प्रेषितहरूका कार्य १४:१-२८

  • आइकोनियममा वृद्धि र विरोध (१-७)

  • लिस्त्रामा तिनीहरूलाई देवता ठानिन्छ (८-१८)

  • ढुङ्‌गाले हानिए पनि पावल बाँच्छन्‌ (१९, २०)

  • मण्डलीहरूलाई बलियो पारिन्छ (२१-२३)

  • सिरियाको एन्टिओकमा फर्कन्छन्‌ (२४-२८)

१४  अब आइकोनियममा यहुदीहरूको सभाघरभित्र पसेर पावल र बर्णाबासले यत्ति राम्ररी बोले कि यहुदी र ग्रीकहरूको ठूलो जमातले प्रभुमा विश्‍वास गर्न थाल्यो। २  तर विश्‍वास नगर्ने यहुदीहरूले अन्यजातिका मानिसहरूलाई भड्‌काएर भाइहरूविरुद्ध रुष्ट बनाए।+ ३  यहोवा* परमेश्‍वरबाट अख्तियार पाएको हुनाले पावल र बर्णाबासले साहसी भई निकै समय बोले। साथै तिनीहरूले सुनाइरहेको परमेश्‍वरको असीम अनुग्रहको वचन उहाँकै तर्फबाट हो भनेर देखाउन उहाँले तिनीहरूको हातबाट चमत्कार अनि आश्‍चर्यजनक कार्यहरू गराउनुभयो।+ ४  तर सहरका मानिसहरूमा फुट उत्पन्‍न भयो अनि कसैले यहुदीहरूको पक्ष लिए भने कसैले प्रेषितहरूको। ५  अन्यजातिका मानिसहरूले अनि यहुदीहरू र उनीहरूका शासकहरूले पावल र बर्णाबासको बेइज्जत गर्ने र तिनीहरूलाई ढुङ्‌गाले हान्‍ने योजना बनाए।+ ६  तर यसको सुइँको पाएर तिनीहरू लाइकाओनियाका सहरहरू अर्थात्‌ लिस्त्रा र डर्बि अनि त्यसको वरपरका इलाकाहरूमा भागे।+ ७  त्यहाँ तिनीहरू सुसमाचार सुनाउँदै हिँडे। ८  लिस्त्रामा एक जना अपाङ्‌ग मानिस बसिरहेको थियो। जन्मैदेखि लङ्‌गडो भएकोले ऊ कहिल्यै हिँडेको थिएन। ९  त्यस मानिसले पावलको कुरा सुनिरहेको थियो। अनि पावलले उसलाई एकटक लगाएर हेरे र उसमा निको पार्न लायकको विश्‍वास छ भन्‍ने देखेपछि+ १०  तिनले ठूलो स्वरमा यसो भने: “आफ्नो खुट्टाको भरमा उठ।” ऊ बुर्लुक्क उफ्रियो र हिँड्‌न थाल्यो।+ ११  पावलको यो काम देखेपछि भीडले लाइकाओनियाली भाषामा ठूलो स्वरमा यसो भन्यो: “देवताहरू मानिसको भेषमा हामीकहाँ आएछन्‌!”+ १२  तिनीहरूले बर्णाबासलाई ज्युस देवता तर पावललाई चाहिँ हर्मेस देवता भन्‍न थाले किनकि अघि सरेर बोल्ने तिनी नै थिए। १३  तब सहरको मूलढोकानेर भएको ज्युसको मन्दिरका पुजारीले मूलढोकामा बहरहरू र फूलमाला ल्याए अनि भीडसित मिलेर बलि चढाउने इच्छा गरे। १४  तर जब प्रेषित बर्णाबास र प्रेषित पावलले यो कुरा सुने, तब तिनीहरूले आफ्नो लुगा च्याते अनि भीडमा हामफालेर यसो भन्दै चिच्याए: १५  “हे मानिसहरू हो, तपाईँहरू किन यस्तो काम गर्नुहुन्छ? हामी पनि त तपाईँहरूजस्तै कमीकमजोरी भएका मानिसहरू हौँ।