अशक्तता सेटिङ

भाषा रोज्ने

सीधै दोस्रो तहको मेनुमा जाने

सीधै विषयसूचीमा जाने

सीधै सामग्रीमा जाने

यहोवाका साक्षीहरू

नेपाली

अनलाइन बाइबल

पवित्र बाइबल—नयाँ संसार अनुवाद

प्रकाश २:१-२९

 “एफिससको मण्डलीको दूतलाई लेख: आफ्नो दाहिने हातमा सात वटा तारा लिने र सुनका सात वटा पानसबीच हिंड्नेले यसो भन्नुहुन्छ, २  ‘मलाई तिम्रा कामहरू, तिम्रो परिश्रम र सहनशीलता थाह छ। अनि मलाई यो पनि थाह छ, तिमी खराब मानिसहरूलाई सहँदैनौ र तिमीले त्यस्ता मानिसहरूलाई जाँचेर फटाहा पायौ, जो आफूलाई प्रेषितहरू* हौं भन्छन्‌ तर वास्तवमा होइनन्‌। ३  तिमीले सहनशीलता पनि देखाइरहेका छौ र मेरो नामको खातिर धेरै कष्ट सहेका छौ, तैपनि थाकेका छैनौ। ४  तथापि, तिमीविरुद्ध मसित यो कुरा छ, कि तिमीसित पहिले जुन प्रेम थियो, अहिले त्यो छैन। ५  “ ‘त्यसैले कहाँबाट तिमी खसेका हौ, त्यो सम्झ र पश्‍चात्ताप गर अनि तिमीले पहिले गरेका कामहरू गर; नत्र त म तिमीकहाँ आउँदैछु र तिमीले पश्‍चात्ताप गरेनौ भने तिम्रो पानस त्यसको ठाउँबाट हटाइदिनेछु। ६  तैपनि तिमीसित यो एउटा राम्रो कुरा छ, तिमी निकोलाउस गुटका कामहरूलाई घृणा गर्छौ, जसलाई म पनि घृणा गर्छु। ७  पवित्र शक्तिले मण्डलीहरूलाई के भन्छ, जसको कान छ, उसले सुनोस्: जसले विजय हासिल गर्छ, उसलाई म जीवनको रूखको फल खान दिनेछु, जुन परमेश्वरको प्रमोदवनमा छ।’ ८  “अनि स्मर्नाको मण्डलीको दूतलाई लेख: जो ‘पहिलो र अन्तिम’ हुनुहुन्छ अनि जो मरेर फेरि जीवित हुनुभयो, उहाँ यसो भन्नुहुन्छ, ९  ‘मलाई तिम्रो सङ्कष्ट र गरिबी थाह छ (तर तिमी धनी छौ) अनि त्यस्ता मानिसहरूले तिम्रो निन्दा गरेको पनि मलाई थाह छ, जो आफूलाई यहूदी भन्छन्‌ तर वास्तवमा यहूदी नभई सैतानको दल* हुन्‌। १०  तिमीले भोग्न लागेका कुराहरूदेखि नडराऊ। हेर, तिमीहरूको पूर्ण रूपमा जाँच होस् र तिमीहरूले दस दिन सङ्कष्ट भोगोस् भनेर दियाबलले* तिमीहरूमध्ये कोही-कोहीलाई झ्यालखानामा हाल्नेछ। मृत्युसम्मै आफूलाई विश्वासी साबित गर अनि म तिमीलाई जीवनको मुकुट * दिनेछु। ११  पवित्र शक्तिले मण्डलीहरूलाई के भन्छ, जसको कान छ, उसले सुनोस्: जसले विजय हासिल गर्छ, उसलाई दोस्रो मृत्युले कुनै हालतमा हानि गर्नेछैन।’ १२  “अनि पर्गाममको मण्डलीको दूतलाई लेख: धारिलो अनि लामो दुईधारे तरबार लिनेले यसो भन्नुहुन्छ, १३  ‘मलाई थाह छ, तिमी सैतानको सिंहासन भएकै ठाउँमा बसिरहेका छौ, तैपनि तिमीले मेरो नाम बलियोसित पक्रिरहेका छौ अनि ती दिनमा समेत तिमीले ममाथिको आफ्नो विश्वास त्यागेनौ, जब मेरो विश्वासी साक्षी एन्टिपासलाई तिमीहरूकै सहरमा मारियो, जहाँ सैतानको बासस्थान छ। १४  “ ‘तथापि, तिमीविरुद्ध मसित केही कुरा छ। तिमीमाझ यस्ता मानिसहरू छन्‌, जसले बालामको शिक्षा बलियोसित पक्रिरहेका छन्‌। मूर्तिलाई बलि चढाइएका थोकहरू खान र अवैध यौनसम्बन्ध राख्न इस्राएलीहरूलाई सुऱ्याएर पापको पासोमा फसाउने तरिका तिनले बालाकलाई सिकाएका थिए। १५  