अशक्तता सेटिङ

भाषा रोज्ने

सीधै दोस्रो तहको मेनुमा जाने

सीधै विषयसूचीमा जाने

सीधै सामग्रीमा जाने

यहोवाका साक्षीहरू

नेपाली

अनलाइन बाइबल

पवित्र बाइबल—नयाँ संसार अनुवाद

मत्ती १२:१-५०

१२  त्यसबेला येशू विश्राम-दिनमा* गहुँको खेत हुँदै गइरहनुभएको थियो। तब उहाँका चेलाहरू भोकाए अनि तिनीहरूले गहुँका बालाहरू टिपेर खान थाले। २  यो देखेर फरिसीहरूले उहाँलाई भने: “हेर्नुहोस्, तपाईंका चेलाहरूले विश्राम-दिनमा गर्न नहुने काम गरेर नियम उल्लङ्घन गरिरहेका छन्‌।” ३  उहाँले तिनीहरूलाई भन्नुभयो: “के तिमीहरूले पढेका छैनौ, दाऊदले आफू र आफ्ना मानिसहरू भोकाउँदा के गरे? ४  परमेश्वरलाई चढाइएका रोटीहरू पुजारीहरूबाहेक अरूले खानु अनुचित भए तापनि तिनी परमेश्वरको भवनभित्र पसे अनि तिनीहरूले ती रोटीहरू खाए। ५  अथवा विश्राम-दिनको बेला मन्दिरमा सेवा गर्ने पुजारीहरूले विश्राम-दिनलाई पवित्र मान्दैनन्‌ तैपनि तिनीहरू निर्दोष ठहरिन्छन्‌ भनी के तिमीहरूले व्यवस्थामा पढेका छैनौ? ६  तर म तिमीहरूलाई भन्छु, मन्दिरभन्दा पनि महान्‌ कोही एक जना यहाँ छ। ७  ‘म बलिदान होइन, कृपा चाहन्छु’ भन्नुको अर्थ के हो तिमीहरूले बुझेको भएदेखि निर्दोषहरूलाई तिमीहरूले दोषी ठहराउने थिएनौ। ८  किनकि मानिसको छोरा नै विश्राम-दिनको प्रभु हो।” ९  त्यस ठाउँबाट जानुभएपछि उहाँ तिनीहरूको सभाघरमा पस्नुभयो। १०  अनि हेर, त्यहाँ एक जना मानिस थियो, जसको एउटा हात सुकेको थियो। त्यसैले उहाँलाई दोष लगाउने निहुँ पाउन फरिसीहरूले सोधे: “विश्राम-दिनमा निको पार्दा नियम उल्लङ्घन हुन्छ कि हुँदैन?” ११  उहाँले तिनीहरूलाई भन्नुभयो: “तिमीहरूमध्ये कुनचाहिं मानिस यस्तो होला, जसले आफूसित भएको एउटै भेडो विश्राम-दिनमा खाल्डोमा खस्यो भने त्यसलाई समातेर बाहिर निकाल्दैन? १२  त्यसो हो भने एउटा भेडोभन्दा मानिस झन्‌ कत्ति बहुमूल्य होला! त्यसैले विश्राम-दिनमा असल काम गर्दा नियम उल्लङ्घन हुँदैन।” १३  तब उहाँले त्यस मानिसलाई भन्नुभयो: “तिम्रो हात पसार।” तिनले आफ्नो हात पसारे अनि त्यो हात पनि अर्को हातजस्तै सद्दे भइहाल्यो। १४  तर फरिसीहरू बाहिर गए अनि उहाँलाई मार्न आपसमा मतो गरे। १५  यसको सुइँको पाएर येशू त्यहाँबाट गइहाल्नुभयो। तब धेरै जना उहाँको पछि लागे र उहाँले तिनीहरू सबैलाई निको पार्नुभयो। १६  तर उहाँको विषयमा कसैलाई नभन्नू भनी उहाँले तिनीहरूलाई कडा चेतावनी दिनुभयो। १७  यसप्रकार यशैया भविष्यवक्ताद्वारा भनिएको यो वचन पूरा भयो: १८  “हेर, मेरो सेवक, जसलाई मैले रोजें, मेरो प्रिय, जसलाई मैले* स्वीकारें। म तिनलाई मेरो पवित्र शक्ति दिनेछु अनि न्याय के हो, तिनले जाति-जातिका मानिसहरूलाई सिकाउनेछन्‌। १९  तिनले झगडा