Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

‘Kuvangisira Ngakupeje Basa Rako’

‘Kuvangisira Ngakupeje Basa Rako’

‘Kuvangisira ngakupeje basa rako, kuti muve vakakwana no vakanaka mu zviro zvese, ucikatami ciro.’​—JAK. 1:4.Shanduro yeNyika Itsva

DUMBO: 135, 139

1, 2. (a) Zvicinyi zvatingajija kubva pa kuvangisira ka Gidheoni no 300 o vanarume vake? (Vonanyi pikica yo kutanga.) (b) Mukuzwirana na Luka 21:19, ngenyi kuvangisira kunosisira maningi?

HONDO yaivanga maningi. Masoca o vaIziraeri acitungamirihwa ngo Mutongi Gidheoni akateverera vavengi vavo​—cikwata co masoca o vaMidhiani no vaivabesera​—usiku hwese pa mumango unokwana kuita 32 o makiromita! Bhaibheri rinonanga zvakazoitika pa mukuvo wakazotevera reciti: “Gideoni wakaguma ku Jordani woambuka, asi yena no mazana matatu o vandhu vaimuperekeja vainga varemba.” Pikija zvakadaro, Gidheoni no vandhu vake vaenga vacito vawina pa hondo ii, asi kwainga kwasara 15.000 zvo masoca o vavengi. Povakapera kutambujwa ko makore ngo kuitwa shoko ngo vaMidhiani, vaIziraeri vakaziva kuti ii asipizve nguva yo kuremba. Ngokudaro, kuti vapeje cikwata cese co masoca, [“ivona vakaramba vaciteverera,” Shanduro yeNyika Itsva] vaMidhiani mbhera koovanyisa.​—Vat. 7:22; 8:4, 10, 28.

2 Itusuvo tiri kuhwisanavo pa hondo icikanangiki. Vavengi vedu vanobatanijwa Sathana, nyika yake, no kutama kukwana kwedu. Vamweni vedu vari kuhwisana ko makore, no besero ra Jehovha vari kuwina. Mu nguva jimweni, itusu kangaije tingatoremba pa kuhwisa vavengi no kuvetera mugumo wo mugariro uno wo zviro. I zvokadi, kuti itusu atito tawina kamare. Jesu wakangwaja vaya vari kurarama mu njiku jino jokupejisira kuti vaizosongana no muejo no kutama kubatwa ushoni ngo vamweni, asi iyena wakanangazve kuti kuitira kuwina zvaizofira pa kuvangisira kwedu. (Verenganyi Luka 21:​19.) Icinyi kuvangisira? Icinyi cinozomubesera kuti muvangisire? Tinojijjenyi ngo vaya vakavangisira? Zve tingaregeresa kudini kuti ‘kuvangisira kupeje basa rako’?​—Jak. 1:4, Shanduro yeNyika Itsva.

ICINYI KUVANGISIRA?

3. Icinyi kuvangisira?

3 Mu Bhaibheri, kuvangisira zvinoreva zvinopinda basi kucijikira pa muejo kana matambujiko. Kuvangisira kunobatanija murangariro no mwoyo wedu, kana kuti njira yo tinohwisana no zvineso. Mundhu anovangisira anotatija kucunga, kuvanga no kusengerera. Rimwe bhuku rakanga kuti kuvangisira i ‘mujimu ungakwanisa kucijikira zviro, kuciripi ngo kuzvivangisira, asi no vetero yakavanga. Uu i mugariro unoita kuti mundhu arambe wakaima naakaringisa mbhepo. I ciro cakanaka cinokwanisa kucinja ciejo cinonesa kuti cive goja, ngo kuti ikona kunosotesesa vetero, haiwa kuhwajihwa.’

4. Ngenyi tingananga kuti kuvangisira kunoitwa ngo ndava yo rudo?

4 Kuvangisira ko ciKristu kunokwevejehwa ngo rudo. (Verenganyi 1 VaKorinto 13:4, 7.) Rudo kuna Jehovha unotikwevejera kuti tivangisire pa ciri cese cinozwirana no kuda kwake. (Luka 22:41, 42) Rudo kuna hama jedu hunotibesera kuti tivangisire pa kutama kukwana kwavo. (1 Ped. 4:8) Rudo kuna wo takarovorana nae unotitendera kuti tivangisire pa “nyatwa” yo kuti pikija varovorani vanodakara vanowanana nayo zve hwovangisa mucadho wavo.​—1 Kor. 7:28.

