Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

Rubhabhatijo Unodiwa Kuitira Kuva MuKristu

Rubhabhatijo Unodiwa Kuitira Kuva MuKristu

“Rubapatizo hunomuponesa nyamasi.”—1 PEDRU 3:21.

NDUMBO: 52, 41

1, 2. (a) Vabari vamweni vanojizwa kudini vana vavo pavanoda kubhabhatijwa? (b) Ngenyi vese vanoda kubhabhatijwa vanobvunjiswa kuti vapira upenyu hwavo kuna Jehovha? (Vonanyi pikica yo kutanga.)

VABARI va Maria vakavona mwana wavo ecimuka no vamweni vaida kubhabhatijwa. Muiti wo hurukuru wakaita mubvunjo muviri. Maria wakapingura ngo izwi guru zve rinozika. Pakupera kupingura, iyena wakabhabhatijwa.

2 Vabari va Maria vainga vecidada ndiyena ngo kuti wainga wapira upenyu hwake kuna Jehovha zve wobhabhatijwa. Asi zvicito zvaitika izvi, mai wa Maria vainga vecineseka padoko. Ngo kudaro, vakajibvunjisa kudari: ‘Maria asipi mudoko maningi kuti abhabhatijwe here? Kureva kuti iyena anozwisisa kuti zvinorevenyi kupira upenyu hwake kuna Jehovha here? Waidikana kuvetera padoko kuti abhabhatijwe here?’ Vabari vazinji vano rudo, vanojiitavo mubvunjo jakafanana na iji mwana wavo paanoda kubhabhatijwa. (Mucumaeri 5:4) Ngokudaro, cisungo  cinosisira maningi cingaithwa ngo mundhu wese i kupira upenyu hwake kuna Jehovha zve wobhabhatijwa.—Vonanyi bhokiso rinoti: “ Makazvipira Pacenyu Kuna Jehovha Here?

3, 4. (a) Mupostori Pedru anotatijisa kudini kuti rubhabhatijo i ciro cinosisira? (b) Ngenyi Pedru wakaezanisira rubhabhatijo no kuvakwa ko arka ya Nowa?

3 Mupostori Pedru wakaezanisa kubhabhatijwa no kuvakwa ko arka ya Nowa. Iyena wakati: ‘Muezaniso wo rubapatizo huponesa nyamasi, . . . nga uhu.’ (Verenganyi 1 Pedru 3:20, 21.) Iyona yakapa citatijo cakajeka ku vamweni kuti Nowa ngo mwoyo wese waida kuita kuda ka Mwari. Rutendo hwa Nowa hwakaita kuti aite basa raakapuwa ndi Jehovha. Ngo ndava yo rutendo hwake, Jehovha wakamuponesa pamwepo no mbhuri yake pamukuvo wo Ndambi. Pedru waieja kutijijisenyi?

4 Vandhu pavaivona arka vaitenda kuti Nowa wainga no rutendo kuna Mwari. Vandhu pavanovona mundhu acibhabhatijwa, vonoziva kuti iyena wapira upenyu hwake kuna Mwari ngo ndava yo rutendo hwake kuna Kristu wakamuswaya. Mukufananavo na Nowa, vaya vanobhabhatijwa vanodikana kuzwira Mwari zve voita basa ro vakapuwa ndiyena kuti vaite. Inga Jehovha wakaponesa Nowa pa Ndambi, iyena anozoponesa vashandiri vake vakagondeka vakabhabhatijwa paanozoparaja nyika ino yakashata. (Marco 13:10; Apokalipsi 7:9, 10) Zvakajeka kuti, zvinosisira maningi kupira upenyu hwedu kuna Jehovha zve tobhabhatijwa. Zvokadi kamare, kudari mundhu wakanonoka kubhabhatijwa, waizoruza mukana wo kupona no kucingaperi.

5. Zvicinyi zvatinozojija mu musoro uno?

 5 Wari takwanisa kuziva kuti rubhabhatijo i shwiro huru kamare, tinodikana kuziva kupingura mubvunjo mutatu jinoteverari: Bhaibheri rinonangenyi ngo pamusoro po rubhabhatijo? Mundhu acito wabhabhatijwa anodikana kuitenyi? Ngenyi mukuvo wese tinodikana kuceukija kuti rubhabhatijo unosisira maningi patinojijisa vana vedu kana mujiji wo Bhaibheri?

