Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 MUSORO WO KUJIJA WO 24

Siyananyi no Murangariro Unohwisana no Uzivi hwa Mwari!

Siyananyi no Murangariro Unohwisana no Uzivi hwa Mwari!

“Tinowisa ndibzona hwiru hwakaxata no masimba ese anomukira uzivi hwa Mwari.”—2 VAKORINTO 10:4, 5.

NDUMBO 124 Nguva Jese Takagondeka

ZVATICAJIJA *

1. I ngwajo yapi yakatara mupostori Pauro ku maKristu okuzojwa?

“MUCATEVEJA bzo nyika yo pasi ino.” (VaRoma 12:2) Pauro wakatara magama aya, ku maKristu o muzana ro kutanga. Waro, ngenyi iyena wakapa ngwajo iyi ku vanarume no vanakaji vakajipira kuna Mwari zve vainga vakazojwa ngo mujimu mucena?—VaRoma 1:7.

2-3. Sathana anoejesa kudini kuticengeja, asi tingavhisisa kudini zviro izvi mu murangariro mwedu?

2 Pauro waineseka, ngokuti maKristu amweni ainga otanga kucengejwa ngo murangariro wakashata no jijiso jinokwijirijwa ngo nyika ya Sathana. (VaEfeso 4:17-19) Izvi zvingatiitikiravo. Sathana, mwari wo nyika ino, angashandisa mazano akasiyana-siyana kuti aticengeje. Inga muezaniso, kudari tiri kuda kuva vandhu vano nduma, iyena angashandisa zvondhozvo kuti aticengeje. Iyena angaeja kushandisa zvirovejeso, zviro zvotakajija no mugariro wedu, kuti tirangarire inga ndiena.

3 Kureva kuti zvingakwanisika kuvhisa zviro izvi mu murangariro mwedu, pikija zvecivoneka inga “biravira rakavangiswa” here? (2 VaKorinto 10:4) Pauro wakadavira kudari: “Tinowisa ndibzona hwiru hwakashata no masimba ese anomukira uzivi hwa Mwari. Tinowisa pasi uzivi hwese, kuti hupurukire  Kristu.” (2 VaKorinto 10:4, 5) Hina, no besero ra Jehovha tingakwanisa kuwisa pasi murangariro wese wakashata. Kudari inga medhiko angakwanisa kunyisa zvingaitwa ngo nveneve, Soko ra Mwari ringakwanisavo kunyisa zvingaitwa ngo nyika ya Sathana.

“MECITENDERUJA MIRANGARIRO YENYU”

4. I cinjo japi jaidikana kuita vazinji vedu potakatanga kujija cokwadi?

4 Ecimborangariranyi basi ngo cinjo jomaidikana kuita po makatanga kujija cokwadi co mu Soko ra Mwari no kukheta kushandira Jehovha. Kuti tiite zvondhozvo, uzinji hwedu takadikana kusiya kuita zviro zvakashata. (1 VaKorinto 6:9-11) Tinobonga maningi Jehovha ngo kutibesera kusiya zviro zvakashata.

5. Ngozvapi zviro zviviri zvatinodikana kuita zvinonangwa pana VaRoma 12:2?

5 Asi ticadorangarira kuti atidikani kuita cinjo iriyese. Pikija takasiya kuita zvishaishi zvikuru zvotainga teciita ticito tabhabhatijwa, tinodikana kushanda ngo simba kuti tinyise mukhaindi uriwese wo murangariro, unotiita kuti tiitezve zvishaishi zvondhozvo. Tingazviitisa kudini izvi? Pauro wakati: “Mucateveja bzo nyika yo pasi ino. Kaveta phindukanyi, mecitenderuja mirangariro yenyu.” (VaRoma 12:2) Ngokudaro, tinodikana kuita zviro zviviri. Cokutanga, atidikani ‘kuteveja’ zvo nyika ino. Cocipiri, tinodikana ‘kuphinduja’ manera edu okurangarira.

