Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

Rambanyi Mecikhombija Rudo Ngokuti Unovaka

Rambanyi Mecikhombija Rudo Ngokuti Unovaka

“Rudo ngo hunovaka.”—1 VAKORINTO 8:2.

NDUMBO: 109, 121

1. Shwiro yapi inosisira yakabhuya Jesu no vajiji vake pa usiku hwo kupejisira naari pasi pano?

PA USIKU wokupejisira no vajiji vake, acito afa, Jesu wakabhuya ngo pamusoro po rudo ko bzava jinodarika 30. Iyena wakabvunja vajiji vake kuti vanodikana ‘kudisana ngocavo.’ (Johani 15:12, 17) Rudo hwavo waizovoneka kamare ku vamweni zve vaizozivika kamare inga vateveri vokadi va Kristu. (Johani 13:34, 35) Rudo hwainangari Jesu, aucaengepi mazwirovo hao, ndi mugariro wakavanga zve wokujipira. Jesu wakananga kudari: “Akuna ano rudo hukuru kupinda wiya anopa uhomi hwake ngo ndava yo xamwari. Munozoita xamwari jangu mukateveja bzondakamubvunja.”—Johani 15:13, 14.

2. (a) Nyamasi uno, vashandiri va Mwari vari kuzivika ngenyi? (b) Tinozodavira mubvunjo japi pa musoro uno?

2 Nyamasi uno, vashandiri va Jehovha vanozivika ngo rudo hwavo hwokadi no hwokujipira pomwe no rubatano hwakavanga. (1 Johani 3:10, 11) Azvinenyi kuti tiri vo nyika yapi, tinovereketa  nduminyi, tinobva kwapi kana takakurira kwapi. Kutenderera pasi pese, vashandiri va Jehovha vanodisanadi kamare umwe no umweni. Ngenyi rudo huri kusisira maningi nyamasi uno? Jehovha na Jesu vari kutivakisa kudini ngo rudo? Zve tingakhombijisa kudini rudo hwondhohwo kuitira kutondhoja no kuvangisa vamweni?—1 VaKorinto 8:2.

NGENYI RUDO UNOSISIRA MANINGI WARI?

3. “Mukuvo wokunesa” uno, uri kupsasa kudini vandhu?

3 Tiri kupona mu “mukuvo wokunesa” zve upenyu wakazara ngo ‘kutambujika’ no kusuruvara. (2 Timoti 3:1-5; Nduyo 90:10, Baiberi Mazwi Akacena aMwari) Vandhu vazinji vari kutambujika maningi zvokuti vanotoda kujiuraya. Vandhu vanodarika 800.000, vanojiuraya gore ngo gore, kuda kureva kuti pa masegundu 40 mundhu umwe anojiuraya. Zvinosuruvarisa ngo zvokuti pikija hama jedu jimweni jiri kuva no mazwiro akadaro jotogumira pa kujiuraya.

4. Ndi vandhu vapi vo mu Bhaibheri vakambojizwa kuti zviri nane kufa?

4 Mu nguva jo Bhaibheri, vashandiri vamweni vakagondeka va Mwari vaijizwa vakasuruvara maningi ngo ndava yo zvineso zvavo zvo kuti vaitoda kufa. Inga muezaniso Jobe wainga ecitambujikavo paakananga kudari: ‘Ndinonyenya kupona kwangu, andizoponi mbhera narini.’ (Jobe 7:16; 14:13, BMAA) Jona wakasuruvara maningi wonanga kudari: “Ndibzo wari, Tenji, itanyi kuti ndife, ngokuti bziri nane kondiri kufa kupinda kurarama!” (Jona 4:3) Muporofita Eria wakajizwa acina vetero kamare woguma pa kunanga kudari: “Bzakwana, Tenji! Toranyi mwiha wangu.” (1 Majimambo 19:4) Asi Jehovha waida vashandiri vake vondhovo vaigondeka zve waida kuti vapone. Aazivi kuvatonga ngo kuva kwavo no mazwiro ondhowo. Kusiyapo zvondhozvo, iyena wakavabesera kumusijira cido cavo co kupona kuti varambe vecimushandira no kugondeka kwese.

