Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 MUSORO WO KUJIJA WO 10

Zvicinyi Zvingatiita Kuti Titame Kubhabhatijwa?

Zvicinyi Zvingatiita Kuti Titame Kubhabhatijwa?

“Wakaimisa ngoro voderuka vese mu kumwa: Filipe no muthenwa, womubapatiza.”—MAITIRO O VAPOSTORI 8:38.

NDUMBO 52 Kuzvipira ko CiKristu

ZVATICAJIJA *

1. Adhamu na Evha vakaruzenyi zve ngowapi wakava muviyo wakona?

NDIYANI wamunorangarira kuti anodikana kupa ndhungamiro yo zvakanaka no zvakashata? Adhamu na Evha povakaha mucero wo muti wo uzivi wo zvakanaka no zvakashata, ivona vakajekesa kamare kuti: Avacaithemba Jehovha no ndhungamiro jake. Vakasana kudira ndhungamiro javo ngo pamusoro po zvakanaka no zvakashata. (Genesi 3:22) Asi, vonanyi basi zvovakaruza. Vakaruza ushamwari hwavo na Jehovha. Voruzazve mukana wo kuzopona kwenda no kwenda. Muviyo wakona wakava unosuruvarisa maningi, kupa ushaishi no rufu ku vana vavo. (VaRoma 5:12) Adhamu na Evha vakajiendesa ku ngozi basi.

Naapera kuzwisisa kuti Jesu mwana wa Mwari, muEtiopi wakada kubhabhatijwa (Vonanyi ndima 2-3)

2-3. (a) MuEtiopi wakadavirisa kudini, Firipi paakamucumaera? (b) Tinoashira makomborero api tikabhabhatijwa zve mubvunjo japi jatinozodavira?

2 Manera akaita Adhamu na Evha pa shwiro iyi, akasiyana no madavirire akaita muEtiopi, Firipi paakamucumaera. MuEtiopi wakabongesera maningi ngo zvakaita Jehovha na Jesu zvokuti waida kubhabhatijwa. (Maitiro o Vapostori 8:34-38) Patinojipira pacedu kuna Mwari inga ndi muEtiopi wiya, tobhabhatijwa, tinokhombija pacena kuti, tiri kubongesera ngo zvese zvakatiitira Jehovha na Jesu. Tinokhombijazve kuti tinothemba Jehovha zve tinozwisisa kuti ndiyena basi anodikana kupa ndhungamiro ngo pamusoro po zvakanaka no zvakashata.

3 Rangariranyi basi makomborero atinoashira patinoshandira Jehovha! Amwe awo ngo o kuti, tinova no mukana wo kuwana zvese zvakaruza Adhamu na Evha, kubatanijavo  mukana wo kupona kwenda no kwenda. Ngo ndava yo rutendo hwedu kuna Jesu Kristu, Jehovha anoregerera kuposa kwedu zve anotipa hana yakacena. (Mateu 20:28; Maitiro o Vapostori 10:43) Tinavo mukana wo kuva divi ro mbhuri ya Jehovha inga vashandiri vanotendehwa kuti tiwane makomborero atiri kuimira. (Johani 10:14-16; VaRoma 8:20, 21) Pikija no makomborero ese aya, vamweni vedu vanoguma pa kuziva Jehovha, vanothya kutevejera muezaniso wo muEtiopi uwu. Zvicinyi zvingavaita kuti vatame kubhabhatijwa? Zve vanganyisisa kudini zvineso izvi?

ZVINESO ZVINGAITA KUTI VAMWENI VATAME KUBHABHATIJWA

Zvineso zvinosongana no vamweni vacito vabhabhatijwa

Kutama kujithemba (Vonanyi ndima 4-5) *

4-5. Ngozvapi zvineso zvakasongana no mujaha umweni anodanwa Avery no musikane anodanwa Hannah?

