सीधै सामग्रीमा जाने

सीधै दोस्रो तहको मेनुमा जाने

सीधै विषयसूचीमा जाने

यहोवाका साक्षीहरू

नेपाली

अनलाइन बाइबल | पवित्र बाइबल—नयाँ संसार अनुवाद

रोमी ३:१-३१

 त्यसोभए, कुन कुराले गर्दा यहूदीहरू अरूभन्दा उच्च भए त? अथवा खतना गरेर के फाइदा?  थुप्रै कुरामा। पहिलो त, तिनीहरूलाई परमेश्वरका पवित्र सन्देशहरू सुम्पिइयो।  त्यसोभए, कुरा के हो त? कसै-कसैले विश्वास गरेनन्‌ भन्दैमा के तिनीहरूको अविश्वासले परमेश्वरको विश्वासीपनलाई बेकार बनाउला त?  त्यस्तो कहिल्यै नहोस्! सबै मानिस झूटो साबित भए तापनि परमेश्वर सत्य ठहरिऊन्‌, किनकि यस्तो लेखिएको छ: “तपाईं आफ्नो वचनमा सही साबित हुन सकोस् र तपाईंले मुद्दा जित्न सकोस्।”  तर यदि हामीले गर्ने खराब कामबाट परमेश्वरको काम न्यायोचित छ भनेर प्रकट हुन्छ भने हामी के भनौं? परमेश्वरले आफ्नो क्रोध खन्याउनुहुँदा के उहाँ अन्यायी हुनुभएन र? (एक जना मानिसको दृष्टिकोणले म यो भन्दैछु।)  त्यस्तो कहिल्यै नहोस्! नत्रता परमेश्वरले कसरी संसारको न्याय गर्नुहुनेछ?  मेरो झूटले परमेश्वरलाई झनै सत्य साबित गर्छ र उहाँको गौरव बढाउँछ भने मलाई किन पापी ठहराइन्छ?  अनि “आओ, हामी खराब कुरा गरौं, ताकि असल कुरा प्रकट होस्” भनेर हामी किन नभनौं, जस्तो कि, कसै-कसैले हामी यस्तै सिकाउँछौं भनेर झूटो आरोप पनि लगाउँछन्‌। यस्ता मानिसहरूले न्यायोचित दण्ड पाउनेछन्‌।  त्यसोभए हामी के ठानौं? के हामी अरूभन्दा उच्च छौं? पटक्कै छैनौं! किनकि यहूदी र ग्रीक* सबै नै पापको अधीनमा छन्‌ भनेर हामीले माथि नै दोष लगाइसक्यौं। १०  जस्तो लेखिएको छ: “परमेश्वरको स्तरबमोजिम असल काम गर्ने मानिस कोही छैन, एक जना पनि छैन; ११  अन्तरदृष्टि हुने एक जना पनि छैन, परमेश्वरलाई खोज्ने पनि एक जनै छैन। १२  सबै मानिस तर्किएका छन्‌, तिनीहरू सबै जना बेकामको भएका छन्‌; दया गर्ने कोही छैन, एक जना पनि छैन।” १३  “तिनीहरूको घोक्रो खुला चिहान हो, तिनीहरूको जिब्रो कपटले भरिएको छ।” “तिनीहरूको ओठमुनि विषालु सर्पको विष छ।” १४  “अनि तिनीहरूको मुख सराप र तीता कुराहरूले भरिएको छ।” १५  “तिनीहरूका खुट्टाहरू रगत बगाउन आतुर छन्‌।” १६  “तिनीहरूको बाटोमा विनाश र दुःख छ, १७  अनि तिनीहरूले शान्तिको बाटो थाह पाएका छैनन्‌।” १८  “तिनीहरूको आँखामा परमेश्वरको डर छैन।” १९  हामीलाई थाह छ कि मोशाको व्यवस्थाले भन्ने सबै कुरा मोशाको व्यवस्थाको