अशक्तता सेटिङ

भाषा रोज्ने

सीधै दोस्रो तहको मेनुमा जाने

सीधै विषयसूचीमा जाने

सीधै सामग्रीमा जाने

यहोवाका साक्षीहरू

नेपाली

अनलाइन बाइबल

पवित्र बाइबल—नयाँ संसार अनुवाद

२ पत्रुस २:१-२२

 जसरी इस्राएलका मानिसहरूबीच झूटा भविष्यवक्ताहरू खडा भएका थिए, त्यसरी नै तिमीहरूमाझ पनि झूटा शिक्षकहरू देखा पर्नेछन्‌। कसैले चाल नपाउने गरी तिनीहरूले तिमीहरूको विश्वासलाई हानि पुऱ्याउने गुटहरू खडा गर्नेछन्‌ र आफूलाई किन्ने मालिकलाई समेत तिनीहरूले इन्कार गर्नेछन्‌ अनि यी सब गरेर तिनीहरूले आफ्नो विनाश छिट्टै निम्त्याउनेछन्‌। २  साथै, धेरै जनाले तिनीहरूको छाडा आचरणको* सिको गर्नेछन्‌। त्यसले गर्दा सत्यको मार्गको बदनाम हुनेछ। ३  यसबाहेक, लालची भएर तिनीहरूले झूटा कुराहरू गर्नेछन्‌ र तिमीहरूलाई फसाउनेछन्‌। तर पहिल्यैदेखि तिनीहरूको निम्ति साँचिराखेको न्यायदण्डले ढिला गर्नेछैन अनि तिनीहरूको विनाश पक्कै हुनेछ। ४  निस्सन्देह, पाप गर्ने स्वर्गदूतहरूलाई समेत परमेश्वरले बाँकी राख्नुभएन तर न्यायदण्डको निम्ति तिनीहरूलाई टार्टरसको* घोर अन्धकारको खाडलमा हाल्नुभयो। ५  त्यसैगरि, उहाँ प्राचीन संसारलाई दण्ड दिनदेखि पछि हट्नुभएन तर परमेश्वरको न्यायोचित स्तरबारे प्रचार गर्ने नूहलाई अनि अरू सात जनालाई भक्तिहीन मानिसहरूको संसारमाथि जलप्रलय ल्याउँदा बचाउनुभयो; ६  अनि सदोम र गमोराका सहरहरूलाई खरानी पारेर उहाँले भक्तिहीन मानिसहरूमाथि आइपर्ने कुराहरूको नमुना बसाल्नुभयो। ७  तर उहाँको स्तरबमोजिम असल काम गर्ने लूतलाई भने छुटकारा दिनुभयो, किनकि परमेश्वरको व्यवस्था उल्लङ्घन गर्ने मानिसहरू छाडा आचरणमा लिप्त भएको देखेर तिनी असाध्यै विचलित भएका थिए— ८  तिनीहरूबीच रहँदा बस्दा, परमेश्वरको स्तरबमोजिम असल काम गर्ने यस मानिसलाई हरेक दिन तिनीहरूको कुकर्म देख्दा अनि सुन्दा औडाहा हुन्थ्यो— ९  तसर्थ, परमेश्वरको भक्ति गर्ने मानिसहरूलाई कसरी परीक्षाबाट जोगाउने तर उहाँको स्तरविपरीत काम गर्ने मानिसहरूलाई भने कसरी न्यायको दिनमा नष्ट गर्नका लागि राखिछोड्ने, सो यहोवा जान्नुहुन्छ, १०  अझ विशेष गरी, त्यस्ता मानिसहरूलाई, जो अरूलाई अशुद्ध पार्न तिनीहरूको शरीरको पछि लाग्छन्‌ अनि प्रभुत्वलाई तुच्छ ठान्छन्‌। यी महसुर अनि स्वेच्छाचारी मानिसहरू महिमा पाएका जनहरूको रत्तीभर डर नराखी निन्दा गर्छन्‌, ११  जबकि, तिनीहरूभन्दा बलवान्‌ अनि क्षमतावान्‌ भएर पनि स्वर्गदूतहरूले अपशब्द बोलेर तिनीहरूलाई दोष लगाउँदैनन्‌, किनकि तिनीहरू यहोवाको आदर गर्छन्‌। १२  