ICINYI CINOZOMUBESERA KUTI MUVANGISIRE?

5. Ngenyi Jehovha ngaanokwanisa kamare kutinasirira kuti tikwanise kuvangisira?

5 Psakanyi Jehovha kuti amuvangise. Jehovha ndi “Mwari wo [kuvangisira, Shanduro yeNyika Itsva] no wo kunyaraja.” (Rom. 15:5) Iyena anozwisisa haiwa basi zvineso zvatinosongano nazvo, asi anozwisisavo zvinoviiswa ngo magariro edu, mazwiro edu pikija zvinoviiswa ngo ndava yo marurirehwe atakaita mu ndani ticito tabahwa. Ngo kudaro, ndiena anokwanisa kamare kutinasirira kuti tikwanise kuvangisira. Bhaibheri rinonanga kuti: “Anoita bzo vanoda vaya vanomuthya, anozwa kukhuwa kwavo, no kuvaponesa.” (Ndu. 145:19) Waro, Mwari anozodavirisa kudini mukumbiro jedu kuitira kutivangisa kuti tivangisire?

6. Inga zvinogondeswa mu Bhaibheri, kuitisa kudini Jehovha anopsaka ‘gwanja ro kubuda’ ndirona pa muejo?

6 Verenganyi 1 VaKorinto 10:13. Patinokumbira Jehovha kuti atibesere pakuhwisana no muejo iyena anozotipsakira “gwanja ro kubuda” ndirona. Jehovha anocinja shwirojo kuti abvise muejo here? Kangaije. Asi, kazinji iyena anotipsangira gwanja ro kubuda ndirona ngo kutipa “simba ro kunyisa [kana kuvangisira] maejo”. Hina, Jehovha anotivangisa kuti ‘tive no kusengerera no kucamwirira kwese ngokudakara.’ (Kol. 1:​11, Baiberi Mazwi Akacena aMwari) Zvecivoneka kuti iyena anoziva muviri wedu, murangariro no mazwiro o pazvinogumira kamare, Jehovha aazotenderi kuti mugariro uite kuti titame kukwanisa kuramba takagondeka.

7. Fananijiranyi kuti ngenyi tinoda zvokuha zvo kumujimu kuti tivangisire.

7 Vangisanyi gonda renyu ngo zvokuha zvo kumujimu. Dundhu Everest, rakareba maningi pasi pese, kuti akhwire Dundhu Everest, mundhu anodikana kuha zvakawanda zvinopinda zvinodiwa ngo mundhu. Akatama kuita kudaro iyena aazokwanisi kukhwira no kuguma kaanoda. Mukuezana, kuti tivangisire pa hwendo hwedu hwo ciKristu no kuguma kwatinoda, tinodikana kuha nguva jese zvokuha zvo kumujimu zvakawanda kudari zvicikwanisika. Tinodikana kujiroveja kuti titore nguva ticiverenga, kujija no kuenda ku musongano jo ciKristu. Mabasa aya anovangisa gonda redu ngo “bzokuha bzinogara mbhera uhomi hucingaperi.”​—Jo. 6:27.

8, 9. (a) Mukuzwirana na Job. 2:4, 5, icinyi cinobatanijwa potinowanana no muejo? (b) Pamunowana no muejo, ciitiko capi cicikavoneki camunodikana kurangarira?

8 Ceukijanyi shwiro yo ugondeki. Mushandiri wa Jehovha paanowanana no muejo, ari pa ngozi maningi kupinda kutambujika ko mundhu ariwese. Zvatinoita tikawanana no muejo, zvinokhombija kuti tinovonadi kamare Jehovha enga Mukuru-kuru wo Zvese kana kuti haiwa. Sathana, muvengi wo ukuru-kuru hwa Jehovha, wakashora Jehovha ngo magama okuti: “Mundhu anopa bzese bzaanabzo kuti ajiponese. Tambanujanyi nyara panyezuru pake, mumutambuje [Jobe] mu nyama no mu magodo. Munozovona kuti anozomutuka.” (Job. 2:4, 5) Sathana wakananga kuti akuna anoshandira Jehovha ngo mwoyo wese. Kureva kuti Sathana wakacinja here kubvira paakavereketa izvo? Haiwa, aazocinji! Papera mazana mazinji o makore, Sathana wakazogogomehwa kubva mugore, asi, waindodanijwa kuti “murevi wo hama jedu, [uwo] waijireva ka Mwari wedu, usiku no masikati.” (Ap. 12:10) Sathana aazivi kukanganwa shwiro yo ugondeki. Iyena ano cido co kuda kutivona teciwira pa muejo jedu zve ­toregera kubesera ukuru-kuru hwa Mwari.

