अशक्तता सेटिङ

भाषा रोज्ने

सीधै दोस्रो तहको मेनुमा जाने

सीधै विषयसूचीमा जाने

सीधै सामग्रीमा जाने

यहोवाका साक्षीहरू

नेपाली

अनलाइन बाइबल

पवित्र बाइबल—नयाँ संसार अनुवाद

फिलिप्पी १:१-३०

 ख्रीष्ट येशूका दास हामी पावल र तिमोथी फिलिप्पीमा बस्ने ती सबै पवित्र जनहरू, जो ख्रीष्ट येशूसित एकतामा छन्‌, उनीहरूका साथै निरीक्षक* र सहायक सेवकहरूलाई * लेख्दैछौं: २  परमेश्वर, हाम्रा बुबा र प्रभु येशू ख्रीष्टबाट तिमीहरूलाई असीम अनुग्रह र शान्ति मिलोस्। ३  हरेक पटक तिमीहरूलाई सम्झँदा मेरा परमेश्वरलाई म सधैं धन्यवाद दिन्छु ४  अनि तिमीहरू सबैका लागि हरेक चोटि उत्कट बिन्ती चढाउँदा म खुसीसाथ त्यसो गर्ने गर्छु, ५  किनकि सुसमाचार सुनेको दिनदेखि अहिलेसम्म तिमीहरूले सुसमाचार फैलाउनमा योगदान पुऱ्याएका छौ। ६  म यस कुरामा ढुक्क छु, कि तिमीहरूमा जसले असल कामको सुरुवात गर्नुभयो, उहाँले नै येशू ख्रीष्टको दिनसम्ममा त्यो काम पूरा पनि गर्नुहुनेछ। ७  तिमीहरू सबैको विषयमा मैले यस्तो सोच्नु एकदमै उचित हो, किनकि तिमीहरू मेरो मुटुमा बसेका छौ अनि चाहे म बन्धनमा पर्दा होस् वा सुसमाचारको पक्षमा खडा भएर त्यसलाई कानुनी तवरमा स्थापना गर्दा, तिमीहरू सबै मसित परमेश्वरको असीम अनुग्रहका साझेदारहरू हौ। ८  तिमीहरू सबैलाई भेट्न म कत्ति आतुर छु, त्यसको साक्षी परमेश्वर हुनुहुन्छ। तिमीहरूप्रति मेरो कोमल स्नेह ख्रीष्ट येशूको जस्तै छ। ९  अनि म यही प्रार्थना गरिरहन्छु, कि सही ज्ञान र पूर्ण समझसँगसँगै तिमीहरूको प्रेम झन्‌-झन्‌ बढ्दै जाओस्, १०  ताकि अझ महत्त्वपूर्ण कुराहरू के हुन्‌, सो तिमीहरूले पक्का गर्न सक्नेछौ। यसरी ख्रीष्टको दिनसम्म तिमीहरू दोषरहित रहन सक्नेछौ र अरूलाई ठेस पुऱ्याउनेछैनौ ११  अनि तिमीहरूले येशू ख्रीष्टमार्फत प्रशस्त मात्रामा असल फल फलाउन सक्नेछौ, जसले गर्दा परमेश्वरको महिमा र प्रशंसा हुनेछ। १२  भाइहरू हो, तिमीहरूले यो जान भन्ने म चाहन्छु, ममाथि जे-जस्ता कुराहरू आइपरेका छन्‌, त्यसले सुसमाचार फैलाउन बाधा होइन, बरु सहयोग नै पुऱ्याएको छ। १३  ख्रीष्टको खातिर म बन्धनमा परेको हुँ भन्ने कुरा सम्राट्को गारत र अरू सबैलाई थाह भएको छ। १४  अनि धेरैजसो भाइहरू मेरो बन्धनको कारण अझ निर्धक्क भएका छन्‌ र परमेश्वरको वचन निडर भई बोल्न पहिलेभन्दा झन्‌ धेरै साहस देखाउँदैछन्‌। १५  यो कुरा साँचो हो, कि कसै-कसैले ईर्ष्या र शत्रुताको भाव राखेर ख्रीष्टबारे प्रचार गर्दैछन्‌ तर अरूले भने राम्रो मनसायले गर्दैछन्‌। १६  राम्रो मनसायले प्रचार गर्नेहरूले प्रेमको कारण ख्रीष्टबारे