Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

‘Kudari Mukaziva Izvi, Muno Mudakaro Kudari Mukazviita’

‘Kudari Mukaziva Izvi, Muno Mudakaro Kudari Mukazviita’

“Bzokuha bzangu, kuita kuda kwa wiya wakanditumaya no kupeja basa rake.”—JOHANI 4:34.

NDUMBO: 80, 35

1. Murangariro wo umbau wo nyika ino, ungapsasisa kudini kujidodokesa kwedu?

NGENYI azvizivi kureruka kushandisa zvatinojija mu Soko ra Mwari? Thangwe rimwe ngo rokuti, kuti tiite zvakanaka, tinodikana kuzvidodokesa. Mu ‘njiku jokupejisira’ jino, zvinonesa kuramba wecijidodokesa, ngo kuti vandhu vazinji vakatitendeneja ‘vanozvida, vanodisisa upfumi, vanojitutumaja, vanojikuja’ zve ‘avajibati.’ (2 Timoti 3:1-3, Baiberi Mazwi Akacena aMwari) Inga vashandiri va Mwari, tinozviziva kuti mufambiro wakadaro wakashata, asi zvingavoneka inga kuti vaya vanoita zviro mu njira iyi vari kubudirira zve vari kudakajihwa kamare mu upenyu hwavo. (Nduyo 37:1; 73:3) Kangaije tingarangarira kudari: ‘Zvinobesera kamare kudira zvinodiwa zvo vamweni kumbeji ko zvangu here? Kudari ndikazvidodokesa, vandhu vanozoramba vacindireremeja here?’ (Luka 9:48) Kudari tikatendera kuti umbau wo mu nyika ino utitungamirire, tinozokhuvaza ushamwari hwedu wakanaka no hama jedu zve  zvinozonesera vamweni kuti vazvizive kuti tiri maKristu. Asi, patinojija muezaniso wo vashandiri vanozvidodokesa va Mwari no kuvatevejera, tinozova no muviyo jakanaka.

2. Zvicinyi zvatingajija ngo vashandiri va Mwari vo kare?

2 Zvicinyi zvakabesera vashandiri vakagondeka va Mwari vo kare kuti vave shamwari jake? Zvicinyi zvo vakaita kuti vamudakajise? Vakariwanirepi simba ro kuita zviro zvaushoni? Patinoverenga ngo pamusoro po muezaniso javo mu Bhaibheri zve torangarijisisa ngo zvatiri kuverengaro, gonda redu rinozovanga.

ZVICINYI ZVINOITA KUTI RUTENDO HWEDU HURAMBE HWAKAVANGA?

3, 4. (a) Jehovha anoshandisenyi kuti atijijise? (b) Ngenyi tinoda zvizinji kupinda zivo kuti rutendo hwedu hurambe hwakavanga?

3 Jehovha anotipa zvatinoda kuti rutendo hwedu hurambe hwakavanga. Tinoashira mbhangiro yaushoni no rovejo inobva mu Bhaibheri, mabhuku edu o ciKristu, saiti yedu, JW Broadcasting, musongano pomwe no magungano. Asi Jesu wakasanangura kuti tinoda zviro zvizinji kupinda zivo. Iyena wakati: “Bzokuha bzangu, kuita kuda kwa wiya wakanditumaya no kupeja basa rake.”—Johani 4:34.

4 Kuna Jesu, kuita kuda ka Mwari kwaidari inga zvokuha. Zvokuha zvaushoni zvinotiita kuti tijizwe ushoni zve tive no uhomi wakanaka. Mukuezanavo, kuita kuda ka Mwari kunoita kuti tijizwe ushoni zve kunovangisa rutendo hwedu. Inga muezaniso, makaamba kwenda ku musongano wo basa ro munda makaremba asi pakupera kucumaera mohwirira kanyi makadakara zve makavanga here?

5. Tinobesereka kudini ngo kuva no ungwaru?

5 Patinoita zvatinokumbihwa ndi Jehovha, tinotatija kuti tino ungwaru. (Nduyo 107:43) Zve zviro zvizinji zvaushoni zvinoitika ku vaya vano uzivi. “Bzounoda bzese, abziezani nahwo. . . . Ndihwona muti wo uhomi kuna vaya vanohukotora, vanomucena vaya vanohubata.” (Mazwi Akangwara 3:13-18) Jesu wakananga kuti: ‘Kudari mukaziva izvi, muno mudakaro kudari mukazviita.’ (Johani 13:17, Shanduro yeNyika Itsva) Vajiji va Jesu vaizoramba vakadakara kudari no vaienderera mberi veciita zvavakabvunjwa ndi Jesu kuti vazviite. Kutevejera jijiso jake no muezaniso wake, ainga maponero avo.

