प्रेषितहरूका कार्य २३:१-३५

  • पावल न्यायपरिषद्‌सामु बोल्छन्‌ (१-१०)

  • प्रभुले पावलको हौसला बढाउनुहुन्छ (११)

  • पावललाई मार्ने षड्‌यन्त्र (१२-२२)

  • पावललाई सिजरिया पुऱ्‍याइन्छ (२३-३५)

२३  यहुदी न्यायपरिषद्‌का सदस्यहरूलाई एकटक लगाएर हेर्दै पावलले भने: “भाइहरू हो, मैले आजको दिनसम्मै परमेश्‍वरसामु सफा अन्तस्करण+ राखेर जीवन बिताएको छु।” २  यो सुनेर प्रधानपुजारी हननियाले पावलको छेवैमा उभिरहेका मानिसहरूलाई तिनको मुखमा हिर्काउने आदेश दिए। ३  तब पावलले उनलाई भने: “ए कमेरो पोतेको पर्खाल, परमेश्‍वरले तिमीलाई हिर्काउनुहुनेछ। तिमी मोसाको व्यवस्थाबमोजिम मेरो न्याय गर्न बसेका छौ तर मलाई हिर्काउने आदेश दिएर के तिमी त्यही व्यवस्था उल्लङ्‌घन गर्छौ?” ४  तब वरपर उभिरहेका मानिसहरूले तिनलाई भने: “के तिमी परमेश्‍वरको प्रधानपुजारीको अपमान गर्दै छौ?” ५  अनि पावलले जवाफ दिए: “भाइहरू हो, उहाँ प्रधानपुजारी हुनुहुन्छ भनेर मलाई थाह थिएन। ‘तिम्रा मानिसहरूको शासकको निन्दा नगर्नू’+ भनेर धर्मशास्त्रमा लेखिएकै छ नि।” ६  त्यहाँ उपस्थित मानिसहरूमध्ये आधाजसो सदुकी र अरूचाहिँ फरिसी रहेछन्‌ भनेर थाह पाएपछि पावलले न्यायपरिषद्‌सामु ठूलो स्वरमा यसो भने: “भाइहरू हो, म फरिसी हुँ+ र फरिसीकै छोरा पनि हुँ। मरिसकेका मानिसहरू फेरि जीवित हुनेछन्‌ भनेर मैले विश्‍वास गरेको हुनाले मेरो न्याय हुँदै छ।” ७  तिनले यसो भनेको हुनाले फरिसी र सदुकीहरूबीच भनाभन सुरु भयो र न्यायपरिषद्‌का सदस्यहरूमा फूट भयो। ८  किनकि सदुकीहरू मरिसकेको मानिस फेरि जीवित हुन्छ भनेर विश्‍वास गर्दैनन्‌; तिनीहरू स्वर्गदूत वा कुनै अदृश्‍य जीव छ भनेर पनि विश्‍वास गर्दैनन्‌ तर फरिसीहरू भने यी कुराहरूमा विश्‍वास गर्छन्‌।+ ९  त्यसैले तिनीहरूबीच चर्को भनाभन भयो र फरिसी समूहका केही शास्त्रीहरू उठेर ठूलठूलो स्वरमा यसो भन्दै झगडा गर्न थाले: “हामी यस मानिसमा कुनै गल्ती भेट्टाउँदैनौँ; स्वर्गदूतले वा स्वर्गबाट कसैले तिनीसित कुरा गरेको पनि त हुन सक्छ+ . . .।” १०  तिनीहरूको भनाभन झन्‌-झन्‌ चर्कँदै गएको देखेर कतै तिनीहरूले पावललाई लछारपछार पार्ने हुन्‌ कि भनी सेनापति डराए। त्यसैले उनले सैनिकहरूलाई तल गएर पावललाई समातेर ल्याई छाउनीभित्र लैजान हुकुम गरे। ११  तर त्यही रात प्रभु तिनको छेउमा उभिनुभयो र भन्‍नुभयो: “साहसी होऊ!+ किनकि तिमीले मेरो विषयमा यरुसलेममा राम्ररी साक्षी दिइरहेका छौ, अब रोममा पनि तिमीले त्यस्तै साक्षी दिनै पर्छ।”+ १२  उज्यालो भएपछि यहुदीहरूले पावलविरुद्ध षड्‌यन्त्र रचे र तिनलाई नमारेसम्म केही खानपिन नगर्ने कसम खाए। १३  यसरी कसम खाएर षड्‌यन्त्र रच्नेहरू ४० जनाभन्दा धेरै थिए। १४  तिनीहरूले मुख्य पुजारीहरू र धर्मगुरुहरूकहाँ गएर भने: “पावललाई नमारेसम्म केही पनि नखाने गम्भीर कसम हामीले खाएका छौँ। १५  अब न्यायपरिषद्‌का सदस्यहरूसित मिलेर तपाईँहरूले सेनापतिलाई के खबर गर्नुहोस्‌ भने तपाईँहरू पावलको मामिला अझ राम्ररी छानबिन गर्न चाहनुहुन्छ। अनि सेनापतिलाई मनाएर पावललाई तल आफूकहाँ ल्याउन लगाउनुहोस्‌। तर त्यो तपाईँहरूकहाँ आइपुग्नुअघि नै त्यसलाई सिध्याउन हामी तम्तयार भएर