गर्नेछैनन्‌, न त चिच्याउनेछन्‌, न कसैले मूल बाटोमा तिनको स्वर सुन्नेछ। २०  न तिनले फुटेको नर्कट भाँच्नेछन्‌, न त धिपधिप बलिरहेको सलेदो निभाउनेछन्‌, जबसम्म तिनले न्याय पूर्णतया स्थापित गर्दैनन्‌। २१  जाति-जातिका मानिसहरूले तिनकै नाममा आशा राख्नेछन्‌।” २२  तब तिनीहरूले दुष्ट स्वर्गदूत बास गरेको एक जना अन्धो र गुँगो मानिस उहाँकहाँ ल्याए; अनि उहाँले तिनलाई निको पार्नुभयो। तब ती गुँगो मानिसले बोल्न र देख्न थाले। २३  यो देखेर भीडमा भएकाहरू सबै दङ्ग परे र यसो भन्न थाले: “कतै यिनी दाऊदका छोरा त होइनन्‌?” २४  यो सुनेर फरिसीहरूले भने: “यस मानिसले दुष्ट स्वर्गदूतहरूको शासक, बालजिबुलको* मदत लिएर दुष्ट स्वर्गदूतहरूलाई धपाउँछ।” २५  तिनीहरू के सोच्दैछन्‌ भन्ने थाह पाएर उहाँले यसो भन्नुभयो: “जुन राज्यभित्र फूट छ, त्यो उजाड हुन्छ अनि जुन सहर कि घरभित्र फूट छ, त्यो टिक्नेछैन। २६  त्यसैगरि यदि सैतानले सैतानलाई नै धपाउँछ भने त्यो आफैमा फूट उत्पन्न हुन्छ र त्यसो भयो भने त्यसको राज्य कसरी टिक्ला र? २७  साथै, यदि म बालजिबुलको मदत लिएर दुष्ट स्वर्गदूतहरूलाई धपाउँछु भने तिमीहरूका छोराहरूले* चाहिं कसको मदत लिएर धपाउँछन्‌? यसैकारण तिमीहरूका छोराहरूले नै तिमीहरूलाई गलत साबित गर्नेछन्‌। २८  तर यदि म परमेश्वरको पवित्र शक्तिले दुष्ट स्वर्गदूतहरूलाई धपाउँछु भने यसको मतलब, परमेश्वरको राज्य आएको तिमीहरूले चालै पाएका रहेनछौ। २९  अथवा के कसैले बलियो मानिसको घरमा घुसेर उसको भाँडाकुँडा कब्जामा लिनुअघि पहिला उसलाई बाँध्नुपर्दैन र? हो, त्यसपछि मात्र त्यसले उसको घर लुट्न सक्छ। ३०  जो मेरो पक्षमा छैन, त्यो मेरो विरुद्धमा हुन्छ अनि जसले मसँग बटुल्दैन, त्यसले छरपस्ट पार्छ। ३१  “यसकारण म तिमीहरूलाई भन्छु, मानिसहरूले गर्ने हर प्रकारका पाप र निन्दा क्षमा गरिनेछ तर पवित्र शक्तिविरुद्ध गरिने निन्दा क्षमा गरिनेछैन। ३२  उदाहरणको लागि, जसले मानिसको छोराको विरुद्ध केही बोल्छ, उसलाई क्षमा दिइनेछ; तर जसले पवित्र शक्तिको विरुद्ध बोल्छ, उसलाई न यस युगमा न त पछि आउने युगमै क्षमा दिइनेछ। ३३  “तिमीहरू कि त असल रूख बन र असलै फल फलाओ, होइन भने बिग्रेको रूख बन र बिग्रेकै फल फलाओ; किनकि रूख कस्तो हो, त्यसको फलैबाट चिनिन्छ। ३४  ए विषालु सर्पका सन्तान हो, तिमीहरू दुष्ट छौ भने कसरी असल कुरा बोल्न सक्छौ? किनकि मनमा जे प्रशस्त छ, मुखले त्यही बोल्छ। ३५  असल मानिसले आफ्नो असल थोकको भण्डारबाट असलै थोक निकाल्छ, अर्कोतिर दुष्ट मानिसले आफ्नो दुष्टताको भण्डारबाट दुष्टै थोक निकाल्छ। ३६  म तिमीहरूलाई भन्छु, आफूले बोल्ने हरेक व्यर्थ कुराको लागि न्यायको दिनमा मानिसहरू जबाफदेही हुनेछन्‌। ३७  किनकि