Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

Iyena Waizokwanisa Kuva no Unyasha hwa Mwari

Iyena Waizokwanisa Kuva no Unyasha hwa Mwari

TINOSHANDIRA Jehovha zve tinoda kuva no unyasha pomwe no makomborero ake. Asi tingauwanisa kudini unyasha hwa Mwari? Mu nguva jo Bhaibheri, vamweni vainga vakaita zvishaishi zvikuru vakawanazve unyasha hwa Mwari, kana vakatendehwazve ndiyena. Vamweni vainga no mugariro jakanaka asi vakazopejisira ngo kuruza unyasha hwake. Ngo iyo ndava tingazvibvunjisa kudari: “Jehovha anosotesesenyi ku umwe nga umwe wedu?” Muezaniso wa Robhowamu, mambo wo Judha, ungatibesera kuwana mupinguro.

MATANGIRO AKASHATA

Soromona, baba wa Robhowamu, wakava mambo wo Iziraeri ko 40 o makore. (1 Majimambo 11:42) Pasure po kufa ka baba wake, Robhowamu wakaita hwendo kubva Jerusarema kwenda Shekemi kuti aende kova mambo. (2 Kronike 10:1) Kunanga kuti iyena waithya kuva mambo waizotevera here? Soromona waizivika ngo kuva no uzivi hwakakura. Ngo kukasika, Robhowamu waizodikana kuvonesa kuti wainga no uzivi hwakakwana kuti atonge ndhango imweni yainesa.

VaIziraeri vaizwa kubzinyirihwa, ngo kudaro, vakatumira vandhu koobvunja Robhowamu zvovaida kuti aite, veciti: “Baba wako vakaremesa kanga yedu, bzino rerusai uxoko hwakavanga hwa baba wako, no kanga inorema yaakadira panyezuru pedu, tinozokuxandira.”—2 Kronike 10:3, 4.

Robhowamu waidikana kutema civaringo cinonesa. Kudari naakaita zvaida vandhu, iyena, ukama hwake pomwe na vaya vaigara pa nyumba ya mambo kangaije vaizodikana kupona vacina upfumi humweni ovainga varovejana nao. Asi, naakaramba kuita zvakakumbirari vandhu, ivona kangaije vaizomupandukira. Waro wakaitenyi? Cokutanga, wakabhuya no vasharuka vaibeseraya babake. Vasharuka vaya vakamubvunja kuti waidikana kuita zvaikumbiraya vandhu. Asi pasure pazvo, Robhowamu wakaenda kobhuya no vandhu vo mupira wake zve wotema civaringo co kutaja vandhu ngo hasha. Iyena wakavabvunja kudari: “Inini ndinozoiengejerabze; baba wangu vakamutambuja ngo bzipembere, [‘inini ndinozomutambuja ngo zvipembere zvinobaya,’ Shanduro yeNyika Itsva.]”—2 Kronike 10:6-14.

Tinojijenyi apa? Nyamasi uno, tino vasharuka vazinji vari kushandira Jehovha ko makore akawanda zve vangatibesera kutema zvivaringo zvo ungwaru. Ngative vano ungwaru ngo kuvapurutana.—Jobe 12:12.

“IVONA VAKAPURUKIRA MUTEMO” WA JEHOVHA

Robhowamu wakaunganija masoca ake kuti ahwisane no majinja akapandukaya. Asi Jehovha wakatumira muporofeti Shemaya kuti amubvunje kudari: “Mucaenda koambira hama jenyu vaIsraeli; umwe nga umwe ngahwirire kanyi kwake, ngokuti ibzo bzakaitika ngo kuda kwangu.”—1 Majimambo 12:21-24. *—Vonanyi masoko o pasi.

 Zvainga zvakareruka kuna Robhowamu kuzwira Jehovha here? Vandhu vaizomuvona kudini mambo wavo mupsa? Iyena wainga wakavabvunja kuti waizovapanica ngo “zvipembere,” asi apa wainga acina manera okuita ciri cese ngo pamusoro po kupandukira uku kwaizizimusa! (Ezanisanyi no 2 Kronike 13:7.) Pikija zvakadaro, azvinenyi zvicinyi zvairangarira vandhu, mambo no masoca ake “vakapurukira mutemo wa Tenji, vohwirira inga bzaakavabvunja Tenji.”

Waro tinojijenyi? Nguva jese, ngo zvo ungwaru kuzwira Mwari pikija vandhu vecitishora ngo kuita kudaro. Nguva jese, Mwari anozotikomborera kudari tikazwira.—Deuteronòmio 28:2.

Kunanga kuti Robhowamu wakakomborehwa ngo kuzwira kwake here? Robhowamu wainga acatonga jinja ra Judha no ra Bhejamini zve wakatema civaringo co kuvaka madhorobha mapsa mu ndharaundha jondhojo. Iyena ‘wakavangisisavo’ madhorobha amweni. (2 Kronike 11:5-12) Zvinosisira maningi ngo zvokuti iyena wakazwira mutemo ja Jehovha ko mukuvo wakati kuti. Zvecivoneka kuti umambo wo gumi ro majinja wakatanga kunamata zvithombi, uzinji hwo vaiponera mu mutundhu wo umambo uhwu vaiita hwendo kwenda ku Jerusarema koobesera Robhowamu no kumanata kokadi-kadi. (2 Kronike 11:16, 17) Ngo kudaro, ngo kuti Robhowamu wakazwira Jehovha, umambo hwakaguma pa kuvanga.

