अशक्तता सेटिङ

भाषा रोज्ने

सीधै दोस्रो तहको मेनुमा जाने

सीधै विषयसूचीमा जाने

सीधै सामग्रीमा जाने

यहोवाका साक्षीहरू

नेपाली

अनलाइन बाइबल

पवित्र बाइबल—नयाँ संसार अनुवाद

रोमी १३:१-१४

१३  हरेक मानिस* उच्च अख्तियारवालाहरूको अधीनमा रहोस्, किनकि परमेश्वरको अनुमतिविना कुनै अख्तियार चल्दैन। अनि जो-जो अख्तियारमा छन्‌, तिनीहरूलाई परमेश्वरले आफ्नो मातहतमा विभिन्न ओहदामा राख्नुभएको हो। २  त्यसैले जसले अख्तियारको विरोध गर्छ, ऊ परमेश्वरको प्रबन्धविरुद्ध खडा भएको हुन्छ; अनि यस प्रबन्धविरुद्ध खडा हुनेहरूले न्यायदण्ड भोग्नेछन्‌। ३  राम्रो काम गर्नेहरू त होइन तर नराम्रो काम गर्नेहरू शासन गर्नेहरूसित डराउँछन्‌। त्यसोभए, के तिमी अख्तियारसित डराउनु नपर्ने मानिस हुन चाहन्छौ? राम्रो काम गरिरह र तिमीले तिनीहरूबाट प्रशंसा पाउनेछौ। ४  किनकि तिनीहरू तिम्रै भलाइको लागि खटिएका परमेश्वरका सेवकहरू हुन्‌। तर तिमीले नराम्रो काम गरिरहेका छौ भने डराऊ, किनकि तिनीहरूले विनाकारण तरबार भिर्दैनन्‌। तिनीहरू परमेश्वरका सेवक यानि नराम्रो काम गरिरहनेहरूमाथि उहाँको क्रोध पोखाउने प्रतिशोधीहरू हुन्‌। ५  त्यसैले त्यस क्रोधको कारण मात्र होइन तर आफ्नो अन्तस्करणको खातिर पनि तिमीहरू अधीनमा बस्नु आवश्यक छ। ६  यसकारण पनि तिमीहरू करहरू तिर्दैछौ कि तिनीहरू परमेश्वरले खटाउनुभएका जनसेवकहरू हुन्‌ र आफ्नो यो भूमिका पूरा गर्न तिनीहरू निरन्तर लागिरहन्छन्‌। ७  तिनीहरूलाई तिर्नुपर्ने सबै कुरा तिर; कर तिर्नुपर्नेलाई कर, तिरो तिर्नुपर्नेलाई तिरो, डराउनुपर्नेसित डराओ, आदर गर्नुपर्नेलाई आदर गर। ८  आपसमा प्रेम गर्नुबाहेक तिमीहरू अरू कुनै कुरामा कसैको ऋणी नहोओ; किनकि जसले अरूलाई प्रेम गर्छ, त्यसले व्यवस्था पूरा गरेको हुन्छ। ९  किनकि “तिमीले आफ्नो पति वा पत्नीबाहेक अरूसित यौनसम्बन्ध नराख्नू, तिमीले हत्या नगर्नू, तिमीले नचोर्नू, तिमीले लालच नगर्नू” भन्ने नियमलगायत अरू सम्पूर्ण आज्ञाहरूको सार यस वचनमा पाइन्छ, अर्थात्‌ “तिमीले आफ्नो छिमेकीलाई आफूलाई जस्तै प्रेम गर्नू।” १०  प्रेमले छिमेकीको कुभलो हुने काम गर्दैन; त्यसैले प्रेमले व्यवस्था पूरा गर्छ। ११  अहिले कस्तो बेला हो भनेर तिमीहरूलाई थाह भएकोले पनि यसो गर, तिमीहरू निद्राबाट ब्यूँझने समय आइसकेको छ, किनकि हामीले विश्वास गर्न थालेको बेलामा भन्दा हाम्रो उद्धार अहिले झन्‌ नजिक छ। १२  रात निकै बितिसक्यो र दिन नजिकै आइपुगेको छ। त्यसैले हामी अन्धकारका कामहरू त्यागेर ज्योतिका हातहतियार धारण गरौं। १३  दिउँसोजस्तै हामी भद्र भएर चलौं। भोजको मोजमस्ती, अनियन्त्रित मद्यपान, अवैध यौनसंसर्ग, छाडा आचरण,* कलह र डाह त्यागौं। १४  तर प्रभु येशू ख्रीष्टलाई धारण गर अनि शरीरका अभिलाषाहरू पूरा गर्न पहिल्यै योजना नबनाओ।

फुटनोटहरू

रोमी १३:१ * ग्रीकमा पुस्खे। अतिरिक्त लेख ७क हेर्नुहोस्।
रोमी १३:१३ गलाती ५:१९ को फुटनोट हेर्नुहोस्।