सीधै सामग्रीमा जाने

सीधै दोस्रो तहको मेनुमा जाने

सीधै विषयसूचीमा जाने

यहोवाका साक्षीहरू

नेपाली

अनलाइन बाइबल

पवित्र बाइबल—नयाँ संसार अनुवाद

मत्ती ८:१-३४

 उहाँ डाँडाबाट ओर्लिसकेपछि एउटा ठूलो भीड उहाँको पछि लाग्यो।  अनि हेर, एक जना कुष्ठरोगी आएर उहाँलाई दण्डवत्‌ गर्दै भन्न थाल्यो: “प्रभु, यदि तपाईंसित इच्छा मात्र छ भने पनि मलाई शुद्ध पार्न सक्नुहुन्छ।”  अनि आफ्नो हात पसारेर उहाँले उसलाई छुनुभयो र भन्नुभयो: “मसित इच्छा छ। तिमी शुद्ध भइजाऊ।” अनि तुरुन्तै उसको कुष्ठरोग हट्‌यो र ऊ शुद्ध भइहाल्यो।  तब येशूले उसलाई भन्नुभयो: “यो कुरा कसैलाई नभन बरु गएर पुजारीलाई देखाऊ अनि मोशाले तोकेबमोजिमको भेटी चढाऊ ताकि तिमी शुद्ध भएछौ भनेर तिनीहरूले साक्षी पाऊन्‌।”  जब उहाँ कफर्नहुम पस्नुभयो तब एक जना सैनिक अफिसर* आए र उहाँलाई बिन्ती गर्दै  तिनले यसो भने: “हे प्रभु, मेरो नोकर पक्षाघातले थलिएर असाध्यै दुःख पाइरहेको छ।”  उहाँले तिनलाई भन्नुभयो: “म त्यहाँ पुगेपछि उसलाई निको पार्नेछु।”  तर त्यस सैनिक अफिसरले यसो भन्दै जवाफ दिए: “प्रभु, तपाईंलाई मेरो घरमा स्वागत गर्न लायकको म छैनँ बरु केवल एक वचन बोलिदिनुहोस् र मेरो नोकर निको हुनेछ।  किनकि म आफै पनि कसैको अधीनमा बसेको मानिस हुँ अनि मेरो मुनि पनि सिपाहीहरू छन्‌। म एक जनालाई भन्छु, ‘जाऊ!’ र ऊ जान्छ अनि अर्कोलाई भन्छु, ‘आऊ!’ र ऊ आउँछ अनि मेरो दासलाई भन्छु, ‘यो गर!’ र उसले त्यो गर्छ।” १०  यो सुनेर येशू छक्क पर्नुभयो अनि आफूलाई पछ्याउँदै आइरहेका मानिसहरूलाई भन्नुभयो: “म तिमीहरूलाई साँचो-साँचो भन्छु, मैले उसको जस्तो ठूलो विश्वास इस्राएलमा अरू कसैको पाइनँ। ११  तर म तिमीहरूलाई भन्छु, पूर्व र पश्‍चिमबाट धेरै जना आउनेछन्‌ अनि स्वर्गको राज्यमा अब्राहाम, इसहाक र याकूबसँगै खान बस्नेछन्‌। १२  तर राज्यका छोराहरू भने बाहिर अन्धकारमा फालिनेछन्‌, जहाँ रोदन अनि वेदनाको चीत्कार हुनेछ।” १३  त्यसपछि येशूले त्यस सैनिक अफिसरलाई भन्नुभयो: “जाऊ। तिमीले जस्तो विश्वास गरेका छौ, त्यस्तै भइजाओस्।” अनि उत्तिखेरै तिनको नोकर निको भइहाल्यो। १४  अनि पत्रुसको घरमा पुग्नुहुँदा येशूले तिनकी सासू निस्लोट ज्वरोले थलिएकी देख्नुभयो। १५  त्यसैले उहाँले उनको हात छुनुभयो र ज्वरोले उनलाई छोड्‌यो अनि उनी उठेर उहाँको लागि खाना तयार गर्न थालिन्‌। १६  तर साँझ परेपछि मानिसहरूले दुष्ट स्वर्गदूतहरू बास गरेका धेरै जनालाई उहाँकहाँ ल्याए; अनि उहाँले दुष्ट स्वर्गदूतहरूलाई* एकै वचनले धपाउनुभयो र बिरामीहरू जति सबैलाई निको पार्नुभयो। १७  यसप्रकार यशैया भविष्यवक्ताद्वारा भनिएको यो वचन पूरा भयो: “उहाँले हाम्रो रोगबिमार अनि पीडा हटाइदिनुभयो।” १८  तब