Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

Vanodakara Vaya Vanoshandira ‘Mwari Wakadakara’

Vanodakara Vaya Vanoshandira ‘Mwari Wakadakara’

‘Vanodakara vandhu avo Mwari wavo ndi Jehovha!’—NDUYO 144:15, Shanduro yeNyika Itsva.

NDUMBO: 44, 125

1. Ngenyi Zvapupu zva Jehovha ndi vandhu vakadakara? (Vonanyi pikica yo kutanga.)

ZVAPUPU ZVA JEHOVHA ndi vandhu vakadakara. Vakandosongana basi, pangava pa musongano, pa gungano kana pa mabungaijo vanobhuya veciseka. Ngenyi vano mudakaro wakadaro? Izvi zvinoitika maningi-ningi ngo kuti ivona vanoziva Jehovha, ‘Mwari wakadakara.’ Ivona vanomushandira zve vanoeja kumutevejera. (1 Timoti 1:11, Shanduro yeNyika Itsva; Nduyo 16:11) Jehovha ndi Cinyuke co mudakaro, ngo kudaro iyena anoda kuti tive vakadakara zve anotipa mathangwe akawanda kuti tidakare.—Deuteronòmio 12:7; Mucumaeri 3:12, 13.

2, 3. (a) Zvinoda kurevenyi kuva wakadakara? (b) Ngenyi zvinganesa kuva no mudakaro?

2 Imwimwi keni? Makadakara here? Kudakara zvinoreva kudakajihwa ngo maponero enyu kana kuva no mudakaro kamare. Bhaibheri rinokhombija kuti, vaya vanokomborehwa ndi Jehovha ndivona vangava no mudakaro wokadi-kadi. Waro ngenyi zvinganesa kuva takadakara mu nyika ino?

 3 Zvinganesa kuva no mudakaro patinosongana no mugariro unocamwisa, wakadari inga kufa kana kujingwa ko mundhu watinoda, patinorambana, kana patinoperehwa ngo basa. Zvinganesazve kuwana mudakaro, kudari pa muzi pedu apana runyararo ngo kugara tecinesana, patinoshohwa ngo vashandi doni kana vajiji doni, kana patinoteverehwa kana kudihwa mu kadheya ngo ndava yo kushandira Jehovha. Kana kudari uhomi hwedu ahuripi ushoni, kangaije tingava no ciyayo, kana tino ndhendha yo kugara takasuruvara. Asi ceukijanyi kuti Jesu Kristu, ‘anodakara zve Mutongi ano Simba,’ waida maningi kutondhoja vandhu no kuvadakajisa. (1 Timoti 6:15, Shanduro yeNyika Itsva; Mateu 11:28-30) Pa Hurukuro yo pa Dundhu, Jesu wakabhuya ngo mugariro jimweni jingatibesera kuva vakadakara pikija patinonga no zvineso zvakawanda ngo kuti tiri kupona mu nyika ya Sathana.

ITUSU ATINGADAKARI TICINA JEHOVHA

4, 5. Tingaitenyi kuti tive vakadakara?

4 Jesu wakatanga ngo kunanga ciro cimweni cinosisira maningi. Iyena wakananga kudari: ‘Vanodakara nga vaya vanoziva zvinodiwa zvavo zvo kumujimu, ngo kuti Umambo hwo mugore ngo hwavo.’ (Mateu 5:3, Shanduro yeNyika Itsva) Kudari teciziva zvinodiwa zvedu zvo kumujimu, tinozodavira kuti tinodikana kuziva Mwari zve tinoda besero no ndhungamiriro yake. Tinozozvizivisa kudini zvondhozvo? Ngo kujija Bhaibheri, kuzwira Mwari no kudira pa kutanga kumunamata kwedu. Kuita zviro izvi kunozotibesera kuva vakadakara. Rutendo hwedu wo kuti zvipikihwa zva Mwari zvinozokwanirisika sambiri pano, unozovanga. Zve ‘vetero inodakajisa’ yatinowana mu Bhaibheri inozotivangisa.—Tito 2:13, Shanduro yeNyika Itsva.

