अशक्तता सेटिङ

भाषा रोज्ने

सीधै दोस्रो तहको मेनुमा जाने

सीधै विषयसूचीमा जाने

सीधै सामग्रीमा जाने

यहोवाका साक्षीहरू

नेपाली

अनलाइन बाइबल

पवित्र बाइबल—नयाँ संसार अनुवाद

हिब्रू ९:१-२८

 पहिलेको करारमा पवित्र सेवासम्बन्धी विधिहरू दिइएका थिए र यसको पवित्र बासस्थान पृथ्वीमा थियो। २  पालमा बनाइएको पहिलो कोठामा पानस, टेबुल र भेटीका रोटीहरू राखिएका हुन्थे अनि यसलाई “पवित्रस्थान” भनिन्छ। ३  तर पालको दोस्रो पर्दापछाडि “महापवित्र” भनिने कोठा थियो। ४  यस कोठामा सुनको धुपौरो र पूरै सुनले मोहरिएको करारको सन्दुक थियो। अनि यो सन्दुकभित्र मन्न भएको सुनको भाँडो, कोपिला लागेको हारूनको लौरो र करारका पाटीहरू थिए। ५  सन्दूकको माथिपट्टिचाहिं त्यसको ढक्कनमा* छाया पारिराखेका महिमित करूबहरू * थिए। तर यी कुराहरूको विषयमा विस्तृत तवरले बताइरहने समय अहिले होइन। ६  यी कुराहरू यसरी बनाइसकेपछि, पवित्र सेवा चढाउन पुजारीहरू बारम्बार पालको पहिलो कोठामा पस्थे। ७  तर दोस्रो कोठामा भने प्रधान पुजारी एक्लै वर्षको एक पटक पस्थे। तिनी रगत नलिई त्यहाँ पसदैनथे, जुन रगत तिनले आफ्नो लागि र मानिसहरूले अनजानमा गरेका पापहरूका लागि चढाउँथे। ८  यसरी पवित्र शक्तिले यो कुरा स्पष्ट पारेको छ कि पहिलो पाल* अस्तित्वमा रहुन्जेलसम्म महापवित्रस्थानमा * पस्ने बाटो प्रकट गरिएको थिएन। ९  यो पाल तोकिएको समय अर्थात्‌ अहिले चलिरहेका कुराहरूको नमुना हो अनि त्यही प्रबन्धअनुसार भेटी र बलिदानहरू अझै पनि चढाइँदैछ। तथापि, यी कुराहरूले पवित्र सेवा चढाउने मानिसको अन्तस्करण पूर्ण रूपले सफा बनाउन सक्दैन, १०  तर यी खानपान अनि शुद्धीकरणसम्बन्धी विभिन्न रीतिथितिहरूसित* मात्र सम्बन्धित छन्‌। यी शारीरिक कुराहरूको विषयमा मोशाको व्यवस्थाले तोकेका आवश्यकताहरू थिए अनि सबै कुरा ठीक-ठीक ठाउँमा ल्याउने तोकिएको समय नआउन्जेलसम्मका लागि दिइएका थिए। ११  तथापि, पूरा भइसकेका उत्तम कुराहरूको प्रधान पुजारीको रूपमा जब ख्रीष्ट आउनुभयो, तब उहाँ अझ ठूलो र पूर्ण पालभित्र पस्नुभयो, जो हातले बनाइएको अर्थात्‌ पार्थिव सृष्टिको भाग होइन। १२  उहाँ बोका र बहरहरूको रगत लिएर होइन तर आफ्नै रगत लिएर एकै पटक सदाका लागि महापवित्रस्थानभित्र पस्नुभयो र हाम्रो लागि चिरस्थायी छुटकारा हासिल गर्नुभयो। १३  यदि अशुद्ध भएका मानिसहरूमाथि बोका र बहरहरूको रगत अनि कोरलीको खरानी छर्कंदा तिनीहरू शारीरिक रूपमा परमेश्वरको नजरमा शुद्ध हुन्छन्‌ भने १४  ख्रीष्ट, जसले सदा कायम रहने पवित्र शक्तिद्वारा परमेश्वरसामु निष्खोट बलिको रूपमा आफूलाई चढाउनुभयो, उहाँको रगतले हाम्रो अन्तस्करणलाई मरेका कामहरूबाट झनै कत्ति शुद्ध पार्ला, ताकि हामीले जीवित परमेश्वरलाई पवित्र सेवा चढाउन सकौं? १५  त्यसैले