Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 MUSORO WO KUJIJA WO 1

‘Ucathimwa-Thimwa Ngokuti Ndiri Mwari Wako’

‘Ucathimwa-Thimwa Ngokuti Ndiri Mwari Wako’

‘Ucathya, ngokuti ndinewe. Ucathimwa-thimwa, ngokuti ndiri Mwari wako. Ndinokuvangisa, hina, ndokubesa.’—ISAIA 41:10, Shanduro yeNyika Itsva.

NDUMBO 7 Jehovha, I Simba Redu

ZVATICAJIJA *

1-2. (a) Magama anowanika pana Isaia 41:10, Shanduro yeNyika Itsva, akabesera kudini hambzaji Yoshiko? (b) Ndiyani angabesehwa ngo magama anowanika pana Isaya 41:10, Shanduro yeNyika Itsva?

YOSHIKO imwe hambzaji yakagondeka yakaashira masoko akashata. Medhiko wayo wakaibvunja kuti yainga yasarihwa ngo mweji munganani kuti ife. Waro hambzaji iyi yakajizwa kudini? Iyona yakaceukija vhesi yo Bhaibheri yo yaidakarira maningi, Isaia 41:10, Shanduro yeNyika Itsva. (Verenganyi.) Ngo kuthiva kwese, iyona yakabvunja medhiko kuti aicaithya, ngokuti Jehovha waibata mukono wayo. * Masoko anoembejera anowanika pa vhesi iyo akabesera hambzaji yedu inodiwa kuti ithembe kamare Jehovha. Vhesi iyo ingatibeseravo nyamasi kuti tirambe takathiva patinosongana no zvineso. Kuti tinase kuzwisisa ushoni manera ainotibesera, cokutanga ngativone kuti zvicinyi zvakaitisa kuti Jehovha abvunje Isaya masoko aya.

2 Pakutanga, Jehovha wakabvunja Isaya kuti atare magama okuembejera vaJudha, vaizotohwa kuenda ku ushoko Bhabhironi. Asi, Jehovha aazivi kunanga izvi kuti zviembejere vaJudha vaengaya ku ushoko basi, asi kuitira kuembejera vashandiri vese vake kutangira mu nguveyo mbhera nyamasi. (Isaia 40:8; VaRoma 15:4) Zvecivoneka kuti tiri kupona mu ‘mukuvo unonesa’ kubatana nawo zve ucito ukawanikazve, tinoda vangiso inowanika mu bhuku ra Isaya.—2 Timoti 3:1.

3. (a) Zvigondiso zvapi zvitatu zvatinowana pana Isaia 41:10, Shanduro yeNyika Itsva, vhesi yakasanwa kuitira gore ro 2019? (b) Ngenyi tinoda zvigondiso izvi?

3 Pa musoro uno, tinozobatikana pa zvigondiso zvitatu zva  Jehovha zvinovangisa rutendo hwedu zvakatahwa mu bhuku ra Isaia 41:10, Shanduro yeNyika Itsva: (1) Jehovha ana itusu, (2) iyena ndi Mwari wedu, zve (3) anozotibesera. Tinoda zvigondiso * izvi ngokuti, inga ndi hambzaji Yoshiko, tiri kusongana no zvineso mu upenyu. Tinodikanazve kuhwisana no zviro zvizinji zvinoitika mu nyika ino. Vamweni vedu, vari kucungirira povanoteverehwa ngo utongi uno simba. Ngatende tipopore zvigondiso zvitatu izvi, cimwe nga cimwe.

‘NDINEWE’

4. (a) Ngocapi cigondiso cokutanga catinoda kujija wari uno? (Vonanyivo masoko o pasi.) (b) Jehovha anokhombijisa kudini rudo hwake? (c) Munozwa kudini pa kuzwa magama a Jehovha?

