सीधै सामग्रीमा जाने

सीधै दोस्रो तहको मेनुमा जाने

सीधै विषयसूचीमा जाने

यहोवाका साक्षीहरू

नेपाली

अनलाइन बाइबल | पवित्र बाइबल—नयाँ संसार अनुवाद

प्रकाश ५:१-१४

 अनि मैले सिंहासनमा बस्नुहुनेको दाहिने हातमा एउटा मुठा देखें। त्यस मुठाको भित्र र बाहिर दुवैपट्टि लेखिएको थियो अनि त्यसलाई सात वटा लाहाछाप लगाएर टम्म बन्द गरिएको थियो।  अनि मैले एक जना बलवान्‌ स्वर्गदूत देखें, जसले चर्को सोरमा यस्तो घोषणा गरिरहेका थिए: “यो मुठाको लाहाछाप हटाउन र यसलाई खोल्न को योग्य छ?”  तर त्यो मुठा खोल्न र पढ्‌न सक्ने कोही, न स्वर्गमा न पृथ्वीमा न त पृथ्वीमुनि नै पाइयो।  त्यो मुठा खोल्न र पढ्‌न योग्य कोही नपाइएकोले म धुरुधुरु रोएँ।  तर एल्डरहरूमध्ये एक जनाले मलाई भने: “नरोऊ। हेर, यहूदाको कुलको सिंह, दाऊदको जराले विजय हासिल गर्नुभएको छ; त्यसैले उहाँ त्यो मुठाको सात वटा लाहाछाप हटाउन र त्यसलाई खोल्न योग्य हुनुहुन्छ।”  अनि काटिएको जस्तो देखिने एउटा थुमालाई सिंहासनको बीचमा, चार वटा करूबको बीचमा र एल्डरहरूको बीचमा उभिरहेको मैले देखें। त्यस थुमाको सात वटा सिङ र सात वटा आँखा थिए। ती आँखाहरूको अर्थ परमेश्वरको सात वटा पवित्र शक्ति हो, जुन सारा पृथ्वीमा पठाइएको छ।  तब थुमाले अघि बढेर सिंहासनमा बस्नुहुनेको दाहिने हातबाट त्यो मुठा तुरुन्तै लिए।  जब तिनले त्यो मुठा लिए, तब चार वटा करूब र चौबीस जना एल्डर ती थुमासामु घोप्टो परे। प्रत्येक एल्डरसित एउटा वीणा थियो र तिनीहरूसित धूपले भरिएको सुनका कचौराहरू पनि थिए। अनि त्यो धूपको अर्थ पवित्र जनहरूका प्रार्थनाहरू हो।  तिनीहरूले यसरी एउटा नयाँ गीत गाए: “तपाईं त्यो मुठा लिन र त्यसको लाहाछाप हटाउन योग्य हुनुहुन्छ, किनकि तपाईं काटिनुभएको थियो र आफ्नो रगतद्वारा तपाईंले हरेक कुल, भाषा, जाति र राष्ट्रका मानिसहरूलाई परमेश्वरको निम्ति किन्नुभयो १०  र हाम्रा परमेश्वरको लागि राजा र पुजारी बनाउनुभयो अनि तिनीहरूले राजाको रूपमा पृथ्वीमाथि शासन गर्नेछन्‌।” ११  अनि सिंहासन, करूबहरू र एल्डरहरूको वरिपरि मैले धेरै स्वर्गदूत देखें र तिनीहरूको सोर सुनें। ती स्वर्गदूतहरूको सङ्‌ख्या लाखौं-लाख, करोडौं-करोड थियो। १२  तिनीहरू चर्को सोरमा यसो भन्दैथिए: “थुमा, जो काटिनुभएको थियो, उहाँ शक्ति, धन, बुद्धि, बल, आदर, महिमा र प्रशंसा पाउन योग्य हुनुहुन्छ।” १३  अनि स्वर्गमा, पृथ्वीमा, पृथ्वीमुनि र समुद्रमा भएका हरेक जीवजन्तु र सबै थोकहरूले यसो भनिरहेको मैले सुनें: “प्रशंसा, आदर, महिमा र पराक्रम सदासर्वदा सिंहासनमा बस्नुहुने र थुमाकै होस्।” १४  तब चार वटा करूबले भनिरहे: “आमिन!” अनि एल्डरहरूले घोप्टो परेर परमेश्वरको उपासना गरे।

फुटनोटहरू