Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

Muri Kupsaka Kuzivika Ndiani?

Muri Kupsaka Kuzivika Ndiani?

“Mwari asipi acina ururami, kuti akanganwe mabasa enyu no unyaxa hwo makatatija ngo zina rake.”—VAHEBERI 6:10.

NDUMBO: 39, 30

1. Ngo capi cido co cibarihwe cino umwe nga umwe wedu?

MUNOJIZWA kudini apo mundhu wamunoziva zve wamunoreremeja, akakanganwa zina renyu, atee kutama kumuziva kamare? Izvi zvingasuruvarisa maningi. Ngenyi? Ngokuti umwe nga umwe wedu ano cido co cibarihwe co kuda kutendehwa ngo vamweni. Asi tinoda kuti ivona vaite zvizinji kupinda kuziva kuti ndisu ani. Tinoda kuti vazive kuti tiri vandhu vo mushovonyi zve ngozvapi zvatakakwanisa kuita.—Bziverengo 11:16, Jobe 31:6.

2, 3. Zvicinyi zvingaitika no cido cedu co kuda kuvoneka ngo vamweni? (Vonanyi masoko o pasi.)

2 Asi kudari tikatama kungwarira, cido ici co cibarihwe co kuda kuvoneka, cingaticengeja. Nyika ya Sathana ingatiita kuti tide kuva vandhu vano nduma kana vanosisira maningi. Pazvinoitika izvi, atipi Baba wedu vo mugore, Jehovha Mwari, nderemejo no kunamata kwaanofanera.—Apokalipsi 4:11.

 3 Mu njiku ja Jesu, vatungamiriri vamweni vo zviara vainga no mavonero akashata ngo pamusoro po kuzivika. Jesu wakangwaja vajiji vake kuti: “Basopanyi vatari! Vanoda kusimira hanju jakareba, vopsanga kucungamijwa mu banje, kugarira bzigaro bzokutanga mu masinagoga no mu mabuso.” Iyena wakaengejera eciti: “Vanozotongehwa nyatwa huru.” (Luka 20:46, 47) Mukusiana, Jesu wakasimba noni yainga murombo yakapira zvimare zviviri zvo mangwenjere, pa mukuvo wokuti kangaije apana waiivona. (Luka 21:1-4) Zvakajeka kuti mavonero ainga na Jesu ngo pamusoro po kuzivika ainga akasiana maningi no vamweni. Musoro uwu, unozotibesera kuti tirambe tino mavonero akanaka ngo pamusoro po kuzivika, mavonero anodiwa ndi Jehovha Mwari kuti tive nawo.

NGOKWAPI KUZIVIKA KUNOSISIRA MANINGI?

4. Ngokwapi kuzivika kunosisira maningi zve ngenyi?

4 Ngokwapi kuzivika kunosisira maningi? Asipi kuda kuvoneka kunopsakwaya ngo vazinji, vecishandisa jijo yo pamusoro, kubudirira mu nyagoso kana kuva no nduma mu zvo mabungaijo. Pauro wakazvisanangura, paakananga kudari: “Kaveta bzino, pakumuziva Mwari, nokuti pakuzivika ndi Mwari, bzingaitisa kudini kuti muhwirirebze ku [‘zviro zvo kutanga,’ Shanduro yeNyika Itsva] bzokutama simba no nderemejo, bzo munoda kuitabze varanda vabzo?” (VaGalàsia 4:9) I cidakajiso cinoshamaisa maningi co ‘kuzivika ndi Mwari,’ Mutongi Mukuru-kuru wo mudenga no pasi! Jehovha anozviziva kuti ndisu ani, iyena anotida zve anoda kuti tive phedo naye. Ndiyena wakatisika, ngo kudaro tingava shamwari yake.—Mucumaeri 12:13, 14.

5. Zvicinyi zvatinodikana kuita kuti tizivike ndi Mwari?

5 Tinozviziva kuti Mosi wainga shamwari ya Jehovha. Paakadeketera kuna Jehovha eciti: ‘Nditatijenyi makwanja enyu,’ Jehovha wakamupingura kudari: “Ndinozoita bzo wanangaro, ngokuti wakawana unyaxa pa meso pangu, ndinokuziva ngo zina.” (Exodo 33:12-17) Jehovha angatiziva pacedu. Asi zvicinyi zvatinodikana kuita kuti tive shamwari ya Jehovha? Tinodikana kumuda zve topira upenyu hwedu kwaari.—Verenganyi 1 VaKorinto 8:3.

6, 7. Zvicinyi zvaizoita kuti tiruze ushamwari wedu na Jehovha?

