Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 MUSORO WO KUJIJA WO 2

Ngatisimbe Jehovha mu Ungano

Ngatisimbe Jehovha mu Ungano

‘Ndinozomusimba pakati po ungano.’ —NDUYO 22:22, Shanduro yeNyika Itsva.

NDUMBO 59 Ngatisimbe Jehovha Pamwepo

ZVATICAJIJA *

1. Dhavhidhi waizwa kudini ngo pamusoro pa Jehovha zve izvo zvaimukwevera kuti aitenyi?

MAMBO DHAVHIDHI wakatara kudari: “Tenji Mwari mukuru, anofanera kusimbwisisa.” (Nduyo 145:3) Iyena waida Jehovha zve rudo wondhowo waimukwevera kuti asimbe Mwari ‘pakati po ungano.’ (Nduyo 22:22, Shanduro yeNyika Itsva; 40:5) Pacina kukana-kana, imwimwi munoda Jehovha zve munowirirana no magama a Dhavhidhi paakati: ‘Simbwanyi imwimwi, Jehovha, Mwari wo vaIsraeli, baba wedu kubvira narini no mbhera narini.’—1 Kronike 29:10-13, Shanduro yeNyika Itsva.

2. (a) Tingasimbisa kudini Jehovha? (b) Uzinji wo hama no hambzaji jedu vari kusongana no cineso capi zve tinoda kutanga tavonenyi?

2 Nyamasi uno, njira imwe basi yo kusimba Jehovha ngo yo kupa mupinguro pa musongano jedu jo ciKristu. Asi, uzinji wo hama no hambzaji jedu vari kunesehwa ngo kuzviita. Ivona vanoda kupa mupinguro, asi vanothya kuzviita. Vangaitenyi kuti vanyise kuthya kondhoko? Zve ngozvapi zvingatibesera kuti tipe mupinguro jinovangisa? Ticito tadavira mubvunjo ijo, ngatitange ngo kuvona zviro zvirongomuna zvinotiita kuti tipe mupinguro pa musongano jedu.

NGENYI TINOPA MUPINGURO PA MUSONGANO?

3-5. (a) Inga zvinosananguhwa pana Vaheberi 13:15, Shanduro yeNyika Itsva, ngenyi tinopa mupinguro pa musongano jedu? (b) Kureva kuti vese vanodikana kupa mupinguro jakafanana here? Sananguranyi.

3 Jehovha wakapa itusu tese cidakajiso co kumusimba. (Nduyo 119:108) Mupinguro jedu pa musongano, i divi ro ‘cipiriso cedu co kusimba,’ apana mundhu umweni angatiitira. (Verenganyi Vaheberi 13:15, Shanduro yeNyika Itsva.) Kureva kuti Jehovha anokumbira kuti tese tipe cipiriso kana mupinguro  wakafanana here? Haiwa, iyena aaiti zvondhozvo!

4 Jehovha anozviziva kuti kukwanisa kwedu kuita zviro no mugariro wedu, kwakasiana zve iyena anoreremeja zviya zvatinokwanisa kumupa. Vonanyi basi mupiro jaitendehwa kuti vaIziraeri vape. VaIziraeri vamweni vaikwanisa kupa cibvuta kana mbuji. Asi vamweni vainga varombo vaitendehwa kupa “magovora nokuti maphwiphwi maviri.” Zve vaicakwanisa kupa shiri mbiri, Jehovha waitendera kuashira ‘cogumi co mupimo wo upfu hwakaceta.’ (VaLevi 5:7, 11) Upfu wainga ciro cicikadhuri, asi Jehovha waireremeja maningi cipo cakadaro.

5 Mwari wedu wakanaka, acindori no mazwiro akafanana nyamasi uno. Patinopa mupinguro, iyena aaveteri kuti tive vandhu vanokwanisa kuvereketa ushoni inga ndi Aporo kana Pauro. (Maitiro o Vapostori 18:24; 26:28) Pa zvese, Jehovha anoda kuti tiite zvese zvatinokwanisa kuti tipe mupinguro jaushoni. Ceukijanyi noni yakapaya mukuruzado muviri. Iyona inosisira maningi kuna Jehovha ngokuti yakapa zvese zvayainga nazvo.—Luka 21:1-4.