त्यसैगरि, तिमीमाझ निकोलाउस गुटको शिक्षा बलियोसित पक्रनेहरू पनि छन्‌। १६  त्यसकारण पश्‍चात्ताप गर; नत्र त म छिट्टै तिमीकहाँ आउँदैछु र मेरो मुखको लामो तरबारले तिनीहरूसित लडाइँ गर्नेछु। १७  “ ‘पवित्र शक्तिले मण्डलीहरूलाई के भन्छ, जसको कान छ, उसले सुनोस्: जसले विजय हासिल गर्छ, उसलाई म छिपाइएको मन्न अलिकति दिनेछु अनि उसलाई म सेतो पत्थर दिनेछु। त्यो पत्थरमा एउटा नयाँ नाम लेखिएको हुनेछ, जुन नाम त्यो पत्थर पाउनेबाहेक अरू कसैलाई थाह हुँदैन।’ १८  “अनि थिआटीराको मण्डलीको दूतलाई लेख: परमेश्वरको छोरा, जसको आँखा आगोको ज्वालाजस्ता र जसको पाउ शुद्ध तामाजस्ता छन्‌, उहाँ यसो भन्नुहुन्छ, १९  ‘मलाई तिम्रा कामहरू अनि तिम्रो प्रेम, विश्वास, सेवा र सहनशीलता थाह छ। अनि तिमीले हालै गरेका कामहरू पहिलेका भन्दा धेरै छन्‌ भनेर पनि मलाई थाह छ। २०  “ ‘तथापि, तिमीविरुद्ध मसित यो कुरा छ, कि तिमी त्यस स्त्री ईजेबेललाई सहन्छौ, जसले आफूलाई भविष्यवक्ता भन्छे अनि मेरा दासहरूलाई अवैध यौनसम्बन्ध राख्न र मूर्तिलाई बलि चढाइएका थोकहरू खान सिकाउँछे र यसरी तिनीहरूलाई बहकाउँछे। २१  मैले त्यसलाई पश्‍चात्ताप गर्ने समय दिएँ तर त्यो आफूले राखेको अवैध यौनसम्बन्धको लागि पश्‍चात्ताप गर्न चाहँदिन। २२  हेर, मैले त्यसलाई ओछ्यानबाट उठ्नै नसक्नेगरि बिरामी बनाउन आँटेको छु अनि ज-जसले त्यससित यौनसम्बन्ध* राख्छन्‌, तिनीहरूले त्यसको जस्ता कामहरू गरेकोमा पश्‍चात्ताप गरेनन्‌ भने तिनीहरूलाई पनि म ठूलो सङ्कष्टमा पार्नेछु। २३  अनि त्यसका छोराछोरीहरूलाई म घातक महामारीले मार्नेछु ताकि सबै मण्डलीहरूलाई यो थाह हुनेछ, कि मिर्गौला र मन* जाँच्ने म नै हुँ अनि म हरेकलाई उसको कामअनुसार प्रतिफल दिनेछु। २४  “ ‘तर थिआटीरामा भएका बाँकी अरू, जसले यो शिक्षा स्वीकारेका छैनन्‌ अर्थात्‌ तिनीहरूकै शब्दमा भन्ने हो भने जसलाई “सैतानका गहिरा कुराहरू” थाह छैन, तिनीहरू सबैलाई म भन्छु: तिमीहरूमाथि म अरू कुनै बोझ थप्दिनँ। २५  बस् यति मात्र गर, तिमीहरूसित जे छ, म नआउन्जेल त्यसलाई पक्रिराख। २६  जसले विजय हासिल गर्छ र मैले अह्राएका कामहरू अन्तसम्म गरिरहन्छ, म उसलाई मानिसहरूमाथि शासन गर्ने अख्तियार दिनेछु। २७  अनि उसले मानिसहरूमाथि फलामको डन्डाले शासन गर्नेछ र तिनीहरूलाई माटोका भाँडाहरूलाई जस्तै चकनाचूर पार्नेछ। मैले पनि आफ्नो बुबाबाट यही अख्तियार पाएको छु। २८  उसलाई म बिहानको तारा दिनेछु। २९  पवित्र शक्तिले मण्डलीहरूलाई के भन्छ, जसको कान छ, उसले सुनोस्।’

फुटनोटहरू

प्रका २:२ * वा, “पठाइएको जन।” ग्रीकमा “अपोस्टोलोस।”
प्रका २:९ * शाब्दिक, “सभाघर।”
प्रका २:१० * ग्रीकमा “दियाबोलोस,” जसको अर्थ हो “निन्दक।”
प्रका २:१० * वा, “पुरस्कार।”
प्रका २:२२ * यहाँ चलाइएको ग्रीक शब्दले आफ्नो पति वा पत्नीबाहेक अरूसित राखिएको यौनसम्बन्धलाई बुझाउँछ।
प्रका २:२३ * “मिर्गौला” अर्थात्‌ मानिसको गहिरो भावना र “मन” अर्थात्‌ मानिसको भित्री रूप।