Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 MUSORO WO KUJIJA WO 25

Thembanyi Jehovha Pamunonga Mecithimwa-thimwa

Thembanyi Jehovha Pamunonga Mecithimwa-thimwa

“Ndinocamwa njiku yese.”—NDUYO 38:7.

NDUMBO 30 Baba Wangu, Mwari Wangu zve Shamwari

ZVATICAJIJA *

1. Ngenyi tinodikana kupurukira ngwajo ya Jesu?

PA CIPOROFITA cake, ngo pamusoro po njiku jo kupejisira, Jesu wakati: “Basopanyi! Mwoyo yenyu icaremehwa ngo ndava yo . . . kuthimwa-thimwa ko pasi.” (Luka 21:34) Tinodikana kupurukira ngwajo iyi. Ngenyi? Mu njiku jino, tinodikana kuhwisana no zvineso zvakafanana no zvinohwisana no vamweni.

2. Hama no hambzaji jedu, jiri kusongana no zvineso zvapi?

2 Nguva jimweni tinosotana no zvineso zvakawanda pa mukuvo wondhowo. Vonanyi muezaniso jinotevera basi. Hama imweni inodanwa John, * yakatambujika ngo ndhenda inozwi esclerose múltipla zve yakacamwa maningi poyakasiiwa ngo mukaji wayo, pasure po 19 o makore novari vese. Pasure po kuitika izvi, vana vayo vaviri vokaji, vakasiya kushandira Jehovha. Hama Bob no mukaji wavo Linda, vakasongana no zvineso zvakasiyana-siyana kupinda zvakasongana na hama John. Vovaviri vakaruza basa ravo, vakaguma pa kuruzazve nyumba yavo, zvecivoneka kuti vainga no magava ovaidikana kupagari ku bhanko. Kusiyapo zvondhozvo, hambzaji Linda vakazobatwa ngo ndhenda yo mwoyo zve vaingazve no ndhenda imweni yaikhuvaza zvaingwarira muviri wavo (sistema imunológico).

3. Mukuzwirana no VaFilipi 4:6, 7, tingava no cokwadi cenyi?

3 Tingava no cokwadi co kuti Musiki wedu zve Baba vedu vano rudo, Jehovha, vanozwisisa patinosongana no zvineso.  Zve vanoda kutibesera kuti tihwisane no zvineso zvondhozvo. (Verenganyi VaFilipi 4:6, 7.) Bhaibheri rino muezaniso jakawanda jo vandhu vakahwisana no zvineso. Rinokhombijazve kuti Jehovha wakavabeseresa kudini kuti vahwisane nazvo. Ngatende tivone muezaniso munganani.

ERIYA “WAINGA MUNDHU WAKAREMBEJEKA KUDARI INGA ITISU”

4. Ngo zvapi zvineso zvakasongana na Eriya zve wakava no mazwiro apo ngo pamusoro pa Jehovha?

4 Muporofita Eriya wakapona mu nguva inonesa maningi zve wakasongana no zvineso zvakakura. Mambo waitonga Iziraeri mukuvo wondhoo, wainga Akabhi zve aacaigondeka kuna Jehovha, mukaji wake Jezabheri, wainamata Bahari. Vo vaviri vakaita kuti nyikeyo yese inamate Bahari zve vakauraya vaporofita vazinji va Jehovha. Eriya wakakwanisa kutiza. Ngo kuthemba kwaiita Jehovha, iyena wakakwanisa kupona pa mukuvo wo njara. (1 Majimambo 17:2-4, 14-16) Kusiyapo zvondhozvo, Eriya wakathembazve Jehovha paakahwisana no vainamata Bahari. Wakavangisa vaIziraeri kuti vashandire Jehovha. (1 Majimambo 18:21-24, 36-38) Pa mukuvo uu unonesa, Eriya wakava no mathangwe akawanda o kuvona kuti Jehovha waimuvhikira no kumubesera.

Jehovha wakatuma ngirozi kuti ivangise Eriya (Vonanyi ndima 5-6) *

5-6. Mukuzwirana no 1 Majimambo 19:1-4, ngoapi ainga mazwiro a Eriya zve Jehovha wakakhombijisa kudini kuti waimuda?

