प्रेषितहरूका कार्य २:१-४७

  • पेन्तिकोसमा पवित्र शक्‍ति खन्याइन्छ (१-१३)

  • पत्रुसको भाषण (१४-३६)

  • पत्रुसको भाषणप्रति भीडको प्रतिक्रिया (३७-४१)

    • तीन हजारले बप्तिस्मा गर्छन्‌ (४१)

  • ख्रिष्टियन सङ्‌गति (४२-४७)

 पेन्तिकोसको* चाडको+ दिनमा तिनीहरू सबै एकै ठाउँमा भेला भएका थिए। २  त्यहाँ अकस्मात्‌ आकाशबाट ठूलो बतास चलेकोजस्तो आवाज आयो र तिनीहरू बसिरहेको घरभरि गुन्जियो।+ ३  अनि तिनीहरूले जिब्रोजस्तो देखिने आगोका ज्वालाहरू देखे र ती छुट्टिएर हरेकमाथि एउटा-एउटा बस्यो। ४  तिनीहरू सबै जना पवित्र शक्‍तिले भरिपूर्ण भए+ अनि पवित्र शक्‍तिले तिनीहरूलाई जुन-जुन भाषामा बोल्ने क्षमता दियो, तिनीहरू त्यही-त्यही भाषामा बोल्न थाले।+ ५  त्यतिखेर संसारका सबै राष्ट्रबाट आएका भक्‍त यहुदीहरू यरुसलेममा थिए।+ ६  त्यसैले जब यो आवाज सुनियो, तब भीड जम्मा भयो र तिनीहरू चकित भए किनकि तिनीहरूकै भाषामा चेलाहरूले बोलिरहेको तिनीहरूले सुने। ७  तिनीहरू साह्रै आश्‍चर्यचकित भए र यसो भने: “हेर त, यी बोल्नेहरू सबै गालिली+ होइनन्‌ र? ८  तर तिनीहरूले हामी प्रत्येकको मातृभाषामा बोलेको हामी सुन्दै छौँ, यो कसरी भयो? ९  हामी पार्थी, मादी+ र एलामीहरू+ हौँ अनि मेसोपोटामिया, यहुदिया, क्यापाडोसिया, पोन्टस र एसिया+ प्रान्तका बासिन्दा हौँ। १०  अनि फ्रिजिया, पाम्फिलिया, मिश्र,* साइरेनीतिर पर्ने लिबियाको भूभागका मानिसहरू र रोमबाट आएका यात्रीहरू हौँ अनि हामी सबै या त यहुदी या धर्म परिवर्तन गरेर यहुदी बनेकाहरू+ हौँ। ११  हामीमाझ क्रेटी र अरबीहरू पनि छन्‌। तर यिनीहरूले हाम्रै भाषामा परमेश्‍वरको विषयमा अद्‌भुत कुराहरू गरिरहेको हामी सुन्दै छौँ।” १२  हो, तिनीहरू सबै छक्क परेका थिए र अचम्म मान्दै एकअर्कालाई यसो भन्दै थिए: “यी सबको अर्थ के हो?” १३  तर अरूले भने तिनीहरूको गिल्ला गर्दै यसो भने: “तिनीहरू नयाँ* मद्यले मात्तिएका हुन्‌।” १४  तर पत्रुस ११ जना+ प्रेषितसँगै उठे अनि ठूलो स्वरमा तिनीहरूलाई यसो भने: “हे यहुदियाका मानिसहरू हो अनि यरुसलेमका सबै बासिन्दा हो, तपाईँहरूलाई यो थाह होस्‌ अनि ध्यान दिएर मेरो कुरा सुन्‍नुहोस्‌। १५  तपाईँहरूले सोचेजस्तो यी मानिसहरू मात्तिएका होइनन्‌ किनकि अहिले त तेस्रो घडी* मात्र भएको छ। १६  बरु यो त भविष्यवक्‍ता योएलमार्फत भनिएको कुरा पूरा भएको हो: १७  ‘परमेश्‍वर भन्‍नुहुन्छ, “अन्तको दिनमा म सबै मानिसमाथि आफ्नो पवित्र शक्‍ति खन्याउनेछु अनि तिमीहरूका छोराहरू र तिमीहरूका छोरीहरूले भविष्यवाणी गर्नेछन्‌ अनि तिमीहरूका ठिटाहरूले दर्शन* देख्नेछन्‌+ र तिमीहरूका बूढापाकाहरूले विशेष सपना देख्नेछन्‌। १८  अनि ती दिनमा मेरा दासहरू र मेरा दासीहरूमाथि समेत म आफ्नो पवित्र शक्‍ति खन्याउनेछु र तिनीहरूले भविष्यवाणी गर्नेछन्‌।