+ अनि यी निरर्थक कुराहरूबाट फर्केर आकाश, पृथ्वी र समुद्र अनि तिनमा भएका सबै थोक बनाउनुहुने+ जीवित परमेश्‍वरकहाँ आउनुहोस्‌ भनेर तपाईँहरूलाई सुसमाचार सुनाउन आएका हौँ। १६  विगतमा उहाँले सबै जातिका मानिसहरूलाई आ-आफ्नै मार्गमा चल्न दिनुभयो।+ १७  तैपनि भलो हुने काम गरेर उहाँले आफ्नो विषयमा साक्षी दिइरहनुभयो+ अर्थात्‌ उहाँले तपाईँहरूलाई आकाशबाट वर्षा अनि ऋतुअनुसार प्रशस्त बाली दिनुभयो+ र खानेकुराले तृप्त पार्नुभयो अनि आनन्दले तपाईँहरूको हृदय भरिदिनुभयो।”+ १८  यति भनिसकेपछि पनि तिनीहरूको निम्ति बलि चढाउनदेखि भीडलाई रोक्न तिनीहरूलाई हम्मेहम्मे पऱ्‍यो। १९  तब एन्टिओक र आइकोनियमबाट आइपुगेका यहुदीहरूले भीडलाई उक्साए।+ अनि तिनीहरूले पावललाई ढुङ्‌गाले हाने र तिनी मरे होलान्‌ भन्ठानेर सहरबाहिर घिसार्दै लगे।+ २०  तर जब चेलाहरू तिनको वरिपरि उभिए, तिनी उठे र सहरभित्र पसे। अनि भोलिपल्ट बर्णाबाससँग डर्बि गए।+ २१  त्यस सहरमा सुसमाचार प्रचार गरेर थुप्रै चेला बनाइसकेपछि तिनीहरू फर्केर लिस्त्रा, आइकोनियम र एन्टिओक गए। २२  त्यहाँ तिनीहरूले चेलाहरूलाई ढाडस दिए+ र विश्‍वासमा रहिरहन प्रोत्साहन दिँदै यसो भने: “हामी धेरै सङ्‌कष्ट सहेर परमेश्‍वरको राज्यमा पस्नेछौँ।”+ २३  यसबाहेक तिनीहरूले प्रत्येक मण्डलीमा एल्डरहरू नियुक्‍त गरे+ अनि प्रार्थना गर्नुका साथै उपवास बसेपछि+ तिनीहरूले यी एल्डरहरूलाई यहोवा* परमेश्‍वरको जिम्मा लगाए, जुन परमेश्‍वरमाथि यिनीहरूले विश्‍वास गरेका थिए। २४  त्यसपछि तिनीहरू पिसिदिया हुँदै पाम्फिलिया+ आइपुगे। २५  अनि पर्गामा वचन प्रचार गरिसकेपछि तिनीहरू अटालिया झरे। २६  त्यहाँबाट समुद्री यात्रा गरेर तिनीहरू एन्टिओक गए। यो त्यही ठाउँ थियो, जहाँ तिनीहरूले आफ्नो काम पूरा गर्न सकून्‌ भनेर भाइहरूले तिनीहरूमाथि परमेश्‍वरको असीम अनुग्रहको निम्ति बिन्ती चढाएका थिए। अनि अहिले तिनीहरूले त्यो काम पूरा गरिसकेका थिए।+ २७  त्यहाँ पुगेर मण्डलीलाई एकसाथ भेला गराइसकेपछि परमेश्‍वरले कसरी तिनीहरूमार्फत थुप्रै काम गर्नुभयो अनि अन्यजातिहरूले पनि प्रभुमा विश्‍वास गरून्‌ भनेर उहाँले कसरी ढोका खोलिदिनुभयो, त्यो तिनीहरूले सुनाए।+ २८  अनि तिनीहरूले चेलाहरूसित निकै समय बिताए।

फुटनोटहरू

अतिरिक्‍त लेख क५ हेर्नुहोस्‌।
अतिरिक्‍त लेख क५ हेर्नुहोस्‌।