5 Verenganyi 1 Majimambo 19:1-4. Asi, Eriya wakagumira pa kuthya Mambo kaji Jezabheri paaida kumuuraya. Ngokudaro,  wakatizira Bhereshebha. Iyena wakagumira pa kuremba zvokuti “wakakumbira kufa.” Ngenyi wakajizwa kudaro? Eriya wainga mundhu acikazivi kukwana zve “wakarembejeka, kudari inga itisu.” (Jakobo 5:17) Kangaije wainga wakasuruvara no kuremba. Zvinovoneka inga kuti simba rese rakaita Eriya kuti vandhu vanamate Jehovha, rainga rabiresi. Wairangarira kuti vandhu vese vaienderera mberi vecinamata Bahari zve iyena basi ngo wainamata Jehovha. (1 Majimambo 18:3, 4, 13; 19:10, 14) Kangaije tingakahamara ngo zvaakaitari. Asi Jehovha wakazwisisa mazwiro ake.

6 Jehovha aazivi kupanica Eriya ngo kukhombija mazwiro ake. Kusiyapo zvondhozvo, wakamubesera kuti awanezve simba. (1 Majimambo 19:5-7) Pa kufamba ko nguva, Jehovha ngo kunaka mwoyo kwese wakabesera Eriya kuti acinje mavonero ake. Jehovha wakananga kuti kwainga kucino 7.000 zvo vandhu ku Iziraeri vainga vakaramba kunamata Bahari. (1 Majimambo 19:11-18) Jehovha wakaita zvese izvi kuti akhombije rudo hwake kwaari.

JEHOVHA ANOZOTIBESERESA KUDINI?

7. Manera akabesera Jehovha Eriya, anotigondisenyi?

7 Muri kusongana no cineso ciri kumusiya mecithimwa-thimwa here? Kuziva kuti Jehovha wakazwisisa mazwiro a Eriya, zvinotiembezera maningi! Zvinotigondesa kuti iyena anozwisisavo zvineso zvedu. Anoziva zvatinokwanisa no zvaticikakwanisi zve anoziva zvatinorangarira pamwepo no mazwiro edu. (Nduyo 103:14; 139:3, 4) Kudari tikatevejera Eriya ngo kuthemba Jehovha, iyena anozotibesera kuti tihwisane no zvineso zvinoita kuti tithimwe-thimwe.—Nduyo 55:23.

8. Jehovha anozomubeseresa kudini kuti muhwisane no kuthimwa-thimwa?

8 Kuthimwa-thimwa, kungamuita kuti murangarire inga kuti mugariro wenyu auzocinji, kunomuita kuti mujizwe mucina simba. Kudari ndizvona zviri kuitika, ceujanyi kuti Jehovha anozomubesera kuti muhwisane nako. Anozomubeseresa kudini? Iyena ari kumukoka kuti mumuvhunje zvineso zvenyu. Zve iyena anozodavira kucema kwenyu. (Nduyo 5:4; 1 Pedru 5:7) Ngokudaro, kumbiranyi Jehovha mucikarembi ngo pamusoro po zvineso zvenyu. Iyena aazobhui nemwi inga zvaakaita na Eriya, asi anozoita zvondhozvo ecishandisa Soko rake Bhaibheri pamwepo no sangano rake. Zvamunozoverenga mu Bhaibheri zvinozomuembezera no kumupa vetero. Cimwenizve, hama no hambzaji jenyu jingamuvangisa.—VaRoma 15:4; Vaheberi 10:24, 25.

9. Shamwari yatinothemba ingatibeseresa kudini?

9 Jehovha wakavhunja Eriya kuti ape divi ro basa rake kuna Erizeu. Ngo kuita kudaro, iyena wakapa Eriya shamwari yaizomubesera paaijizwa wakarembejeka. Mukufananavo, patinovhunja shamwari yatinothemba zvineso zvedu, iyona inozotibesera kuhwisana nazvo. (2 Majimambo 2:2; Mazwi Akangwara 17:17) Kudari mukavona kuti apana mundhu womungabhuya naye ngo pamusoro po zvineso zvenyu, kumbiranyi Jehovha kuti amubesere kuwana muKristu wakaivha angamubesera pa zvineso zvenyu.