Kupa mupinguro kunobesera itusu no vaya vanotizwa (Vonanyi ndima 6-7) *

6. (a) Mukuzwirana no Vaheberi 10:24, 25, mupinguro jatinozwa jinotipsasa kudini? (b) Mungaitenyi kuitira kubongesera ngo mupinguro jinomuvangisa?

6 Tinovangisa vamweni patinopa mupinguro jedu. (Verenganyi Vaheberi 10:24, 25.) Tese tinodakara maningi patinozwa mupinguro jakasiyana-siyana pa musongano jedu. Tinodakarazve patinozwa vocidoko vacipa mupinguro ngo magama avo. Tinovangiswazve patinozwa ari wese acinanga ngo pamusoro po upfumi hwaakapfumbura. Zve tinokahamara ngo vaya ‘vanocunga’ kuti vape mupinguro javo, pikija vanonga vaciita nyowa kana vari kutanga kujijira ndumi yedu. (1 VaTesalònika 2:2, Baiberi Mazwi Akacena aMwari) Tingakhombijisa kudini kuti tiri kubongesera ngo kuvangisira kwavo? Tingavabongesera ngo mupinguro wavo unovangisa, musongano paunopera. Njira imweni yo kukhombija kuti tiri kumbongesera ngo yo kupavo mupinguro. Tikadaro, kusiyapo itusu basi tovangiswa, tinovangisavo vamweni.—VaRoma 1:11, 12.

7. Tinobesereka kudini patinopa mupinguro?

7 Tinobesereka pacedu patinopa mupinguro. (Isaia 48:17) Kuitisa kudini? Cokutanga, kudari tinoda kupa mupinguro, tinokwevejehwa kuti tinase kunasirira  musongano. Patinonasa kunasirira, tinonasavo kuzwisisa Soko ra Mwari. Zve patinonasa kuzwisisa, tinozonasavo kushandisa zviya zvotajija. Cocipiri, tinozodakarira maningi musongano, kudari tikatora rutivi ngo kupa mupinguro jedu. Cocitatu, zvecivoneka kuti kupa mupinguro kunoda kuvangisira, kazinji tinoramba teciceukija zvatakapingura pa musongano pa nguva yakareba.

8-9. (a) Inga zvinonangwa pana Malakia 3:16, munorangarira kuti Jehovha anozwa kudini patinopa mupinguro? (b) Ngenyi vamweni vanondothya basi?

8 Tinodakajisa Jehovha patinokhombija rutendo hwedu. Ngative no cokwadi co kuti Jehovha anotipurukira zve anoreremeja kuvangisira kwatinoita kuti tipe mupinguro pa musongano. (Verenganyi Malakia 3:16.) Iyena anobongesera ngo kutikomborera patinoeja kumudakajisa.—Malakia 3:10.

9 Zvakajeka kamare kuti, tino mathangwe akanaka anotiita kuti tipe mupinguro. Pikija zvakadaro, vamweni vanothya kumusa nyara. Kudari munozwa kudaro, mucadopera simba. Ngatende tivone ndhungamiro jo mu Bhaibheri, muezaniso munganani pomwe no zviro zvimweni zvinoshanda zvingatibesera kuti tipe mupinguro pa musongano.

KUNYISA KUTHYA

10. (a) Vazinji vedu tinothienyi? (b) Ngenyi kuthya kupa mupinguro icitatijo caushoni?