4 Kutama kujithemba. Vabari va Avery ndi Zvapupu zva Jehovha. Babake vano mufambiro waushoni zve mukuru anobudirira. Hina, Avery waithya kubhabhatijwa. Ngenyi? Iyena wakati: “Ndairangarira kuti andizokwanisi kuva no mufambiro waushoni inga wainga na Babangu.” Avery wairangarirazve kuti aacaizokwanisa kuita mabasa aaizopuwa kumbejiyo. “Ndaithya kuzobvunjwa kuti ndiite mukumbiro pakawanda vandhu, kuita hurukuro kana kutungamirira cikwata co kwenda mu basa ro mu munda.”

5 Hannah wo 18 o makore okubahwa, waineseka maningi ngo kutama kujithemba. Iyena wakarehwa ngo vabari vaishandira Jehovha. Pikija zvakadaro, waikana-kana dangani waizokwanisa kupona mukuzwirana no ndhungamiro ja Jehovha. Ngenyi? Ngokuti wainga mundhu umweni acikajithembi kamare. Pa kufamba ko nguva, wakatoguma pa kujikhuvaza, ngokuti waijizwa inga acikatosisiri. Iyena wakati: “Andizivi kubvunja ari wese zvondakaita, nee vabari vangu zve ndairangarira kuti Jehovha narini aazondidi inga umwe wo vashandiri vake.”

Kukwevehwa ngo shamwari (Vonanyi ndima 6) *

6. Zvicinyi zvakaita kuti Vanessa anesehwe kubhabhatijwa?

6 Kukwevehwa ngo shamwari. Vanessa wo 22 o makore o kubahwa, wakati: “Ndainga no shamwari jaushoni maningi, jondakaziva kubvira kare kamare.” Asi, shamwari jake ajicaimubesera kuti akwanirise cido cake cokuda kubhabhatijwa. Izvo, zvakamuhwaja maningi, woguma pa kuti: “Ndaivona kuti kuita ushamwari i ciro cinonesa maningi zve ndaithya kuti kudari ndikapeja ushamwari uwu, narini andicaizowanazve shamwari jo phedo.”

Kuthya kuita cishaishi cikuru (Vonanyi ndima 7) *

7. Musikane waidanwa Makayla waithya cinyi zve ngenyi?

7 Kuthya kuita cishaishi cikuru. Makayla wainga no makore mashanu nevanji wake povakajingwa. Paainga ecikura, wakavona masuruvarire akaita vabari vake ngo pamusoro  po zviito zva nevanji wake. Iyena wakati: “Ndaithya kubhabhatijwa, ndaithya kuti ndinozoita cishaishi, ndojingwa zve ndoita kuti vabari vangu vasuruvare.”

Kuthya kuteverehwa (Vonanyi ndima 8) *

8. Umwe mujaha waidanwa Miles waithyenyi?

8 Kuthya kuteverehwa. Baba no mukaji wo cipiri wa baba wa Miles vaishandira Jehovha, asi mai wake avacainga Capupu. Miles wakati: “Ndaigara na mai wangu ko 18 o makore zve ndaithya kuvabvunja kuti ndaida kubhabhatijwa. Ndakavona manera ovakagara babangu povakava Capupu. Ndaithya kuti vaizondibarira zvineso.”

MUNGANYISISA KUDINI ZVINESO IZVI?

9. Zvicinyi zvinozoitika kudari mukajija ngo pamusoro po kusengerera no kuva no rudo kwa Jehovha?

9 Adhamu na Evha, vakasana kutama kushandira Jehovha ngokuti ivona avazivi kusakurira rudo wakavanga naye. Pikija zvakadaro, Jehovha wakavatendera kuti vapone nguva yakareba, vave no vana zve vadire ndhungamiro javo povanonga vacirera vana vavo. Muviyo wakava na Adhamu na Evha wo kuda kujitonga vega wakajekesa kuti ivona avacainga no ungwaru. Dangwe ravo rakava muurai wo hama yake icina ndava zve pa kufamba ko nguva, ugevenga no umbau zvakabata mbhuri jese pa nyika. (Genesi 4:8; 6:11-13) Asi, Jehovha wainga no manera o kuponesa mubarihwana wese wa Adhamu na Evha kuti umushandire. (Johani 6:38-40, 57, 58) Pamunoengejera jijo yenyu munozovona kuti Jehovha anosengerera zve ano rudo, mukadaro, rudo hwenyu unozokura. Munozoramba kuita zvakaitari Adhamu na Evha zve munozojipira pacenyu kuna Jehovha.

