Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

Rambanyi Mucina Komakapeamira mu Nyika Yakaparajana

Rambanyi Mucina Komakapeamira mu Nyika Yakaparajana

“Ipanyi . . . Mwari bza Mwari”.​MT. 22:21.

NDUMBO: 33, 137

1. Tingazwira kudini Mwari no utongi hwo vandhu?

SOKO RA MWARI rinotibvunja kuti zwiranyi utongi hwo vandhu, asi rinotijijisazve kuti tinodikana kuzwira Mwari kuciripi mundhu. (Mait. 5:29; Tito 3:1) Kuda kureva kuti Bhaibheri rinozvikanija here? Nakamwe hako, arizvikaniji! Ciambi co kuzvidira pasi ko pakati no pakati, cinotibesera kuzwisisa no kuzwira mupango iji. Jesu wakagurisira ciambi ici paakananga kuti: “Ipanyi Sézare bza Sézare, ipanyibze Mwari bza Mwari.” [1] (Mt. 22:21) Tinoteveresa kudini ndhungamiriro ya Jesu? Tinozvidira pasi po mutemo wo utongi hwotiri kutongwa ndihwona ngo kuzwira mutemo waho, kureremeja vanoimirira utongi, no kushaba. (Rom. 13:7) Asi, kudari mutemo wo utongi ukatibvunja kuti titame kuzwira Mwari, ngo kureremeja kamare, tinoramba kuhuzwira.

2. Tinotatijisa kudini kuti atitori rutivi mu shwiro jo zvomatongehwe o nyika?

2 Itusu tinopa Mwari zvaanofanera kamare, imwe nyira yo kuzviita, ngo yokuramba ticina kotakapeamira mu shwiro jo zvomatongehwe o nyika. (Is. 2:4) Ngokuita kudaro, atihwisani no utongi hwo vandhu uhwo hwaakatendera Jehovha kuti hutonge zve atikhwijiriji zviito zvo nyika yedu kana jinja redu. (Rom. 13:1, 2) Itusu ativhoti mundhu kana cisungo co zvomatongehwe o nyika, atipsaki cigaro mu utongi hwo nyika kana kueja kucinja utongi huri kutongaro.

3. Ngenyi tinodikana kuramba ticina kotakapeamira?

3 Bhaibheri rinotipa mathangwe akawanda okuti ngenyi Mwari anoda kuti tirambe ticina kotakapeamira. Enga muezaniso, tinotevejera muezaniso no zvakajijisa Mwana wake, Jesu Kristu, ngo kutama kuita divi ro ‘nyika’ yo ngo kuramba hondo no zvomatongehwe ayo. (Jo. 6:15; 17:16, Baiberi Mazwi Akacena aMwari) Tinodikana kuramba ticina kotakapeamira kuti tizvidire pasi zvakaperera ku Umambo hwa Mwari. Tikatama kuita kudaro, tinozovisa kudini no hana yakacena potinocumaira masoko akanaka okuti ndi Umambo hwa Mwari basi hunokwanisa kupeja zvineso zvo vandhu vese? Mukusiana no zviara zvokunyepa, izvo zvinoparajanisa vandhu vazvo ngo kunghwina mu zvomatongehwo o nyika, kunamata ko cokwadi kunojivirira kubatana kwedu no ukama hwo panyika yese ngo kutibesa kuti tirambe ticina kotakapeamira.​—1 Ped. 2:17.

4. (a) Tinozvizivisa kudini kuti zvinozonesa maningi kuramba ticina kotakapeamira? (b) Ngenyi tinodikana kunasirira wari kuti tirambe ticina kotakapeamira?

4 Motinoraramira, mugariro wo zvomatongehwo o nyika ungava wakathiva, wovoneka inga kuti unotendera kunamata ko cokwadi. Asi zvecivoneka kuti mugariro wo zviro wa Sathana uri kukhwedera ku mugumo tingavetera kuti shwiro yokutama kotakapeamira ive inosoteseswa maningi. Nyika ino yakazara ngo vandhu ‘vacikadi kuzwirana’ no ‘vakavanga musoro,’ ngo kudaro inozoramba ecienderera mberi mukutama kubatana. (2 Tim. 3:3, 4, Shanduro yeNyika Itsva) Munyika jimweni, ngo kucinja ko kukasika ko mugariro wo zvomatongehwo o nyika, hama jedu jakawanana no zvineso zvojicaiveterepi ngo kutama kwajo kojakapeamira. Muri kuvona kuti ngenyi tinodikana kuvangisa cisungo cedu wari co kuramba ticina kotakapeamira here? Kudari tiri kuvetera mbhera tiwanane no mugariro unonesa kuti tizovangise cisungo cedu, tingazonyiswa totosiya kutama kotakapeamira ngo ndava kuvangirijwa. Waro, tinganasiririsa kudini kuti tirambe tina kutama kwedu kotakapeamira mu nyika ino yakaparajana? Ngatende tivone zviro zvirongomuna zvingatibesera kuti tibudirire.

