उत्पत्ति ३५:१-२९

  • याकुब विदेशी देवीदेवताका मूर्तिहरू हटाउँछन्‌ (१-४)

  • याकुब बेथेल फर्कन्छन्‌ (५-१५)

  • बिन्यामिनको जन्म; राहेलको मृत्यु (१६-२०)

  • इस्राएलका १२ छोरा (२१-२६)

  • इसहाकको मृत्यु (२७-२९)

३५  यो घटना भएपछि परमेश्‍वरले याकुबलाई भन्‍नुभयो: “अब यहाँबाट बेथेल+ जाऊ, त्यहीँ बस र तिमी आफ्नो दाइ एसावदेखि भागेको बेला तिमीकहाँ प्रकट हुनुभएको साँचो परमेश्‍वरको निम्ति त्यहाँ एउटा वेदी बनाऊ।”+ २  तब याकुबले आफ्नो घराना र आफूसित भएका सबै मानिसलाई भने: “तिमीहरूसँग भएका देवीदेवताका मूर्तिहरू हटाओ,+ आफूलाई चोखो पार अनि लुगा फेर। ३  त्यसपछि यो ठाउँ छोडेर हामी बेथेलतिर लागौँ। दुःखको बेला मेरो पुकारा सुन्‍नुहुने र म जहाँ* गए पनि सधैँ मसँगै हुनुहुने साँचो परमेश्‍वरको लागि म त्यहाँ वेदी बनाउँछु।”+ ४  तिनीहरूले आफूसित भएका विदेशी देवीदेवताका मूर्ति र कानमा लगाएको कुण्डल याकुबलाई दिए। अनि याकुबले ती लगेर सकेमनजिकैको ठूलो रूखमुनि गाडे।* ५  तिनीहरूको यात्रामा वरपरका सहरहरूका मानिसहरूले तिनीहरूलाई खेदेनन्‌। परमेश्‍वर याकुबका सन्तानसित हुनुभएकोले ती मानिसहरू डराएका थिए। ६  अन्तमा याकुब र तिनका सबै मानिस कनानको लुज+ अर्थात्‌ बेथेल पुगे। ७  तिनले त्यहाँ वेदी बनाए र त्यस ठाउँको नाम एल-बेथेल* राखे। किनभने आफ्नो दाइ एसावदेखि डराएर भागेको बेला साँचो परमेश्‍वर त्यही ठाउँमा याकुबकहाँ प्रकट हुनुभएको थियो।+ ८  पछि रिबेकाकी धाईआमा दबोराको+ मृत्यु भयो र तिनीहरूले उनलाई बेथेलको फेदीमा फलाँटको रूखमुनि गाडे। याकुबले त्यस ठाउँको नाम अल्लोन-बकुथ* राखे। ९  याकुब पद्दान-अरामबाट फर्किरहेको बेला परमेश्‍वर फेरि तिनीसामु प्रकट हुनुभयो र तिनलाई आशिष्‌ दिनुभयो। १०  परमेश्‍वरले तिनलाई भन्‍नुभयो: “तिम्रो नाम याकुब हो।+ तर अबदेखि तिमी याकुब नामले होइन, इस्राएल नामले चिनिनेछौ।” अनि परमेश्‍वरले तिनलाई इस्राएल भनेर बोलाउन थाल्नुभयो।+ ११  परमेश्‍वरले तिनलाई अझै भन्‍नुभयो: “म सर्वशक्‍तिमान्‌ परमेश्‍वर हुँ।+ तिम्रा सन्तान फलून्‌-फुलून्‌ र बढ्‌दै जाऊन्‌। तिम्रै सन्तानबाट विभिन्‍न जाति बन्‍नेछन्‌+ र राजाहरू निस्कनेछन्‌।+ १२  मैले अब्राहाम र इसहाकलाई दिने प्रतिज्ञा गरेको भूमि म तिमीलाई अनि तिम्रो शेषपछि तिम्रा सन्तानलाई दिनेछु।”+ १३  त्यसपछि परमेश्‍वर त्यस ठाउँबाट अलप हुनुभयो। १४  परमेश्‍वर बोल्नुभएको त्यस ठाउँमा याकुबले एउटा ढुङ्‌गा ठड्‌याए, त्यसमाथि मद्यभेटी* चढाए र तेल पनि खन्याए।