4 Jehovha, pakutanga anotipa cigondiso ngo magama aya: ‘Ucathya, ngokuti ndinewe.’ * Jehovha wakakhombija kuti ana itusu ngo kuva anonasa kutipurutana no kutikhombijira rudo. Vonanyi makhombijire aanoita rudo hwake kwatiri, paanoti: “Ngokuti unomutengo pa majiso angu, wakareremejwa, ngokuti ndinokuda.” (Isaia 43:4) Apana ari wese mudenga no pasi angakwanisa kuita kuti Jehovha asiye rudo hwaanahwo no vese vaya vanomushandira, kugondeka kwake akuzoperi. (Isaia 54:10) Rudo hwake no ushamwari hwake unotipa cicunge. Iyena anotingwarira nyamasi uno, inga zvaakaita no shamwari yake Abhirahama. Jehovha wakamubvunja kudari: “Ucathya hako, Abrahama; inini ndiri mubviko wako.”—Genesi 15:1.

No besero ra Jehovha, tingakwanisa kuhwisana no zvineso zvese, pikija hazvo zvingadari inga murambo kana murabvu (Vonanyi ndima 5-6) *

5-6. (a) Tinozvizivisa kudini kuti Jehovha anoda kutibesera patinosongana no zvineso? (b) Tingajijenyi ngo muezaniso wa hambzaji Yoshiko?

5 Tinozviziva kuti Jehovha anoda kamare kutibesera pa zvineso zvo mu upenyu hwedu, ngokuti iyena wakagondisa vandhu vake kudari: “Ukakhirira pakati po kumwa, ndinozova newe, ukaambuka murambo, aizokuboboji. Ukakhirira pa muriro, auzokupisi, no murabzu aizokugumiri.” (Isaia 43:2) Magama aya anoda kurevenyi?

6 Jehovha aagondesi kubvisa matambujiko anoitisa kuti upenyu uve no zvineso, asi aatenderi kuti “murambo” wo zvineso utiboboje kana kuti “murabzu” wo zviejo utiviisire matambujiko acikaperi. Jehovha ari kutigondisa kuti anoramba ana itusu ecitibesera kuti ‘tikhirire pakati’ po zvineso zvondhozvo. Anozozviitisa kudini? Iyena anozotibesera kuti titame kuthya, ngokudaro  tingaramba takagondeka kwaari pikija tikavona kuti upenyu hwedu uri pa ngozi. (Isaia 41:13) Hambzaji Yoshiko vanangwaya pakutanga, vakavona kuti izvi ndizvonadi kamare. Mwana wayo wokaji wakati: “Takakahamara maningi potakavona kuti mai vakaramba vakathiva. Takavona kuti Jehovha waivapa runyararo hwo mukati. Mbhera yoguma njiku yovakatamika, mai vaindobhuya no maiferimeiro pamwepo no vatenda vamweni ngo pamusoro pa Jehovha no zvigondiso zvake.” Tinojijenyi ngo muezaniso wa hambzaji Yoshiko? Patinothemba cigondiso ca Mwari co kuti ‘ndinewe’ tinozova vandhu vano cicunge zve takavanga patinosongana no zvineso.

‘NDIRI MWARI WAKO’

7-8. (a) Ngocapi cigondiso cocipiri cakatahwa ndi Isaia zve cinorevenyi? (b) Ngenyi Jehovha wakabvunja vaJudha vaingaya ku ushoko kuti vatame: ‘Kuthimwa-thimwa’? (c) Magama anowanika pana Isaia 46:3, 4 anovangisa kudini vashandiri va Mwari?

7 Vonanyi cigondiso co cipiri cakatahwa mu bhuku ra Isaya: ‘Ucathimwa-thimwa, ngokuti ndiri Mwari wako.’ Masoko aya anonangenyi ngo pamusoro po kuthimwa-thimwa? Pa vhesi iyi gama rakasandujwa ro kuti kuthimwa-thimwa, ringaviisa murangariro wo mundhu “anonga ecisota, dangani anonga ecivetera kuhwiswa kuri kwese” kana kuti “mundhu anonga ari pa mugariro wo ngozi.”