6. Ngenyi tinodikana kuramba tecishandisa zvatinojija?

6 Nyamasi uno, tinodikanavo kuramba ticishandisa zvatinojija. Rangariranyi ngo mekaniko ano mathurusi o kushanda nawo no zivo. Zviro izvo zvinozomubesera kuti ave mekaniko waushoni, basi kudari akazvishandisa. Zvingaita kuti ano makore mazinji aciita basa rondhoro, asi kuti arambe ari mekaniko waushoni anodikana kuramba ecishandisa zvaakajija. Mu njira yakafanana, patakatanga kujija cokwadi, tainga takadakara maningi ngo kuti taishandisa zvataiverenga mu Bhaibheri. Asi kuti tive no mudakaro ucikaperi, tinodikana kuramba tecishandisa njiku jese zvatinojijiswa ndi Jehovha.

7. Zvicinyi zvatinodikana kuita kuti tijije ngo muezaniso jo mu Bhaibheri?

7 Pa musoro uno, tinozobhuisana ngo mugariro munganani jinotiita kuti tinesehwe kuramba tecijidodokesa. Tinozojijazve kuti vagondeki vo kare vakarambisa kudini vecijidodokesa. Asi tinodikana kuita zvizinji kupinda kuverenga masoko basi. Tinodikana kurangarijisisa no kuzvishandisa mu upenyu hwedu.

 MUCAJIVONA INGA MUNOSISIRA MANINGI

8, 9. Pana Maitiro o Vapostori 14:8-15 tinojijenyi ngo kujidodokesa ka Pauro? (Vonanyi pikica yo kutanga.)

8 Mwari anoda kuti mushovo wese wo vandhu “vaponeswe, no kukwanisa kuziva bzokadi.” (1 Timoti 2:4) Munovavona kudini vandhu vese vacito vajija cokwadi? Mupostori Pauro wakacumaera vaJudha, avo vaiziva ciri cese ngo pamusoro pa Jehovha. Asi iyena wakacumaeravo vaya vainamata zvimwari zvo manyepo. Kucumaira vandhu ava, kwakaeja kujidodokesa ka Pauro. Kuitisa kudini?

9 Pa hwendo wo kutanga wa Pauro inga misionario, iyena na Bharnabha vakaenda ku dhorobha ro Ristra. Vandhu vaigara kondhoyo vakataja Pauro na Bharnabha inga vandhu vanosisira maningi zve vakavadanija ngo mazina o zvimwari zvavo zvo manyepo Zeu na Hermeu. Waro Pauro na Bharnabha vakajizwa kudini? Kureva kuti ivona vakavona izvo inga cinjo inodakajisa, zvecivoneka kuti vainga vecibva kuteverehwa mu madhorobha maviri ovaibva kobvakacira here? Vakarangarira kuti kutajwa uku kwaizobesera vandhu vazinji kuti vapurukire masoko akanaka here? Haiwa! Ivona vakanyangajwa maningi vomima kudari: “Xamwari, bzinyi bzomunoitari? Itisuvo tiri vandhu vanofa, inga imwimwi.”—Maitiro o Vapostori 14:8-15.

10. Ngenyi Pauro na Bharnabha avacaijivona inga vanosisira maningi kupinda vandhu vo ku Rikaonia?

10 Pauro na Bharnabha pavakananga kuti vaingavo vandhu, vainanga kuti vainga vacizivi kukwana. Ivona avacainanga kuti manamatiro avo aifanana no manamatiro o vandhu vo ku Rikaonia. Pauro na Bharnabha vainga vakatumwa ndi Mwari inga mamisionario. (Maitiro o Vapostori 13:2) Vainga vapera kuzojwa ngo mujimu mucena zve vainga no vetero inoshamaisa. Asi iri aricaingepi thangwe raivaita kuti vajizwe inga kuti vanosisira maningi. Ivona vaizwisisa kuti vandhu avo, vaizoashira vetero yo kurarama mugore kudari novakaashira masoko akanaka.