6 Asi, tinodikana kuramba tino ushamwari unosisira maningi na Baba wedu vo mugore. Mukufanana no maKristu o kutanga o ku Garatia, itisu tinodikana kusiya kuva varanda vo ‘zviro zvo kutanga, zvo kutama simba no nderemejo’ zvo nyika ino, zvinobatanija kubudirira no nduma inoviiswa ndikona. (VaGalàsia 4:9, Shanduro yeNyika Itsva) MaKristu o ku Garatia aiziva Mwari zve na Iyena waiazivavo. Asi Pauro wakananga kuti hama jondhojo ‘jaida kuitazve’ zviro izvi zvabiresi. Ngo magama amweni, iyena wakavabvunjisa kuti: ‘Ngenyi mahwirira sure zve motangazve kuva varanda vo zviro zvo upenji zve zvabiresi?’

7 Kureva kuti zviro zvakafanana zvingaitikavo kwatiri here? Hina, zvingaitika. Mukufanana na Pauro, potakajija cokwadi, takasia nduma no kubudirira mu nyika ya Sathana. (Verenganyi VaFilipi 3:7, 8.) Kangaije vamweni vedu takasia jijo yo pamusoro-soro yotaipagarihwi, takasia mabasa akanaka, kana kusia mukana wo kuwana  mare yakawanda. Zvingaitazve kuti taizova no nduma kana kukhupuka ngo kuti tinoziva kuimba kana tinoziva mutambo uri wese. Asi takasia mukana jese iji. (Vaheberi 11:24-27) Azvicaizova zvo ungwaru kuzvivaza ngo kutema zvivaringo zvo kusia zviro izvi zve torangarira kuti upenyu wedu waizova wakanaka maningi kudari no takazviteverera! Murangariro wakadari waizotiita kuti tihwirire ku zviro zvo nyika ino zvatakavona kuva “bzokutama simba no nderemejo.” *—Vonanyi masoko o pasi.

VANGISANYI CIDO CENYU CO KUDA KUZIVIKA NDI JEHOVHA

8. Icinyi cinozovangisa cido cedu co kuda kuzivika ndi Jehovha?

8 Cido cedu co kuda kuzivika ndi Jehovha cingakurisa kudini zvo kuti atizopsaki kuda kuzivika ngo nyika? Tinodikana kusotesesa zvokadi zviviri zvinosisira maningi. Cokutanga, nguva jese Jehovha anokuja vaya vanomushandira ngo kugondeka. (Verenganyi Vaheberi 6:10; 11:6) Jehovha anovona vashandiri vake vakagondeka inga vanosisira, ngo kudaro iyena anojizwa kuti azvicaizova “ururami” kwaari kuregera umwe wavo. Jehovha nguva jese “anoziva vandhu vake.” (2 Timoti 2:19) Iyena “anoziva gwanja ro varurami” zve anoziva maponesere aanovaita.

9. Ipanyi muezaniso wo kuti Jehovha wakakhombijisa kudini kuti waitendera vandhu vake.

9 Nguva jimweni, Jehovha waivonesa kuti anotendera vandhu vake mu njira jinoshamaisa. (2 Kronike 20:20, 29) Inga muezaniso, rangariranyi ngo manera akaita Jehovha kuti aponese vandhu vake mu Jombe ro Kupsuka, pavaiteverehwa ngo masoca ano simba a Faro. (Exodo 14:21-30; Nduyo 106:9-11) Ciitiko ici, cakashamaisa maningi zvokuti akapera makore anokwedera 40 zvecibhuiwa ngo vandhu vo mutundhumo. (Joxwa 2:9-11) Zvokadi kamare, zvinotivangisa maningi kuceukija madisire aiita Jehovha vandhu vake no mashandisire aakaita simba rake kuti avaponese mu nguva yo kare, ngokuti sambiri pano tinodohwiswa ndi Gogi wo Magogi. (Ezekieli 38:8-12) Mu nguveyo, tinozova vakadakara maningi ngokuti takapsaka kutendehwa ndi Mwari, haiwa ngo nyika.

Nguva jimweni Jehovha anopfupa vashandiri vake ngo njira icikavetehwi

10. Ngo capi cokwadi cimweni catinodikana kusotesesa?

10 Cokwadi cocipiri catinodikana kusotesesa ngo co kuti Jehovha angaita kuti tizivike mu njira yo ticikaveteri. Kudari vandhu vakaita zviro zvaushoni basi, ngo kuda kusimbhwa ngo vamweni, Jehovha aazovapfupi. Ngenyi? Ngokuti, inga zvakananga Jesu, pavanosimbhwa ngo vamweni, uwu ndiwona mupfupo wavo. (Verenganyi Mateu 6:1-5.) Ngo divi rimweni, Jehovha ‘anovona mu cifise-fise’ vaya vacizivi kukujwa ngo zvakanaka zvavakaita kuno vamweni. Iyena anovona zvavanoita zve anozovapfupa kana kuvakomborera. Zve mu nguva jimweni Jehovha anopfupa vashandiri vake mu njira yo vacikaveteri.  Ngatibhuisanenyi ngo muezaniso munganani.