5 Kudari tinoda kuva vakadakara, azvinenyi zvicinyi zvinoitika mu upenyu hwedu, tinodikana kuramba ticivangisa ushamwari hwedu na Jehovha. Mupostori Pauro wakatara kudari: “Dakaranyi ngari yese mwa Tenji. Ndinotibze komuri: dakaranyi.” (VaFilipi 4:4) Kuti tive shamwari yo phedo ya Jehovha, tinodikana kuva no zivo yo umwari. Soko ra Mwari rinonanga kudari: ‘Mundhu anowana uzivi ndiyena wakadakara, no mundhu anowana ungwaru. Ndiwona muti wo upenyu kuno vaya vanohubata zve vaya vanohubata ngo simba vanonangwa kuti vakadakara.’—Mazwi Akangwara 3:13, 18, Shanduro yeNyika Itsva.

Kuti tigare takadakara, zvinosisira maningi kuramba tecishandisa zvatinojija

6. Tinodikanazve kuitenyi kuti tigare takadakara?

6 Asi, kuti tigare takadakara, zvinosisira maningi kuti tirambe tecishandisa zvatinojija mu Bhaibheri. Jesu wakagogomejera kusisira kwazvo paakananga kudari: ‘Kudari mukaziva izvi, muno mudakaro kudari mukazviita.’ (Johani 13:17, Shanduro yeNyika Itsva; verenganyi Jakobo 1:25.) Izvi zvinodikana maningi kudari tiri kuda kugutisa zvido zvedu zvo kumujimu no kuramba takadakara. Waro tingava kudini vakadakara  patinova no zviro zvakawanda zvingatitorera mudakaro wedu? Ngativone zvimweni zvakanangazve Jesu pa Hurukuro yo pa Dundhu.

MUGARIRO JINOTIITA KUTI TIDAKARE

7. Zvingaitisa kudini vaya vanocema vova no mudakaro?

7 ‘Vanodakara vaya vanocema, ngo kuti vanozonyarajwa.’ (Mateu 5:4, Shanduro yeNyika Itsva) Tingatojibvunjisa kudari: ‘Zvingaitisa kudini vaya vari kucema vova vakadakara?’ Jesu aacainangira vese vari kucemari. Vandhu vazinji vakashata vari kucema, kana vakasuruvara, ngo kuti vari kusongana no zvineso mu ‘njiku jo kupejisira’ jino ‘jinonesa kubata najo.’ (2 Timoti 3:1, Shanduro yeNyika Itsva) Asi vari kurangarira ngo pamusoro pavo basi haiwa ngo pamusoro pa Jehovha, ngo kudaro, avaripi kupsaka kuva no ushamwari naye zve avakwanisi kuva vakadakara. Jesu wainga ecinangira vaya vanoziva zvinodiwa zvavo zvo kumujimu. Ivona vari kucema ngo kuti vari kuvona kuti vandhu vazinji vari kuramba Mwari kana avaripi kupona mukuzwirana no zvaanoda. Ivonavo vanotendera kuti ndi vashaishi zve vari kuvona zviro zvakashata zviri kuitika mu nyika ino. Jehovha anovona vaya vanocema ngo mwoyo wese, wovatondhoja ecishandisa Soko rake zve wovapa mudakaro no upenyu.—Verenganyi Ezekieli 5:11; 9:4, Shanduro yeNyika Itsva.

8. Ngenyi kuva wakapfava kunomubesera kuva makadakara?

8 ‘Vanodakara vakapfava, ngo kuti vanozogara utaka wo nyika.’ (Mateu 5:5, Shanduro yeNyika Itsva) Ngenyi kuva mundhu wakapfava kunomubesera kuva makadakara? Vandhu vazinji, vano hasha zve vanoda zvokujipana-jipana, mugariro iji jinoviisa zvineso zvakawanda. Asi pavanojija cokwadi ivona vanocinja vosimira “undhu hupsa.” Pasure pazvo, vanokhombija ‘unyaxa no kuthiva; kujidodokesa; kuthiva no kusengerera.’ (VaKolosi 3:9-12) Inga muviyo, ivona vano runyararo, vano ushamwari hwakanaka no vamweni zve vakadakara. Cimwenizve ngo co kuti Soko ra Mwari rakagondesa kuti ivona vanozogara utaka kana kuita “veno vo nyika.”—Nduyo 37:8-10, 29.