9 Pomunohwisana no matambujiko, rangariranyi ciitiko ici cicikavoneki. Sathana no vateveri vake vo madhimoni vari divi rimwe, vecikhombija zvineso zvenyu, vecinanga kuti mukavangirijwa munozokana-kana, moramwa. Ngo divi rimweni kuna Jehovha, Mwana wake uwo ari kutonga, vokumuswa vokuzojwa no mutengo ucikaverengeki wo ngirozi. Ivona vari kumubwabwaijira nyara, kudakara ngo kuvangisira kwenyu ko njiku no njiku no kubesera ukuru- kuru hwa Jehovha. Mungatora pacenyu cikumbiro cakafemehwa ca Jehovha cokuti: “Itai wakangwara, mwana wangu, dakajisai mwoyo wangu; ndinozokwanisa kupingura vaya vanondituka.”​—Mazwi 27:11.

10. Tingatevejeresa kudini Jesu ngo kusotesesa mupfupo unoviiswa ngo kuvangisira?

10 Sotesesanyi mupfupo unoviiswa ngo kuvangisira. Ngatiti kuti pomunonga mucifamba hwendo hwakakura, moima pakati no pakati po túnel (kana gwanja ro kutukumira ngo pasi). Mosota mativi ese, movona cidima. Pikija zvakadaro, imwimwi munothemba kuti kudari mukaramba mecifamba kuenda kumbhiri ko túnel, maizovonazve kujeka. Mukuezana, kangaije pa mukuvo umweni mungazwa kuremehwa ngo zvineso zvomunozongana nazvo. Pikija Jesu wakavavo no mazwiro akadaro. Iyena wakava ‘anonyenywa kukuru ngo vaxaixi,’ kushohwa no kutambujwa kunosuruvarisa pa [“danda ro kutambujikira,” Shanduro yeNyika Itsva]​—zvokadi wakava mukuvo wo cidima mu upenyu hwake pa nyika! Hina, Jesu wakavangisira pa zvese “eciziva rudakaro hwaizomuviira.” (Heb. 12:2, 3) Iyena wakasotesesa mupfupo wo kuvangisira kwake, maningi-ningi ngo kubesera kwake pa kucenesa zina ra Mwari no kujivirira ukuru-kuru hwa Jehovha. Cidima ca Jesu cakava co nguva shomani, asi kujeka ko mupfupo wake wo mugore waizova wo kwenda no kwenda. Nyamasi uno, muejo jomuri kuwanana najo jinosuruvarisa zve pikija kutokhuvaza. Asi rangariranyi kuti matambujiko enyu o mu gwanja ro ku upenyu ucikaperi ngo o nguva shomani.

‘VAYA VAKAVANGISIRA’

11. Ngenyi tinodikana kujija muezaniso jo ‘vaya vakavangisira’?

11 Ativangisiri tega. Kuitira kuvangisa maKristu kuti avangisire pa matambujiko o vanoviisihwa ndi Sathana, mupostori Pedhru wakatara kuti: “Muvangirenyi, makavanga ngo rutendo, meciziva kuti hama jenyu jinotenda nyatwa jondhojo, pasi pese.” (1 Ped. 5:9) Zvakaitikira ‘vaya vakavangisira’ zvinotijijisa kuti tingarambisa kudini takatendeseka, zvinotigondesa kuti tingabudiriira, no kuticeuja kuti tinozova no mupfupo ngo muitiro wedu wo kugondeka. (Jak. 5:11, Shanduro yeNyika Itsva) Ngatende tivone muezaniso munganani. [1]