8 Ngenyi Jehovha wakabvunja vaJudha vaizoendaya ku ushoko ku Bhabhironi kuti vatame ‘kuthimwa-thimwa’? Ngokuti iyena waiziva kuti vandhu vaya, vaizobatwa ngo kuthya. Zvicinyi zvaizovaita kuti vathye? Mu kupera ko 70 o makore vari mu ushoko, masoca o Medho no Persia aizohwisa vaBhabhironi. Jehovha waizoshandisa masoca ondhowo kuti asujunure vandhu vake. (Isaia 41:2-4) VaBhabhironi no vandhu vo majinja amweni vaipona mu nguva yondhoyo povakavona kuti muvengi wavo wainga ecikwedera, vakaeja kuvangisana umwe no umweni veciti: ‘Itanyi simba.’ Ivona vaizoitazve zvimwari zvo kunyepa, vecivetera kuti zvaizovangwarira. (Isaia 41:5-7) Kusiyapo zvondhozvo, Jehovha waizonyaraja mwoyo jo vaJudha vaingaya ku ushoko eciti: ‘Iwewe, Israeli, muranda wangu . . . ucathimwa-thimwa, ngokuti ndiri Mwari wako.’ (Isaia 41:8-10, Shanduro yeNyika Itsva) Vonanyi kuti Jehovha wakati: ‘Ndiri Mwari wako.’ Ngo magama awo, iyena wakavangisa vanamati vake vakagondeka kuti aazivi kuvakanganwa, iyena wainga aciri Mwari wavo zve ivona vainga vaciri vandhu vake. Iyena wakavabvunja kudari: ‘Ndinozomuseseja . . . no kumuponesa.’ Magama ese aya akavangisa vaJudha vaingaya ku ushoko.—Verenganyi Isaia 46:3, 4.

9-10. Ngenyi atidikani kuthya? Ipanyi muezaniso.

9 Nyamasi uno, vandhu vakatitendeneja vari kuthimwa-thimwa ngo ndava yo zvineso zvo nyika ino kupinda kare. Zvokadi kamare, itusu tinopsaswavo ngo zvineso zvondhozvo. Asi, atidikani kuthya. Jehovha ari kutibvunja kudari: ‘Ndiri Mwari wako.’ Ngenyi kuziva izvo, kunotibesera kuti tirambe takathiva?

10 Vonanyi muezaniso uwu: Mapasajhero maviri, Jim na Ben vari mu ndeki, kwakava no bepo guru maningi. Mapasajhero akazwa izwi recinanga kudari: “Nasanyi kugara pa ndau jenyu, mucabvisa sintu. Tinonga tecineseka ngo mbepo pa mukuvo mushomani basi.” Jim waithya maningi. Asi mufambisi wo ndeki wakaengejera eciti: “Mucathimwa-thimwa. Ndini mufambisi wo ndeki ndiri kunangari.” Asi, Jim wakajunguja musoro wake eciti, “Mushovonyi wo cigondiso ico?” Iyena wakavona kuti Ben wainga acikathimwi-thimwi. Jim wakamubvunjisa kudari: “Ngenyi iwewe auripi  kuthya?” Ben wakaseka woti: “Ngokuti ndinonasa kuziva mufambisi wo ndeki iyi. Iyena ndi babangu!” Perapo Ben wakati: “Siyai ndikubvunje zvizinji ngo pamusoro pavo. Ndino cokwadi cokuti paunonasa kuvaziva no kuziva zvavanokwanisa kuita, unozovavo wakathiva.”

11. Tingajijenyi ngo muezaniso wo mapasajhero maviri anangwari?

11 Tingajijenyi ngo muezaniso uwu? Inga ndi Ben, itusu atithyi ngo kuti tinonasa kuziva Baba wedu vo mugore, Jehovha. Tinozviziva kuti ivona vanozotibesera kuti ticungirire pikija no zvineso zvizinji zvatinosongana nazvo mu njiku jino jo kupejisira. (Isaia 35:4, Baiberi Mazwi Akacena aMwari) Tinothemba Jehovha, ngokudaro, tingaramba takathiva pikija vandhu vazinji mu nyika vanonga vacithya. (Isaia 30:15) Tinotevejerazve zvakaita Ben, patinonga tecibvunja vamweni kuti ngenyi tinothemba Mwari. Tikadaro, vangatovavo no cokwadi co kuti azvinenyi zvineso zvavanosongana nazvo, Jehovha anozovabesera.

