Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 MUSORO WO REVHISTA | NGENYI JESU WAKATAMBUJIKA ZVE WOFA?

Zvakaitikadi Kamare Here?

Zvakaitikadi Kamare Here?

Mu cipepo co mu gore ro 33 N.V.Y., Jesu mu Nazareta wakaurawa. Wakapumbhwa kuti waicengeja vandhu, wotakwa maningi zve wokohomehwa pa danda. Kufa kwake kwaisuruvarisa maningi. Asi Mwari wakamuviisazve kuupenyu, zve 40 o njiku jakazotevera, Jesu wakakhwira mugore.

Ndhorondho ii tinoiwana mu Mavhangeri marongomuna o Matahwa o ciKristu o ciGiriki, kazinji anodanijwa kuti Testamento Imbza. Zviro izvo zvakaitikadi kamare here? Mubvunjo uwo unosisira zve i mukuru. Kudari azvizivi kuitika, gonda ro ciKristu arina shwiro zve vetero yo kupona mu Paradhiso kwenda no kwenda asipi ciro, kuciripi kurota hako. (1 VaKorinto 15:14) Ngo divi rimweni, kudari zviitiko izvo zvakaitikadi kamare, kuna vetero yakanaka maningi ku mushovo wese wo vandhu, yokuti mungaibvunjavo vamweni. Ngokudaro, zvinonangwa mu Mavhangeri ndizvona kana ngo zvokunyepa?

ZVAKAITIKARI ZVINOTATIJENYI

Mukusiyana no kurangarijira basi, zvakatahwa mu Mavhangeri zvinokhombija zviitiko zvakaitikadi kamare no maitikiro ozvakaitika ndiona. Inga muezaniso, Mavhangeri akazara ngo mazina o ndau jokadi kamare, zinji jakona jingatoendiwa koobvakacihwa nyamasi uno. Iwona anobhuya ngo pamusoro po vandhu kamare, kuvepo kwavo kwakanangwavo ngo vatari vo ndhorondho vo nyika.​—Luka 3:1, 2, 23.

 Jesu pacake wakanangwa ngo vatari vo nyika vo zana rokutanga no rocipiri ro makore. * Mafiro ake, enga zvaanonangwa mu Mavhangeri, anozwirana no maurairo o vo kuRoma pa mukuvowo. Kunja kwa izvi, zviitikozvo zvainangwa ngo maitiro okuva shwiro huruwane no yokadi kamarez​—pikija zvaivoneka kuti azvikwanisiki ngo vajiji vamweni va Jesu. (Mateu 26:56; Luka 22:24-26; Johani 18:10, 11) Zvese izvi zvinopa mathangwe akavanga anotatijwa ngo vatari vo Mavhangeri kuti vaenga vakagondeka zve vakatara zvokadi kamare ngo pamusoro pa Jesu.

TINGANANGENYI NGO KUMUSWA KA JESU

Pikija zvinotendwa kazinji kuti Jesu wakararama zve wofa, vamweni vanophikiza kumuswa kwake. Pikija no vapostori vake avazivi kutenda povakatanga kubvunjwa kuti ari kuponazve. (Luka 24:11) Kukana-kana kwese kwakapera, asi, ivona no vajiji vamweni vakavona nyakumuswa Jesu pa mukuvo wakasiyana. Zvokadi kamare, pa mukuvo umweni, paenga no vanodarika 500 vakamuvona pamwepo.​—1 VaKorinto 15:6.

Novari pa ngozi yo kukhwekherejwa no kuuraiwa, ngo kucunga kwese vajiji vakatokotesa kumuswa ka Jesu ku vese—no ku ariwese wo vaya vakamuuraya. (Maitiro o Vapostori 4:1-3, 10, 19, 20; 5:27-32) Ngokudaro, vajiji vazinji vaizova no kucunga kudari avacaengepi no cokwadi co kuti Jesu waenga wamuswadi kamare here? Ngo zvokadi kuti kumuswa ka Jesu i simba rinovangisa raenga no maKristu mu nyika yese kare no wari uno.

Zvinonangwa ngo Mavhangeri ngo kufa no kumuswa kwa Jesu zvese zvakatahwa ngo mutovo wakajeka kamare enga ngo zvinodiwa. Kuzviverenga ngo ubhasopa hwese zvinozomukhohwesa kuti zviitiko izvi zvakaitikadi kamare. Kukhohwa kwenyu kunozomuvangisa pomunozwisisa kuti ngenyi izvi zvakaitika. Musoro unotevera unozozvisanangura.

^ ndim. 7 Tasito, wakabahwa mugore ro 55 N.V.Y., wakatara kuti: “Christus kana Kristu kwakabva zina rokuti [maKristu], wakatambujwa maningi mu kutonga ka Tibherio mu nyara jo mutongi wedu, Ponsio Pirato.” Jesu wakanangihwazve ndi Suetonio (muzana ro kutanga ro makore); Josefo mutari wo ndhorondho yo ciJudha (muzana ro kutanga ro makore); no Mujaha Plinio, mutongi wo Bhitinia (muzana ro cipiri ro kutungamira ro makore).