11. Tingajidodokesa kudini inga ndi Pauro patinocumaera?

11 Aya ndi amwe manera o tinotatija ndiwona kuti tinojidodokesa inga ndi Pauro. Narini atijizwi inga kuti basa redu ro kucumaera kana zviro zvatinobesehwa kukwanirisa ndi Jehovha zvinotiita kuti tive vanosisira maningi. Tingajibvunjisa kudari: ‘Ndinojizwa kudini ngo vaya vari mu ndima yangu? Ndina mukheto no vandhu vo cikwata cakati kuti here?’ Kutenderera nyika yese, Zvapupu zva Jehovha zvinoeja kupsaka vaya vanozopurukira masoko akanaka. Vamweni vanovangisira kuti vajijire ndumi imbza kana zvirovejeso zvo vandhu vanovoniwa ngo vamweni inga vakaderera. Asi narini avajivoni inga kuti vanosisira maningi kupinda vaya vavanocumaera. Kunja kwa izvo, vanoeja kuzwisisa mundhu umwe nga umwe kuitira kubesera vazinji zvikakwanisika kuti vaashire masoko o Umambo.

KUMBIRIRANYI VAMWENI MECINANGA ZINA RAVO

12. Epafra wakatatijisa kudini kuti waitaja kamare vamweni?

12 Manera amweni atinokhombija ndiwona kuti tinojidodokesa ngo o kuitira mukumbiro hama no hambzaji jedu, jino “rutendo hwokadi-kadi pamwepo na itusu.” (2 Pedru 1:1) Izvi ngo zvakaitwa ndi Epafra. Bhaibheri rinomunanga katatu basi. Pauro paainga wakasungwa ku Roma, wakatarira maKristu o ku Korosi ecinanga kudari ngo pamusoro pa Epafra: “Yena anovangirira ngo  mukumbiro yake acikazorori.” (VaKolosi 4:12) Epafra waiziva ushoni hama jake zve waijitaja ushoni. Pauro wakamudanija kuti “mudoni wangu pakusungwa,” ngo kudaro, Epafra waingavo no zvineso zvake. (Filemoni 23) Asi iyena wairamba ecitaja zvinodiwa zvo vamweni zve waiita ciri cese kuti avabesere. Epafra wakaitira mukumbiro hama no hambzaji jake zve itusu tingaitavo zvakafanana, tecitonanga ngo mazina avo. Mukumbiro jondhojo jinobesera maningi.—2 VaKorinto 1:11; Jakobo 5:16.

13. Pamunoita mukumbiro mungatevejeresa kudini Epafra?

13 Rangariranyi mundhu omungaitira mukumbiro ngo zina. Mungatoziva shamwari mu ungano kana mbhuri jiri kusongana no zvineso. Kangaije vano zvivaringo zvinonesa kutema kana muejo javari kuhwisana najo. Mungaitiravo mukumbiro hama jino mazina ari mu jw.org pa musoro unoti: “Testemunhas de Jeová presas por causa de sua fé.” (Nghwinanyi ngo panoti IMPRENSA > CASOS JURÍDICOS.) Mungaitiravo mukumbiro vaya vakaruza vadiwa vavo mu rufu, vaya vakapokonyoka wari pa ngozi kana pa hondo pomwe no vaya vari kusongana no zvineso zvo mare. Kuno hama no hambzaji zinji jinoda mukumbiro jedu! Patinovakumbirira, tinotatija kuti atirangariri zvido zvedu basi asi tinorangariravo zvinodiwa zvo vamweni. (VaFilipi 2:4) Jehovha anozwa mukumbiro jondhojo.

‘KASIKANYI KUPURUKIRA’

14. Kuitisa kudini Jehovha anonasa kupurukira?

14 Manera amweni atinokhombija ndiwona kuti tinojidodokesa ngo o kuva mupurutani waushoni. Jakobo 1:19 inotibvunja kuti tive ‘vanokasika kupurukira.’ Jehovha i mupurutani waushoni. (Genesi 18:32; Joxwa 10:14) Inga muezaniso, verenganyi mabhuyo anowanika pa Exodo 32:11-14. (Verenganyi.) Jehovha wakatendera kuti Mosi anange mazwiro ake, pikija kuti iyena aacaizozviita. Maizopurutana no kusengerera kwese mundhu wo kuti wakamboposa kareko perepo moteverera mazano ake here? Asi, Jehovha  anopurukira ngo kusengerera kwese vaya vanokumbira ngo gonda.