10 Kureva kuti munotetemera pamunoeja kumusa nyara kuti mupingure here? Kudari munozwa kudaro, amuripi mega. Cokwadi ngo co kuti tese tinothya patinopa mupinguro. Asi, kuti munyise kuthya kondhoko, munodikana kupsaka kuziva kuti zvicinyi zvinomuitaro kuti muthye. Kureva kuti munozokanganwa zvamunoda kunanga kana munozonanga zviciripi izvona here? Kureva kuti munothya kuti mupinguro wenyu auzovi waushoni inga wo hama jimweni here? Zvokadi kamare, kuthya kwakadaro, kungava citatatijo caushoni. Ikona kunokhombija kuti munojidodokesa zve munovona vamweni inga vakuru kupinda imwimwi. Jehovha anodakarira maningi vara ro kujidodokesa. (Nduyo 138:6; VaFilipi 2:3) Asi, Jehovha anodazve  kuti mumusimbe zve muvangise hama no hambzaji jenyu pa musongano. (1 VaTesalònika 5:11) Iyena anomuda zve anozomupa cicunge camunoda.

11. Vhesi japi jingatibesera?

11 Vonanyi basi vhesi iji jo mu Bhaibheri. Bhaibheri rinonanga kuti tese tinoshaisha pa zvatinonanga no manangire atinozviita. (Jakobo 3:2) Jehovha aaveteri kuti tive vakakwana zve hama no hambzaji jedu ajiveterivo zvondhozvo. (Nduyo 103:12-14) Ijona i mbhuri yedu yo kumujimu zve jinotida. (Marco 10:29, 30; Johani 13:35) Ijona jinozwisisa kuti mupinguro jedu nguva jimweni ajivi kamare zviya zvataida.

12-13. Tinojijenyi ngo muezaniso wa Neemia no wa Jona?

12 Rangariranyi muezaniso munganani jo mu Bhaibheri jingamubesera kuti munyise kuthya. Inga muezaniso, ngatibhuye ndi Neemia. Iyena waishandira pa muzi wa mambo ano simba. Neemia wainga akasuruvara ngokuti wakazwa kuti mufimbiji no musuvo jo Jerusarema jainga japhwanyika. (Neemia 1:1-4) Vonanyi basi kutetemera kwaakava nako, mambo paakamubvunjisa kuti ngenyi wainga akasuruvara! Ngo kukasika wakaita mukumbiro perapo wopa mupinguro. Pa mupinguro, mambo wakaita zvizinji kuti abesere vandhu va Mwari. (Neemia 2:1-8) Rangariranyizve ngo muezaniso wa Jona. Jehovha paakamubvunja kuti aende koocumaera ku Ninivha, Jona wakathya maningi zvokuti wakatiza woenda ku divi rimweni. (Jona 1:1-3) Asi, ngo besero ra Jehovha, Jona wakakwanirisa basa rake. Zve masoko ondhowo akabesera maningi vandhu vo Ninivha. (Jona 3:5-10) Kubvira ku zvakaitika na Neemia,tinojija kusisira ko kuita mukumbiro ticito tadavira. Zve pa muezaniso wa Jona, tinojijira kuti ngo besero ra Jehovha tinokwanisa kumushandira pikija no kuthya kwatinonga nako. Zvokadi kamare, kupa mupinguro mu ungano zvakareruka maningi kupinda koocumaera ku vandhu vo Ninivha.

13 Ngozvapi zviro zvinoshanda zvingamubesera kuti mupe mupinguro jinovangisa pa musongano? Ngativone mazano manganani.

14. Ngenyi tinodikana kunasa kunasirira kuitira musongano jedu zve tingazviita rini?

14 Nasiriranyi musongano jese. Pamunoronga kuda kupa mupinguro zve monasa kunasirira, munganasa kuzvithemba. (Mazwi Akangwara 21:5) Zvokadi kamare, tese tino urongwa wakasiyana kuitira kunasirira musongano jedu. Eloise, imwe noni ino makore anokwana 80, inotanga kunasirira musongano pa kutanga ko sumana. Iyona yakananga kudari: “Ndinonasa kubesereka ngo musongano pandinotanga kunasisira pacino nguva.” Joy, imwe hambzaji inoita mabasa o ku nyika pa nguva yakareba, yakananga kuti inoronga nguva kuti inasirire Murindiri ngo mu Sabudu. Iyona yakananga kuti inodakarira kuita kudaro ngokuti inoramba iciceukija zvainonga yajija. Ike imwe hama iri mukuru, inoshandazve inga piyona yakananga kuti: “Kwandiri zviri nane  kujija padoko padoko, kusiapo kujija zvese pa nguva imwe.”