10. Kuitisa kudini zvakaitikari na Eriya zvinotipa vetero zve kuitisa kudini ciporofita ciri pana Isaia 40:28, 29 cingatibesera?

10 Jehovha wakabesera Eriya kuti ahwisane no zvineso zvake no kumubesera kuti amushandire wakagondeka ko makore akawanda. Zvakaitikari na Eriya zvinotipa vetero. Zvingatoita kuti nguva jimweni tinosongana no zvineso zvingatotisiya takaremba zve ticina simba. Hina, tikathemba Jehovha, anozotipa simba ratinoda kuti timushandire.—Verenganyi Isaia 40:28, 29.

 ANA, DHAVHIDHI NA “AZAFI” VAKATHEMBA JEHOVHA

11-13. Kuthimwa-thimwa kwakapsasisa kudini vashandiri vatatu va Mwari vo mu nguva yo kare?

11 Bhaibheri rinobhuya ngo vandhu vakasonganavo no zvineso zvikuru. Inga muezaniso, Ana, wakahwisana no cineso co kutama kubara zve waindoshohwa basi ngo mbhwere yake. (1 Samueli 1:2, 6) Cineso ici cakamuita kuti ayangajwe maningi wototama no kuha.—1 Samueli 1:7, 10.

12 Pa kufamba ko nguva, Mambo Dhavhidhi vakasonganavo no zvineso. Amborangariranyi zvineso zvovakasongana nazvo. Ivona vakava no kuremehwa kukuru ngo ndava yo zvishaishi zvovakaita. (Nduyo 40:13) Mwana wavo, Abhusaromi wakavapandukira, zvomuita kuti auraiwe. (2 Samueli 15:13, 14; 18:33) Zve imwe shamwari yo phedo kamare, yakavacengeja. (2 Samueli 16:23–17:2; Nduyo 55:13-15) Nduyo zinji jakatara Mambo Dhavhidhi jinobatanija mazwiro o kutama simba no kuthemba kwavo Jehovha.—Nduyo 38:6-11; 94:17-19.

Zvicinyi zvakabesera mutari wo nduyo kuti ashandire Jehovha naakadakarazve? (Vonanyi ndima 13-15) *

13 Asi mutari umweni wo nduyo wakatanga kuva no thima no vandhu vakashata. Kangaije wainga muLevi mubarihwana wa Azafi zve waishandira “mu ngome ya Mwari.” Mutari uwu wo nduyo wakahwisana no zvineso zvakamuita kuti atame mudakaro. Atee, wakatanga kukana-kana makomborero anovepo ngo kushandira Mwari.—Nduyo 73:2-5, 7, 12-14, 16, 17, 21.

14-15. Tinojijenyi ngo muezaniso mutatu jo mu Bhaibheri ngo pamusoro po kukumbira besero ra Jehovha?

14 Vashandiri vatatu va Jehovha vaperari kunangwa, vakathemba Jehovha zve vakakumbira besero. Ivona vakaita mukumbiro kuna  Jehovha ngo pamusoro po kuthimwa-thimwa kwavo. Atee, vakatonanga zvaivaitisaro kuti vathimwe-thimwe. Cimwenizve, avazivi kusiya kwenda ku ndau yo kunamatira Jehovha.—1 Samueli 1:9, 10; Nduyo 55:23; 73:17; 122:1.

15 Ngo unyasha hwese Jehovha wakadavira umwe nga umwe wavo. Ana wakawana runyararo hwo mukati. (1 Samueli 1:18) Dhavhidhi wakati: ‘Varurami vano matambujiko akawanda, asi Tenji Mwari anovaponesa mu bzese.’ (Nduyo 34:19) Zve mutari wo nduyo wakajizwa inga kuti Jehovha ‘wakamubata ngo nyara yo muho,’ ecimutungamirira ngo ndhungamiro jo rudo. Iyena wakaimba kudari: “Kondiri, kugara pamwepo na Mwari, kunaka kwangu! Mwari, ndiyena citiziro cangu.” (Nduyo 73:23, 24, 28) Tinojijenyi ngo muezaniso iji? Nguva jimweni, tingatojizwa kuremba ngo ndava yo zvineso zvedu. Asi, tingakwanisa khwisana nazvo, ngo kurangarijisisa ngo manera akabesera Jehovha vamweni, kuita mukumbiro tecimuthemba pomwe no kuita zvese zvaanotikumbira kuti tiite.—Nduyo 143:1, 4-8.