Munganyisisa kudini zvineso zvondhozvo?

(Vonanyi ndima 9-10) *

10. Ngenyi kurangarijisisa Nduyo 19:8, kungamubesera kuti mushandire Jehovha?

10 Rambanyi mucijija ngo pamusoro pa Jehovha. Mukaengejera kujija kwenyu ngo pamusoro pa Jehovha, munozoengejeravo kuthemba kwamunomuita zve mungabudirira pa kumushandira. Avery, wanangwaya pakutanga, wakati: “Ndakaengejera kuthemba kwangu ngo kuverenga no kurangarijisisa cigondiso cinowanika pana Nduyo 19:8.” (Verenganyi.) Avery paakavona makwanisire akaita Jehovha cigondiso ici, rudo hwake naye wakavanga kamare. Rudo auvangisi  basi kuthemba kwedu asi, unotibeseravo kuti tisotesese Jehovha no zviya zvaanoda. Hannah, wanangwaya pakutanga, wakati: “Pa kuverenga kwangu Bhaibheri no kurijija, ndakazwisisa kuti pandinojikhuvaza, ndinongavo ndecikhuvaza Jehovha.” (1 Pedru 5:7) Hannah wakaguma pa ‘kuteveja izwi ra Mwari.’ (Jakobo 1:22) Ngowapi wakava muviyo wakona? Iyena wakati: “Pondakavona kuti kuzwira Jehovha kunondibesera, ndakavangisa rudo hwangu naye. Wari, ndino cokwadi co kuti Jehovha, nguva jese anonditungamirira ndikada besero rake.” Hannah wakakwanisa kunyisa cineso co kujikhuvaza. Wakaguma pakujipira kuna Jehovha no kubhabhatijwa.

(Vonanyi ndima 11) *

11. Vanessa wakaitenyi kuti ave no shamwari jaushoni zve tingajijenyi?

11 Sananyi shamwari ngo ungwaru. Vanessa, wanangwaya pakutanga, pa kufamba ko nguva wakazwisisa kuti shamwari jake ajicaimubesera kuti ashandire Jehovha. Ngokudaro, wakapeja ushamwari najo. Asi, iyena wakaita zvizinji kupinda zvondhozvo. Wakashanda ngo simba kuti ave no shamwari jipsa mukati mo ungano. Wakavona kuti muezaniso wakagajwa ndi Nowa no mbhuri yake wakamubesera maningi. Iyena wakati: “Ivona vaitendenejwa ngo vandhu vacaida Jehovha, asi ivona vakava vanoshamwarijana ngo cavo.” Naapera kubhabhatijwa, Vanessa wakava piyona. Wari iyena ari kuti: “Izvi zviri kundibesera kuti ndiite ushamwari hwaushoni haiwa basi mu ungano yangu asi mu ungano jimweni.” Imwimwi mungavavo no shamwari jaushoni, pomunonga meciita basa rotakapuwa ndi Jehovha kuti tiite.—Mateu 24:14.

(Vonanyi ndima 12-15) *

12. Mushovonyi wo kuthya aucainga na Adhamu na Evha zve ngowapi wakava muviyo wokutama kuva nawo?

12 Ivanyi makaezanana pa kuthya kwenyu. Kuriyo kuthya kumweni kwaushoni. Inga muezaniso, tinodikana kuthya kuti tidakajise Jehovha. (Nduyo 111:10) Kudari, Adhamu na Evha vainga no kuthya uku, ivona avacaizopandukira Jehovha. Asi, ivona vakapandukira. Novapera kuita izvo, meso avo akafununguka zvokuti vakakwanisa kuzwisisa kuti vainga vashaisha. Ivona vakapa vana vavo cishaishi no rufu. Ngokuti ivona vakavona kana kuzwisisa mugariro wavo, voguma pa  kuita nyowa ngo umitu hwavo vopsaka zvokuzvifukija ndizvona.—Genesi 3:7, 21.