KUVONA UTONGI HWO VANDHU INGA MAVONERO ANOITA JEHOVHA

5. Jehovha anovona kudini ngo pamusoro po utongi hwo vandhu?

5 Ciro co kutanga kuti tirambe ticina kotakapeamira i kuva no mavonero a Jehovha ngo pamusoro po zvomatongehwo o nyika. Pikija utongi humweni hunokhombija kuva hwakarungama, Jehovha aacaidepi kuti vandhu vatonge vandhu vamweni. (Jr. 10:23) Utongi hwo vandhu hunomusijira mukheto wo majinja, uhwo unoparajanisa ukama hwo vandhu. Nee vatongi vo vandhu vanovoniwaya inga vakanakisisa, avakwanisi kupeja zvineso zvese. Kunja kwaizvi, kubvira mu gore ro 1914, utongi hwo vandhu hwapambhira Umambo hwa Mwari, uhwo hucazotonga majinja ese sasambi uno ngo kuaparaja.​—Verenganyi Nduyo 2:2, 7-9.

6. Tinodikana kutaja kudini vana zvigaro mu utongi?

6 Mwari anoregera kuti nasiriro yo zvomatongehwo o nyika irambe iripo ngokuti nasiriro iyi inoviisa kugajanisa nyika mbhera pakati kuti, zvobesera kuti masoko akanaka o Umambo akwanise kucumaehwa. (Rom. 13:3, 4) Mwari anotibvunja kuti tiite mukumbiro ngo pamusoro po vatongi, maningi-ningi pavanotema zvivaringo zvo kuti kangaije zvinopsasa kunamata kwedu. (1 Tim. 2:1, 2) Inga zvakaita mupostori Pauro, patinoshaisha kutajwa, itusu tinoenda ku vatongi. (Mait. 25:11) Pikija Bhaibheri rinojijisa kuti muvengi wa Mwari, Sathana, ngaanotungamirira shwiro jo zvomatongehwo o nyika, izvo azvirevi kuti iyena anovonerera kamare mutongi umwe nga umwe. (Lc. 4:5, 6) Ngokudaro, atidikani kurangarira kuti mutongi umwe nga umwe ari kutungamurihwa ndi Dhiabhu. Kunja kwaizvi, potinobhuya no “vatongi no majimambo,” ativereketeri [“zvinokhuvaza ngo pamusoro po ariwese,” Shanduro yeNyika Itsva.]​—Tito 3:1, 2.

7. Tinodikana kuramba murangariro wapi?

7 Tinozwira Mwari ngo kutama kubesera mudongeri ariwese kana partidho iri yese, azvinenyi dangani inotibesere kana kuti haiwa. Kutama kwedu kotakapeamira kungaejeswa kudini pa mugariro uu? Ngatiti kuti cikwata co vapandukiri vo utongi vari kueja kubvisa utongi hucikaripi kutonga ushoni, hwokuti huri kutambujavo no vandhu va Mwari. Pikija kuti aticaizofambafamba navo teciita citereka, asi kureva kuti taizovabesera ngo mwoyo here? (Ef. 2:2) Tinodikana kuramba ticina kotakapeamira, haiwa basi pa magama no zviito zvedu asi, no mu mwoyo medu.

‘IVANYI VAKANGWARA’ ASI ‘VACINA NDAVA’

8. Pa zvinonesaya kuramba ticina kotakapeamira, tingavisa kudini ‘vakangwara’ asi ‘vacina ndava’?

8 Ciro cocipiri kuti tirambe tina kutama kwedu kotakapeamira ngo co kuva ‘vakangwara kudari inga nyoka asi vacina ndava kudari inga njiva’ potinowanana no zvineso. (Verenganyi Mateu 10:16, 17, Shanduro yeNyika Itsva.) Tinotatija kungwara ngo kuvona ngozi icito yaguma, zve toramba ticina ndava ngo kutama kuzvitendera kuti zviphwanye utendi hwedu. Ngativone zvineso zvimweni zvikuru no mahwisaniro otingaita nazvona.