बस्नेछौँ।” १६  तिनीहरूले यसरी ढुकेर बस्ने योजना बनाएका छन्‌ भनेर पावलको भान्जाले सुने। त्यसैले सेनाको छाउनीभित्र पसेर उनले पावललाई खबर गरे। १७  तब पावलले सैनिक अफिसरमध्ये एक जनालाई आफूकहाँ बोलाएर भने: “यस ठिटोलाई सेनापतिकहाँ लैजानुहोस्‌ किनकि ऊसित सेनापतिलाई खबर गर्नुपर्ने केही कुरा छ।” १८  त्यसैले ती सैनिक अफिसरले पावलको भान्जालाई सेनापतिकहाँ लगेर भने: “कैदी पावलले मलाई बोलाएर यस ठिटोलाई तपाईँकहाँ ल्याउन आग्रह गऱ्‍यो किनकि ऊ तपाईँलाई केही कुरा बताउन चाहन्छ।” १९  तब सेनापतिले उनको हात समातेर उनलाई अलग्गै लगे र सोधे: “तिमी मलाई के भन्‍न चाहन्छौ?” २०  उनले भने: “यहुदीहरूले पावलको मामिलाबारे अझ राम्ररी बुझ्ने+ बहाना बनाएर उहाँलाई भोलि न्यायपरिषद्‌सामु हाजिर गराउन तपाईँलाई आग्रह गर्ने सहमति गरेका छन्‌। २१  तपाईँ कुनै हालतमा तिनीहरूको दबाबमा नपर्नुहोस्‌ किनकि ४० जनाभन्दा धेरै मानिसले पावललाई नमारेसम्म केही खानपिन नगर्ने कसम खाएका छन्‌ र तिनीहरू पावललाई मार्न ढुकिरहेका छन्‌।+ तपाईँले वचन दिनेबित्तिकै आफ्नो कदम चालिहाल्न तिनीहरू तम्तयार छन्‌।” २२  तब ती सेनापतिले त्यस ठिटोलाई यस्तो आदेश दिएर त्यहाँबाट पठाए: “तिमीले मलाई यो कुरा खबर गऱ्‍यौ भनेर कसैलाई नभन्‍नू।” २३  त्यसपछि तिनले दुई जना सैनिक अफिसरलाई बोलाएर भने: “तिमीहरूले २०० जना सैनिक, ७० जना घोडचढी अनि २०० जना भालाधारीलाई रातको तेस्रो घडीमा* सिजरिया जान तयार पारिराख्नू। २४  साथै पावललाई सकुशल राज्यपाल फेलिक्सकहाँ पुऱ्‍याउन घोडाहरू पनि तयार गर्नू।” २५  त्यसपछि तिनले यस्तो पत्र लेखे: २६  “महामहिम राज्यपाल फेलिक्सलाई क्लौडियस लायसिअसको अभिवादन! २७  यहुदीहरूले यस मानिसलाई पक्रेर मार्न लागेका थिए तर सैनिकहरूको दलबलसहित म तुरुन्तै त्यहाँ पुगेँ र तिनलाई बचाएँ+ किनकि तिनी रोमी रहेछन्‌ भनेर मैले थाह पाएँ।+ २८  अनि यहुदीहरूले आरोप लगाउनुको कारण बुझ्न मैले तिनलाई उनीहरूको न्यायपरिषद्‌सामु हाजिर गराएँ।+ २९  अनि मैले के पाएँ भने उनीहरूले आफ्नै व्यवस्थाको कुरा लिएर तिनलाई आरोप लगाएका रहेछन्‌+ तर तिनले मृत्युदण्ड वा जेल सजाय पाउन लायकको काम गरेको आरोप भने उनीहरूले एउटा पनि लगाएनन्‌। ३०  मैले तिनीविरुद्ध षड्‌यन्त्र भइरहेको खबर पाएँ।+ त्यसैले म तुरुन्तै तिनलाई तपाईँकहाँ पठाउँदै छु र तिनीविरुद्ध जे-जे भन्‍नुछ, त्यो तपाईँसामु नै भन्‍नू भनेर आरोपकहरूलाई पनि आदेश दिँदै छु।” ३१  त्यसैले ती सैनिकहरूले आफूले पाएको आदेशबमोजिम पावललाई राती नै एन्टिपाट्रिस पुऱ्‍याए।+ ३२  अनि भोलिपल्ट घोडचढीहरूलाई पावलसँगै जाने अनुमति दिएर तिनीहरूचाहिँ छाउनी फर्के। ३३  तब सिजरिया पसेर घोडचढीहरूले राज्यपाललाई पत्र बुझाए अनि उनीसामु पावललाई हाजिर पनि गराए। ३४  त्यसपछि राज्यपालले त्यो पत्र पढे र पावललाई तिनी कुन प्रान्तका हुन्‌ भनी सोधे अनि तिनी सिलिसियाका+ रहेछन्‌ भनी थाह पाए। ३५  उनले यसो भने: “तिम्रा आरोपकहरू आइपुगेपछि म तिमीलाई आफ्नो सफाइ पेस गर्ने पूरापूर मौका दिनेछु।”+ त्यसपछि पावललाई हेरोदको महलमा लगी पहरा दिएर राख्नू भनी उनले आदेश दिए।

फुटनोटहरू

अर्थात्‌, राती लगभग नौ बजे।