13-14. (a) Mukuzwirana na 1 Pedru 3:21, ngenyi atidikani kuthya kufa? (b) Ngoapi mathangwe atinao kuti tide Jehovha?

13 Pikija tinodikana kuthya kuti tidakajise Jehovha, atidikani kuva vandhu vanothya kufa. Jehovha wakaita ciri cese kuti tikwanise kuwana upenyu ucingaperi. Kudari tikaita cishaishi, tokhauya ngo mwoyo wese, Jehovha anozotiregerera. Iyena anozotiregerera ngo ndava yo rutendo hwedu ku muripo wo kujipira wo Mwana wake. Njira inosisira yo kukhombija rutendo hwedu ngo yo kupira upenyu hwedu kuna Mwari no kubhabhatijwa.—Verenganyi 1 Pedru 3:21.

14 Tino mathangwe akawanda maningi o kuda Jehovha. Haiwa basi ngokuti anotipa zviro zvaushoni zvinodakajisa njiku jese, asi iyena anotijijisa cokwadi ngo pamusoro pake no zvidisiso zvake. (Johani 8:31, 32) Iyena wakatipavo ungano yo ciKristu kuti ititungamirire zve itibesere. Wari anotibesera kuti ticungirire pa zvineso zvedu zve anotipa mukana wo kuzopona kwenda no kwenda mu mugariro wakakwana kumbejiyo. (Nduyo 68:19; Apokalipsi 21:3, 4) Patinorangarijisisa kuti Jehovha wakanasiririka kuti aite zvizinji kuitira kukhombija rudo hwaanahwo nesu, tinozokwevehwa kuti timudevo. Patinoda Jehovha, tinozojijira kuva no mavonero akaezanana o kuthya. Tinozothya kukhuvaza mundhu watinoda.

15. Makayla wakanyisisa kudini kuthya kwake kuita cishaishi?

15 Makayla, wanangwaya pakutanga, wakanyisa kuthya kwake kushaisha paakazwisisa kuti Jehovha anoregerera. Iyena wakati: “Ndakazwisisa kuti tese atizivi kukwana zve tinoshaisha. Asi ndakazwisisazve kuti Jehovha anotida zve anozotiregerera wakacijikira pa muripo.” Rudo hwaainga nahwo na Jehovha wakamuita kuti ajipire kwaari no kubhabhatijwa.

(Vonanyi ndima 16) *

16. Miles wakanyisisa kudini kuthya kwake kuteverehwa?

16 Miles, waithyaya kubhabhatijwa ngo kuthya kuteverehwa ndi mai wake, wakakumbira besero kuno muvonereri wo ndharaundha. Miles wakati: “Iyena wakarehwavo pa mbhuri yo kuti mubari umwe wainga capupu. Wakandibesera kurangarira zviro zvaizobesera mai wangu kuti vazwisise cisungo cangu co kuda kubhabhatijwa zve vazwisise kuti baba avacaindivangirija kuita zvondhozvo.” Mai wa Miles avazivi kudakara ndizvona. Pa kufamba ko nguva, iyena wakabuda pa muzi pavo, asi wakabatisisa cisungo cake. Iyena wakati: “Kuvona zviro zvaushoni zvese zvaakandiitira Jehovha zvakabaya mwoyo wangu. Pandakarangarijisisa ngo pamusoro po muripo wo kujipira wa Jesu, ndakazwisisa kuti zvokadi kamare Jehovha anondida. Zvese izvi zvakandiita kuti ndijipire kuna Jehovha no kubhabhatijwa.”

 BATISISANYI CISUNGO CENYU

Tingakhombija kuti tinobongesera zvese zvatinoitihwa ndi Mwari (Vonanyi ndima 17)

17. Tese tino mukana wenyi?

17 Evha paakaha mucero wo muti wiya mu Edheni, iyena wakaramba baba wake. Adhamu paakabatana naye, iyena wakakhombija kuti acaibongesera ngo zvese zvaushoni zvaakaitihwa ndi Jehovha. Tese tino mukana wo kukhombija kuti atizivi kuezana na Adhamu na Evha. Itusu tinobonga ngo zvese zvatinoitihwa ndi Jehovha. Ngo kubhabhatijwa, tinokhombija Jehovha kuti ndiyena basi ano mutoro wo kupa ndhungamiro ngo pamusoro po zvakanaka no zvakashata. Itusu tinokhombija kuti tinoda Baba wedu no kuvathemba.