+ १९  माथि आकाशमा म आश्‍चर्यजनक कामहरू देखाउनेछु र तल पृथ्वीमा चिन्हहरू देखाउनेछु: रगत, आगो र धुवाँको मुस्लो। २०  यहोवाको* महान्‌ र महिमित दिन आउनुअघि सूर्य अन्धकारमा र चन्द्रमा रगतमा परिणत हुनेछ। २१  अनि हरेक जसले यहोवाको* नाम पुकार्छ, उसले उद्धार पाउनेछ।”’+ २२  “हे इस्राएलका मानिसहरू हो, यो कुरा सुन्‍नुहोस्‌: नासरी येसुलाई परमेश्‍वरले पठाउनुभएको थियो र यो कुरा प्रकट गर्न परमेश्‍वरले उहाँमार्फत शक्‍तिशाली काम र आश्‍चर्यजनक कार्यहरू गर्नुभयो अनि चिन्हहरू देखाउनुभयो,+ जुन कुरा तपाईँहरूलाई पनि थाहै छ। २३  यिनै मानिस, जसलाई परमेश्‍वरको उद्देश्‍य* र पूर्वज्ञानअनुसार तपाईँहरूको हातमा सुम्पिइयो,+ तिनैलाई तपाईँहरूले कुकर्मीहरूको हातमा सुम्पिदिनुभयो र खम्बामा टाँगेर मार्नुभयो।+ २४  तर परमेश्‍वरले उहाँलाई मृत्युबाट* मुक्‍त गरेर फेरि जीवित पार्नुभयो+ किनकि उहाँ त्यसको बन्धनमा रहिरहन सम्भव थिएन।+ २५  किनकि उहाँको विषयमा दाउद यसो भन्छन्‌: ‘मैले यहोवालाई* सदैव मेरै सामने* राखेको छु किनकि म नडगमगाऊँ भनेर उहाँ मेरो दाहिने हाततर्फ हुनुहुन्छ। २६  यसले गर्दा मेरो मन प्रफुल्लित भयो र असाध्यै हर्षित भएर मैले बोलेँ। अनि म आशामा जिउनेछु २७  किनकि तपाईँले मलाई चिहानमा* छोड्‌नुहुनेछैन, तपाईँले आफ्नो वफादार जनलाई कुहिन दिनुहुनेछैन।+ २८  तपाईँले मलाई जीवनको मार्ग देखाउनुभएको छ, तपाईँले आफ्नो उपस्थितिद्वारा मलाई आनन्दले भरिदिनुहुनेछ।’+ २९  “भाइहरू हो, कुलपुरुष दाउदको विषयमा तपाईँहरूलाई निर्धक्क भई साहसका साथ बताउन मलाई अनुमति दिनुहोस्‌। तिनी मरे र गाडिए+ अनि तिनको चिहान आजको दिनसम्म हाम्रै बीचमा छ। ३०  तिनी भविष्यवक्‍ता थिए अनि तिनको सिंहासनमा तिनकै सन्तानमध्ये एक जनालाई बसाउनेछु भनी परमेश्‍वरले शपथ खाँदै वाचा गर्नुभएको कुरा तिनलाई थाह थियो।+ ३१  पछि हुने कुरा पहिल्यै थाह पाएर तिनले ख्रिष्ट फेरि जीवित हुने विषयमा यसो भने, ‘उहाँलाई न चिहानमा* छोडिनेछ न त उहाँको शरीर नै कुहिनेछ।’+ ३२  यिनै येसुलाई परमेश्‍वरले ब्युँताउनुभयो, जसको हामी सबै साक्षी छौँ।+ ३३  उहाँलाई परमेश्‍वरको दाहिने हाततर्फ उच्च पद दिइएकोले+ अनि प्रतिज्ञा गरिएअनुसारै उहाँले बुबाबाट पवित्र शक्‍ति पाउनुभएकोले त्यही पवित्र शक्‍ति उहाँले हामीमाथि खन्याउनुभएको छ,+ जसले काम गरेको तपाईँहरू देख्दै र सुन्दै हुनुहुन्छ। ३४  दाउद स्वर्ग उक्लेनन्‌ तर तिनी आफै यसो भन्छन्‌: ‘यहोवाले* मेरा प्रभुलाई भन्‍नुभयो, “तिमी मेरो दाहिने हाततिर बस, ३५  जबसम्म म तिम्रा शत्रुहरूलाई तिम्रो पाउदान तुल्याउँदिनँ।”’