9. (a) Jesu waida kunangenyi paakananga kuti vandhu vakapfava ‘vanozogara utaka wo nyika’? (b) Ngenyi ‘vaya vano njara no nyota yo urungami’ vangadakara?

9 Jesu waida kunangenyi paakananga kuti vandhu vakapfava ‘vanozogara utaka wo nyika’? Vokuzojwa vanogara utaka hwo nyika pavanonga veciitonga inga majimambo no vapiri. (Apokalipsi 20:6) Mamirioni o vamweni vacina vetero yo kwenda mugore vanozogara utaka wo nyika pavanozotendehwa kuigara mbhera narini. Vanozova vakakwana zve vanozova no runyararo pomwe no mudakaro. Ndivona vakanangwaya ndi Jesu paakati: ‘Vanodakara vaya vano njara no nyota yo urungami.’ (Mateu 5:6, Shanduro yeNyika Itsva) Kuda kwavo zvakarungama kunozogutiswa Jehovha paanozobvisa ushati hwese. (2 Pedru 3:13) Mu nyika imbza, vandhu vakarungama vanozodakara zve avazocemizve ngo ndava yo zviro zviri kuizwa ngo vandhu vakashata.—Nduyo 37:17.

10. Zvinorevenyi kuva no unyasha?

10 ‘Vano mudakaro vaya vano unyasha ngo kuti vanozoitihwa unyasha.’ (Mateu 5:7, Shanduro yeNyika Itsva) Kuva no unyasha zvinoreva kuva anodakarira vamweni, ano pena zve ano usizi, kuda kunanga kuti  anozwira urombo vaya vanotambujika. Asi, unyasha unopinda kuva no mazwiro o pena basi. Bhaibheri rinojijisa kuti kuva no unyasha zvinobatanija kuita ciri cese kuitira kubesera vamweni.

11. Mufananijo ngo pamusoro po muSamaria wakanaka, unotijijisenyi?

11 Verenganyi Luka 10:30-37. Pa mufananijo wa Jesu ngo pamusoro po muSamaria wakanaka mwoyo, tinozwa kamare kuti zvinorevenyi kuva no unyasha. MuSamaria wakava no usizi pomwe no pena, kuno mwanarume wainga ecitambujika zvomuita kuti aite ciri cese kuti abesere. Pasure po kuita mufananijo uwu, Jesu wakati: “Endai, woitavo bzondhobzo.” Waro tingatojibvunjisavo kudari: ‘Ndiri kuitavo zvondhozvo here? Ndiri kuita zvakaizwaya ngo muSamaria wakanaka here? Vamweni pavanotambujika, ndingaita ciri cese kuitira kuvabesera here? Inga muezaniso, ndingabesera vasharuka mu ungano, noni kana vana vadoko vacina vabari vanoshandira Jehovha here? Ndingananga ‘zvinovangisa vaya vakavora mwoyo’ kuitira kuvatondhoja here?’—1 VaTesalònika 5:14, Baiberi Mazwi Akacena aMwari; Jakobo 1:27.

Ivanyi anotanga kubesera vamweni zve munozovona kuti vamweni vanozodakara kamare (Vonanyi ndima 12)

12. Ngenyi patinova no unyasha, tinova vakadakara?

12 Ngenyi tinodakara patinova no unyasha? Patinokhombija unyasha no vamweni, tinonga tecipa zve Jesu wakananga kuti kupa kunotipa mudakaro. Thangwe rimweni ngo rokuti tinonga teciziva kuti tiri kudakajisa Jehovha. (Maitiro o Vapostori 20:35; verenganyi Vaheberi 13:16, Shanduro yeNyika Itsva.) Mambo Dhavhidhi wakananga kudari ngo pamusoro po vanoita unyasha: “Tenji Mwari anomungwarira; anomupa uhomi no kudakara mu nyika, aamupi mu nyara jo vavengi vake.” (Nduyo 41:2, 3) Kudari tikava no unyasha pomwe no pena no vamweni, tinozoitihwavo unyasha ndi Jehovha zve tingava vakadakara mbhera narini.—Jakobo 2:13.