18. Mungabudiririsa kudini pa kushandira Jehovha?

18 Cineso catinosongana naco pakupera kubhabhatijwa i kupona njiku jese mukuzwirana no ndhungamiro ja Jehovha, haiwa ngo ndhungamiro jedu. Zviuru no zviuru zvo vandhu zviri kupona ngo njira iyi gore rimwe nga rimwe. Mungavavo inga ndivona, kudari mukaramba meciengejera kuzwisisa kwenyu Soko ra Mwari, Bhaibheri; kusongana pamwepo no hama no hambzaji jenyu no kubvunja vamweni zvamunojija ngo pamusoro pa Baba wenyu vano rudo. (Vaheberi 10:24, 25) Pamunoda kutema civaringo, purukiranyi mbhangiro yamunopuwa ndi Jehovha ecishandisa Soko rake pomwe no sangano rake. (Isaia 30:21) Mukadaro, munozobudirira.—Mazwi Akangwara 16:3, 20.

19. Munodikana kwenderera mberi meciceukijenyi zve ngenyi?

19 Pamunoenderera mberi mecizwisisa kuti munobesereka ngo ndhungamiro ja Jehovha, rudo hwenyu naye no ku ndhungamiro jake unozokura. Perapo, apana camunozopuwa ndi Sathana cinozomuita kuti musiye kushandira Jehovha. Ambojirangarirenyi basi pa ciuru co makore cinozari. Munozosota sure mozovona kuti cisungo cenyu co kubhabhatijwa cakava cakanakisisa co zvisungo zvese zvomakamboita!

NDUMBO 28 Kuwana Ushamwari hwa Jehovha

^ ndim. 5 Cisungo cinosisira maningi camungaita ngo co kuti munozobhabhatijwa kana kuti nadha. Ngenyi i cisungo cinosisira? Musoro uno, unozodavira mubvunjo uwu. Iwona unozobesera vese vanorangarira ngo pamusoro po kubhabhatijwa no manyisire ovangaita zvineso zvinovaita kuti vahwirire sure.

^ ndim. 56 KUDURUJIHWA KO PIKICA: Kuthemba: Apa tiri kuvona mujaha ari kutetemera pa kuda kupa mupinguro.

^ ndim. 58 KUDURUJIHWA KO PIKICA: Shamwari: Tiri kuvona musikane ari capupu ano ushamwari wakashata, apa ari kuita nyowa paarikuvona zvapupu zvimweni zvecicumaera.

^ ndim. 60 KUDURUJIHWA KO PIKICA: Kushaisha: Nevanji vake povakajingwa zve vobuda pa muzi, musikane uwu ari kuthya kuti anozoshaishavoNevanji vake povakajingwa zve vobuda pa muzi, musikane uwu ari kuthya kuti anozoshaishavo.

^ ndim. 62 KUDURUJIHWA KO PIKICA: Kuteverehwa: Apa tiri kuvona mujaha ari kuthya kuita mukumbiro pambeji pa mai wake vacikaripi capupu.

^ ndim. 65 KUDURUJIHWA KO PIKICA: Kuthemba: Apa tiri kuvona mujaha ari kuengejera kujithemba kwake ngo kuita jijo yo mundhu ega.

^ ndim. 67 KUDURUJIHWA KO PIKICA: Shamwari: Tiri kuvona musikane ari kudada ngo kuva Capupu.

^ ndim. 69 KUDURUJIHWA KO PIKICA: Kushaisha: Tiri kuvona musikane ari kuita kuti cokwadi cive cake perapo ari kubhabhatijwa.

^ ndim. 71 KUDURUJIHWA KO PIKICA: Kuteverehwa: Apa tiri kuvona mujaha no cicunge cese ari kusanangura zvitendhwa zvake ka mai wake vacikaripi capupu.