15. Mungajinasiririsa kudini kuitira musongano?

15 Zvicinyi zvinobatanijwa pa kunasa kunasirira musongano? Tanganyi jijo iri yese hayo ngo kuita mukumbiro mecikumbira Jehovha mujimu mucena. (Luka 11:13; 1 Johani 5:14) Perapo pejanyi zvimuseswa zvinganani kuti mupopore jijo yese. Poporanyi musorowo, zvimusoro zvidoko, muezaniso no masoko amweni okuengejera. Pamunonga mecipopora ndima imwe nga imwe, ejanyi kuverenga vhesi jese jinonga jadihwemo. Rangarijisisanyi zvamunongaro meciveverenga, maningi-ningi mativi amunodaya kupa mupinguro. Pamunoengejera kunasirira kwenyu, munozobesereka maningi zve zvinozomurerukira kupa mupinguro.—2 VaKorinto 9:6.

16. Ngoapi mathurusi atinawo zve muri kumashandisa kudini?

16 Kudari zvikakwanisika, shandisanyi mathurusi amunoziva, anowanika mu ndumi yenyu. Jehovha, acishandisa sangano rake, anotipa mathurusi otinoshandisa mu foni jedu kuti atibesere kunasirira musongano. Tecishandisa apirikativho JW Library® tinokwanisa kubhashari mabhuku o kujija mu foni jedu. Perapo tingakwanisa kujija kana kuverenga no kupurukira zvakagaravhahwi pa nguva iri yese hayo. Vamweni vanoshandisa JW Library kuti vajije pavanonga vari kuzorora, ku basa kana ku cikora, atee pavanonga vaciita hwendo. Watchtower Library no BHIBHIRIOTEKA RO MU INTERNETIro Torre De Vigia rinoita kuti zvireruke kupsakisisa zvatinoda kunasa kuzwisisa patinonga tecijija.

Ndirini munoita urongwa wo kunasirira musongano? (Vonanyi ndima 14-16) *

17. (a) Ngenyi i zviro zvakanaka kunasirira mupinguro jakawanda? (b) Majijenyi kubvira mu vhidhiyo ina musoro anoti Iva Shamwari ya Jehovha—Nasirira Mupinguro Wako.

17 Kudari zvecikwanisika, nasiriranyi mupinguro jakawanda. Ngenyi? Zvingaita kuti nguva jimweni munomusa mukono zve motama kutatijwa. Vamweni vangatomusavo mukono pa mubvunjo wondhowo zve muitisi wo Murindiri angatosana ivona. Kuitira kuti atame kupeja nguva zinji pa ndima imwe, zvingaita kuti hama iri kuitisaro Murindiri isane vandhu vashoma kuti vadavire. Ngokudaro, mucanyangajwa kana kupera simba, kudari mukatama kusanwa pa bvaza yo kutanga. Kudari mukanasirira mupinguro jakawanda, munozova no mukana jakawanda kuti mudavirevo. Kangaije umwe wo mupinguro wenyu, ungabatanijavo kuverenga vhesi jo Bhaibheri. Asi zvingakwanisika, munganasiriravo mupinguro mecishandisa magama enyu. *