+ १५  परमेश्‍वरले तिनीसित कुरा गर्नुभएको त्यस ठाउँको नाम याकुबले पहिलेजस्तै बेथेल नै राखे।+ १६  त्यसपछि तिनीहरू बेथेलबाट हिँडे। तर तिनीहरू एप्राता नपुग्दै राहेललाई सुत्केरी बेथा लाग्यो र तिनलाई झन्‌झन्‌ च्याप्दै लग्यो। १७  राहेल बच्चा जन्माउन नसकेर छटपटाइरहेको बेला सुँडेनीले तिनलाई भनिन्‌: “हिम्मत नहार्नुहोस्‌, तपाईँले यसपालि पनि छोरा पाउनुहुनेछ।”+ १८  राहेलले आफ्नो जीवनको अन्तिम घडीमा (किनकि तिनी मर्नै लागेकी थिइन्‌।) आफ्नो छोराको नाम बेन-ओनि* राखिन्‌। तर याकुबले भने छोराको नाम बिन्यामिन*+ राखे। १९  यसरी एप्राता अर्थात्‌ बेतलेहेम+ जाने बाटोमै राहेलको मृत्यु भयो र याकुबले तिनको लास त्यहीँ गाडे। २०  त्यसपछि तिनले राहेलको चिहानमाथि एउटा ठूलो ढुङ्‌गा ठड्‌याए। त्यो ढुङ्‌गा आजसम्म पनि त्यहीँ छ। २१  त्यसपछि इस्राएल त्यहाँबाट हिँडे र एदेरको धरहरा कटेपछि अलि पर तिनले पाल टाँगे। २२  इस्राएल त्यही ठाउँमा बास बसिरहेको बेला एकदिन रुबेन आफ्नो बुबाकी उपपत्नी बिल्हासित सुते र यो कुरा इस्राएलको कानमा पऱ्‍यो।+ याकुबका १२ भाइ छोरा थिए। २३  लेआले जन्माएको रुबेन+ याकुबको पहिलो सन्तान हुन्‌। लेआबाट जन्मिएका अरू छोराहरूको नाम सिमियोन, लेवि, यहुदा, इस्साकार र जबुलुन हो। २४  युसुफ र बिन्यामिन राहेलबाट जन्मिएका छोराहरू हुन्‌। २५  राहेलकी दासी बिल्हाबाट जन्मिएका छोराहरूचाहिँ दान र नप्तालि हुन्‌। २६  अनि गाद र असेर लेआकी दासी जिल्पाहले जन्माएका छोराहरू हुन्‌। याकुबका छोराहरू यिनीहरू नै हुन्‌ र यिनीहरू सबै पद्दान-अराममा जन्मिएका थिए। २७  अन्तमा याकुब किर्यथ-अर्बा अर्थात्‌ हेब्रोनको मम्रेमा बसोबास गरिरहेका आफ्ना बुबा इसहाकको घर पुगे।+ अब्राहाम र इसहाक दुवै यही ठाउँमा प्रवासी भएर बसेका थिए।+ २८  इसहाक १८० वर्ष बाँचे।+ २९  इसहाक आफ्नो पूरा उमेर खाएर मरे। यसरी तिनी आफ्ना पितापुर्खाजस्तै माटोमा मिल्न गए। तिनी आफ्नो जीवनसित सन्तुष्ट थिए। तिनका छोराहरू एसाव र याकुबले तिनको लास गाडे।+

फुटनोटहरू

वा “जुन बाटो।”
वा “लुकाए।”
यसको अर्थ हो, “बेथेलका परमेश्‍वर।”
यसको अर्थ हो, “रुवाबासीको सालको रूख।”
शब्दावली हेर्नुहोस्‌।
यसको अर्थ हो, “मैले निकै पीडामा जन्माएको छोरा।”
यसको अर्थ हो, “मेरो दायाँ हातको छोरा।” अर्थात्‌, मेरो प्यारो छोरा।