अय्युब ७:१-२१

  • अय्युब अझै जवाफ दिन्छन्‌ (१-२१)

    • मानिसको जीवन मजदुरको जस्तै छ (१, २)

    • “तपाईँ किन मलाई आफ्नो तारो बनाउनुहुन्छ?” (२०)

 “मानिसको जीवन दुःख गरेरै बित्छ,उसका दिनहरू मजदुरको जस्तै हुन्छन्‌।+  २  एउटा दासझैँ ऊ शीतल छहारी खोजिरहन्छ,ज्यालादारी नोकरझैँ आफ्नो ज्याला कुरिरहन्छ।+  ३  मेरो जीवन पनि महिनौँदेखि व्यर्थ भएको छ,कैयौँ रात मैले रोएर बिताएको छु।+  ४  जब म ढल्कन्छु, तब आफैलाई सोध्छु, ‘अब कहिले ब्युँझने होला?’+ तर उज्यालो नहोउन्जेल म कोल्टे फेर्दै छटपटाइरहन्छु।  ५  मेरो शरीर किरैकिरा* र माटैमाटोले भरिएको छ,+मेरो जीउमा पाप्रा नभएको र पीप ननिस्केको ठाउँ नै छैन।+  ६  मेरा दिनहरू तानको थुरी* चलेभन्दा छिटो बितिरहेका छन्‌,+कुनै आशाविना ती दिनहरू बितिरहेका छन्‌।+  ७  हे परमेश्‍वर! हेर्नुहोस्‌, मेरो जीवन त हावाको झोक्काजस्तै छ;+मेरो आँखाले कहिल्यै सुदिन हेर्न पाउनेछैन।  ८  मलाई देख्ने आँखाले फेरि कहिल्यै मलाई देख्नेछैन;तपाईँको आँखाले मलाई धुइँधुइँती खोज्नेछ तर भेट्टाउनेछैन।+  ९  जसरी बादल फाट्‌छ र हराउँछ,त्यसरी नै चिहानमा* जाने मानिस कहिल्यै फर्केर आउँदैन।+ १०  ऊ कहिल्यै आफ्नो घरमा फर्कनेछैनअनि उसकै ठाउँका मानिसहरूले समेत उसलाई बिर्सनेछन्‌।+ ११  त्यसैले म अब चुप लागेर बस्दिनँ। म आफ्नो मनको सबै पीर-बेथा पोख्नेछु।आफ्नो मनको तीतोपन व्यक्‍त गर्नेछु।+ १२  तपाईँ किन मलाई रुङ्‌नुहुन्छ?म समुद्र वा समुद्रको विशाल जलजन्तु हुँ र? १३  ‘म ओछ्यानमा आराम गर्छु,पलङमा आफ्नो कष्ट बिसाउँछु’ भनेर सोच्दा १४  तपाईँ सपनामा मलाई तर्साउनुहुन्छ,डरलाग्दो दर्शन* देखाएर भयभीत पार्नुहुन्छ। १५  त्यसैले बरु मेरो सास रोकियोस्‌।यस्तो शरीर लिएर बाँच्नुभन्दा त मर्नु नै जाती।+ १६  म आफ्नो जीवनदेखि वाक्क भइसकेँ,+ अब म बाँच्न चाहन्‍नँ। मलाई एक्लै छोडिदिनुहोस्‌ किनकि मेरा दिनहरू क्षणभरका छन्‌।+ १७  मानिस के हो र?तपाईँ किन त्यसमा यत्ति धेरै चासो लिनुहुन्छ? किन त्यसलाई यत्ति धेरै ध्यान दिनुहुन्छ?+ १८  किन बिहानैपिच्छे त्यसलाई जाँच्नुहुन्छ?अनि हरपल त्यसको परीक्षा गर्नुहुन्छ?+ १९  तपाईँ कहिलेसम्म ममाथि नजर राख्नुहुन्छ?के तपाईँ मलाई थुक निल्ने समय पनि दिनुहुन्‍न?+ २०  मानिसको एक-एक चाल जाँच्नुहुने परमेश्‍वर, मैले पापै गरेको भए तापनि कसरी तपाईँको नोक्सानी भयो र?+ तपाईँ किन मलाई आफ्नो तारो बनाउनुहुन्छ? के म तपाईँको निम्ति बोझ बनेँ? २१  तपाईँ किन मेरो अपराध क्षमा गर्नुहुन्‍न?अनि मेरो गल्ती माफ गर्नुहुन्‍न? अब त म माटोमा मिल्नै लागिसकेँ।+तपाईँले मलाई यताउता खोजे पनि भेट्टाउनुहुनेछैन।”

फुटनोटहरू

वा “औँसै-औँसा।”
कपडा बुन्‍ने तानमा धागाको बीचबीचमा छिराई धागोलाई एकातिरबाट अर्कोतिर लग्ने एक साधन।
हिब्रू भाषामा शिओल। शब्दावली हेर्नुहोस्‌।
शब्दावली हेर्नुहोस्‌।