आफूलाई चारैतिर भीडले घेरेको देखेर येशूले आफ्ना चेलाहरूलाई डुङ्‌गा खियाएर पारिपट्टि लैजाने आज्ञा दिनुभयो। १९  अनि एक जना शास्त्री उहाँकहाँ आएर यसो भने: “हे गुरु, तपाईं जहाँ-जहाँ जानुहुन्छ, म त्यहाँ-त्यहाँ तपाईंको पछि लाग्नेछु।” २०  तर येशूले तिनलाई भन्नुभयो: “फ्याउरोहरूको ओडार हुन्छ र आकाशका चराचुरुङ्‌गीको गुँड, तर मानिसको छोराको भने शिर ढल्काउने ठाउँसमेत छैन।” २१  त्यसैगरि अर्को एक जना चेलाले उहाँलाई यसो भने: “हे प्रभु, पहिला मलाई गएर मेरो बुबालाई गाड्‌न दिनुहोस्।” २२  येशूले तिनलाई भन्नुभयो: “मुर्दाहरूलाई मुर्दाहरूले नै गाडून्‌ तर तिमीचाहिं मेरो पछि लागिरह।” २३  अनि उहाँ डुङ्‌गा चढ्‌नुभएपछि चेलाहरू पनि उहाँको पछि-पछि लागे। २४  अब हेर, समुद्रमा ठूलो बतास चल्यो र छाल उठेर डुङ्‌गा पानीले भरिन थाल्यो; तर उहाँ भने निदाइरहनुभएको थियो। २५  अनि तिनीहरू आएर उहाँलाई यसो भन्दै ब्यूँझाए: “हे प्रभु, हामीलाई बचाउनुहोस्, हामी मर्नै आँट्‌यौं!” २६  तर उहाँले तिनीहरूलाई भन्नुभयो: “ए थोरै विश्वास हुनेहरू हो, तिमीहरू किन डराउँछौ?” त्यसपछि उठेर उहाँले बतास र समुद्रलाई हप्काउनुभयो अनि समुद्र पूरै शान्त भयो। २७  तब चेलाहरू छक्क परेर यसो भने: “यिनी को हुन्‌, जसको आज्ञा बतास र समुद्रले समेत मान्छ?” २८  उहाँ पारिपट्टि गदरिनीको इलाकामा पुग्नुभएपछि चिहानबाट आइरहेका दुई जना मानिससित उहाँको भेट भयो। दुष्ट स्वर्गदूतहरू बास गरेका ती मानिसहरू असाध्यै डरलाग्दा भएकोले त्यो बाटो भएर हिंड्‌ने आँट कसैले गर्दैनथ्यो। २९  अनि हेर, तिनीहरू यसो भन्दै चिच्याए: “हे परमेश्वरको छोरा, तपाईंको हामीसित के सरोकार?* के तपाईं तोकिएको समयअगावै हामीलाई सताउन यहाँ आउनुभएको हो?” ३०  निकै पर एक बथान सुँगुर चरिरहेको थियो। ३१  त्यसैले दुष्ट स्वर्गदूतहरूले यसो भन्दै उहाँलाई बिन्ती गर्न थाले: “हामीलाई धपाउने हो भने त्यस सुँगुरको बथानमा पठाउनुहोस्।” ३२  अनि उहाँले तिनीहरूलाई भन्नुभयो: “जाओ!” तब तिनीहरू निस्केर सुँगुरभित्र पसे; अनि हेर, पूरै बथान भीरतिर हुत्तिंदै गयो र समुद्रमा खसेर मऱ्यो। ३३  तब गोठालाहरू भागे अनि दुष्ट स्वर्गदूतहरू बास गरेका ती मानिसहरूलाई के भयो, त्यो लगायत सबै कुरा सहरमा गएर एक-एक सुनाए। ३४  अनि हेर, येशूलाई भेट्‌न पूरै सहर उर्लेर आयो र उहाँलाई देखेपछि तिनीहरूले उहाँलाई आफ्नो इलाकाबाट गइहाल्न बिन्ती गरे।

फुटनोटहरू

वा, “सय जना सिपाहीको नाइके।”
ग्रीकमा न्युमा। अतिरिक्त लेख ७ख हेर्नुहोस्।
प्राचीन समयमा यो उक्ति प्रयोग गरेर प्रश्न सोध्ने गरिन्थ्यो। तर हेपेर वा अहङ्‌कार गरेर बोल्न नभई कसैले भनेको कुरा, दिएको सुझाव वा व्यक्त गरेको शङ्‌कामा आपत्ति जनाउन चलाइन्थ्यो।