NGENYI ‘VAKACENA MU MWOYO’ VANODAKARA?

13, 14. Ngenyi zvinosisira kuva ‘vakacena mu mwoyo’?

13 Jesu wakananga kudari: ‘Vanodakara vakacena mu mwoyo, ngo kuti vanozovona Mwari.’ (Mateu 5:8, Shanduro yeNyika Itsva) Kuti tive vakacena mu mwoyo, tinodikana  kuita kuti murangariro no zvido zvedu zvirambe zvakacena. Izvi zvinosisira maningi kudari tinoda kuti Jehovha atendere kunamata kwedu.—Verenganyi 2 VaKorinto 4:2; 1 Timoti 1:5.

14 Vaya vakacena mu mwoyo, vangava no ushamwari hwakanaka na Jehovha, uwo anoti: ‘Vanodakara vaya vanopaja nguvo javo.’ (Apokalipsi 22:14, Shanduro yeNyika Itsva) Zvinoda kurevenyi kunanga kuti ivona ‘vakapaja nguvo javo’? Ku maKristu okuzojwa, zvinoda kureva kuti Jehovha anovavona inga vakacena, iyena anozovapa upenyu ucikafi mugore zve ivona vanozodakara kwenda no kwenda. Ku uzinji ukuru, uwo unovetera kupona pasi pano, zvinoreva kuti Jehovha anoutendera kuti uve shamwari jake ngokuti anouvona inga wakarungama. Bhaibheri rinonanga kuti ivona “vakapaja no kucenesa nguvo javo mu ngazi yo Bvuta.”—Apokalipsi 7:9, 13, 14.

15, 16. Kuitisa kudini vaya vakacena mu mwoyo ‘vanovona Mwari’?

15 Jehovha wakati: “Mundhu aakwanisi kuvona hope yangu no kuraramabze.” (Exodo 33:20) Kuitisa kudini vaya ‘vanovona Mwari’ vangava vakacena mu mwoyo? Gama ro ciGiriki rakasandujwa kuti “kuvona” ringareva kurangarira, kuzwisisa kana kuziva. Ngokudaro, ‘kuvona Mwari’ zvinoda kureva kuzwisisa mushovo wo Mundhu waari no kuda mugariro jake. (VaEfeso 1:18) Jesu wakatevejera mugariro ja Mwari ngo maitiro akaperera kamare, zvo kuti waikwanisa kunanga kudari: “Ndiyani anondivona, anovonavo Baba.”—Johani 14:7-9.

16 Mukuengejera, ‘tinovona Mwari’ patinovona kuti iyena ari kutibesera kamare mu upenyu hwedu. (Jobe 42:5) ‘Tingavonazve’ kana kusotesesa, zviro zvinoshamaisa zvinogondisa Jehovha ku vaya vanoramba vakacena zve vanomushandira vakagondeka. Zve kuno vokuzojwa, vanozovona Jehovha pavanozomuswa kwenda mugore.—1 Johani 3:2.