12. Tinojijenyi ngo muezaniso wo makerubhi akadihwa mu Edheni?

12 Makerubhi. Muezaniso jimwe jakagajwa ngo zvisikwa zvokutanga zvo kumujimu ngo kugumira vandhu, muezaniso iji jinotijijisa kuvangisira kudari tikagajwa kuita basa rinonesa. Jehovha Mwari “[wakadira] pambeji po munda wo Edeni makerubi, no murabzu wo banga rinocetukacetuka, kuti angwarire gwanja ro muti wo uhomi.” [2] (Gn. 3:24) Zvokadi kamare, makerubhi aya aazivi kusikihwa kuti aite basa iri! Pasure pozvese, ushaishi no kutama kuzwira azvicaitepi divi ro cidisiso ca Jehovha ku vandhu vese. Pikija zvakadaro, apana pari pese potinoverenga kuti makerubhi​—zvisikwa zvo kumujimu zvo cigaro cakakhwirira​—zvakan’gun’guta kuti zvaikhwirira maningi kuti zviite basa iri. Izvona azvizivi kuremba nee kuramwija. Mukusiana, izvona ngo kuzwira kamare zvakabatisisa basa ro zvakagajwa no kuvangisira mbhera zvopeja basa razvo​—kangaije mbhera mukuvo wo Ndambi, pa makore anodarika kuita 1.600!

13. Jobe wakakwanisisa kudini kuvangisira pa muejo jake?

13 Teteguru Jobe. Kudari muri kuhwajihwa ngo magama anorembesa o shamwari kana o cihwa co pambhuri, muri kutambujwa ngo ndhendha huruwane, kana muri kucumba ngo kufihwa ngo mudiwa, mungaembejehwa ngo muezaniso wa Jobe. (Job. 1:18, 19; 2:7, 9; 19:1-3) Pikija aacaizivepi kwaibva matambujiko ake, Jobe aazivi kuremba ngo kutama vetero. Ngenyi aazivi kuremba? Ngo ciro cimwe, iyena “waithya Mwari.” (Job. 1:1) Jobe waenga wakatema civaringo co kudakajisa Jehovha pa mugariro unotendera no ucikatenderi. No besero ra Mwari, Jobe wakarangarira ngo zviro zvinoshamaisa zvainga zvakaita Jehovha ngo mujimu Wake mucena. Jobe wakanyengejera kuthemba kuti Jehovha waizopeja muejo jake pa nguva kwayo. (Job. 42:1, 2) Zve izvo ngaizvona kamare zvakazoitika. “[Jehovha] Mwari wakasanduja magariro a Jobe, apo wakanamatira xamwari jake, womuengejera ruviri upfumi hwake.” Jobe wakararama mbhera ‘waaharahwa, wakazara ngo mazuva.’​—Job. 42:10, 17.

14. Mukuzwirana no 2 VaKorinto 1:6, kuvangisira kwa Pauro kwakabeseresa kudini vamweni?

14 Mupostori Pauro. Muri kuhwisana no kuzondwa, pikija kuteverehwa ngo vavengi vo kunamata ko cokwadi here? Muri mukuru wo ungano kana muvonereri wo ndharaundha ari kuzwa kuremehwa ngo mutoro jenyu here? Rangarijisisanyi muezaniso wa Pauro. Iyena wakawanana no [“zviro izvo zvokunja,” Shanduro yeNyika Itsva] zvakawanda zvaiviiswa ngo vatevereri vakashata, zve waizwa kuvangijihwa njiku jese ngo kukaya-kaya kwake ngo pamusoro po ungano. (2 Kor. 11:23-29) Pikija zvakadaro, aazivi kuremba, zve muezaniso wake wakavangisa vamweni. (Verenganyi 2 VaKorinto 1:6.) Pomunovangisira pa matambujiko, rangariranyi kuti muezaniso wenyu ungavangisa vamweni kuti vavangisire.

KUVANGISIRA ‘KUNOZOPEJA BASA RAKO’ MOMURI HERE?

15, 16. (a) Kuvangisira kunodikana kupeja ‘basa’ rapi? (b) Ipanyi muezaniso wo kuti tingaregeresa kudini ‘kuvangisira kupeje basa rako.’