JEHOVHA WAKAPA MUSIKANE UMWENI RUKUJO HWAACAIVETERA

11. Jehovha wakakujisa kudini Maria?

11 Jehovha wakasana musikane waizvidodokesa anodanwa Maria kuti ave mai wo Mwana wake, Jesu. Maria waigara mu cindharaundha cidoko caidanwa Nazareta, ndhambo no Jerusarema zve no temberi yakaseja. (Verenganyi Luka 1:26-33.) Ngenyi Jehovha wakasana Maria? Ngirozi Gabrieri yakamubvunja kuti iyena wainga “wawana unyaxa panyasi pa Mwari.” Tingavona kuti iyena wainga shamwari yo phedo ya Jehovha ngo zvaakananga pa nguva yakatevera ku ukama wake Erizabheti. (Luka 1:46-55) Jehovha wainga ecisotesesa Maria zve wakamupa makomborero aya aacaivetera, ngokuti iyena waigondeka kwaari.

12, 13. Jesu wakakujiswa kudini paakabahwa zve paakatohwa ndi Maria kuti aende naye ku themberi no pakhirira 40 o njiku?

12 Jesu paainga abahwa, Jehovha wakabvunja ani ngo pamusoro po kubahwa ka Jesu? Aazivi kubvunja mutungamiriri ari wese, kana mutongi ku Jerusarema no Bheterehema. Kunja kwazvo, wakatumira ngirozi ku vahavisi vamweni vaijidodokesa, pavaingwarira mabvuta kunja ko Bheterehema. (Luka 2:8-14) Perapo, vahavisi ava vakaenda kovona mwana wabahwari. (Luka 2:15-17) Maria na Jasefa vakashamaiya maningi ngo kuvona Jesu ecikujwa ngo njira iyo. Manera aanoita Jehovha zviro, akasiana maningi no manera anoita Sathana. Sathana paakatumira vazivi vo ndhondho kuti vabvakacire Jesu no vabari vake, vese mu Jerusarema vakajija ngo kubahwa ka Jesu zve izvi zvakaita kuti kuve no zvineso zvakawanda. (Mateu 2:3) Inga muviyo, vana vazinji vacina ndava vakapera kuuraiwa.—Mateu 2:16.

13 Mutemo wa Jehovha ku vaIziraeri wainanga kuti kudari pakupera ko 40 o njiku mwana naabahwa, make vaidikana koita mupiro kuna Jehovha. Ngokudaro, Jasefa na Maria vakaita hwendo na Jesu kubva ku Bheterehema kwenda ku themberi ku Jerusarema raiwanika mumango wakareba  no pavaigararo. (Luka 2:22-24) Pavaienda, kangaije Maria wakarangarira kuti mupiri waizoita ciri cese cinosisira kuti akuje Jesu kana kuti haiwa. Jesu wakakujwa, asi mu njira yokuti Maria kangaije aacaivetera. Jehovha wakakheta Simioni, “wainga murungami no mutendi,” no muporofitakaji waidanijwa Ana, wainga noni yo 84 o makore okubahwa, kuti vazivise kuti Jesu waizova Mesia wakagondiswa kana Kristu.—Luka 2:25-38.

14. Jehovha wakapfupisa kudini Maria?

14 Kureva kuti Jehovha wakaenderera mberi ecikuja Maria, ngokuti iyena wakarera no kukorondha Jesu ngo kugondeka kwese here? Hina, wakamukuja. Mwari wakaita kuti zviro zvimweni zvakananga Maria no zvaakaita, zvitahwe mu Bhaibheri. Zvinovoneka inga kuti Maria aacaikwanisa kuita hwendo na Jesu pa makore matatu no meya aakacumaera. Kangaije ngokuti wainga waa noni, waidikana kugara Nazareta. Ngo iyo ndava, iyena aazivi kukwanisavo kuvona zviro zvizinji zvinoshamaisa zvakavoniwa ngo vamweni. Asi iyena wainga na Jesu pa kufa kwake. (Johani 19:26) Pa kufamba ko nguva, Maria wainga Jerusarema no vajiji va Jesu vacito vaashira mujimu mucena mu Pentekoste. (Maitiro o Vapostori 1:13, 14) Zvinodenga kuti iyena wakazojwavo pamwepo no vajiji vamweni. Kudari zvakaitika, zvinoreva kuti iyena wakawana mukana wokuzova na Jesu mu gore kwenda no kwenda. Zvokadi kamare, uwu mupfupo wakanaka ngo basa rake rakagondeka!