15. Tingatevejeresa kudini Jehovha ngo kupa rukujo vamweni?

15 Jibvunjisenyi kudari: ‘Kudari Jehovha anojidodokesa maningi zvo kuti angapurukira vandhu inga zvaakaita na Abhirahama, Rakeri, Mosi, Joshuwa, Manoa, Eria, na Ezekia, andidikanivo kuita zvakafanana here? Ndingapa rukujo ku hama jangu jese ngo kupurukira mazano ajo no kumateverera kudari zvikakwanisika here? Kuno mundhu ari wese mu ungano yangu kana pa mbhuri yangu anoda kupurukihwa here? Ngozvapi zvandinozoita ngo pamusoro pazvo?’—Genesi 30:6; Vatongi 13:9; 1 Majimambo 17:22; 2 Kronike 30:20.

KANGAIJE JEHOVHA ‘ANOZOVONA UROMBO HWANGU’

Dhavhidhi wakati: “Muregerenyi!” Imwimwi keni mwaizoitenyi? (Vonanyi ndima 16, 17)

16. Mambo Dhavhidhi wakaitenyi paakashaisha kutajwa ndi Shimei?

16 Kujidodokesa kunozotibeseravo kuti tijibate patinoshaisha kutajwa. (VaEfeso 4:2) Tinovona muezaniso waushoni maningi pana 2 Samueli 16:5-13. (Verenganyi.) Shimei, ukama wa Mambo Sauri, wakatuka no kuhwisa Dhavhidhi no vashandiri vake. Dhavhidhi waizokwanisa kurambisa Shimei kuti atame kumutuka, asi kunja kwa izvo, ngo kusengerera kwese wakacungirira kutukwa kwaaitwa ndiyena. Dhavhidhi wakaitenyi kuti akwanise kuzvibata? Tingakwanisa kufumbhura izvo ngo kupopora Nduyo yo citatu.

17. Zvicinyi zvakabesera Dhavhidhi kuti akwanise kujibata zve itusu tingamutevejeresa kudini?

17 Dhavhidhi wakatara Nduyo yo citatu pa mukuvo waainga ecida kuurawa ngo mwana wake Abhusaromi. Ndiwona mukuvo wondhowo waakahwiswa ndi Shimei, asi iyena wakawana simba ro kuramba wakathiva. Wakariwanepi? Pana Nduyo 3:5 tinoverenga magama a Dhavhidhi eciti: “Ngo izwi guru ndinokhuwira Tenji Mwari, yena anondidavira, ari pa dunthu rake rakacena.” Patinoshaisha kutajwa, tinodikana kuita mukumbiro inga zvakaita Dhavhidhi. Perepo Jehovha anozotipekeja mujimu mucena wake, ngokudaro tingazocungirira. Munokwanisa kujibata kamare kana kuregerera pamunoshaisha kutajwa ngo ari wese here? Muno gwinyiso ro kuti Jehovha anoneseka ngo dambujiko renyu zve anozomubesera no kumukomborera here?

‘UNGWARU NDI CIRO CIKURU MANINGI’

18. Tinozobesereka kudini ngo kushandisa ndhungamiriro ja Jehovha?

18 Patinoita zvatinoziva kuti zvakanaka, tinozova vano ungwaru zve Jehovha anozotikomborera. Pa Mazwi Akangwara 4:7, Bhaibheri rinonanga kudari: ‘Ungwaru ndi ciro cikuru maningi.’ Pikija kuti ungwaru wakacijikira pa zivo, unobatanija zvizinji kupinda kuzwisisa zviro. Ungwaru unobatanija zvisungo zvatinotema. Nee usunji unokhombija ungwaru ngo kunasirira zvokuha kuitira nguva yo cipepo. (Mazwi Akangwara 30:24, 25) Kristu, uwo anodanijwa “uzivi hwa Mwari,” nguva jese waidakajisa Baba wake. (1 VaKorinto 1:24; Johani 8:29) Mwari anozotipfupa tikarambavo tecikhombija ungwaru ngo kusana kuita zvatinoziva kuti zvakanaka no kuramba tecijidodokesa. (Verenganyi Mateu 7:21-23, Shanduro yeNyika Itsva.) Ngo kudaro, rambanyi mecishanda kuti ungano ive ndau yo kuti vese vanozoramba vecishandira Jehovha ngo kuzvidodokesa. Zvinoda nguva no kusengerera kuti tishandise zvatinoziva kuti zvakanaka. Asi kuita izvo zvinokhombija kujidodokesa zve kujidodokesa kunozotiita kuti tidakare wari zve kwenda no kwenda.