उत्पत्ति १६:१-१६

  • हागार र इस्माएल (१-१६)

१६  अब्रामकी पत्नी साराईका छोराछोरी थिएनन्‌।+ तिनकी हागार नाम गरेकी एउटी मिश्री दासी थिइन्‌।+ २  अनि साराईले अब्रामलाई यस्तो बिन्ती गरिन्‌: “हेर्नुहोस्‌, यहोवा परमेश्‍वरले मेरो कोख बन्द गरिदिनुभएको छ। त्यसैले बिन्ती छ, मेरी दासीकहाँ जानुहोस्‌ र उसले मेरो लागि सन्तान जन्माइदेओस्‌।”+ अब्रामले साराईको कुरा माने। ३  अब्राम कनानमा बसेको १० वर्ष भइसकेको थियो। साराईले आफ्नी मिश्री दासी हागार अब्रामकी पत्नी हुनलाई दिइन्‌। ४  अब्राम हागारकहाँ गए र तिनी गर्भवती भइन्‌। तर आफू गर्भवती भएको कुरा थाह पाएपछि हागारले आफ्नी मालिक्नीलाई हेप्न थालिन्‌। ५  त्यसपछि साराईले अब्रामलाई भनिन्‌: “ममाथि जे-जति अन्याय भइरहेको छ, त्यसको दोषी तपाईँ नै हुनुहुन्छ। तपाईँलाई मैले नै आफ्नी दासी दिएकी थिएँ। तर गर्भ बसेको थाह पाएपछि त्यसले मलाई हेप्न थाली। अब यहोवा परमेश्‍वरले नै तपाईँ र मबीच इन्साफ गरिदेऊन्‌।” ६  अब्रामले साराईलाई भने: “हेर, तिम्री दासी तिम्रै हातमा छिन्‌। तिमीलाई जे ठीक लाग्छ, त्यही गर।” त्यसपछि साराईले हागारलाई खसालेर व्यवहार गर्न थालिन्‌ अनि हागार आफ्नी मालिक्नीलाई छोडेर भागिन्‌। ७  पछि यहोवा परमेश्‍वरका दूतले हागारलाई निर्जनभूमिको कुवानेर भेट्टाए। त्यो कुवा सुर+ जाने बाटोमा पर्थ्यो। ८  ती दूतले सोधे: “ए साराईकी दासी हागार, तिमी कहाँबाट आयौ अनि कता जाँदै छ्यौ?” हागारले भनिन्‌: “म मेरी मालिक्नी साराईबाट भाग्दै छु।” ९  अनि यहोवा परमेश्‍वरका दूतले भने: “जाऊ, आफ्नी मालिक्नीकहाँ फर्क। नम्र भएर उनको अधीनमा बस।” १०  त्यसपछि यहोवा परमेश्‍वरका दूतले भने: “तिम्रा सन्तान कसैले गन्‍नै नसक्नेगरि धेरै हुनेछन्‌।”+ ११  यहोवा परमेश्‍वरका दूतले फेरि भने: “हेर, तिमी गर्भवती छ्यौ। तिमीले छोरा जन्माउनेछ्यौ। तिमीले तिनको नाम इस्माएल* राख्नू। किनभने यहोवा परमेश्‍वरले तिम्रो वेदनाको पुकार सुन्‍नुभएको छ। १२  तिम्रो छोरा जङ्‌गली गधाजस्तै* हुनेछन्‌। तिनी सबैमाथि जाइलाग्नेछन्‌ अनि अरू सबै मानिस पनि तिनीमाथि जाइलाग्नेछन्‌। तिनी आफ्ना दाजुभाइको छेउछाउमा बस्नेछन्‌।”* १३  त्यसपछि हागारले यहोवा परमेश्‍वरको नाम पुकारिन्‌, जसले* तिनीसित कुरा गरिरहनुभएको थियो। तिनले यसो भनिन्‌: “तपाईँ सबै कुरा देख्ने परमेश्‍वर हुनुहुन्छ।”+ तिनले फेरि भनिन्‌: “मलाई देख्नुहुनेलाई मैले पनि देखेँ!” १४  त्यसैले त्यस कुवाको नाम बेर-लहै-रोइ* राखियो। (यो कुवा कादेस र बरेदको बीचमा पर्छ।) १५  पछि हागारले छोरा जन्माइन्‌ अनि अब्रामले तिनको नाम इस्माएल राखे।+ १६  हागारले इस्माएललाई जन्माउँदा अब्राम ८६ वर्षका थिए।

फुटनोटहरू

यसको अर्थ हो, “परमेश्‍वर सुन्‍नुहुन्छ।”
कसै-कसैको विचारमा यसले जेब्रालाई पनि जनाउँछ। यसले स्वतन्त्र हुनुपर्ने वा कसैको अधीनमा बस्न नचाहने मनोभावलाई जनाएको हुन सक्छ।
वा सम्भवत: “तिनले आफ्ना सबै दाजुभाइसित दुस्मनी राख्नेछन्‌।”
यसले यहोवाको प्रतिनिधित्व गर्ने स्वर्गदूतलाई जनाउँछ।
यसको अर्थ हो, “मलाई देख्नुहुने जीवित परमेश्‍वरको कुवा।”