JEHOVHA WAKAKUJA MWANA WAKE

15. Jehovha wakakhombijisa kudini kuti waitendera Jesu paainga pasi pano?

15 Jesu aacaida kukujwa ngo vatungamiriri vo zviara no vo zvomatongehwe o nyika. Asi pa vhaza ndhatu, Jehovha wakavereketa naari mugore, kuitira kutatija mwana wake kuti anomuda maningi. Izvi zvakavangisa maningi Jesu! Jesu paakandopera kubhabhatijwa mu Murambo Jorodhani, Jehovha wakati: “Nga uu mwana wangu anodikana, wiya anondidakajisa.” (Mateu 3:17) Kusiapo Jesu, zvinovoneka inga kuti Johani Mubhabhatiji wakava umwe basi o  vakazwa mazwi aya. Perepo, no pasara gore basi kuti Jesu afe, vapostori vake vatatu vakazwa Jehovha ecinanga kudari ngo pamusoro pa Jesu: “Nga uu mwana wangu wokudikana, wondakadira rudakaro hwangu hwese. Mupurukirenyi.” (Mateu 17:5) Pejisire, njiku nganani Jesu acito afa, Jehovha wakavereketazve no mwana wake naari mugore.—Johani 12:28.

Zvicinyi zvamajija ngo makujire akaita Jehovha Mwana wake? (Vonanyi ndima 15-17)

16, 17. Jehovha wakakujisa kudini Jesu ngo njira icikavetehwi?

16 Jesu waizviziva kuti vandhu vaizomudanija kuti mundhu anoshora Mwari zve waidikana kufa ngo manera anosuruvarisa. Pikija zvakadaro, iyena wakakumbira kuti kuda ka Mwari kuitike, haiwa kwake. (Mateu 26:39, 42) ‘Iyena wakacungirira pa danda ro kutambujikira . . . acikanyoejeki,’ ngo kuti waida kukujwa ndi Baba wake, haiwa ngo nyika ino. (Vaheberi 12:2, Shanduro yeNyika Itsva) Jehovha wakakujisa kudini Jesu?

17 Jesu paainga pasi pano, wakaita mukumbiro ecikumbira kuti ave no goja raainga naro kare, paainga na Baba wake mugore. (Johani 17:5) Mu Bhaibheri apana pakatahwa kuti Jesu waivetera kuwana zvinopinda izvi. Iyena aacaivetera mupfupo wakasiana kamare ngo kuita kuda ka Jehovha pasi pano. Asi, zvicinyi zvakaita Jehovha? Iyena wakakuja Jesu ngo njira icikavetehwi. Jehovha paakamusa Jesu, iyena “wakamukuja” mugore. Iyena, wakapazve Jesu upenyu wo kumujimu ucikafi, ciro cokuti cingozvo akunazve wakambociashira! * (Vonanyi masoko o pasi.) (VaFilipi 2:9; 1 Timoti 6:16) Manera anoshamaisa zvakadini akaita Jehovha kuti apfupe Jesu ngo basa rake rakagondeka!

18. Zvicinyi zvinozotibesa kupsaka kutendehwa ndi Jehovha, haiwa ngo nyika?

18 Zvicinyi zvinozotibesa kuti tipsake kutendehwa ndi Jehovha, haiwa ngo nyika ino? Tinodikana kusotesesa pa cokwadi cokuti nguva jese Jehovha anokuja vashandiri vake vakagondeka zve anovapfupa ngo njira icikavetehwi. Tingaeja kurangarira ngo makomborerero anozotiita Jehovha kumbejiyo! Asi wari uno, potinonga tecicungirira zvineso no matambujiko mu nyika ino yakashata, tinodikana kuceukija kuti nyika iyi iri kukhirira. Ngo kudaro, kuzivika kuri kwese ngo nyika, kunozokhiriravo. (1 Johani 2:17) Ngo divi rimweni, Baba wedu vano rudo, Jehovha, aazokanganwi mabasa edu no rudo watinokhombija ku zina rake, ngo kuti iyena asipi “acina ururami.” (Vaheberi 6:10) Zvokadi kamare, iyena anozovonesa kuti anotitendera, kangaije mu njira yokuti cingozvo atizivi kuirangarira!

^ ndim. 7 Pa ndau po kushandisa gama ro kuti “zvicina nderemejo,” maBhaibheri amweni anoshandisa magama o kuti, “zvabiresi,” “kutama mare,” “murombo,” “zvinosuruvarisa.”

^ ndim. 17 Mupfupo uwo zvingaita kuti wakava ucikavetehwi, ngokuti kutama kufa akunangwi mu Matahwa o ciHebheru.