तिमी जे बोल्छौ, त्यसैको आधारमा तिमीलाई निर्दोष ठहराइनेछ अनि तिमी जे बोल्छौ, त्यसैको आधारमा तिमीलाई दोषी ठहराइनेछ।” ३८  तब कोही-कोही शास्त्री र फरिसीहरूले उहाँलाई यस्तो जवाफ फर्काए: “हे गुरुज्यू, तपाईंले एउटा चिन्ह* देखाउनुभएको हामी हेर्न चाहन्छौं।” ३९  अनि उहाँले तिनीहरूलाई जवाफ दिनुभयो: “परमेश्वरप्रति वफादार नरहने दुष्ट पुस्ताले चिन्ह मात्र खोजिरहन्छ तर त्यसलाई भविष्यवक्ता योनाको चिन्हबाहेक अरू कुनै चिन्ह दिइनेछैन। ४०  किनकि योना ठूलो माछाको पेटमा तीन दिन तीन रात रहेजस्तै मानिसको छोरा पनि पृथ्वीको गर्भमा तीन दिन तीन रात रहनेछ। ४१  न्यायको बेला निनवेका मानिसहरू यो पुस्तासँगै खडा हुनेछन्‌ र यसलाई दोषी ठहराउनेछन्‌ किनभने योनाले प्रचार गर्दा तिनीहरूले पश्‍चात्ताप गरे। तर हेर, योनाभन्दा पनि ठूलो कोही एक जना यहाँ छ। ४२  न्यायको बेला दक्षिणकी महारानी यो पुस्तासँगै खडा हुनेछिन्‌ र यसलाई दोषी ठहराउनेछिन्‌ किनभने सुलेमानका बुद्धिका कुराहरू सुन्न तिनी पृथ्वीको पल्लो छेउबाट आइन्‌। तर हेर, सुलेमानभन्दा पनि ठूलो कोही एक जना यहाँ छ। ४३  “जब एउटा दुष्ट स्वर्गदूत एक जना मानिसबाट बाहिर निस्कन्छ तब त्यसले सुक्खा ठाउँहरूमा विश्रामस्थल खोज्छ तर भेटाउँदैन। ४४  अनि त्यसले भन्छ: ‘म जुन घरबाट निस्केर आएँ, त्यहीं जान्छु।’ त्यहाँ पुग्दा त्यसले त्यो घर खाली मात्र होइन, सफा पारेर सजिसजाउ गरिएको पनि पाउँछ। ४५  तब त्यो आफ्नो बाटो लाग्छ र आफूभन्दा झन्‌ दुष्ट सात वटा स्वर्गदूतलाई सँगै लिएर आउँछ र तिनीहरू त्यस मानिसभित्र पसेर त्यहीं बस्छन्‌; अनि त्यस मानिसको पछिल्लो अवस्था पहिलेको भन्दा झन्‌ खराब हुन्छ। यस दुष्ट पुस्तालाई पनि यस्तै हुनेछ।” ४६  उहाँ भीडसित बोलिरहनुभएको बेला हेर, उहाँकी आमा र भाइहरू उहाँसित कुरा गर्न बाहिर पर्खिरहेका थिए। ४७  तब कसैले उहाँलाई भन्यो: “हेर्नुहोस्, तपाईंका आमा र भाइहरू तपाईंसित कुरा गर्न बाहिर पर्खिरहेका छन्‌।” ४८  उहाँले त्यस मानिसलाई जवाफ दिनुभयो: “को हुन्‌ मेरी आमा अनि को हुन्‌ मेरा भाइहरू?” ४९  आफ्नो हात चेलाहरूतिर तेर्स्याउँदै उहाँले भन्नुभयो: “हेर, मेरी आमा अनि मेरा भाइहरू! ५०  किनकि जसले स्वर्गमा बस्नुहुने मेरो बुबाको इच्छा पूरा गर्छ, ऊ नै मेरो दाजुभाइ, दिदीबहिनी र आमा हो।”

फुटनोटहरू

मत्ती १२:१ * यहूदीहरूले हप्ताको सातौं दिनलाई विश्राम-दिन वा शबाथ मान्थे। आराम गर्न र परमेश्वरको उपासनासित सम्बन्धित कुराहरूमा ध्यान दिन यो दिन छुट्याइन्थ्यो।
मत्ती १२:१८ * ग्रीकमा पुस्खे। अतिरिक्त लेख ७क हेर्नुहोस्।
मत्ती १२:२४ * यो सैतानको अर्को नाम हो।
मत्ती १२:२७ * अर्थात्‌, “चेलाहरूले।”
मत्ती १२:३८ * अर्थात्‌, “चमत्कार।”