THEMBANYI JEHOVHA KUTI MUHWISANE NO ZVINESO

Pa kutanga imwe hambzaji yainga no mazwiro o kuda kugara yega, asi mazwiro ayo akazocinja poyakatanga kubesera vamweni (Vonanyi ndima 16-17)

16-17. (a) Ngenyi atidikani kujiparajanisa no vamweni? (b) Tingawanazve kudini simba?

16 Muezaniso mutatu iji, jinotijijisazve ciro cimweni cinosisira, atidikani kujiparajanisa  kuna Jehovha no vandhu vake. (Mazwi Akangwara 18:1) Hambzaji Nancy vakasongana no zvineso zvinosuruvarisa maningi, mwamuna wavo povakavasiya, vakati: “Pakava no njiku jakawanda maningi, jo kuti andicaida kuvona nee kubhuya no ari wese. Asi, pondaigara maningi ndega, ushongwe hwangu waiengejeka.” Zviro zvakacinja hambzaji Nancy povakatanga kupsaka njira jo kubesera vamweni vaisongana no zvineso. Ivona vakati: “Ndaipurukira vamweni vecinanga zvineso zvavo. Pondakaita zvondhozvo, ndakavona kuti zvaindibesera kuti nditame kujizwira pena.”

17 Tingawanazve simba ngo kwenda ku musongano jo ungano. Patinoenda ku musongano, tinopa Jehovha mukana wo kuva ‘mubeseri no muembejeri’ wedu. (Nduyo 86:17) Kondhoyo iyena anotivangisa ecishandisa mujimu mucena wake, Soko rake pomwe no vashandiri vake. Musongano jinopa mukana wo ‘kuvangisana.’ (VaRoma 1:11, 12) Imwe hambzaji inodanwa Sophia, yakati: “Jehovha pomwe no hama kutenderera pasi pese jakandibesera. Musongano jo ungano jakandibesera maningi kamare. Ndakazwisisa kuti kubatikana maningi mu basa ro kucumaera pamwepo no ungano, kunondibesera maningi kuti ndihwisane no kuthya kwangu.”

18. Kudari tikajizwa takapera simba, Jehovha angatipenyi?

18 Patinojizwa ticina simba, ngaticeukije kuti Jehovha aagondesi kupeja zvineso zvese wari, asi anozozvipeja kumbejiyo. Wari uno iyena anotibesera kuti tihwisane nazvo. Iyena anotipa “simba ro kuda” kuhwisana no mugariro wakadaro.—VaFilipi 2:13.

19. Cigondiso capi catinopuwa pana VaRoma 8:37-39?

19 Verenganyi VaRoma 8:37-39. Mupostori Pauro, anotigondesa kuti apana cingatiparajanisa ku rudo hwa Mwari. Tingabeseresa kudini hama no hambazji jedu jiri kuhwisana no kuthimwa-thimwa? Musoro unotevera, unozokhombija kuti tingatevejeresa kudini Jehovha pa kukhombija unyasha pomwe no kubesera hama no hambzaji pajinothimwa-thimwa.

NDUMBO 44 Mukumbiro wo Mundhu Ari Kuneseka

^ ndim. 5 Kuthimwa-thimwa ko mukuvo wakareba, kungakhuvaza upenyu hwedu. Jehovha angatibeseresa kudini? Pa musoro uno, ticavona kuti Jehovha wakabeseresa kudini Eriya paaihwisana no kuthimwa-thimwa. Ticazovonazve muezaniso jimweni jo mu Bhaibheri, jinokhombija kuti tinodikana kuitenyi kuti tiwane besero ra Jehovha pa kuhwisana no kuthimwa-thimwa.

^ ndim. 2 Mazina amweni pa musoro uno akacinjwa.

^ ndim. 53 KUDURUJIHWA KO PIKICA: Ngirozi ya Jehovha iri kumusa Eriya perapo yomupa zvokuha no kumwa.

^ ndim. 55 KUDURUJIHWA KO PIKICA: Mutari wo nduyo kangaije mubarihwana wa Azafi anodakarira kutara nduyo no kuimba no vadoni vake vaLevi.