उहाँ नयाँ करारको मध्यस्थकर्ता हुनुहुन्छ। बोलावट पाएकाहरूले अनन्त उत्तराधिकारको प्रतिज्ञा पाउन सकून्‌ भनेर उहाँ यस्तो बन्नुभयो। यी सब उहाँको मृत्युद्वारा सम्भव भएको हो अनि पहिलेको करार अस्तित्वमा छँदा गरिएका अपराधहरूबाट मुक्त गर्न उहाँकै मृत्युद्वारा फिरौती तिरियो। १६  कुनै करार गरिन्छ भने करार गर्ने मानिसको मृत्यु हुनु आवश्यक छ। १७  मृत्युपछि मात्र करारले मान्यता पाउँछ, किनकि करार गर्ने मानिस जीवित छउन्जेल करार लागू हुँदैन। १८  त्यसैले पहिलो करार पनि विनारगत लागू भएको थिएन। १९  किनकि व्यवस्थाको हरेक आज्ञा मानिसहरूलाई सुनाइसकेपछि मोशाले बहर र बोकाहरूको रगतको साथमा पानी लिए अनि चहकिलो रातो ऊन र हिसपले* व्यवस्थाको पुस्तक र सबै मानिसहरूमाथि छर्कंदै २०  यसो भने: “यो रगतको करार हो, जसलाई पूरा गर्ने जिम्मेवारी परमेश्वरले तिमीहरूलाई सुम्पनुभएको छ।” २१  अनि तिनले पालका साथै जनसेवामा चलाइने सबै भाँडाहरूमाथि पनि त्यसरी नै रगत छर्के। २२  हो, मोशाको व्यवस्थाअनुसार रगतले प्रायः सबै थोक शुद्ध पार्छ अनि रगत नबगाईकन पापको क्षमा हुँदै हुँदैन। २३  त्यसैले स्वर्गका कुराहरूको नमुना पशुबलिहरूको रगतद्वारा शुद्ध पारिनु आवश्यक थियो तर स्वर्गका कुराहरू आफै भने यस्ता पशुबलिहरूभन्दा पनि अझ उत्तम बलिहरूद्वारा शुद्ध पारिनु आवश्यक थियो। २४  किनकि ख्रीष्ट हातले बनाइएको महापवित्रस्थान, जुन सक्कलको नक्कल मात्र हो, त्यसमा नभई अब हाम्रो लागि परमेश्वरसामु देखा पर्नलाई स्वर्गमै पस्नुभयो। २५  न त उहाँले आफूलाई बारम्बार बलि चढाउनुपर्छ, जस्तो कि प्रधान पुजारी सालिन्दा महापवित्रस्थानभित्र पस्थे तर आफ्नो रगत लिएर त होइन। २६  नत्र भने उहाँले संसारको प्रारम्भदेखि* बारम्बार दुःख भोग्नुपर्ने थियो। तर आफैलाई बलि चढाएर पाप हटाउनको लागि उहाँले आफूलाई युगको आखिरी समयमा सदाका लागि प्रकट गरिसक्नुभएको छ। २७  जसरी मानिसहरू एकपल्ट मर्नै पर्छ र त्यसपछि इन्साफ हुन्छ, २८  त्यसरी नै ख्रीष्ट पनि धेरैका पापहरू बोक्न एकैपल्ट सदाका लागि बलि चढाइनुभयो। दोस्रो पल्ट उहाँ देखा पर्दा पाप हटाउनका लागि होइन तर आफ्नो उद्धारको लागि उत्सुकतासाथ उहाँको बाटो हेर्नेहरूका लागि देखा पर्नुहुनेछ।

फुटनोटहरू

हिब्रू ९:५ * यहाँ “ढक्कन” भनेर अनुवाद गरिएको ग्रीक शब्दले परमेश्वरको निगाह पाउन चढाइने प्रायश्‍चितको भेटीलाई पनि बुझाउन सक्छ।
हिब्रू ९:५ * करूबहरू उच्च ओहदाका स्वर्गदूतहरू हुन्‌।
हिब्रू ९:८ * यसले पृथ्वीमा भएको पाललाई सङ्केत गर्छ।
हिब्रू ९:८ * यसले स्वर्गको महापवित्रस्थानलाई सङ्केत गर्छ।
हिब्रू ९:१० * शाब्दिक, “विभिन्न किसिमका बप्तिस्माहरूसित।”
हिब्रू ९:१९ यूहन्ना १९:२९ को फुटनोट हेर्नुहोस्।
हिब्रू ९:२६ मत्ती २५:३४ को फुटनोट हेर्नुहोस्।