6. Zvicinyi zvatinojija pa magama a Jesu anowanika pana Mateu 12:43-45?

6 Kuphinduja kwakanangari Pauro kunobatanija zvizinji kupinda kucinja mavonekero basi. Kunopsasa mativi ese o upenyu hwedu. (Vonanyi bhokiso rinoti: “ Kuphinduka kana kucengejera?”) Tinodikana kucinja mukuperera murangariro wedu, izvi zvinobatanija zvatiri ngo mukati, mazwiro no zvatinodisisa. Asi tingajivhunjisa kudari: ‘Cinjo jandiri kuita  kuti ndive muKristu ngo jo kucengera kana jirikundiita kuti ndive muKristu wokadi?’ Zvinosisira maningi kuziva musiyano uripo. Pa magama ake anowanika pana Mateu 12:43-45, Jesu wakakhombija zvatinodikana kuita. (Verenganyi.) Magama aya anotijijisa cokwadi cinosisira maningi: Azvikwani basi kuvhisa murangariro yakashata, tinodikana kuzaja ngo murangariro jinotendehwa ndi Mwari.

ENDERERANYI MBERI ‘MECIITA VANDHU VAPSA MU MURANGARIRO’

7. Tingacinjisa kudini zvatiri ngo mukati?

7 Zvingakwanisika here kucinja zvatiri ngo mukati? Bhaibheri rinoti: Munodikana “kuita vandhu vapsa mu murangariro no mu mwoyo yenyu, no kusimira undhu hupsa hwakaruhwa mwa Mwari ngo ururami no unasi hwo bzokadi.” (VaEfeso 4:23, 24) Hina, zvinokwanisika kucinja zvatiri ngo mukati, asi azvizivi kureruka. Tinodikana kuita zvizinji kuciripi basi kucungirira zvidisiso no zviito zvakashata. Tinodikana kuva “vapsa mu murangariro.” Izvi zvinobatanija kucinja zvido zvedu no zvirovejeso. Izvi zvinoda kushanda ngo simba.

8-9. Kuitisa kudini zvakaitika no hama imweni zvinokhombija dikano yo kucinja zvatiri ngo mukati?

8 Vonanyi muezaniso wo imwe hama yainga phanga kareko. Poyakasiya kumwa doro no kutakana, yakabhabhatijwa, izvi zvakapa ucapupu pa muthundu wo yaigararo. Asi pa usiku umweni, pasure po mukuvo mushoma noyapera kubhabhatijwa, yakasongana no muejo wo yaicaivetera. Cidhakwa cimweni cakaguma pa muzi payo, coda kutakana nayo. Pakutanga hama iyi yakakwanisa kucungirira muejo uu. Asi cidhakwa ciya pocakatuka zina ra Jehovha, hama ii yakanyangajwa maningi zvokuti yakabararika hwiru. Yakabuda kunja yobata cidhakwa ciya kakucitaka. Ngenyi hama iyi yakaita kudaro? Pikija jijo yayo yo Bhaibheri yakaibesera kuti ijingwarire mu kuita zvo uphanga, iyona aicainga yacinja manera ayo o kurangarira. Ngo magama amweni, iyona aicainga yacinja zvoyainga ngo mukati.

9 Pikija zvakadaro, hama ii aizivi kuremba. (Mazwi Akangwara 24:16) No besero ro vakuru, iyona yakaenderera mberi yeciita cinjo. Pakufamba ngo nguva yakava mukuru. Pa usiku umweni, kunja ko Nyumba yo Umambo, yakasongana no muejo wakafanana no wo kutanga. Cidhakwa cimweni caida kutaka umwe mukuru. Hama iyi yakaitenyi? Yakabhuya no cidhakwa ciya ngo kuthiva kwese no kujidodokesa zve yocibesera kuti cinyarare no kuciperekeja kanyi kwaco. Ngenyi hama iyi yakazoita kudari pa vhaza iyi? Ngokuti yainga yacinja manera ayo okurangarira. Yakaguma pakuva no runyararo wokadi zve mundhu anojidodokesa. Izvi zvakakujisa maningi zina ra Jehovha.