बताउँदैछन्‌, किनकि सुसमाचारको पक्षमा खडा हुन म यहाँ छु भनेर तिनीहरूलाई थाह छ। १७  तर शुद्ध मनसायले नभई ईर्ष्या र शत्रुताको भाव राखेर प्रचार गर्नेहरूचाहिं म बन्धनमा रहेको बेला मेरो सङ्कष्ट अझ बढाउन सकिन्छ भन्ठानेर त्यसो गर्छन्‌। १८  त्यसो भए के भयो त? खराब मनसायले होस् वा सही मनसायले, जसरी भए पनि प्रचार त ख्रीष्टकै हुँदैछ अनि यसमा म रमाउँछु। भनौं भने, म रमाइरहने पनि छु, १९  किनकि मलाई थाह छ, तिमीहरूको उत्कट बिन्ती र येशू ख्रीष्टलाई दिनुभएको पवित्र शक्तिद्वारा मेरो उद्धार हुनेछ। २०  अनि म तीव्र इच्छा र आशा गर्छु, कि म कुनै पनि कुरामा सर्माउन नपरोस् तर जसरी अहिलेसम्म बोल्दै आएको छु, त्यसरी नै निर्धक्क भई साहसका साथ बोलेर मेरो शरीरद्वारा ख्रीष्टको महिमा होस्, चाहे म बाँचूँ या मरूँ। २१  मेरो सन्दर्भमा भन्नुपर्दा, यदि म बाँचें भने ख्रीष्टको निम्ति बाँच्छु र यदि मरें भने पनि त्यो मेरै फाइदाको निम्ति हो। २२  जबसम्म म यस शरीरमा हुनेछु, मैले आफ्नो कामद्वारा अझ धेरै फल फलाउन सक्नेछु। तर म के रोज्छु, सो थाह दिन्नँ। २३  यी दुईमध्ये एउटा रोज्ने दबाब ममाथि छ तर म भने छुटकारा पाएर ख्रीष्टसँगै हुने इच्छा गर्छु, किनकि यो पक्कै पनि सबैभन्दा उत्तम हो। २४  तथापि, तिमीहरूको खातिर म यस शरीरमा रहनु झनै आवश्यक छ। २५  यस कुरामा विश्वस्त भएकोले मलाई थाह छ, म शरीरमा रहनेछु अनि तिमीहरूको प्रगति र तिमीहरूको विश्वासद्वारा पाइने आनन्दका लागि तिमीहरू सबैसित रहनेछु। २६  यसरी म फेरि तिमीहरूकहाँ उपस्थित हुँदा ख्रीष्ट येशूमा तिमीहरूको खुसी प्रशस्त हुँदै जाओस्। २७  ख्रीष्टसित सम्बन्धित सुसमाचारको योग्य जीवन बिताओ, ताकि चाहे म तिमीहरूकहाँ आएर तिमीहरूलाई भेटूँ वा अनुपस्थित नै रहूँ, मैले यो सुन्न पाऊँ, कि तिमीहरू दृढ छौ अनि एउटै सोचाइ र एकै ज्यानका* भएर सुसमाचारमा आधारित विश्वासको निम्ति एकजुट भई प्रयत्न गरिरहेका छौ २८  अनि आफ्ना विरोधीहरूसित रत्तीभर डराएका छैनौ। तिनीहरू नाश हुनेछन्‌ तर तिमीहरूको भने उद्धार हुनेछ भन्ने प्रमाण यही हो। यस्तो सङ्केत परमेश्वरले नै दिनुभएको हो। २९  किनभने ख्रीष्टको खातिर तिमीहरूलाई यो सम्मान दिइयो, कि तिमीहरूले उहाँमाथि विश्वास राख्ने मात्र होइन तर उहाँको खातिर दुःख पनि भोग्नुपर्छ। ३०  मैले जे-जस्तो सङ्घर्ष गरेको तिमीहरूले देख्यौ र अहिले सुनिरहेका छौ, तिमीहरूले पनि त्यस्तै सङ्घर्ष गरिरहेका छौ।

फुटनोटहरू

फिलि १:१ * ग्रीकमा  “इपिस्कोपोइस।”
फिलि १:१ * ग्रीकमा “डियाकोनोइस।”
फिलि १:२७ * ग्रीकमा पुस्खे। अतिरिक्त लेख ७क हेर्नुहोस्।