तर यी मानिसहरू भने पक्रिन र मारिनका लागि जन्मेका नासमझ पशुहरूजस्तै छन्‌। यिनीहरू आफूलाई थाह नभएका कुराहरूविरुद्ध अपशब्द बोल्छन्‌। त्यसैले आफ्नै विनाशको बाटोमा लागेर यिनीहरू नष्ट हुनेछन्‌, १३  र आफूले गरेको खराबीको बदलामा खराबी नै भोग्नेछन्‌। दिनदहाडै विलासितामा डुब्न तिनीहरूलाई मज्जा लाग्छ। तिनीहरू दाग अनि खोट हुन्‌ अनि तिमीहरूसित भोज खाँदै झूटा कुराहरू गरेर तिमीहरूलाई बहकाउन पाउँदा तिनीहरू असाध्यै खुसी हुन्छन्‌। १४  तिनीहरूका आँखा कामवासनाले* भरिएका छन्‌ अनि पाप गर्नदेखि तिनीहरूलाई रोक्न सक्दैन। अस्थिर मानिसहरूलाई* तिनीहरू फसाउँछन्‌। तिनीहरूको मनले लालच गर्ने तालिम पाएको छ। तिनीहरू श्रापित सन्तान हुन्‌। १५  सोझो बाटोलाई त्यागेर तिनीहरू बहकिएका छन्‌। तिनीहरू बोअरको छोरा बालामको बाटोमा हिंडेका छन्‌, जसले खराबीको इनामलाई प्रेम गरेका थिए, १६  र आफूले गरेको गलत कामको निम्ति हप्की पाएका थिए। अबोला गधाले आफ्नो मुखबाट मानिसको आवाज निकालेर ती भविष्यवक्ताको बौलट्टीलाई रोक्यो। १७  तिनीहरू पानीविनाका मुहान अनि भीषण आँधीले उडाएका कुहिरो हुन्‌। तिनीहरूको निम्ति घोर अन्धकार साँचेर राखिएको छ। १८  किनकि तिनीहरू बेमतलबका ठूलठूला कुरा गर्छन्‌ अनि गलत काम गर्ने मानिसहरूमाझबाट भर्खरै निस्केर आएका मानिसहरूलाई शरीरका कुइच्छाहरू अनि छाडा बानीबेहोराद्वारा फसाउँछन्‌। १९  तिनीहरू स्वतन्त्रता दिने प्रतिज्ञा गर्छन्‌ तर आफै भने भ्रष्टताका दासहरू हुन्‌। किनकि जो अरूको अधीनमा बस्छ, ऊ त्यसैको दास हुन्छ। २०  निस्सन्देह, हाम्रा प्रभु अनि उद्धारक येशू ख्रीष्टको सही ज्ञान हासिल गरेर यस संसारका अशुद्ध कुराहरूबाट उम्केपछि तिनीहरू फेरि त्यही कुराहरूमा मुछिन्छन्‌ र त्यसको वशमा पर्छन्‌ भने तिनीहरूको पछिल्लो अवस्था पहिलेको भन्दा झनै खराब हुन्छ। २१  परमेश्वरको असल मार्गबारे सही ज्ञान हासिल गरिसकेपछि आफूले पाएका पवित्र आज्ञाहरूबाट मुख फर्काउनुभन्दा त तिनीहरूले ती कुराहरू थाहै नपाएको भए बेस हुनेथियो। २२  यो सत्य उखान तिनीहरूमा ठ्याक्कै लागू हुन्छ: “कुकुरले फर्केर फेरि आफ्नै बान्ता चाट्छ, नुहाइदिएको भुनी फेरि हिलैमा लडीबुडी खेल्छ।”

फुटनोटहरू

२प २:२ गलाती ५:१९ को फुटनोट हेर्नुहोस्।
२प २:४ * परमेश्वरले नूहको दिनमा अनाज्ञाकारी स्वर्गदूतहरूलाई राख्नुभएको झ्यालाखानासमान पतित अवस्थालाई टार्टरस भनिन्छ।
२प २:१४ * वा, “आफ्नो पति वा पत्नीबाहेक अरूसित राखिने यौनसम्बन्धले।”
२प २:१४ * ग्रीकमा पुस्खे। अतिरिक्त लेख ७क हेर्नुहोस्।