5. Ngenyi hama no hambzaji jedu jinoda kamare rudo hwedu wari?

5 Nyamasi uno, uzinji wo hama no hambzaji jedu jiri kuhwisana no mugariro jokunesa zve jinoda rudo hwedu. Vamweni vari kushohwa kana kuteverehwa. Vamweni vari kucungirira kudheerehwa kana kuitihwa magumbu kana magumba ku basa kwavo. Kangaije vanonga varemba ngo kushanda nguva jakawanda kana vava no basa rinonyangajisa. Vamweni vatona zvineso zvikuru pa mbhuri. Kangaije vakacadha no mundhu acikashandiri Jehovha zve nguva jese vanondoshohwa ndiyena. Ngo ndava yo zvineso izvi no zvimweni, vazinji vanotojizwa inga kuti avatocina simba zve vanotanga kuzvivona inga kuti avatoshandi. Ndiani angavabesera?

RUDO HWA JEHOVHA UNOTIVANGISA

6. Kuitisa kudini rudo hwa Jehovha unovangisa vashandiri vake?

6 Jehovha anogondisa vashandiri vake kuti anovada wari zve anozovada mbhera narini. Rangariranyi mazwire akava no vaIziraeri Jehovha paakavabvunja kudari: “Ngokuti unomutengo pa majiso angu, wakareremejwa, ngokuti ndinokuda,” zve “Ucathya, ngokuti ndinewe.” (Isaia 43:4, 5) Itusu tinozviziva kuti umwe nga umwe wedu anosisira kuna Jehovha. * (Vonanyi masoko  o pasi.) Bhaibheri rinogondesa kudari: “Ndiyena muponesi wakavanga. Anozotamba ngo kudakara ngondava yako.”—Sofonia 3:16, 17.

7. Kuitisa kudini rudo hwa Jehovha wakadari inga wa mai vari kumwisa? (Vonanyi pikica yo kutanga.)

7 Jehovha wakagondesa kuti anozovangisa no kuembezera vandhu vake, azvinenyi zvineso zvavanosongana nazvo. Iyena wakananga kudari: “Munozomwiswa, mozoberekwa, mozopuruzihwa pa mavero. Inga mundhu anopendejehwa ndi mai wake, ngokudarovo inini ndinozomupendejera.” (Isaia 66:12, 13) Rangariranyi mazwire anova no mwana, mai wake pavanonasa kumutaja kana kutamba naye! Jehovha anomuda ngo mwoyo wese zve anoda kuti mujizwe kuti makangwaririka. Narini, mucadokana-kana kuti imwimwi munosisira maningi pamberi pa Jehovha.—Jeremia 31:3.

8, 9. Rudo hwa Jesu hungativangisa kudini?

8 Vonanyi thangwe rimweni rinotiita kuti tizive kuti Jehovha anotida: “Mwari wakadisa nyika yo pasi, kokuti wakapa Mwana wake umwe ega, kuti vese vanomutenda vatame kufa, kaveta vave no uhomi hucingaperi.” (Johani 3:16) Muripo wa Jesu unotatijavo kuti iyena anotida zve rudo wondhowo unotivangisa. Bhaibheri rinonanga kuti nee “dambujiko nokuti kuthya” ‘azvingatiparajanisi ku rudo hwa Kristu.’—VaRoma 8:35, 38, 39.

9 Nguva jimweni, tinova no zvineso zvinotirembesa kunyama kana mu murangariro kana zvinotiita kuti tiruze mudakaro wedu pa kushandira Jehovha. Asi, ceujanyi kuti rudo wa Kristu ungativangisa kuti ticungirire. (Verenganyi 2 VaKorinto 5:14, 15.) Rudo hwa Jesu unotipa cido co kuramba tecipona zve ticishandira Jehovha. Ungatibesera kuti tisiye murangariro wo kuda  kufa pikija tiri kutambujika ngo ndava yo ngozi, kuteverehwa, kuvora mwoyo kana kuthimwa-thimwa.

HAMA JEDU JINODA RUDO HWEDU

Mungavangiswa ngo kujija muezaniso wa Jesu (Vonanyi ndima 10, 11)

10, 11. Ndiani ano mutoro wo kuvangisa hama jakaremba? Sananguranyi.