CISHAISHI CA ROBHOWAMU NO KUKHAUYA KWAKE

Umambo hwa Robhowamu pahwakaguma pa kuvanga, iyena wakaita ciro cimweni cakasiyana. Iyena wakaima kuzwira mutemo ja Jehovha wotanga kunamata zvimwari zvo manyepo. Ngenyi? Kureva kuti make vaingaya vaAmoni vakamukwevejera here? (1 Majimambo 14:21) Atizvizivi, asi jinja rese rakatevera muezaniso wake wakashata. Ngo kudaro, Jehovha wakatendera kuti Mambo Shishaki wo Ejipita anyise madhorobha akawanda o umambo wo Judha. Izvi zvakaitika, pikija Robhowamu wainga wakavangisa maningi madhorobha ondhowo!—1 Majimambo 14:22-24; 2 Kronike 12:1-4.

Mugariro wakanyanya kunesa apo Shishaki pomwe no masoca ake pavakaenda kohwisa Jerusarema, kwaitonga Robhowamu. Ngokudaro, muporofeti Shemaya wakabvunja Robhowamu no vatungamiriri vake masoko aibva kuna Mwari eciti: “Imwimwi makandisia, ininivo ndakamusia mu nyara ja Xixaki.” Robhowamu wakaashirisa kudini mbhangiro iyi? Ngo manera anodakajisa kamare! Bhaibheri rinonanga kudari: “Vakuru vo vaIsraeli na mambo vakajidodokesa, veciti: ‘Tenji Mwari wakarurama!’” Ngo kudaro, Jehovha wakaponesa Robhowamu zve Jerusarema arizivi kuparajwa.—2 Kronike 12:5-7, 12.

Pasure pazvo, Robhowamu wakaramba ecitonga mu umambo wo Judha. Acito afa, wakapekeja zvipo zvakawanda vana vake. Kangaije wakazviita ngo kuti waida kuva no gwinyiso ro kuti ivona avacaizopandukira hama yavo Abhijani, wiya waizova mambo waizotevera. (2 Kronike 11:21-23) Ngo kuita kudaro, Robhowamu wakaita zviro ngo ungwaru kupinda paainga Mujaha.

ROBHOWAMU WAINGA WAKANAKA KANA WAKASHATA?

Pikija Robhowamu wakaita zviro zvimweni zvaushoni, Bhaibheri rinonanga kudari ngo pamusoro po matongero ake: “Yena wakaita bzakaxata.” Ngenyi? Ngokuti “Aazivi kupsaka Tenji Mwari ngo mwoyo wake wese.” Ngo kudaro, Jehovha aazivi kudakara ndiyena.—2 Kronike 12:14.

Robhowamu aacainga no ushamwari hwo phedo na Jehovha, inga ndi Dhavhidhi

Tingajijenyi ngo zvakaitika mu upenyu hwa Robhowamu? Iyena wakazwira Mwari ko cimukuvo. Iyena wakaita zviro zvimweni zvakanaka kuno vandhu va Jehovha. Asi aacainga no ushamwari hwo phedo na Jehovha, aacainga no cido cakavanga co kumudakajisa. Ngo kudaro, wakaima kuita zvakanaka wotanga kunamata zvimwari zvo manyepo. Imwimwi mungarangarira kudari: ‘Kunanga kuti Robhowamu paakatendera mbhangiro yaJehovha, waizviita ngo ndava yo kuti waikhauyadi kamare ngo zvishaishi zvake here? Kana kuti waizviita ngo kuti vandhu vaimubvunja?’ (2 Kronike 11:3, 4; 12:6) Mukufamba ko nguva mu upenyu hwake wakaitazve zvakashata. Wainga wakasiyana kamare na teteguru wake Mambo Dhavhidhi! I zvokadi kuti Dhavhidhi wakaposavo. Asi, ngo mwoyo wese iyena wakakhauya ngo zvishaishi zvikuru zvaakaita. Zve mu upenyu  hwake hwese waida Jehovha no kunamata kokadi-kadi.—1 Majimambo 14:8; Nduyo 51:1, 17; 63:1.

Tingajija zvakawanda pa ciitiko ici co mu Bhaibheri. Zvinosimbhwa maningi vandhu pavanopa zvinodiwa kuno mbhuri javo no kuitira zvakanaka vamweni. Asi, kuti tiwane unyasha hwa Jehovha, tinodikana kumunamata ngo maitiro anomudakajisa zve tinodikana kuva no ushamwari hwakavanga naye.

Kuti tikwanise kuita zvondhozvo, tinodikana kuda Jehovha ngo mwoyo wese kamare. Kudari inga muriro unoramba wecibwaka ukaengejehwa huni, itisu tinozoramba tino rudo na Mwari ngo kujija Soko rake nguva jese, kurangarijisisa no kuvangirira pa kuita mukumbiro. (Nduyo 1:2; VaRoma 12:12) Rudo hwondhohwo, unozotikwevejera kuti tidakajise Jehovha pa zvese zvatinoita. Unozotikwevejeravo kuti tinase kukhauya kamare patinoposa no kukumbira kuti Jehovha atiregerere. Ngo kudaro, atizovi inga ndi Robhowamu, asi tinozoramba takagondeka pa kunamata kokadi-kadi.—Juda 1:20, 21.

^ ndim. 9 Zvecivoneka kuti Soromona aazivi kuva wakagondeka, Mwari wainga wakananga kuti umambo waizoguhwa wova uviri.—1 Majimambo 11:31.