10. Ngozvapi zvatinodikana kuita kuti ticinje zvatiri ngo mukati?

10 Cinjo iji ajiitiki nyamasi-nyamasi kana ticikazivi kushanda ngo simba. Tinodikana ‘kuvangirira’ pikija ko makore akawanda. (2 Pedru 1:5) Cinjo iji ajiitiki ngokuti tiri mu “cokwadi” ko makore akawanda. Tinodikana kueja kushanda ngo simba mbhera patinokwanisa kuti ticinje zvatiri ngo mukati. Asi, pano zviro zvinganani zvingatibesera kuita zvondhozvo. Ngatende tibhuye ngo zviro zvimweni zvakona.

TINGAITISA KUDINI KUTI TICINJE MANERA ATINORANGARIRA?

11. Kuitisa kudini kuita mukumbiro kunotibesera kuti ticinje manera atinorangarira?

11 Mukumbiro i ciro cokutanga cinosisira maningi catinodikana kuita. Tinodikana kuita mukumbiro inga zvakaita mutari wo nduyo, paakati: “Mwari wangu! Ruranyi mukati  mangu mwoyo wakacena, itanyibze mwiha wakavanga mukati mangu.” (Nduyo 51:10) Tinodikana kuzwisisa kuti manera edu okurangarira anodikana kucinja zve tokumbira Jehovha kuti atibesere. Tingathembesa kudini kuti Jehovha anozotibesera kuita cinjo? Tingavangiswa ngo cigondiso ca Jehovha co kuvha pasi po mwoyo kamare, caakaita kuno vaIziraeri mu njiku ja Ezekieri, paakati: “Ndinozovapa mwoyo umwewo, ndozodira mu hana mavo mwiha mupsa . . . ndozovapa mwoyo wo mundhu [kana kuti, mwoyo unobesera kuti vateveje ndhungamiro ja Mwari].” (Ezekieli 11:19) Jehovha waida kubesera vaIziraeri vaya kuti vacinje zve anodavo kutibesera.

12-13. (a) Mukuzwirana na Nduyo 119:59, tinodikana kurangarijisisa ngo pamusoro penyi? (b) Muvhunjo japi jatinodikana kujiita tega?

12 Kurangarijisisa i ciro cocipiri cinosisira maningi catinodikana kuita. Patinoverenga njiku jese Soko ra Mwari, tinodikana kutora nguva kuti tirangarijisise, kana kuti, tirangarire manera atinodikana kuita cinjo mu murangariro no mu mazwiro. (Verenganyi Nduyo 119:59; Vaheberi 4:12; Jakobo 1:25) Ngatieje kuvona dangani murangariro wedu no mwoyo uri kupsaswa ngo uzivi hwo vandhu. Tinodikana kujidodokesa zve ngatitendere zvaticikakwanisi kuita perapo toshanda ngo simba kuti tizvinyise.

13 Inga muezaniso, mungajivhunjsa kudari: ‘Kureva kuti ndino thima kana usanje here?’ (1 Pedru 2:1) ‘Ndinojivona kuva anosisira maningi kupinda vamweni ngo pamusoro po kondakavha, jijo yo ndakava nayo kana kuti ndino maningi dinyeru here?’ (Mazwi Akangwara 16:5) ‘Ndinovona vamweni vacikana zviro zvandinavo kana vo ganda rimweni inga vakuru here?’ (Jakobo 2:2-4) ‘Ndinodisisa zviro zvinoviiswa ngo nyika ya Sathana here?’ (1 Johani 2:15-17) ‘Ndinodakarira kuvona mavhidhiyo anokhombija zvo uphanga kana zvo uhure?’ (Nduyo 97:10; 101:3, 4; Amosi 5:15) Pamunopingura muvhunjo iji munokwanisa kuvona mativi amunodikana kuitisa nani. Ngo zvokadi, kuita cinjo iji mukati mwedu zvinganesa maningi inga kuphwanya “biravira rakavangiswa,” asi tikazviita, tinozodakajisa Baba wedu vo mugore.—Nduyo 19:14.

14. Ngenyi kusana shamwari jaushoni kunosisira?

14 Kusana shamwari jaushoni i ciro cocitatu cinosisira maningi catinodikana kuita. Kangaije atingazvivoni, asi tinopsaswa maningi ngo shamwari jedu. (Mazwi Akangwara 13:20) Kubasa kana kucikora, tingasongana no vandhu vacikatibeseri kuti tirangarire inga ndi Mwari. Pikija zvakadaro, tingawana shamwari jaushoni ku musongano jedu jo ciKristu. Kondhoyo ndikona kwatingajizwa kuvangiswa, pa basa ro “kudisana no kuita bziro bzakanaka.”—Vaheberi 10:24, 25.