9. Zvicinyi zvatinodikana kubhasopa potinobhuya no vamweni?

9 Mabhuyo. Tinodikana kubhasopa panomukaya shwiro jo zvomatongehwo o nyika. Inga muezaniso, potinocumaira masoko o Umambo, atidikani kusimba kana kushora zvinonangwa ngo patidho iri yese kana mutongi ari wese. Ngokudaro, ejanyi kuita kuti samuzi ave no mavonero amweo no enyu ngo kusotesesa cineso camuri kubhuyaro, haiwa kusotesesa besero ringabva ku zvomatongehwe o nyika. Perepo, mutatijanyi mu Bhaibheri kuti umambo hwa Mwari hunozopejesa kudini zvineso mbera narini. Kudari pakamuka shwiro jakadari enga jo kurovorana ko mwanarume no mwanarume, manakaji no mwanakaji, kana kubvisa mimba, jiviriranyi ndhungamiriro ja Mwari zve durujiranyi kuti itusu tinoshandisa kudini ndungamiriro iji mu upenyu hwedu. Pa kubhuisana uku, rambanyi mucina ko mapeamira pa zvomatongehwo o nyika pa shwiro iji. Atibeseri divi riri rese ngo pamusoro pokuti mutemo japi jinodikana kushandiswa, kubviswa, kana kucinjwa, zve ativangijiri vamweni kuti vatende mavonero edu.

10. Tingava kudini no cokwadi kuti tiri kuramba ticina kotakapeamira potinovona kana kuverenga ciricese mu zvinofambisa masoko?

10 Zvinofambisa masoko. Masoko anosumuhwaya inga “notiisia” anosumuhwa ngo maitiro o kubesera divi rimwe zve o kuvonesa mavonero. Zvinofambisa masoko nguva jimweni zvinoshanda enga thurusi ro shwiro jo zvomatongehwo o nyika. Mu nyika jokuti zvinofamasa masoko zvinovonerehwa ngo Citado, ripoti jo notiisia jingapeamira pa kubesera utongi, pikija zvakadaro maKristu ari kurarama mu nyika jinonangwa kuti jakasujunyuka, anodikana kungwarira kuti atame kubesera zvinonangwa ngo vanobhuyaya mavonero avo mu zvinofambisa masoko. Zvibvunjisenyi kuti: ‘Ndinodakarira kupurukirisisa mundhu ariwese mu zvinofambisa masoko ngokuti ndinotenderana naye ngo pamusoro po zvomatengehwe o nyika here?’ Kana zvakadaro, mungapsaka cinyuke cimweni co masoko cicikabeseri divi riri rese. Pa shwiro iri yese, ngo zvo ungwaru kutama kupurutana maningi masoko anosumuhwa ngo zvinofambiso zvo masoko zvinokhwijirija urongwa hwo zvomatongehwe o nyika zve mopopora kuti anohwisana no zvomunozwa mu “mazwi akanaka” anowanika mu Bhaibheri here kana kuti haiwa.​—2 Tim. 1:13.

11. Zvinganesesa kudini kotiri kuramba ticina kotakapeamira zviro zvedu pozvinova zvinosisira maningi kotiri?

11 Kudisisa upfumi. Kudari tinobatisisa maningi zvotinazvo, tiri kuzvidira pa ngozi yo kuphwanya kutama kwedu kotapeamira potinowanana no ciejo. Ruti, wo Marawi, wakavona zvapupu zvakawanda zviciphwanya kutama kwazvo kotapeamira pozvaiteverehwa mu gore ro 1970. Iyena ari kuceuja kuti: “Azvicaikwanisepi kuregera upenyu hwazvo hwo kugarisika. Zvapupu zvimweni zvakaenda ku ushoko na itusu, pa mukuvo wakazotevera zvazoita divi ro shwiro jo zvomatongehwo o nyika, zvohwirira kanyi ngo kuti azvacaidepi kurarama upenyu hwo unonesa wo pa ndau yo vaingairo vakadihwa.” Mukusiana, vazinji vo vandhu va Mwari vakaramba vacina kovakapeamira pikija vaenga pa urombo kana vakaruza zvese zvovaenga nazvo.​—Heb. 10:34.