+ ३६  त्यसकारण इस्राएलको सबै घरानालाई यो निश्‍चय थाह होस्‌ कि तिनै येसु, जसलाई तपाईँहरूले खम्बामा टाँग्नुभयो,+ उहाँलाई परमेश्‍वरले प्रभु+ र ख्रिष्ट दुवै बनाउनुभयो।” ३७  यो सुनेर तिनीहरूको हृदय अत्यन्तै व्याकुल भयो अनि तिनीहरूले पत्रुस र अरू प्रेषितहरूलाई सोधे: “भाइहरू हो, त्यसोभए हामी के गरौँ?” ३८  पत्रुसले तिनीहरूलाई भने: “पश्‍चात्ताप गर्नुहोस्‌+ र तपाईँहरू हरेकले आ-आफ्ना पापहरूको क्षमाको लागि+ येसु ख्रिष्टको नाममा बप्तिस्मा गर्नुहोस्‌+ अनि तपाईँहरूले वरदानस्वरूप पवित्र शक्‍ति सित्तैँमा पाउनुहुनेछ। ३९  किनकि यो प्रतिज्ञा+ तपाईँहरू र तपाईँहरूका सन्तानका लागि अनि टाढा-टाढाका ती सबै मानिसका लागि हो, जसलाई हाम्रा परमेश्‍वर यहोवाले* आफूतिर खिच्नुहुन्छ।”+ ४०  अनि तिनले अरू पनि धेरै वचनद्वारा राम्ररी साक्षी दिए र यसो भन्दै तिनीहरूलाई प्रोत्साहन दिए: “यस टेढो पुस्तासँगसँगै+ नाश नहोओ।” ४१  ज-जसले तिनको वचन खुसीसाथ स्विकारे, तिनीहरूले बप्तिस्मा गरे+ अनि त्यस दिन लगभग ३ हजार जना थपिए।+ ४२  तिनीहरू प्रेषितहरूको शिक्षा ध्यान दिएर सुन्थे, एकसाथ भेला हुन्थे,* एकसाथ भोजन गर्थे+ अनि सँगै प्रार्थना गर्थे।+ ४३  अनि सबै मानिसलाई डरले छोप्न थाल्यो र प्रेषितहरूले धेरै आश्‍चर्यजनक कार्य र चमत्कारहरू गर्न थाले।+ ४४  जो-जो येसुको चेला बने, तिनीहरू एकसाथ भेला हुन्थे र तिनीहरूसित भएका सबै कुरा तिनीहरूको साझा हुन्थ्यो। ४५  तिनीहरू आफ्नो सरसामान र जायजेथा बेच्थे+ अनि त्यसबाट आएको रकम सबैलाई बाँड्‌थे। हरेकलाई उसको खाँचोअनुसार दिइन्थ्यो।+ ४६  एउटै उद्देश्‍य लिएर तिनीहरू दिनहुँ मन्दिरमा भेला हुन्थे र एकअर्काको घरमा गएर भोजन गर्थे अनि बडो आनन्द र सफा हृदयले बाँडचुँड गर्दै सँगै खान्थे ४७  अनि परमेश्‍वरको प्रशंसा गर्थे। तिनीहरूले सबै मानिसमाझ राम्रो नाम कमाएका थिए। साथै उद्धार पाउनेहरूलाई यहोवा* परमेश्‍वरले दिनहुँ तिनीहरूको सङ्‌ख्यामा थप्दै जानुभयो।+

फुटनोटहरू

शब्दावली हेर्नुहोस्‌।
वा “इजिप्ट।”
वा “गुलियो।”
अर्थात्‌, बिहानको लगभग नौ बजे।
शब्दावली हेर्नुहोस्‌।
अतिरिक्‍त लेख क५ हेर्नुहोस्‌।
अतिरिक्‍त लेख क५ हेर्नुहोस्‌।
वा “इच्छा।”
शा., “मृत्युको पीडाबाट।” सम्भवत: “मृत्युको बन्धनबाट।”
अतिरिक्‍त लेख क५ हेर्नुहोस्‌।
वा “मेरो नजरसामु।”
ग्रीक भाषामा हेडिज। शब्दावली हेर्नुहोस्‌।
ग्रीक भाषामा हेडिज। शब्दावली हेर्नुहोस्‌।
अतिरिक्‍त लेख क५ हेर्नुहोस्‌।
अतिरिक्‍त लेख क५ हेर्नुहोस्‌।
वा “एकअर्कासित बाँडचुँड गर्थे।”
अतिरिक्‍त लेख क५ हेर्नुहोस्‌।