10 Jehovha anoshandisavo ungano kuti itivake mu rudo. Patinoda hama no hambzaji jedu, tinovonesa rudo hwedu kuna Jehovha. Tinoita zvese zvatingakwanisa kuti tibesere hama jedu kuti jizive kuti ijona jinosisira zve jinodiwa ndi Jehovha. (1 Johani 4:19-21) Mupostori Pauro wakatara kudari: ‘Besananyi no kuvangisana, kudari ngo bzo munoita.’ (1 VaTesalònika 5:11) Asipi vakuru basi vangadikana kuita izvi. Umwe nga umwe wedu angatevejera Jehovha na Jesu ngo kuembejera hama no hambzaji jedu.—Verenganyi VaRoma 15:1, 2.

11 Vamweni mu ungano vari kutambujika maningi ngo kusuruvara kana kuthimwa-thimwa, kangaije vanoda besero ro mamedhiko kana mutombo kamare. Pikija vakuru no vamweni mu ungano asipi mamedhiko, besero no embejero yavo ingasisira maningi. Vese mu ungano ‘vangavangisa vaya vakasuruvara, vangavangisa vakarembejeka, no kuva vanosengerera kuno vese.’ (1 VaTesalònika 5:14, Baiberi Mazwi Akacena aMwari) Tinoda kueja kuzwisisa mazwire anoita hama jedu. Tinodikana kuva vanosengerera tobhuya navo ngo maitiro anovanyaraja pavanonga vakaremba. Munoeja kuvangisa vamweni here? Mungaitenyi kuti muengejere kuva anotondhoja no kuvangisa?

12. Ipanyi muezaniso wo umwe mundhu wakavangiswa ngo rudo hwo hama jo mu ungano yake.

12 Hambzaji imweni yo ku Europa yakananga kudari: “Nguva jimweni ndinogumihwa  ngo murangariro wo kuda kujiuraya, asi ndino zvinokwanisa ushoni kundibesera. Ungano yandiri iri kuponesa upenyu hwangu. Hama no hambzaji vanondida no kundivangisa nguva jese. Pikija vashoma vanoziva kuti ndinotambujika ngo ndhendha yo kusuruvara, asi nguva jese ungano iripo kuitira kundibesera. Kuno varovorani vamweni vakadari inga vabari vangu vo kumujimu. Ivona vanondikorondha ushoni zve vanotondibesera njiku jese kamare.” Zvokadi, asipi vese vanokwanisa kubesera ngo manera akaezana. Asi tese tingaita zvakawanda kuitira kubesera hama no hambzaji jedu. * (Vonanyi masoko o pasi.)

TINGAVAKISA KUDINI VAMWENI NGO RUDO?

13. Tinodikana kuitenyi kuti titondhoje vamweni?

13 Ivanyi mupurutani wakanaka. (Jakobo 1:19) Tinokhombija rudo patinopurutana no usizi. Itanyi mubvunjo jingamubesera kunasa kuzwisisa mazwiro o hama yenyu. Iyona inozoziva kuti munoitaja, pikija ngo masotere amunoiita. Painonga yecivereketa, ivanyi anosengerera zve siyanyi kuti iverekete zvainazvo mucikaiguri. Ngo kuva mupurutani waushoni, munganasa kuizwisisa zve mungaita kuti iyona imuthembe. Ngo kudaro, zvinozoirerukira kupurutana zvamunovereketa pamunonga mecieja kuibesera. Pamunotaja kamare vamweni, ivona vangabesereka ngo kuvatondhoja komunovaita.

14. Ngenyi atidikani kushora?

14 Mucadoshora. Mundhu wakasuruvara, tikamushora, mazwiro aanova nao basi ngo kuti iyena aasisiri ciro. Akajizwa kudaro, zvinozonesa maningi kuti timubesere. “Variyo vano rurimi hunoceka inga banga; asi rurimi hwo vazivi hunorapa.” (Mazwi Akangwara 12:18) Pikija aticaizoda kukhugunya mundhu wakasuruvara ngo magama, itusu taizoengejera kuhwajihwa kwake kudari tikavereketa ticikazivi kurangarira. Kuti titondhoje hama yedu tinodikana kuikhohwesa kuti zvokadi tiri kueja kuzwisisa zvairi kusongana nazvo.—Mateu 7:12.