12, 13. (a) Jehovha anorangarira kudini ngo vandhu? (b) Tingazvizivisa kudini kudari tiri kutanga kuzvikuja ngo nyika yedu?

12 Kuzvikuja kucikadikani. Vandhu kazinji vanoramba vana murangariro wokuti bvumbo ravo, ukama, cirovejo co kovakakurira, dhorobha, kana jinja ravo rinonyisa amweni. Asi, itusu tinozviziva kuti kuzvikuja kucikadikani ko ukama, zvirovejo zvo kowakakurira, kuzvikuja ko jinja zvinotihwisanisa no mavonero aanoita Jehovha vatongi no vandhu vese. Mwari aaveteri kuti tirambe zvirovejo zvo kotakakurira. Asi, kusiana ko zvirovejo zvo kotakakurira zvinofananijira kukahamarisa ko kusiana-siana ko ukama hwo vandhu. Ngokudaro, tinodikana kurangarira kuti pa mavonewo a Mwari, vandhu vese vakaezana.​—Rom. 10:12.

13 Kuvano kuzvikuja kucikadikani ko kwatakakurira ngokunobara kuzvikuja ko majinja zve unova mudanyu wokutanga wokuti tiphwanye kutama kwedu kotakapeamira. MaKristu anovavo no kuzvikuja uku; maKristu amweni o mu ungano yo mu zana ro kutanga ro makore aiitira mukheto ku hama jao ngokuti ajicaengepi jo jinja rao. (Mait. 6:⁠1) Tingazvizivisa kudini kudari kuzvikuja kucikadikani kuri kumera miji mukati medu? Ngatiti kuti hama kana hambzai yokubva ku nyika imweni yamupa mazano. Maizoaramba, morangarira kuti: ‘Itusu muno tinorangarira ushoni here?’ Kunja kwa izvi, tese tinodikana kushandisa mbhangiro yakafemehwa yokuti: “Thivanyi mwoyo, mecivona vamweni inga vakuru.”​—Fil. 2:3.

WANANYI VANGISO YA JEHOVHA

14. Mukumbiro ungamubeseresa kudini, zve muezaniso wapi wo mu Bhaibheri unokhombijira izvi?

14 Ciro co Citatucitatu co kuti tirambe ticina kotakapeamira kotakapeamira ngo co kuvangiswa kunobva kuna Jehovha. Kumbiranyi mujimu mucena, uwo ungamupa kusengerera no kuzvibata, mavara anodiwa pa kubhuya no utongi hwokuti nguva jimweni ahuzivi kururama kana hunotonga no mukheto. Mungakumbirazve ungwaru kuna Jehovha kuti murangarire no kuhwisana no mugariro jingamuitisa kuti muphwanye kutama kwenyu komakapeamira ko ciKristu. (Jak. 1:5) Kudari muri mukaraboso kana muri kutambujwa ngo ndava kusunga kwenyu kuimirira kunamata ko cokwadi, kumbiranyi vangiso kuti mujivirire gonda renyu ngo kucunga no kuvangisira, pikija ­kuteverehwa kwakadini komungawanana nako.​—Verenganyi Maitiro o Vapostori 4:27-31.

15. Bhaibheri ringatibeseresa kudini kuti tirambe ticina kotakapeamira? (Vonanyizve bhokiso rina musoro unoti: “Soko ra Mwari Rakavangisa Kukhohwa Kwavo.”)

15 Jehovha angamuvangisa ngo Soko rake. Rangarijisisanyi mavhesi angamubesera kuti murambe mucina komakapeamira mukawanana no ciejo. Mavhesio madirenyi mu murangariro wari, kuitira kuti azomubesere kudari mukazova pa mugariro womucikazovi no Bhaibheri kumbejiyo. Soko ra Mwari ringazomusijirazve vetero yenyu yo makomborero o Umambo kumbejiyo. Vetero iyi inodikana maningi kudari tiri kuvangisira pa kuteverehwa. (Rom. 8:25) Sananyi mavhesi anonanga makomborero omuri kuvetera kuzobhusa, zve rangarijiranyi enga muri kutoabusa wari mu Paradhiso.

