Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 UZIVI HWO KARE HUNOSHANDA MBHERA NA NYAMASI UNO

Regereranyi no Mwoyo Wese

Regereranyi no Mwoyo Wese

CIAMBI CO BHAIBHERI: ‘[“Ngo mwoyo wese,” Shanduro yeNyika Itsva], mecikungurirana. kudari aripo ana ciricese no mudoni wake. Regererananyi inga bzaakamuregerera [Jehovha].’​—VaKolosi 3:13.

Izvi zvinoda kurevenyi? Mu Bhaibheri, cishaishi cinoezanisihwa no zigava zve kuregerera kunoezanisihwa no kuregerera zigava. (Luka 11:4) Bhuku rimweni rinonanga kuti mu Matahwa, gama ro cigiriki rakasandujwaya kuti “kuregerera” rinoreva “kuregerera zigava ngo kutama kurikhumbusazve.” Ngo kudaro, patinosunga kuregerera ari wese watishaishira, ativeterizve ciri cese kwaari. Kuregerera kwedu akurevi kuti itusu tiri kudakajihwa ngo muitiro wakashata kana tinorerusa zvakashata zvataitihwaya. Kusiyapo izvo, itusu tinonga tatema civaringo co kutama kuviga bundu, pikija hazvo tinonga tino “ciri cese” no mundhu wiya.

Ngenyi zvinoshanda nyamasi uno? Inga vandhu vacikazivi kukwana, tese tinoshaisha. (VaRoma 3:23) Ngo kudaro, zvakanaka kuti tive vakapeamira pa kuda kuregerera vamweni, ngo kuti pa nguva iri yese tinozodavo kuti vamweni vatiregerere. Kusiyapo izvi, patinoregerera vamweni, itusu tinobesereka pacedu. Kuitisa kudini?

Patinoramba tino ushungu kana kuviga bundu​—totama kuregerera​—tinojikhuvaza pacedu. Murangariro jondhojo jicikabeseri, jingatitorera mudakaro, jobzinyirira upenyu hwedu zve tova takasuruvara. Zvingatiitavo kuti tive pa ngozi yo kuva no zvineso zvo uhomi. Ripoti iri mu Journal of the American College of Cardiology, ya Dhokodhea Yoichi Chida no ya Andrew Steptoe, uwo ari Mujijisi wo Psikorogia, yakavonesa mbhejiso yo kuti: “Zvawanika wari zvinovonisa kubatana kunokhuvaza ko ushungu no cizondo no ndhendha yo mwoyo inozwi CHD [doença coronária].”

Ngo divi rimweni vonanyi zvinodakajisa zvinoviiswa ngo kuregerera. Patinoregerera vamweni ngo mwoyo wese, tinobvikira rubatano no runyararo, ngo kudaro, tinonga tecingwarira ushoni ushamwari hwedu no vamweni. Zvinosisira maningi ngo zvo kuti, tinokhombija kuva vatavejeri va Mwari, uwo anoregerera no mwoyo wese vashaishi vanokhauya zve anovetera kuti tiregererevo vamweni.​—Marco 11:25; VaEfeso 4:32; 5:1.