अशक्तता सेटिङ

भाषा रोज्ने

सीधै दोस्रो तहको मेनुमा जाने

सीधै विषयसूचीमा जाने

सीधै सामग्रीमा जाने

यहोवाका साक्षीहरू

नेपाली

अनलाइन बाइबल

पवित्र बाइबल—नयाँ संसार अनुवाद

मर्कूस १६:१-२०

१६  तब विश्राम-दिन बितिसकेपछि, मरियम मग्दलिनी, याकूबकी आमा मरियम र सलोमीले चिहानमा गएर उहाँको शवमा दल्न सुगन्धित मसलाहरू किने। २  अनि हप्ताको पहिलो दिन बिहान सबेरै घाम झुल्केपछि तिनीहरू उहाँको चिहानमा पुगे। ३  तिनीहरू आपसमा यस्तो कुरा गर्दै थिए: “हाम्रो निम्ति कसले चिहानको ढोकाको ढुङ्गा गुडाइदिने होला?” ४  तर तिनीहरूले नजर उठाएर हेर्दा त्यत्रो बडेमानको ढुङ्गालाई कसैले गुडाइसकेको देखे। ५  अनि जब तिनीहरू चिहानभित्र छिरे, तब सेतो लुगा लगाएको एक जना जवान मानिसलाई दाहिनेतिर बसिरहेको तिनीहरूले देखे र तिनीहरू छक्क परे। ६  तब उनले तिनीहरूलाई यसो भने: “तिमीहरू छक्क नपर। मलाई थाह छ, तिमीहरू खम्बामा टाँगिनुभएका नासरी येशूलाई खोज्दैछौ। तर उहाँ यहाँ हुनुहुन्न, उहाँ ब्यूँतिसक्नुभयो। उहाँलाई राखिएको ठाउँ हेर त! ७  अब जाओ, उहाँका चेलाहरू अनि पत्रुसलाई यो कुरा भनिदेओ: ‘उहाँ तिमीहरूभन्दा अघि गालील जाँदै हुनुहुन्छ र उहाँले भन्नुभएझैं तिमीहरूले उहाँलाई त्यहीं देख्नेछौ।’ ” ८  चिहानबाट निस्कनेबित्तिकै तिनीहरू त्यहाँबाट भागे, किनकि तिनीहरू असाध्यै डराएका अनि छक्क परेका थिए। डरले गर्दा तिनीहरूले कसैलाई केही बताएनन्‌। छोटो समापन पछि-पछिका अन्य केही पाण्डुलिपि अनि अनुवादहरूमा भने मर्कूस १६:८ पछि यस्तो छोटो समापन पाइन्छ: तर आफूले आज्ञा पाएजति सबै कुरा तिनीहरूले पत्रुस र तिनीसँग भएकाहरूलाई छोटकरीमा बताइदिए। यसबाहेक, यी कुराहरूपछि, येशू आफैले अनन्त छुटकाराको पवित्र र अविनाशी सन्देश तिनीहरूमार्फत पूर्वदेखि पश्‍चिमसम्म पठाउनुभयो। लामो समापन कुनै-कुनै पुरातन पाण्डुलिपिहरूमा (कोडेक्स अलेक्जेन्ड्रिनस, कोडेक्स इफ्राइमी, कोडेक्स बेजी) अनि पुरातन अनुवादहरूमा (ल्याटिन भल्गेट, क्युरेटोनियन सिरियाक, सिरियाक पेशिट्टा) यस्तो लामो समापन थपिएको छ। तर कोडेक्स साइनाइटिकस, कोडेक्स भ्याटिकनस, साइनाइटिक सिरियाक कोडेक्स, आर्मेनियन भर्जनमा भने पाइँदैन: ९  हप्ताको पहिलो दिन बिहान सबेरै मृत्युबाट ब्यूँतिएपछि उहाँ सबैभन्दा पहिला मरियम मग्दलिनीकहाँ देखा पर्नुभयो, जसबाट उहाँले सात वटा दुष्ट स्वर्गदूतलाई धपाउनुभएको थियो। १०  त्यसपछि उहाँका चेलाहरूकहाँ गएर तिनले सबै कुरा सुनाइदिइन्‌। किनकि तिनीहरू शोकमा डुबेर रोइरहेका थिए। ११  तर जब तिनीहरूले उहाँ जीवित हुनुभयो र तिनले उहाँलाई देखिन्‌ भनेर सुने, तब तिनीहरूले पत्याएनन्‌। १२  यसबाहेक, यी सब कुरा भइसकेपछि गाउँतिर गइरहेका दुई जना चेलाकहाँ उहाँ अर्कै रूपमा देखा पर्नुभयो र तिनीहरूसँगै हिंड्न थाल्नुभयो। १३  अनि फर्केर तिनीहरूले बाँकी अरूलाई खबर गरे। तर उनीहरूले यिनीहरूको कुरा पनि पत्याएनन्‌। १४  पछि, खाना खान बसिरहेका एघारै जनाकहाँ उहाँ देखा पर्नुभयो र तिनीहरूको अविश्वास र मनको कठोरतालाई लिएर उहाँले तिनीहरूलाई हप्काउनुभयो। किनकि उहाँ अब मृत्युबाट ब्यूँतिसक्नुभयो भनेर देख्नेहरूको कुरा तिनीहरूले पत्याएका थिएनन्‌। १५  अनि उहाँले तिनीहरूलाई भन्नुभयो: “सारा संसारमा जाओ र सबै मानिसहरूलाई सुसमाचार प्रचार गर। १६  जसले विश्वास गर्छ र बप्तिस्मा गर्छ, त्यसले उद्धार पाउनेछ तर जसले विश्वास गर्दैन त्यो दोषी ठहराइनेछ। १७  यसबाहेक विश्वास गर्नेहरूले यस्ता चमत्कारहरू गर्नेछन्‌: मेरो नाम लिएर तिनीहरूले दुष्ट स्वर्गदूतहरूलाई धपाउनेछन्‌, विभिन्न भाषामा बोल्नेछन्‌, १८  तिनीहरूले आफ्नो हातले सर्पहरू समाउनेछन्‌ अनि जस्तोसुकै विषालु कुरा पिए तापनि तिनीहरूलाई केही हानि हुनेछैन। तिनीहरूले बिरामी मानिसहरूमाथि आफ्नो हात राख्नेछन्‌ र तिनीहरू निको हुनेछन्‌।” १९  यसरी तिनीहरूसित कुरा गरिसकेपछि प्रभु येशू स्वर्गतिर लगिनुभयो र परमेश्वरको दाहिने हाततर्फ बस्नुभयो। २०  तब उहाँले भन्नुभएबमोजिम तिनीहरू गए र चारैतिर प्रचार गर्न लागे। अनि प्रभुले पनि तिनीहरूलाई सहायता गर्नुभयो र तिनीहरूलाई चमत्कार गर्ने शक्ति दिएर तिनीहरूको सन्देशलाई समर्थन गर्नुभयो।

फुटनोटहरू