15 Ngo kufemehwa, Jakobo wakatara kuti: ‘Kuvangisira ngakupeje basa rako.’ Kuvangisira kunodikana kupeja ‘basa’ rapi? Ikona kunotibesera kuti ‘tive vakakwana no vakanaka mu zviro zvese, ticikatami ciro.’ (Jak. 1:4, Shanduro yeNyika Itsva) Muejo kazinji jinotatija patakarembera no mativi o undhu hwedu otinodikana kuitisa nane. Kudari tikavangisira pa muejo ijo, undhu hwedu hwo ciKristu hunozova hwakakwana maningi, kana kunaka. Inga muezaniso, kangaije tingava vanosengerera maningi, vanobongesera no vanozwira usizi.

Patinovangisira pa muejo undhu hwedu hwo ciKristu hunova hwakakwana maningi (Vonanyi ndima 15, 16)

16 Ngokuti kuvangisira kunopeja basa rinosisira ro kutiumba enga maKristu, amudikani kusiya zviambi zvo Matahwa kuitira kupeja kuejwa komuri kuwanana nako. Inga muezaniso, tingati kudini kudari muri kuhwisana no murangariro jicikazivi kucena? Zvokadi ngo zvokuti amudikani kuwira mu ciejoco, munodikana kuita mukumbiro kuti murambe cidoco. Mukaita kudaro, munozovangisa kuzvibata kwenyu. Muri kuhwisana no kuteverehwa ngo wo pa ukama hwenyu aciripi mutendi here? Kunja ko kuwira mu kuvangijihwa, temanyi civaringo co kuramba muri muezaniso wo kunamata ngo mwoyo wese. Ngo iyo ndava, munozovangisa kuthemba kwenyu kuna Jehovha. Ceujanyi kudari: Kuti tiashirike kuna Mwari, tinodikana kuvangisira.​—Rom. 5:3-5; Jak. 1:12.

17, 18. (a) Fananijiranyi kudikana ko kuvangisira mbhera kumagumo. (b) Patinonga tecikhwedera ku magumo, kuthemba kwapi kwatingava nako?

17 Tinodikana kuvangisira, kuciripi pa mukuvo mushoma, asi mbhera kumagumo. Kuti tifananijire: Rangariranyi kuti piketi yandondomera. Kuti vapokonyoke, vapakiri vanodikana kusambira mbhera kumutundhu. Musambiri wiya anoremba naaphedo no kumutundhu zvinomuitikira ngo zvinoitikiravo musambiri wiya waremba pa kutanga kusambira kamare. Mukuezanavo, takaimisira kuti tivangisire mbhera kuguma mu nyika imbza. Upenyu hwedu hunofira pa kuvangisira kwedu. Itusu tina mugariro wakaezana no mupostori Pauro, paakananga ruviri kuti: ‘Atirembi.’​—2 Kor. 4:1, 16, Shanduro yeNyika Itsva.

18 Tingathemba kamare kuti Jehovha anozotibesera kuti tivangisire mbhera kumagumo. Tinavo kukhohwa ka Pauro kwaakananga pa VaRoma 8:37-39 kuti: “Tiri vanyisi ngo ndava ya wiya wakatidisa weya. Hina. Inini ndinobziziva bzakadi kuti rufu nokuti kupona, ngirozi nokuti majimambo, bza nyamasi nokuti bza mangwana, masimba, urebu nokuti kujika, nokuti bzisikwa bziribzese abzikwanisi kutiparajanisa ku rudo hwa Mwari, mwa Kristu Jesu Tenji wedu.” Izvokadi kuti pa nguva jimweni tinoremba. Asi tingavangisira mbhera ku magumo, kuitira kuti kungaije zvizonangwevo ngo pamusoro pedu inga ngo zvakanangwa ngo pamusoro pa Gidheoni no vandhu vake kuti: ‘Ivona vakaramba vaciteverera.’​—Vat. 8:4, Shanduro yeNyika Itsva.

^ [1] (ndima 11) Mungavonazve kuti zvinovangisa kuhwirijira kuverenga ngo kuvangisira ko vandhu va Mwari vo mukuvo uno. Inga muezaniso, Mabhuku Egore o 1992, 1999, no ro 2008 ana ripoti jinovangisa gonda jo hama jedu jo ku Etiopia, Malawi, no Rusia.

^ [2] (ndima 12) Bhaibheri arinangi kuti makerubhi mangana akagajwa kuita basa iri.