TINGADAKARA PIKIJA TINO ZVINESO

17. Ngenyi muiti wo runyararo anodakara?

17 Perepo, Jesu wakananga kudari: ‘Vanodakara vanoita kuti pave no runyararo.’ (Mateu 5:9, Shanduro yeNyika Itsva) Patinoita ciri cese kuti tiite runyararo no vamweni, tingava vakadakara. Mujiji Jakobo wakatara kudari: “Micero yo kururama inokuswa mu kunyarara nga vaya vanoita kunyarara.” (Jakobo 3:18) Kudari muri kuhwisana kuti munase kuzwanana no ari wese mu ungano yenyu kana pa mbhuri yenyu, deketeranyi kuti Jehovha amubesere kuita runyararo. Perapo, Jehovha anozomupa mujimu mucena wake, uwo unozomubesera kuti mukhombije mugariro jo ciKristu zve munozodakara. Jesu wakagogomejera kusisira kokuva tinotanga ndisu kuita runyararo, paakananga kudari: “Ngokudaro, pakuda kudira cipo cako pa dandiro, wocereceja pondhopo kuti hama yako ino ndava  na iwewe, regerai cipo cako pa nyasi po dandiro, ambai kuenda kozwirana no hama yako. Sure kwabzo, unozovia kopira cipo cako.”—Mateu 5:23, 24.

Mujimu wa Jehovha unozomubesera kuti mukhombijire mugariro jo ciKristu, perapo munozodakara

18, 19. Ngenyi maKristu angadakara pikija aciteverehwa?

18 ‘Munodakara imwimwi kudari vandhu vakamuvereketera zvinonyangaja no kumutambuja no kumunyepera no kuvereketera mushovo wese wo zviro zvakashata ngo ndava yangu.’ (Mateu 5:11, 12, Shanduro yeNyika Itsva) Jesu waida kunangenyi? Iyena wakaengejera eciti: ‘Dakaranyi, sekereranyi, ngokuti mubairo wenyu unozoita mukuru mugore. Ngokutibze vakatambuja kudaro vaporofeti vakamutungamirira.’ (Mateu 5:11, 12) Mapostori paakatakwa no kuimiswa kucumaera, ‘ivona vakabuda pa nyasi po Sinedrio, vakazara ngo kudakara. I zvokadi kuti avacaidakajihwa ngo kutakwa. Asi vaidakara “ngokuti vainga vakanakira kutambujwa ngo njio yo zina ra Jesu.”—Maitiro o Vapostori 5:41.

19 Nyamasi uno, vandhu va Jehovha vari kucungiriravo no mudakaro pavanoteverehwa ngo ndava yo zina ra Jesu. (Verenganyi Jakobo 1:2-4.) Kudari inga ndi vapostori, atidakari patinotambujika kana kuteverehwa. Asi, kudari tikaramba takagondeka kuna Jehovha, iyena anozotipa cicunge catinoda kuti ticungirire. Vonanyi basi zvakaitika na Henryk Dornik no hama yake. Mu mweji wa Agosto wo 1944, ivona vakaendeswa ku ndau yaiunganijwa vasungwi. Vandhu vaivatevererari vakananga kuti: “Azvikwanisiki kuvakhohwesa kuti vaite ciri cese. Kutambujika kwavo kunovaviisira mudakaro.” Henryk wakasanangura kudari: “Pikija andicaidepi kuurawa ngo ndava yo zvitendwa zvangu, kutambujika no cicunge pomwe no nderemejo ngo ndava yo kugondeka kwangu kuna Jehovha zvinondipa mudakaro.” Iyena wakaengejera eciti: “Kuita mukumbiro jakavanga kwakandiita kuti ndikwedere phedo na Jehovha zve iyena wakakhombija kuti ndi Mubeseri anothembeka.”

20. Ngenyi tinodakara patinoshandira ‘Mwari wakadakara’?

20 Jehovha, ‘Mwari wakadara,’ paanodakajihwa ndisu, tingadakara pikija patinoteverehwa ngo mbhuri yedu, kudari tiri kuhwaja, kana kudari taamusharuka. (1 Timoti 1:11, Shanduro yeNyika Itsva) Tingavavo vanodakara ngokuti Mwari wedu, “acikanyepi,” wakatigondisa zviro zvizinji zvinoshamaisa. (Tito 1:2) Jehovha paanozokwanirisa zvigondiso zvake, atizoceukijizve zvineso zvatiri kusongana nazvo wari. Zvokadi kamare, tinozova no upenyu unoshamaisa mu Paradhiso zve tinozova vakadakara kamare. Hina, ‘tinozodakara ngo kunyarara kwakaperera.’—Nduyo 37:11.