प्रेषितहरूका कार्य १९:१-४१

  • पावल एफिससमा; कसै-कसैलाई फेरि बप्तिस्मा गराइन्छ (१-७)

  • पावलको शिक्षणकार्य (८-१०)

  • प्रेतहरूको प्रभावको बाबजुद सफलता (११-२०)

  • एफिससमा हूलदङ्‌गा (२१-४१)

१९  अपोल्लस+ कोरिन्थमै भएको बेला पावल तटवर्ती भूभागबाट भित्र पर्ने ठाउँहरू हुँदै एफिसस+ झरे। त्यहाँ तिनले केही चेलालाई भेटे २  र उनीहरूलाई सोधे: “येसुको अनुयायी बन्दा के तपाईँहरूले पवित्र शक्‍ति पाउनुभयो?”+ उनीहरूले जवाफ दिए: “अहँ, हामीले पवित्र शक्‍तिबारे कहिल्यै सुनेका छैनौँ।” ३  त्यसैले तिनले भने: “त्यसोभए तपाईँहरूले कुन किसिमको बप्तिस्मा गर्नुभयो त?” उनीहरूले जवाफ दिए: “युहन्‍नाले सिकाउने गरेको चाहिँ।”+ ४  पावलले भने: “युहन्‍नाले पापको पश्‍चात्तापको प्रतीकस्वरूप+ बप्तिस्मा गर्न प्रचार गरेका थिए अनि आफूपछि आउन लागेका व्यक्‍ति+ अर्थात्‌ येसुमाथि विश्‍वास गर्नू भनी मानिसहरूलाई बताएका थिए।” ५  यो कुरा सुनेर उनीहरूले प्रभु येसुको नाममा बप्तिस्मा गरे। ६  अनि पावलले उनीहरूमाथि हात राख्नेबित्तिकै पवित्र शक्‍ति उनीहरूमाथि आयो+ र उनीहरूले विभिन्‍न भाषामा बोल्नुका साथै भविष्यवाणी गर्न थाले।+ ७  उनीहरू जम्माजम्मी १२ जना पुरुष थिए। ८  त्यसपछि सभाघरभित्र पसेर+ परमेश्‍वरको राज्यको विषयमा साहसका साथ भाषण दिँदै+ अनि तर्क गरेर मानिसहरूलाई मनाउँदै तिनले तीन महिना बिताए। ९  तर कसै-कसैले हठी भएर तिनको कुरा पत्याउन मानेनन्‌ अनि भीडसामु ‘त्यस मार्ग’-को*+ बदनाम गरे। त्यसैले तिनी उनीहरूदेखि अलग भए+ र चेलाहरूलाई पनि उनीहरूदेखि अलग राखे। तिनी हरेक दिन टिरान्‍नसको पाठशालाको सभाकक्षमा भाषण दिन्थे। १०  तिनले दुई वर्षसम्म यसै गरे, जसले गर्दा के यहुदी के ग्रीक, एसिया प्रान्तका सबै बासिन्दाले प्रभुको वचन सुने। ११  परमेश्‍वरले पावलमार्फत असामान्य शक्‍तिशाली कामहरू गरिरहनुभयो;+ १२  यहाँसम्म कि तिनको शरीरलाई छोएको लुगा वा रुमाल लगेर छुवाउँदा मात्र पनि बिरामीहरू निको हुन्थे+ र प्रेतहरू* निस्कन्थे।+ १३  त्यतिखेर केही यहुदी ठाउँठाउँमा डुल्दै अनि प्रेतहरूलाई निकाल्दै हिँडिरहेका थिए। प्रभु येसुको नाम लिएर तिनीहरूले पनि यसो भन्दै प्रेतहरूलाई धपाउन खोजे: “पावलले प्रचार गर्ने गरेको येसुको नाममा म तँलाई हुकुम गर्छु।”