“CIJIKIRANYI KUTENDA”

15-16. Sathana anoejesa kudini kucinja murangariro wedu?

15 Mucakanganwa kuti Sathana wakasunga kucinja murangariro wedu. Iyena anoshandisa mukhaindi wese wo jijiso kuti tikanekane ngo pamusoro po cokwadi ciri mu Soko ra Mwari.

16 Sathana acaenderera mberi acindoita muvhunjo jakaezana no waakaitira Evha mu munda wo Edheni, wokuti: Ngo “bzokadi Mwari wakananga kuti . . . ?” (Genesi 3:1) Mu nyika ino iri kutongwa ndi Sathana, tingazwa muvhunjo jinoitwa jingatisiya ticikanakana, jakadari inga iji: ‘Ngo zvokadi Mwari aatenderi mucadho wo mwanarume no mwanarume  kana mwanakaji no mwanakaji here? Ngo zvokadi kuti Mwari aadi kuti mucereceje Khisimuso no njiku jo kubahwa here? Ngo zvokadi kuti Mwari wenyu aatendereri kuti mudihwe ngazi here? Kudari Mwari ano rudo, zvokadi iyena anodadi kamare kuti mutame kushamwarijana no vakajingwa here?’

17. Tinodikana kuitenyi patinosongana no muvhunjo jinotiita kuti tikanekane zvatinotenda zve VaKolosi 2:6, 7 inovonesa kudini muviyo wakona?

17 Tinodikana kukhohwa ngo zvatinotenda. Kudari atikwanisi kuwana mupinguro jo muvhunjo jinosisira maningi ngo pamusoro po zvatinotenda, tingatotanga kukanakana kuti zvatinotenda ndizvona kana kuti haiwa. Kukanakana kwese uku kungakangaija manera atinorangarira zve kungakhuvaza rutendo hwedu. Waro zvicinyi zvatingaita? Soko ra Mwari rinotivhunja kuti ticinje manera atinorangarira, ngo kudaro tinodikana kujikhohwesa ‘kuti tizivisise ngo kwapi kuda kwa Mwari, ngo capi cauxoni, cinodakaja no cakaperera.’ (VaRoma 12:2) Ngo kujija nguva jese, tingakwanisa kujikhohwesa kuti zvatinojija mu Bhaibheri ngo zvokadi. Tinova no cokwadi cokuti ndhungamiro ja Jehovha jakanaka. Ngokudaro, inga muti wakacira miji jawo, tinozova vandhu ‘vakacijikira mu kutenda.’—Verenganyi VaKolosi 2:6, 7.

18. Zvicinyi zvingatibesera kuti tive vakajiviririka ku nvenene yo nyika ya Sathana?

18 Akuna mundhu angaita kuti rutendo hwenyu uvange. Ngokudaro, rambanyi meciita cinjo mu murangariro. Itanyi mukumbiro nguva jese, kumbiranyi Jehovha kuti amubesere ngo mujimu mucena. Rangarijisisanyi zve rambanyi mecipopora murangariro wenyu. Ivanyi no shamwari jaushoni, fambanyi no vandhu vanozomubesera kucinja manera enyu o kurangarira. Ngokuita kudaro, munojijivirira ku nvenene yo nyika ya Sathana zve munozokwanisa kuvhita “hwiro hwakashata no masimba ese anomukira uzivi hwa Mwari.”—2 VaKorinto 10:4, 5.

NDUMBO 50 Mukumbiro Wangu wo Kujipira

^ ndim. 5 Zvakatiitikira mu upenyu hwedu, zvotakajijiswa, kotakakurira pomwe no zvirovejeso zvedu zvinopsasa murangariro wedu. Tingatovona kuti zviito zvimweni zvakashata zvingatoguma pa kupsasa upenyu hwedu. Pa musoro uno, ticazovona kuti tingaitisa kudini kuti tivhite murangariro wakashata watingava nawo.