BHAIBHERI RINOJIJISENYI NGO PAMUSORO PO RUBHABHATIJO

6, 7. (a) Rubhabhatijo hwa Johani hwaida kurevenyi? (b) Rubhabhatijo wapi wainga wakasiana no umweni wese zve ngenyi?

6 Mu Bhaibheri, mundhu wokutanga anonangwa kuti waibhabhatija vamweni ndi Johani Mubhabhatiji. (Mateu 3:1-6) Ngenyi vandhu vaiviya kwaari kuti vabhabhatijwe? Ivona vaiita zvondhozvo kuti vatatije kuti vainga vakhauya ngo zvishaishi zvavo, vaitendera kuti avazivi kuzwira Mutemo wa Mosi zve vaikumbira kuregerehwa. Asi rubhabhatijo unosisira maningi wakaitwa ndi Johani wainga no revo yakasiana kamare. Johani wakava no cidakajiso co kubhabhatija Jesu, Mwana wakakwana wa Mwari. (Mateu 3:13-17) Jesu wainga acizivi kushaisha. Aacainga no thangwe ro kukhauya. (1 Pedru 2:22) Waro, ngenyi Jesu wakabhabhatijwa? Wakazviita kuti atatije kuti wainga wakanasiririka kuti ashandise upenyu hwake kuti aite kuda ka Mwari.—Vaheberi 10:7.

7 Jesu paakatanga kucumaera, vajiji vake vakatanga kubhabhatija vamweni. (Johani 3:22; 4:1, 2) Vandhu vondhovo vakabhabhatijwa ngokuti vainga vakhauya mu zvishaishi zvavo zvaiphwanya Mutemo wa Mosi. Asi, Jesu paakafa zve womuswa, viya vaida kuva vajiji vake vaidikana kubhabhatijwa ngo thangwe rakasiana.

8. (a) Ngo wapi mupango wakapa Jesu pasure po kumuswa kwake? (b) Ngenyi maKristu anodikana kubhabhatijwa?

8 Mu gore ro 33, pakupera kumuswa kwake, Jesu wakavereketa ku vandhu vaidarika 500, vanarume, vanakaji zve zvingaita kuti pondhopo paingavo no zvivana. Iyi ingaita nguva yaakananga kudari: “Endanyi, jijisanyi vandhu vese no kuvabapatiza mu zina ra Baba no ro Mwana no ro mujimu mucena, no kuvajijisa kuteveja bzese bzo ndakamutuma.” (Mateu 28:19, 20; 1  VaKorinto 15:6) Jesu wakapangira vateveri vake kuti vaite vajiji. Wese anoda kuva mujiji wake, kana kuthwara “kanga” yake waidikana kubhabhatijwa. (Mateu 11:29, 30) Kuti tishandire Mwari mu njira inomudakajisa, tinodikana kudavira kuti Mwari anoshandisa Jesu kuti akwanirisi cidisiso Cake. Perapo, mundhu angabhabhatijwa wakatendehwa ndi Mwari. Bhaibheri rinazvitatijo zvizinji zvokuti vajiji vo kutanga va Jesu vaiziva kuti zvinosisira maningi kuti mundhu abhabhatijwe. Ivona avacairangarira kuti vaidikana kuimira kuti vazobhabhatijwe mukuvo umweni.—Maitiro o Vapostori 2:41; 9:18; 16:14, 15, 32, 33.

MUCANONOKA KUBHABHATIJWA

9, 10. Zvicinyi zvatinojija ngo pamusoro po rubhabhatijo kubvira ku mwanarume muEtiopi na Sauro?

9 Verenganyi Maitiro o Vapostori 8:35, 36, Shanduro yeNyika Itsva. Umwe mwanarume wakava no gonda ku ciJudha wainga ecienda ku muzi kwake pasure po kunamata mu temberi ku Jerusarema. Ngirozi ya Jehovha yakatuma Firipi kuti aende koomucumaira, zve Firipi wakamujijisa ‘masoko akanaka  ngo pamusoro pa Jesu.’ Mwanarume uwu wakaitenyi? Iyena wakazwisisa kuti zvaisisira maningi kutenda Jesu inga Tenji zve waida kuita zvinoda Jehovha kuti zviitwe ngo maKristu. Ngo kukasika wakabhabhatija.

