अशक्तता सेटिङ

भाषा रोज्ने

सीधै दोस्रो तहको मेनुमा जाने

सीधै विषयसूचीमा जाने

सीधै सामग्रीमा जाने

यहोवाका साक्षीहरू

नेपाली

अनलाइन बाइबल

पवित्र बाइबल—नयाँ संसार अनुवाद

प्रकाश १७:१-१८

१७  अनि सात वटा कचौरा लिएका सात वटा स्वर्गदूतमध्ये एउटा आएर यसो भन्दै मसित कुरा गरे: “आऊ, धेरै पानीहरूमाथि बस्ने त्यो महावेश्यामाथि भएको इन्साफ म तिमीलाई देखाउनेछु, २  जससित पृथ्वीका राजाहरूले अवैध यौनसम्बन्ध* राखे अनि पृथ्वीमा बास गर्नेहरूचाहिं त्यसको अवैध यौनसम्बन्धको मद्य पिएर मात्तिए।” ३  तब तिनले मलाई पवित्र शक्तिद्वारा उजाडस्थानमा लगे। अनि मैले एउटी स्त्रीलाई चहकिलो रातो रङ्गको जङ्गली जनावरमाथि बसिरहेकी देखें। त्यो जनावरमा परमेश्वरको निन्दा हुने नामै नाम लेखिएको थियो अनि त्यसको सात वटा टाउका र दस वटा सिङ थिए। ४  त्यस स्त्रीले बैजनी र चहकिलो रातो रङ्गको लुगा लगाएकी थिई अनि सुन, बहुमूल्य रत्न र मोतीले त्यो सिंगारिएकी थिई। त्यसको हातमा सुनको एउटा कचौरा थियो, जुन घिनलाग्दा थोकहरू र त्यसको अवैध यौनसम्बन्धका अशुद्ध थोकहरूले भरिएको थियो। ५  अनि त्यसको निधारमा एउटा रहस्यमय नाम लेखिएको थियो: “महान्‌ बेबिलोन, वेश्याहरू र पृथ्वीका घिनलाग्दा थोकहरूकी आमा।” ६  मैले त्यो स्त्री पवित्र जनहरूको रगत अनि येशूका साक्षीहरूको रगत पिएर मात्तिएकी देखें। हो, त्यसलाई देखेर म असाध्यै आश्चर्यचकित भएँ। ७  त्यसैले ती स्वर्गदूतले मलाई भने: “तिमी किन आश्चर्यचकित हुन्छौ? म तिमीलाई त्यस स्त्रीको र त्यसलाई बोकेर हिंड्ने त्यस जङ्गली जनावरको रहस्य बताउनेछु, जसको सात वटा टाउका र दस वटा सिङ छ: ८  तिमीले देखेको जङ्गली जनावर पहिले थियो, अहिले छैन तर अगाध खाडलबाट निस्कनै लागेको छ र त्यसको विनाश हुनेछ। अनि कसरी त्यो जङ्गली जनावर पहिले थियो, अहिले छैन तर फेरि उपस्थित हुनेछ, त्यो देखेर पृथ्वीमा बास गर्नेहरू आश्चर्यचकित हुँदै त्यसको तारिफ गर्नेछन्‌। तथापि, तिनीहरूको नाम संसारको प्रारम्भदेखि* जीवनको पुस्तकमा लेखिएको छैन। ९  “ज्ञान र बुद्धि चाहिने यस्तै बेला हो: सात वटा टाउकाको अर्थ सात वटा पर्वत हो, जसको टुप्पोमा त्यो स्त्री बसछे। १०  अनि त्यसको अर्थ सात जना राजा हो: पाँच जनाको पतन भइसक्यो, एक जना अहिले अस्तित्वमा छ अनि अर्को एक जनाचाहिं अस्तित्वमै आएको छैन तर त्यो आएपछि केही समय रहनै पर्छ। ११  त्यो जङ्गली जनावर, जो पहिले थियो, अहिले छैन, त्यो आफै आठौं राजा पनि हो तर त्यो ती सात राजाहरूबाट निस्केको हो र त्यसको विनाश हुनेछ। १२  “अनि तिमीले देखेको दस वटा सिङको अर्थ दस जना राजा हो, जसले अहिलेसम्म राज्य पाएका छैनन्‌ तर तिनीहरूले एकछिनको* लागि त्यो जङ्गली जनावरसँगसँगै राजाको रूपमा अख्तियार पाउनेछन्‌। १३  तिनीहरू सबैको सोच एउटै छ। त्यसैले तिनीहरूले आफ्नो शक्ति र अख्तियार त्यस जङ्गली जनावरलाई दिनेछन्‌। १४  तिनीहरूले थुमासित युद्ध गर्नेछन्‌ तर थुमा प्रभुहरूका महाप्रभु र राजाहरूका महाराजा भएको हुनाले तिनीहरूमाथि विजय हासिल गर्नेछन्‌। साथै, बोलाइएका, चुनिएका र विश्वासीहरूले पनि विजय हासिल गर्नेछन्‌, जो थुमासँग छन्‌।” १५  अनि ती स्वर्गदूतले मलाई भने: “तिमीले देखेका पानीहरू, जहाँ त्यो वेश्या बसिरहेकी छे, त्यसको अर्थ मानिस, भीड, राष्ट्र र भाषाहरू हो। १६  तिमीले देखेको ती दस वटा सिङ र त्यो जङ्गली जनावरले त्यस वेश्यालाई घृणा गर्नेछन्‌ र त्यसलाई उजाड र नाङ्गो पार्नेछन्‌ अनि त्यसको मासु खानेछन्‌ र त्यसलाई आगोमा भस्म पार्नेछन्‌। १७  किनकि परमेश्वरले आफ्नो सोच पूरा गर्न तिनीहरूको मनमा यो कुरा हालिदिनुहुनेछ। तिनीहरूले आफ्नो साझा सोच पूरा गर्न आफ्नो राज्य तबसम्मको लागि त्यस जङ्गली जनावरलाई दिनेछन्‌, जबसम्म परमेश्वरले भन्नुभएको वचन पूरा हुँदैन। १८  अनि तिमीले देखेको त्यस स्त्रीको अर्थ त्यो ठूलो सहर हो, जसले पृथ्वीका राजाहरूमाथि राज गर्छ।”

फुटनोटहरू

प्रका १७:२ * अतिरिक्त लेख ४ हेर्नुहोस्।
प्रका १७:८ मत्ती २५:३४ को फुटनोट हेर्नुहोस्।
प्रका १७:१२ * शाब्दिक, “एक घण्टाको।”