अशक्तता सेटिङ

भाषा रोज्ने

सीधै दोस्रो तहको मेनुमा जाने

सीधै विषयसूचीमा जाने

सीधै सामग्रीमा जाने

यहोवाका साक्षीहरू

नेपाली

अनलाइन बाइबल

पवित्र बाइबल—नयाँ संसार अनुवाद

प्रकाश १:१-२०

 येशू ख्रीष्टद्वारा भएको प्रकाश, जो छिट्टै हुन लागेका कुराहरू आफ्ना दासहरूलाई प्रकट गर्न परमेश्वरले उहाँलाई दिनुभयो। अनि येशूले आफ्नो स्वर्गदूत पठाएर परमेश्वरको दास* यूहन्नालाई चिन्हहरूद्वारा ती प्रकट गर्नुभयो, २  अनि तिनले आफूले देखेका सबै कुराको अर्थात्‌ परमेश्वरले दिनुभएको वचनको अनि येशू ख्रीष्टले दिनुभएको साक्षीको गवाही दिए। ३  आनन्दित हो त्यो मानिस, जसले यस भविष्यवाणीका वचनहरू ठूलो सोरले पढेर सुनाउँछ; अनि आनन्दित हुन्‌ ती मानिसहरू, जसले ती सुन्छन्‌ र जसले ती पालन गर्छन्‌, किनकि तोकिएको समय नजिकै छ। ४  एसिया* प्रान्तका सात वटा मण्डलीलाई यूहन्नाको सन्देश: “जो हुनुहुन्छ, जो हुनुहुन्थ्यो अनि जो आउँदै हुनुहुन्छ,” उहाँको अनि उहाँको सिंहासनसामु भएका सात वटा पवित्र शक्तिको असीम अनुग्रह अनि शान्ति तिमीहरूमाथि रहोस्, ५  साथै, येशू ख्रीष्टको पनि, जो “विश्वासी साक्षी,” “मृत्युबाट सबैभन्दा पहिले ब्यूँतनुभएको जेठो सन्तान” अनि “पृथ्वीका राजाहरूका शासक” हुनुहुन्छ। जसले हामीलाई प्रेम गर्नुहुन्छ र जसले आफ्नै रगतद्वारा हामीलाई हाम्रो पापको बन्धनबाट मुक्त गर्नुभयो ६  अनि जसले हामीलाई आफ्नो परमेश्वर तथा बुबाको लागि राजा र पुजारी बनाउनुभयो; हो, उहाँकै महिमा र पराक्रम सदासर्वदा रहोस्। आमिन। ७  हेर, उहाँ बादलहरूका साथ आउँदै हुनुहुन्छ। तब हरेक आँखाले अनि उहाँलाई घोच्नेहरूले उहाँलाई देख्नेछन्‌ र पृथ्वीका सबै कुलहरूले उहाँको कारण विलाप गर्दै आफ्नो छाती पिट्नेछन्‌। हो, यो पक्कै हुनेछ। आमिन। ८  यहोवा परमेश्वर, “जो हुनुहुन्छ, जो हुनुहुन्थ्यो, जो आउँदै हुनुहुन्छ अनि जो सर्वशक्तिमान्‌ हुनुहुन्छ,” उहाँ भन्नुहुन्छ: “अल्फा र ओमेगा* म नै हुँ।” ९  म यूहन्ना, तिमीहरूको भाइ अनि येशूको चेला भएको नाताले तिमीहरूसँगसँगै सङ्कष्ट भोग्ने, राज्य गर्ने अनि धैर्य धारण गर्ने मानिस हुँ। परमेश्वरको विषयमा बोलेकोले अनि येशूको साक्षी दिएकोले पत्मोस नाम गरेको टापुमा म पुगें। १०  पवित्र शक्तिको प्रेरणाद्वारा म प्रभुको दिनमा पुगें र मैले मेरो पछाडि बिगुल फुकेको जस्तो चर्को आवाज सुनें। ११  त्यो आवाजले मलाई यसो भनिरहेको थियो: “तिमी जे देख्छौ, एउटा मुठामा लेख अनि यी सात वटा मण्डलीलाई पठाऊ: एफिसस, स्मर्ना, पर्गामम, थिआटीरा, सार्डिस, फिलाडेल्फिया र लाओडिसिया।” १२  मसित बोल्ने आवाज कसको रहेछ भनेर हेर्न म पछाडि फर्कें। अनि फर्केर हेर्दा मैले सुनको सात वटा पानस र १३  ती पानसहरूको बीचमा मानिसको छोराजस्तो कोही एक जनालाई देखें। तिनले पाउसम्मै पुग्ने लामो लुगा लगाएका थिए अनि तिनको छातीमा सुनको फित्ता बाँधिएको थियो। १४  यसबाहेक, तिनको शिरको केश सेतो ऊन अनि हिउँजस्तो सेतो थियो र तिनको आँखा आगोको ज्वालाजस्ता थिए, १५  तिनको पाउ आगोको भट्टीमा चम्किरहेको शुद्ध तामाजस्तै थियो अनि आवाजचाहिं बगिरहेको पानीको गर्जनजस्तै थियो। १६  तिनको दाहिने हातमा सात वटा तारा थिए र तिनको मुखबाट धारिलो अनि लामो दुई धारे तरबार निस्किरहेको थियो। तिनको मुहार चम्किरहेको घामजस्तै तेजिलो थियो। १७  तिनलाई देखेर म मुर्दाझैं अचेत भएँ र तिनको पाउमा पछारिएँ। अनि तिनले आफ्नो दाहिने हात ममाथि राखेर भने: “नडराऊ, किनकि पहिलो र अन्तिम १८  अनि जीवित म नै हुँ। म मरेको थिएँ तर हेर, म सधैंका लागि जीवित भएको छु। अनि मसित मृत्यु र चिहानका* साँचाहरू छन्‌। १९  त्यसैले तिमीले जे देख्यौ, अहिले जे भइरहेको छ, अनि यसपछि जे हुनेछ, ती सबै कुरा लेख। २०  तिमीले मेरो दाहिने हातमा देखेको सात वटा तारा अनि सुनका सात वटा पानसको पवित्र रहस्य यही हो: सात वटा ताराको अर्थ सात वटा मण्डलीका दूतहरू हो अनि सात वटा पानसको अर्थचाहिं सात वटा मण्डली हो।

फुटनोटहरू

प्रका १:१ * वा, “आफ्नो दास।”
प्रका १:४ प्रेषित २:९ को फुटनोट हेर्नुहोस्।
प्रका १:८ * अल्फा र ओमेगा ग्रीक वर्णमालाका पहिलो र अन्तिम अक्षर हुन्‌।
प्रका १:१८ * ग्रीकमा “हेडिज।” अतिरिक्त लेख ८ हेर्नुहोस्।