10 Muezaniso umweni ngo wo mwanarume wo ciJudha anodanwa Sauro. Jinja rese ro ciJudha rainga rakazvipira kuna Mwari, asi Jehovha wakaramba vaJudha ngokuti avacaimuzwira. Sauro waitenda kuti vaJudha vainga vacishandira Mwari mu njira yaimudakajisa, ngokudaro wakateverera maKristu. Asi njiku imweni, nyakumuswa Jesu, uwo waairangarira kuti wainga wakafa, wakavereketa na Sauro naari mugore. Zvicinyi zvakaita Sauro? Iyena ngo kudakara kwese wakatendera besero raibva kuna Anania umwe muKristu wainga mutevereri wa Jesu. Bhaibheri rinoti: ‘Wakamuka, wobhabhatijwa.’ (Maitiro o Vapostori 9:17-19; VaGalàsia 1:14) Pakufamba ko nguva wakaguma pakuzivika inga mupostori Pauro. Vonanyi kuti, ngo kukasika iyena wakazozwisisa kuti Mwari waishandisa Jesu kuti akwanirise kuda kwake, ngokudaro Sauro wakabhabhatijwa.—Verenganyi Maitiro o Vapostori 22:12-16.

Vajiji vo Bhaibheri vanobongesera maningi ngo kujija cokwadi zve vano cido co kuguma pa kubhabhatijwa

11. (a) Zvicinyi zvinoita vajije vo Bhaibheri nyamasi uno kuti vabhabhatijwe? (b) Tinozwa kudini patinovona mundhu acibhabhatijwa?

11 Nyamasi uno, zvakaezana no vajiji vazinji vo Bhaibheri, majaha, vasikane zve madhodha. Ngokuti ivona vano rudo zve vothemba zvinonangwa ngo Bhaibheri, vari kuda ngo simba rese kupira upenyu hwavo kuna Jehovha zve vobhabhatijwa. Zvokadi kamare, hurukuru yo rubhabhatijo inodakajisa magungano edu. Zvapupu zva Jehovha zvinodakara maningi pazvinovona vajiji vo Bhaibheri veciashira cokwadi zve vobhabhatijwa. Vabari vanodakara maningi pavanovona vana vavo vaciitavo zvondhozvo. Mukati mo gore ro basa ro 2017, vandhu vanodarika 284.000 vakabhabhatijwa kuitira kuvonesa kuti vapira upenyu hwavo kuna Jehovha. (Maitiro o Vapostori 13:48) Zvakajeka kuti ivona vanozwisisa zvinodiwa kuitira kuti mundhu abhabhatijwe wova muKristu. Asi zvicinyi zvovanodikana kuita vacito vabhabhatijwa?

12. Vajiji vo Bhaibheri vanodikana kuitenyi vacito vabhabhatijwa?

12 Vajiji vo Bhaibheri vacito vabhabhatijwa, vanodikana kujija cokwadi ngo pamusoro pa Mwari, cidisiso cake no vandhu zve no nyika ino pomwe no zvaakaita kuti aponese mushovo wese wo vandhu. (1 Timoti 2:3-6) Ngokudaro, ivona vanodikana kusakurira rutendo, uwo unozovabesera kuteveja mutemo ja Mwari zve no kutama kuita zvinonyenywa ndiyena. (Maitiro o Vapostori 3:19) Izvi zvinosisira maningi, ngokuti Jehovha aazotenderi kuzvipira ko mundhu anoita zviro zvinonyenywa Ndiyena. (1 VaKorinto 6:9, 10) Asi pano zvakawanda. Vese vaya vanoda kupira upenyu hwavo kuna Jehovha vanodikana  kwenda ku musongano no kucumaera masoko akanaka nguva jese pamwepo no kujijisa vamweni. Izvi zvinodikanwa ku vese vanoda kuva vatevereri va Jesu. (Maitiro o vapostori 1:8) Mujiji anodikana pakutanga kuita zviro zvese zvanangwari. Perapo angapira upenyu hwake kuna Jehovha ngo mukumbiro wo mundhu ega zve wozobhabhatijwa.

ITANYI KUTI VAJIJI VO BHAIBHERI VAVE NO CIDO CO KUBHABHATIJWA

Pamunojijisa vamweni, munopsaka mukana wo kuvabesera kuzwisisa kuti rubhabhatijo unosisira maningi here? (Vonanyi ndima 13)

13. Patinojijisa vamweni, ngenyi tinodikana kuvaceukija kuti vanodikana kubhabhatijwa kuti vave maKristu o kadi-kadi?

13 Patinobesera vana vedu pomwe no vajiji vamweni vo Bhaibheri kuti vaite zviro zvinodikana, tinodikana kuceukija kuti vese vanoda kuva vatevereri vokadi va Jesu vanodikana kubhabhatijwa. Perapo, atizothyi kuvabvunja kusisira ko kuzvipira zve no kubhabhatijwa kudari mukuvo ukaguma. Itusu tinoda kuti vana vedu zve no vajiji vamweni vo Bhaibheri vaenderere mberi zve vagume pa kubhabhatijwa!