+ १४  स्केवा नाम गरेको यहुदी मुख्य पुजारीका सात जना छोराले त्यसै गरिरहेका थिए। १५  तर प्रेतले तिनीहरूलाई यस्तो जवाफ फर्कायो: “म येसुलाई चिन्छु+ अनि पावललाई पनि चिन्छु+ तर तिमीहरू को हौ?” १६  तब त्यो प्रेत बास गरेको मानिसले तिनीहरूलाई झम्ट्‌यो र पालैसित सातै जनालाई न्याक्यो। तब घाइते अवस्थामै तिनीहरू त्यस घरबाट नाङ्‌गै भागे। १७  यो कुरा एफिससमा हुने सबै यहुदी अनि ग्रीकलाई थाह भयो र तिनीहरूमा डर छायो। अनि प्रभु येसुको नाम पनि महिमित हुँदै गयो। १८  साथै येसुका अनुयायी बनिसकेका थुप्रै मानिस आउँथे र आफ्ना पापहरू खुलेआम स्विकार्थे अनि आफूले गरेका खराब कामहरू बताउँथे। १९  हुन पनि पहिले-पहिले जादुगरी गर्ने थुप्रै मानिसले आफ्ना पुस्तकहरू ल्याए अनि सबैसामु ती जलाए।+ तिनीहरूले त्यसको मोल निकाल्दा ५० हजार चाँदीको टुक्राबराबर पाए। २०  यसरी यहोवा* परमेश्‍वरको वचन शक्‍तिशाली ढङ्‌गमा बढ्‌दै अनि प्रबल हुँदै गयो।+ २१  यी सबै कुरा भइसकेपछि पावलले म्यासिडोनिया+ अनि अखैया गएर यरुसलेम+ जाने निधो गरे। तिनले यसो भने: “त्यहाँ पुगेपछि जसरी भए पनि म रोम जानै पर्छ।”+ २२  त्यसैले तिनले आफ्नो सेवा गर्ने मानिसमध्ये दुई जनालाई अर्थात्‌ तिमोथि+ र इरास्तसलाई+ म्यासिडोनिया पठाए तर आफूचाहिँ केही समय एसिया प्रान्तमै बसे। २३  त्यतिबेला ‘त्यस मार्ग’-लाई*+ लिएर मानिसहरूबीच निकै खैलाबैला मच्चियो।+ २४  डेमेत्रियस नाम गरेको सुनारले चाँदीबाट अर्तिमिस देवीको साना मन्दिरहरू बनाउँथे, जसले गर्दा कारिगरहरूको निकै आम्दानी भइरहेको थियो।+ २५  तिनले उनीहरूलाई अनि अरू कारिगरहरूलाई भेला गरेर यसो भने: “साथीहरू हो, यो व्यापारले गर्दा हाम्रो कत्ति फलिफाप भइरहेको छ, त्यो त तपाईँहरूलाई थाहै छ। २६  तर हातले बनाइएका कुराहरू ईश्‍वर होइनन्‌+ भनेर त्यो पावलले यहाँ एफिससमा+ मात्र होइन, एसिया प्रान्तका लगभग सबै ठाउँमा भीडका भीड मानिसलाई भड्‌काउँदै कसरी अर्कै मत मान्‍न लगाइरहेको छ, त्यो पनि तपाईँहरूले देख्नु अनि सुन्‍नुभएकै छ। २७  त्यसले गर्दा हाम्रो पेसाको बदनाम हुने मात्र होइन तर महान्‌ देवी अर्तिमिसको मन्दिरको सान घट्‌ने अनि एसिया प्रान्तका सबै इलाका र सारा संसारले पुज्ने हाम्री देवीको वैभव पनि गुम्ने खतरा देखिएको छ।” २८  यो सुनेर मानिसहरू रिसले चूर भए अनि यसो भन्दै नारा लगाउन थाले: “एफिसीहरूकी महान्‌ देवी अर्तिमिसको जय!” २९  