18. Ngenyi zvaushoni kupa mupinguro jakafupika?

18 Ipanyi mupinguro jakafupika. Kazinji mupinguro jinovangisa ndi jiya jakafupika. Ngokudaro ivanyi no cido co kuda kupa mupinguro  jakafupika. Ejanyi kuita kuti jitame kupindirija 30 o masegundu. (Mazwi Akangwara 10:19; 15:23) Kudari muri kupa mupinguro pa musongano ko makore akawanda, muno basa rinosisira maningi ramunodikana kuita, gajanyi muezaniso waushoni ngo kupa mupinguro jakafupika. Kudari munopa mupinguro jakareba, jinopeja museswa jakawanda, jingaita kuti vamweni vathye vorangarira kuti narini avazokwanisi kupa mupinguro jaushoni inga zvamunoitaro. Cimwenizve, mupinguro jakafupika jinozoita kuti vamweni vapevo mupinguro javo. Maningi-ningi kudari mukava mundhu wokutanga pa kupa mupinguro, ipanyi mupinguro wakareruka zve unodavira kamare mubvunjowo. Mucadoeja kukwakwatija mafundo ese o mu ndima. Mukavona kuti fundo guru ro pa ndima rapera kusananguhwa, mungananga henyu masoko o kuengejera.—Vonanyi bhokiso rinoti “ Ndinganangenyi Pandinonga Ndecida kupa Mupinguro?

19. Hama inoitisa Murindiri ingamubesera kudini, asi imwimwi munodikana kuitenyi?

19 Bhuyanyi no hama iri kuitisaro Murindiri kuti maidakarira kupa mupinguro pa ndima yakati kuti. Kudari mukasana kuita zvondhozvo, munodikana kubhuya no hameyo nguva iciripo. Ikaguma nguva yo ndima yondhoyo, musanyi nyara yenyu ngo kukasika zve nasanyi kuumusa, mukadaro muitisi anokwanisa kumuvona.

20. Kuitisa kudini musongano jo ungano jingaezanisihwa no kuha kwatinoita no shamwari?

20 Vonanyi musongano inga zvokuha zvamunokovana no shamwari jenyu. Rangariranyi basi kuti jimwe shamwari jo mu ungano jiri kumukumbira kuti munasisire zvokuha zvaushoni zve zvinonaka. Maizojizwa kudini? Mungathimwa-thimwa padoko, asi maizoita zvese zvamunokwanisa kuti munasirire zvaushoni zvaizodakarihwa ngo vese. Jehovha uwo anotikoka kuti tiende ku musongano, anotinasirira meza yakazara ngo zvokuha zvaushoni pa musongano jedu. (Nduyo 23:5; Mateu 24:45) Zve iyena anodakajihwa patinomupa cipo cakareruka, asi cokhombija kuti ndi zvese zvatinokwanisa kumupa. Ngokudaro, nasanyi kunasirira zve itanyi zvese zvamunokwanisa kuti mupe mupinguro jenyu. Mukadaro, amuzohi basi zvinonga pa meza ya Jehovha asi munonga muciviisavo cipo co kukovana no ungano.

NDUMBO 2 Munozwi Jehovha

^ ndim. 5 Inga mutari wo nduyo Dhavhidhi, tese tinoda Jehovha zve tinodakara ngo kumusimba. Tino mukana unosisira wo kukhombijira rudo hwedu kuna Mwari patinosongana pa Nyumba yedu yo Umambo kuti tinamate. Vamweni vedu, vanonesehwa kupa mupinguro pa musongano. Kudari muri kusongana no cineso ico, musoro uno ungamubesera kuzwisisa kuti ngenyi muri kuthya kupa mupinguro zve munozokwanisa kuvona kuti mungazvinyisisa kudini.

^ ndim. 17 Endanyi mu jw.org, kuti muvone vhidhiyo inoti Iva Shamwari ya Jehovha—Nasirira Mupinguro Wako. Nghwinanyi ngo panoti JIJISO JO BHAIBHERI > VANA.

^ ndim. 63 KUDURUJIHWA KO PIKICA: Hama jo mu ungano jiri kudakajihwa ngo kupa mupinguro pa jijo yo Murindiri.

^ ndim. 65 KUDURUJIHWA KO PIKICA: Vandhu vamweni vari pa pikica yo kutanga vari kunasirira Murindiri. Pikija vano mugariro jakasiyana mu upenyu, ivona vanopsaka nguva kuti vanasirire musongano.