14. Ngenyi ativangijiri mundhu kuti abhabhatijwe?

14 Zvokadi kamare, akuna mundhu anodikana kuvangirija, mwana wake kana mujiji wo Bhaibheri kuti abhabhatijwe. Jehovha aavangijiri mundhu kuti amushandire. (1 Johani 4:8) Patinojijisa vamweni, tinodikana kuvabesera kuzwisisa kuti kuva no ushamwari wo mundhu ega na Jehovha kunosisira maningi. Perapo, kudari mujiji wo Bhaibheri ari kudakara ngo kuziva cokwadi ngo pamusoro pa Mwari zve anoda kuita zvese zvinoitwa ngo maKristu okadi-kadi iyena anozoda kubhabhatijwa.—2 VaKorinto 5:14, 15.

15, 16. (a) Mundhu anodikana kuva no makore akati-kuti kuti abhabhatijwe here? Sananguranyi. (b) Ngenyi mujiji wo Bhaibheri anodikana kubhabhatijwa inga umwe wo Zvapupu zva Jehovha pikija wakambobhabhatijwa mu ciara cimweni?

 15 Mundhu aadikani kuva no mupira wakati-kuti kuti abhabhatijwe. Mundhu umwe na umwe wakasiana zve vajiji vamweni vanoenderera mberi kupinda vamweni. Vazinji vanobhabhatijwa pavanonga vaciri majaha zve vanoramba vakagondeka kuna Jehovha mbhera pavanoita vasharuka. Vamweni vaavasharuka pavanotanga kujija Bhaibheri zve voguma pa kubhabhatijwa. Vamweni vano makore anodarika 100 o kubahwa!

16 Mwanakaji umweni wakajija Bhaibheri naapera kubhabhatijwa mu zviara zvakasiana-siana. Ngo iyo ndava wakabvunjisa mujijisi wake wo Bhaibheri kuti waidikanazve kubhabhatijwa here. Mujijisi wake wakamutatija mavhesi manganani o Bhaibheri kuti amudavire mubvunjo wake. Mwanakaji uwu paakazwisisa zvinoda Bhaibheri, wakabhabhatijwa, pikija wainga no makore anodarika 80. Zvicinyi zvatinojija pa muezaniso uwu? Jehovha anozotendera rubhabhatijo hwedu kudari tikaziva cokwadi ngo pamusoro po kuda kwake. Ngo kudaro, pikija notabhabhatijwa ku ciara cimweni, tinodikanazve kubhabhatijwa inga umwe wo Zvapupu zva Jehovha.—Verenganyi Maitiro o Vapostori 19:3-5.

17. Mundhu anodikana kurangarirenyi ngo pamusoro po njiku yaanobhabhatijwa?

17 Njiku inobhabhatijwa mundhu i njiku inodakajisa maningi. Ndi nguva yo kunasa kurangarira ngo pamusoro po zvinobatanijwa pa kuzvipira no kubhabhatijwa. Kuti muite zvese zvinodiwa ku maKristu okadi-kadi i basa guru. Vateveri va Jesu vaidikana ‘kuponera wiya wakavafira no kumuka, ngo ndava yavo.’—2 VaKorinto 5:15; Mateu 16:24.

18. Mubvunjo japi jatinozodavira pa musoro unotevera?

18 Inga zvotapera kujija mu musoro uno, cisungo co kuva muKristu i cikuru maningi. Ngo iyo ndava, mai va Maria vakazviita mubvunjo wanangwaya pa kutanga ko musoro uno. Kudari imwimwi muri mubari, zvibvunjisenyi kudari: ‘Mwana wangu wakanasirika kuti abhabahatijwe here? Mwana wangu anoziva Jehovha zvokuti ajipire pacake kwaari here? Kureva kuti mwana wangu anodikana kuva no jijo yaushoni zve no basa kuti agume pa kubhabhatijwa here? Kudari mwana wangu akaita cishaishi cikuru pasure po kubhabhatijwa keni?’ Tinozobhuisana ngo mubvunjo iji pa musoro unotevera zve tinozojija kuti kuitisa kudini vabari vo ciKristu vanodikana kuva no mavonero akanaka ngo pamusoro po rubhabhatijo.