तब पूरै सहरभरि हुलदङ्‌गा मच्चियो र तिनीहरू सबै जना पावलका म्यासिडोनियाली सहयात्रीहरू गायस र अरिस्तार्खसलाई+ घिसार्दै एकैचोटि रङ्‌गशालामा घुसे। ३०  पावल रङ्‌गशालाभित्र पसेर भीडसामु जान चाहन्थे तर चेलाहरूले तिनलाई जान दिएनन्‌। ३१  तिनीप्रति मित्रभाव राख्ने खेलकुद तथा उत्सवका केही आयोजकले समेत रङ्‌गशालाभित्र छिरेर आफ्नो ज्यानको खतरा नमोल्न बिन्ती गर्दै तिनलाई सन्देश पठाए। ३२  वास्तवमा के भइरहेको थियो भने, कसैले एक थरी अनि अरूले चाहिँ अर्कै थरी नारा लगाइरहेका थिए किनकि पूरै भीड गोलमालमा परेको थियो अनि तिनीहरूमध्ये धेरैलाई त आफू के कामले भेला भएको हो, त्योसमेत थाह थिएन। ३३  त्यसैले तिनीहरूले अलेक्जेन्डरलाई भीडबाट तानेर निकाले अनि यहुदीहरूले तिनलाई ठेल्दै अगाडि पुऱ्‍याए। तब अलेक्जेन्डरले हातले इसारा गर्दै मानिसहरूसामु आफ्नो सफाइ पेस गर्ने इच्छा जाहेर गरे। ३४  जब तिनी यहुदी पो रहेछन्‌ भनेर तिनीहरूले थाह पाए, तब सबैले एकैचोटि कराउँदै “एफिसीहरूकी महान्‌ देवी अर्तिमिसको जय!” भन्दै दुई घण्टासम्म नारा लगाए। ३५  अन्तमा नगर-प्रमुखले बल्लतल्ल भीडलाई शान्त पारे अनि भने: “हे एफिससका बासिन्दा हो, एफिसस सहर महान्‌ देवी अर्तिमिसको मन्दिरको र आकाशबाट खसेको मूर्तिको रखवाला हो भनेर थाह नहुने मानिस को होला र? ३६  यो कुरामा कसैले विवाद गर्न नसक्ने भएकोले शान्त हुनुहोस्‌ अनि आवेशमा आएर केही नगर्नुहोस्‌। ३७  किनकि तपाईँहरूले ल्याउनुभएका यी मानिसहरू न मन्दिरका लुटेराहरू हुन्‌ न त हाम्री देवीका निन्दकहरू नै हुन्‌। ३८  त्यसैले यदि डेमेत्रियस+ र तिनीसँग भएका कारिगरहरूको कसैसित झगडा परेको छ भने त्यसको लागि अदालत अनि प्रान्तीय राज्यपालहरू* छँदै छन्‌; त्यहीँ गएर तिनीहरूले आफ्नो झगडाको छिनोफानो गरून्‌। ३९  तर तपाईँहरूले चाहेको कुरा अर्कै हो भने त्यसको फैसला नियमित सभाबाटै हुनुपर्छ। ४०  आजको यो घटनाले गर्दा हामीमाथि राजद्रोहको आरोप लाग्ने खतरा साँच्चै आइपरेको छ किनकि यसरी मानिसहरू भेला पारेर हुलदङ्‌गा मच्चाउने कुनै कारण हामीसित छैन।” ४१  यति भनेर तिनले भीडलाई पठाइदिए।

फुटनोटहरू

अर्थात्‌, ख्रिष्टियन मार्गको।
वा “दुष्ट स्वर्गदूतहरू।” शब्दावलीमा “प्रेत” हेर्नुहोस्‌।
अतिरिक्‍त लेख क५ हेर्नुहोस्‌।
अर्थात्‌, ख्रिष्टियन मार्गलाई।
शब्दावली हेर्नुहोस्‌।