अधीनमा हुनेहरूका लागि हो, ताकि कसैले बहाना बनाउन नपाओस् अनि सारा संसार परमेश्वरको दण्ड पाउन योग्य होस्। २०  त्यसैले व्यवस्थाअनुसार चलेर कोही पनि उहाँसामु असल ठहरिनेछैन, किनकि पाप के हो, त्यसको सही ज्ञान व्यवस्थाद्वारा प्राप्त हुन्छ। २१  तर अब व्यवस्था पालन नगरीकन पनि परमेश्वरको नजरमा असल ठहरिन सकिन्छ भनेर प्रकट भएको छ, जसको साक्षी मोशाको व्यवस्था र भविष्यवक्ताहरूको लेखोट छन्‌। २२  हो, येशू ख्रीष्टमा विश्वास गरेर परमेश्वरको नजरमा असल ठहरिन सकिन्छ; हो, विश्वास हुने जति सबै। यसमा कुनै भेदभाव छैन। २३  किनकि सबैले पाप गरेका छन्‌ अनि परमेश्वरका गौरवशाली गुणहरू प्रकट गर्न चुकेका छन्‌। २४  तर परमेश्वरले आफ्नो असीम अनुग्रह देखाएर सित्तैंमा उपहारस्वरूप तिनीहरूलाई आफ्नो नजरमा असल ठहराउनुभयो। ख्रीष्ट येशूले तिर्नुभएको फिरौतीद्वारा मुक्त गरेर उहाँले तिनीहरूलाई यसरी असल ठहराउनुभयो। २५  येशू ख्रीष्टको रगतमाथि विश्वास गरेर आफूसित मिलाप गर्न सकून्‌ भनेर परमेश्वरले उहाँलाई बलिदानको रूपमा चढाउनुभयो। उहाँ न्यायी हुनुहुन्छ भनी प्रकट गर्न उहाँले त्यसो गर्नुभयो, किनकि बितेको समयमा तिनीहरूले गरेका पापहरू सहेर उहाँले क्षमा गरिरहनुभएको थियो। २६  वर्तमान समयमा पनि आफू न्यायी छु भनी देखाउन उहाँले त्यसो गर्नुभयो, ताकि येशूमाथि विश्वास गर्ने मानिसहरूलाई आफ्नो नजरमा असल ठहराउँदा आफू पनि न्यायसङ्‌गत हुन सकियोस्। २७  त्यसोभए घमन्ड गर्ने कुनै कारण छ त? छँदै छैन। कुन व्यवस्थाले गर्दा? कामको व्यवस्थाले गर्दा? त्यसो कदापि होइन तर विश्वासको व्यवस्थाले गर्दा। २८  किनकि हामीले यो बुझ्यौं कि व्यवस्थाको कामद्वारा होइन तर विश्वासद्वारा मानिस परमेश्वरको नजरमा असल ठहरिन्छ। २९  वा के उहाँ यहूदीहरूका मात्र परमेश्वर हुनुहुन्छ? के उहाँ अन्यजातिका मानिसहरूको पनि परमेश्वर हुनुहुन्न र? हो, उहाँ अन्यजातिका मानिसहरूको पनि परमेश्वर हुनुहुन्छ। ३०  परमेश्वर साँच्चै एकै जना हुनुहुन्छ र उहाँले नै खतना भएका मानिसहरूलाई विश्वासको आधारमा असल ठहराउनुहुन्छ र खतना नभएका मानिसहरूलाई पनि तिनीहरूको विश्वासद्वारा असल ठहराउनुहुन्छ। ३१  त्यसोभए के हामी आफ्नो विश्वासद्वारा व्यवस्थालाई खारेज गर्छौं त? त्यस्तो कहिल्यै नहोस्! बरु हामी व्यवस्थालाई दह्रो बनाउँछौं।

फुटनोटहरू

स्पष्ट छ, यसले ग्रीक भाषा बोल्ने गैर-यहूदीहरूलाई बुझाउँछ।