BESEREKANYI NGO VAYA VAKARAMBA VAKAGONDEKA

16, 17. Tingajijenyi ngo muezaniso jo vashandiri vakagondeka va Mwari vaya vakaramba vacina kovakapeamira? (Vonanyi pikica yokutanga.)

16 Ciro co cirongomuna kuti tirambe ticina kotakapeamira tinociwana no vashandiri vakagondeka va Jehovha. Muezaniso javo jinotipa ungwaru no kuvanga kotinoda kuti tivangisire. Ngokudaro, Shadhereki, Misheki na Abhedhenego vakaramba kunamata cithombi caiimirira Citado co Bhabhironi. (Verenganyi Danieli 3:16-18.) Keverenga ngo pamusoro po cisungo cavo kunopa kucunga Zvapupu zvo nyamasi uno kuti zvirambe kunamata bandhera ro jinja rozviri kuraramira. Mukuezanavo, Jesu wakaramba wakaparajana kamare no zvomatongehwo o nyika no mapope ayo. Ecirangarija ngo muviyo waizova no muezaniso wake ku vamweni, Jesu wakakohomeja vajiji vake kuti: “Gondanyi [kana cunganyi]: Inini ndakanyisa nyika yo pasi.”​—Jo. 16:33.

17 Zvapupu zvakawanda zvo mazuva ano zvakarambavo zvicina kozvakapeamira. Zvapupu zvimweni zvakatambujwa, kudihwa mukaraboso zve pikija kufa ngo gonda razvo. Muezaniso jazvo jingamubesa enga zvojakabesa Bariş, wo Turkiya, uwo wakati: “Franz Reiter waenga hama yocidoko uwo wakauraiwa ngokuti wakaramba kubatana no cikwata co masoca a Hitler. Karata yaakatarira mai wake pa usiku hwaacito afa yakatatija gonda rakakura no kuthemba kuna Jehovha, zve inini ndakada kutevejera muezaniso wake kudari ndikawanana no ciejo cakadari.” [2]

18, 19. (a) Hama jo mu ungano yenyu jingamubeseresa kudini kuti murambe mucina komakapeamira? (b) Ngozvapi zvomasunga kuita?

18 Besero rinobvazve ku hama no hambzaji jo mu ungano. Zivisanyi vakuru vo ungano muejo jokutama komakapeamira jomungawanana najo, zve kumbiranyi mbhangiro javo jakaibva jakacijikira mu Bhaibheri. Hama jo mu ungano jinozomuvangisa kudari jinozviziva zvineso zvomuri kusongana nazvo. Jikumbirenyi kuti jiite mukumbiro ngo pamusoro penyu. Zvokadi kamare, tinoda kuti hama jedu jitibesere no kutiitira mukumbiro, itusu tinodikana kuitavo kudaro kovari. (Mt. 7:12) Musoro wo mu jw.org unoti: “Testemunhas de Jeová presas por causa de sua fé​—por região” wakadihwa pasi po musoro unoti IMPRENSA > CASOS JURÍDICOS ungamubesera kuti mujinange ngo zina mu mukumbiro jenyu. Unobatanija nda-nda-nda yo Zvapupu zvo wari zvakadihwa mukaraboso ngo gonda razvo. Toranyi mazvina amweni zve moita mukumbiro kuti ngo kucunga kwese varambe vana kutama kwavo kovakapeamira.​—Ef. 6:19, 20.

19 Kudari ngo zvokuri phedo kupera ko utongi hwo vandhu, azvitikahamarisi kudari vatongi vakatitendera padoko ngo padoko kuti tive takagondeka kuna Jehovha no Umambo hwake. Ngokuita kudaro, tinovangisa cisunga cedu co kuramba ticina kotakapeamira mu nyika yakaparajana.

^ [1] (ndima 1) Apa wari Jesu wakashandisa Sezari, cigaro cikuru co utongi hwo vandhu pa mukuvo wondhowo, enga utongi hwo vandhu, kana Citado.

^ [2] (ndima 17) Vonanyi Zvapupu zvaJehovha​—Vazivisi voUmambo hwaMwari, pheji 662, no bhokiso rina musoro unoti: “Akafira Kukudza Mwari” uri pa pheji 150 mu bhuku Umambo hwaMwari Huri Kutonga! (mu ciShona)