सीधै सामग्रीमा जाने

सीधै दोस्रो तहको मेनुमा जाने

सीधै विषयसूचीमा जाने

यहोवाका साक्षीहरू

नेपाली

अनलाइन बाइबल | पवित्र बाइबल—नयाँ संसार अनुवाद

फिलेमोन १:१-२५

 ख्रीष्ट येशूको खातिर कैदी भएको म पावलका साथै हाम्रा भाइ तिमोथीको तर्फबाट हाम्रा प्रिय भाइ तथा सहकर्मी फिलेमोन  अनि हाम्री बहिनी अप्फिया, हाम्रा सँगी-सिपाही अर्खिप्पस र तिम्रो घरमा भेला हुने मण्डलीलाई:  परमेश्वर, हाम्रा बुबाबाट र प्रभु येशू ख्रीष्टबाट तिमीहरूलाई असीम अनुग्रह र शान्ति मिलोस्।  मेरा प्रार्थनाहरूमा तिमीलाई सम्झँदा मेरा परमेश्वरलाई म सधैं धन्यवाद चढाउँछु।  किनकि प्रभु येशू र सबै पवित्र जनहरूप्रति तिमीमा भएको प्रेम र विश्वासबारे म सुनिरहन्छु।  जे-जति असल कुरा पाएका छौं, ती सबै ख्रीष्टसित एक भएकोले गर्दा नै पाएका हौं भनेर तिमीले बुझेकोले अझ सक्रिय भई आफ्नो विश्वास प्रकट गर्न सक।  तिम्रो प्रेमले गर्दा मैले निकै आनन्द र सान्त्वना पाएको छु, किनभने मेरो भाइ, तिमीले गर्दा पवित्र जनहरूको मनले* स्फूर्ति पाएको छ।  यसैकारण, म ख्रीष्टको प्रेषित* भएकोले जे ठीक छ, त्यही गर्ने आदेश तिमीलाई दिने ठूलो साहस मसित भए तापनि  बूढो भइसकेको म पावललाई अनि अहिले ख्रीष्टको खातिर कैदी भएको कुरालाई पनि ध्यानमा राख्दै तिमीलाई प्रेमपूर्वक आग्रह गर्छु। १०  हो, म ओनेसिमसको लागि आग्रह गर्दैछु, कैदी छँदा म जसको बुबाजस्तै बनेको थिएँ, ११  जो पहिले तिम्रो लागि बेकामको थियो तर अहिले तिम्रो र मेरो लागि काम लाग्ने भएको छ। १२  हो, मेरो मुटुको टुक्रा, उनै ओनेसिमसलाई म तिमीकहाँ पठाउँदैछु। १३  सुसमाचारको खातिर कैदमा परेको बेला मेरो सेवा-सुसार गर्न तिम्रो सट्टा म उसलाई आफूसितै राख्न चाहन्छु। १४  तर तिम्रो सहमतिविना म केही गर्न चाहन्नँ किनभने तिमीले करकापमा परेर होइन तर स्वेच्छाले असल काम गरेको म चाहन्छु। १५  यसरी फर्केर सधैंभरि तिमीसित बस्न पाउनु रहेछ र पो केही समयको लागि ऊ भागेको रहेछ। १६  अबदेखि दासको रूपमा होइन तर दासभन्दा ठूलो, प्रिय भाइको रूपमा उसलाई स्वीकार। मेरो लागि ऊ प्रिय भाइ हो भने तिम्रो लागि झन्‌ कति प्रिय हुनुपर्छ, किनभने तिमीहरूबीच मालिक र दासको मात्र होइन प्रभुमा भाइको* सम्बन्ध पनि छ। १७  यदि तिमी मलाई आफ्नो सहकर्मी ठान्छौ भने उसलाई त्यसरी नै स्वागत गर जसरी तिमीले मलाई माया गरेर स्वागत गर्नेथियौ। १८  उसले तिम्रो केही नोक्सानी गरेको छ वा तिमीलाई केही तिर्नुपर्ने छ भने मेरो खातामा चढाइदिनू। १९  म पावल आफ्नै हातले यो लेख्दैछु: म तिरिदिन्छु तर भनिरहनु नपर्ला, तिमी आफै पनि मप्रति ऋणी छौ। २०  हो भाइ, हामी दुवै जना प्रभुको चेला भएकोले तिमीबाट मैले फाइदा पाउन सकूँ: ख्रीष्टको चेलाको नाताले मेरो मनलाई स्फूर्ति देऊ। २१  तिमीले मेरो कुरा मान्नेछौ भनी भरोसा गर्दै म लेख्दैछु र म जान्दछु, तिमीले मैले भनेको भन्दा पनि बढ्‌ता गर्नेछौ। २२  साथै मेरो लागि बस्ने ठाउँको बन्दोबस्त मिलाइराख किनभने तिमीहरूको प्रार्थनाले गर्दा म तिमीहरूकै लागि कैदबाट मुक्त हुने आशा गर्दैछु। २३  ख्रीष्ट येशूको खातिर म जस्तै कैदमा परेका* इपाफ्रासले तिमीहरूलाई अभिवादन पठाएका छन्‌। २४  साथै मेरा सहकर्मीहरू मर्कूस, अरिस्तार्खस, डेमस र लूकाले पनि। २५  तिमीहरूले देखाउने मनोभावमा प्रभु येशू ख्रीष्टको असीम अनुग्रह रहोस्।

फुटनोटहरू

वा, “कोमल स्नेहले।” शाब्दिक, “आँत,” जसले सबैभन्दा गहिरो भावनालाई बुझाउँछ।
वा, “पठाइएको जन।” ग्रीकमा “अपोस्टोलोस।”
शाब्दिक, “तिमीहरूबीच शरीर र प्रभुको।”
शाब्दिक, “सहकैदी।”