सीधै सामग्रीमा जाने

सीधै दोस्रो तहको मेनुमा जाने

सीधै विषयसूचीमा जाने

यहोवाका साक्षीहरू

नेपाली

अनलाइन बाइबल | पवित्र बाइबल—नयाँ संसार अनुवाद

याकूब ४:१-१७

 तिमीहरूमाझ लडाइँ र झगडा कहाँबाट आयो? के ती तिमीहरूकै अङ्‌गहरूमा सङ्‌घर्ष गर्ने तिमीहरूका शरीरको अभिलाषाबाट आएका होइनन्‌ र?  तिमीहरू इच्छा गर्छौ तैपनि पाउँदैनौ। तिमीहरू हत्या गर्छौ र लालच गर्छौ तैपनि हासिल गर्न सक्दैनौ। तिमीहरू झगडा गर्छौ र लडाइँ गर्छौ। तिमीहरूले पाएका छैनौ, किनभने तिमीहरूले मागेकै छैनौ।  तिमीहरू माग्छौ तैपनि पाउँदैनौ, किनकि तिमीहरू आफ्नो शरीरको अभिलाषा पूरा गर्न गलत उद्देश्यले माग्छौ।  हे धोकेबाजहरू* हो, यस संसारसितको मित्रता परमेश्वरसितको शत्रुता हो भनेर के तिमीहरूलाई थाह छैन? त्यसकारण, जो यस संसारको मित्र हुन चाहन्छ, उसले आफूलाई परमेश्वरको शत्रु बनाइरहेको हुन्छ।  अथवा के तिमीहरूलाई धर्मशास्त्रले यो कुरा बेकारमा भनेको हो जस्तो लाग्छ: “ईर्ष्या गर्ने झुकावले गर्दा हामी विभिन्न कुराको चाहना गरिरहन्छौं”?  तर उहाँले दिनुहुने असीम अनुग्रह त्यो झुकावभन्दा प्रबल छ। त्यसैले, धर्मशास्त्र भन्छ: “परमेश्वरले अहङ्‌कारीहरूको विरोध गर्नुहुन्छ तर नम्रहरूलाई असीम अनुग्रह देखाउनुहुन्छ।”  त्यसकारण, आफूलाई परमेश्वरको अधीनमा राख र दियाबलको विरोध गर अनि ऊ तिमीहरूबाट भाग्नेछ।  परमेश्वरसित नजिक होओ र उहाँ तिमीहरूसित नजिक हुनुहुनेछ। हे पापीहरू हो, आफ्नो हात शुद्ध पार। हे दोमनेहरू हो, आफ्नो मन चोखो बनाओ।  दुःखित होओ, शोक मनाओ र रोओ। तिमीहरूको हाँसो शोकमा र तिमीहरूको खुसी खिन्नतामा परिणत होस्। १०  आफूलाई यहोवाको नजरमा नम्र बनाओ र उहाँले तिमीहरूलाई उच्च पार्नुहुनेछ। ११  हे भाइहरू हो, एक-अर्काविरुद्ध बोल्न छोड। जसले आफ्नो भाइविरुद्ध बोल्छ वा उसको न्याय गर्छ, उसले व्यवस्थाविरुद्ध बोल्छ र व्यवस्थाको न्याय गर्छ। अब यदि तिमी व्यवस्थाको न्याय गर्छौ भने तिमी व्यवस्था पालन गर्ने होइन तर त्यसको न्यायकर्ता पो भयौ। १२  व्यवस्थाको दाता र न्यायकर्ता एकै जना हुनुहुन्छ, जसले उद्धार गर्न सक्नुहुन्छ अनि नाश पनि गर्न सक्नुहुन्छ। तर आफ्नो छिमेकीको न्याय गर्ने तिमी को हौ? १३  तिमीहरू यसो भन्छौ: “आज कि भोलि हामी फलानो सहरमा जाऔंला अनि त्यहाँ एक वर्ष बिताऔंला र व्यापार गरेर नाफा कमाऔंला,” १४  जबकि तिमीहरूको जीवन भोलि के हुने हो, त्यो तिमीहरूलाई थाह छैन। किनकि तिमीहरू त एकछिन देखापरेर बिलाइहाल्ने कुहिरो हौ। १५  बरु तिमीहरूले यसो भन्नुपर्ने थियो: “यहोवाको इच्छा भए हामी बाँचौंला अनि यसो गरौंला र उसो गरौंला।” १६  तर तिमीहरू धक्कु लगाउँदै घमन्ड गर्छौ। यसप्रकारको सबै घमन्ड दुष्ट कुरा हो। १७  त्यसकारण, जसले सही काम गर्न जानेर पनि गर्दैन, उसले पाप गरिरहेको हुन्छ।

फुटनोटहरू

शाब्दिक, “आफ्नो पतिबाहेक अरूसित यौनसम्बन्ध राख्नेहरू।”