15. Mathurusi api anosisira atingashandisa kuti titondhoje vamweni?

15 Shandisanyi Soko ra Mwari pa kutondhoja vamweni. (Verenganyi VaRoma 15:4, 5, Shanduro yeNyika Itsva.) Bhaibheri rinobva ka ‘Mwari anopekeja kucungirira no nyarajo,’ ngokudaro azvitikahamaji kuzwa kuti ndimona matinowana nyarajo. Itusu tinavo Índice das Publicações da Torre de Vigia no Bhuku ro Kupsakisisa ro Zvapupu zva Jehovha. Tikashandisa mathurusi aya tingawana matahwa no mabhuku atingashandisa kuti titondhoje no kuvangisa hama no hambzaji jedu.

16. Mugariro japi jinozotibesera kuvangisa ari wese wakasuruvara?

16 Ivanyi wakanaka mwoyo zve ano pena. Jehovha ndi “Baba wo unyaxa, Mwari wo unyarajo hwese” zve iyena ‘wakanaka mwoyo’ kuno vashandiri vake. (Verenganyi 2 VaKorinto 1:3-6; Luka 1:78; VaRoma 15:13) Pauro wakagaja muezaniso wakanaka pa divi iri ngo kuti waitevejera Jehovha. Iyena wakatara kudari: ‘Takagara pakati penyu takazara ngo kupfava, ngo maitiro o vanoita  mai vanorera vana vavo. Rudo hwedu hwakakura kudari kuti taizomupa, haiwa vhangeri ra Mwari basi, kaveta mwoyo yedu kamare, ngo kukura ko rudo hwedu.’ (1 VaTesalònika 2:7, 8) Patinokhombija kunaka mwoyo inga ndi Jehovha, tinopa tondhojo inokumbihwaya ngo hama jedu pa mukumbiro.

17. Kuti tivangise hama jedu, tinodikana kuva no mavonero api ngo pamusoro pajo?

17 Mucadovetera kuti hama jenyu jive jakakwana. Mucadonyanyisa. Mukambhera ngo kuvetera kuti hama jenyu jive jakakwana, munozopera simba. (Mucumaeri 7:21, 22) Ceujanyi kuti Jehovha anosota zvatiri kamare. Ngo kudaro, tinodikana kuva vanosengerera umwe kuno umweni. (VaEfeso 4:2, 32) Atidi kuita kuti hama jedu jizwe inga kuti ajiripi kushandavo zvinovoneka kana kujiezanisa no vamweni. Kusiyapo, tinojivangisa no kunanga zviro zvakanaka zvajiri kuita. Izvi zvingajibesera kuva jakadakara pajinonga jecishandira Jehovha.—VaGalàsia 6:4.

18. Ngenyi tinodikana kuda kuvakana umwe no umweni mu rudo?

18 Umwe nga umwe wo vashandiri va Jehovha anosisira maningi kwaari zve kuna Jesu. (VaGalàsia 2:20) Tinoda maningi hama no hambzaji jedu, ngo iyo ndava tinodikana kujitaja ngo unyasha. Itusu tinopsaka “ibzo bzinovaka rugarisiko no rubeso ngocedu.” (VaRoma 14:19) Tiri kuvetera no cido cese upenyu mu Paradhiso, mu nguva yo kuti akuna na umwe anozova no thangwe ro kusuruvara. Akucazovi no ndhendha nee hondo. Vandhu avazofi ngo ndava yo cishaishi, akucazovi no kuteverehwa, zvineso zvo mbhuri kana zvinorembesa mu upenyu. Pasure po ciuru co makore, vandhu vanozova vakakwana. Vaya vanozoramba vakagondeka pa muejo wo kupejisira vanozoitwa vana ndi Jehovha pasi pano zve vanozova no “rusujunuko mugoja ro vana va Mwari.” (VaRoma 8:21) Ngo kudaro, tese ngatiteme civaringo co kukhombija rudo hunovaka no kubeserana umwe no umweni kuti tinghwine mu nyika imbza inoshamaisa ya Mwari.

^ ndim. 6 Vonanyi cipauko 24 co bhuku rinoti, Swedera Pedyo naJehovha.

^ ndim. 12 Kuitira kubesera vaya vano murangariro jo kuda kujiuraya vonanyi musoro iji jo revhista Mukai!, jinoti: “Chandinoraramira Chii?—Zvikonzero Zvitatu Zvokuti Urambe Uchirarama?(Maio 2014); “Pfungwa Dzokuda Kuzviuraya Padzinombouya(Abril 2012); zve musoro unoti: “Vale apena viver, unowanika pa Dispertai! (22 de Outubro, 2001).