‘NDINOZOKUVANGISA [ZVE] NDOKUBESA’

12. (a) Ngocapi cigondiso co citatu cakatahwa mu bhuku ra Isaya? (b) Gama ro kuti “mukono” wa Jehovha rinoticeukijenyi?

12 Vonanyi cigondiso co citatu cakatahwa ndi Isaya: ‘Ndinozokuvangisa, hina, ndokubesa.’ Isaya wainga wakananga kuti Jehovha waizovangisa vandhu vake, paakati: Jehovha “ari kuvia ngo simba, mukono wake unomupa utongi.” (Isaia 40:10) Kazinji Bhaibheri rinoshandisa gama ro kuti “mukono” pa kuda kunangira simba. Ngokudaro, magama o kuti “mukono wake unomupa utongi” anoticeukija kuti Jehovha ndi Mambo ano simba. Kareko iyena wakashandisa simba rake kuti abesere no kujivirira vashandiri vake zve aciri kuramba ecivangisa no kungwarira vese vaya vanomuthemba nyamasi uno.—Deuteronòmio 1:30, 31; Isaia 43:10.

Apana nvuti inozobudirira pa kuhwisana no nyara yakavanga inongwarira ya Jehovha (Vonanyi 12-16) *

13. (a) Jehovha anokwanirisa papi cigondiso cake co kuzotivangisa? (b) Cigondiso capi cinotivangisa zve cinotipa cicunge?

 13 Patinonga teciteverehwa, Jehovha anokwanirisa cigondiso cake co kuti: ‘Ndinozokuvangisa.’ Mu nyika jimweni, nyamasi uno, vavengi vedu vari kueja kurambisa basa redu ro kucumaera. Pikija zvakadaro, itusu atithimwi-thimwi zvondhozvo pazvinoitika. Jehovha anotigondisa kuti iyena anozotivangisa no kutipa cicunge. Iyena anotigondisa kudari: “Cokurhwa ndicona, cakanasirihwa kuambana nemwi, acizobudiriri.” (Isaia 54:17) Cigondiso ici cinoticeukija zvokadi zvitatu zvinosisira maningi.

14. Ngenyi atikahamari patinonga teciteverehwa?

14 Cokutanga, inga vateveri va Kristu, tinovetera kunyenywa. (Mateu 10:22) Jesu wakananga kuti vajiji vake vaizoteverehwa mu mazuva ano okupejisira. (Mateu 24:9; Johani 15:20) Cocipiri, ciporofita ca Isaya cakananga kuti vavengi vedu vaizoita zvizinji kupinda kutivenga, ivona vaizoshandisa nvuti jakasiyana-siyana kuti vatihwise. Nvuti jondhojo, jinobatanija kunanga manyepo ngo pamusoro pedu no kuva vanotiteverera. (Mateu 5:11) Jehovha aazorambisi vavengi vedu kuti vatame kushandisa nvuti jondhojo kuti vatihwise. (VaEfeso 6:12; Apokalipsi 12:17) Asi, itusu atidikani kutya. Ngenyi?

15-16. (a) Icokwadi capi catinodikana kuceukija zve kuitisa kudini Isaia 25:4, 5 inobesera zvondhozvo? (b) Isaia 41:11, 12, Shanduro yeNyika Itsva, inokhombijisa kudini mugumo wo vaya vanohwisana no vashandiri va Mwari?

15 Vonanyi cokwadi co citatu catinodikana kuceukija. Jehovha wakananga kuti apana “cokurhwa ndicona” cinozoshandiswa kuti citihwise ‘cinozobudirira.’ Kudari inga mufimbiji unotijivirira pa dutu guru, Jehovha anozotijivirira pa “simba ro vaxuphi.” (Verenganyi Isaia 25:4, 5.) Vavengi vedu narini avazobudiriri pavanoeja kutihwisa, ngokuti Jehovha anozotijivirira.—Isaia 65:17.

16 Kuti tiengejere kuthemba kwedu Jehovha, iyena ari kutibvunja zvinozoitika no  ‘vese vaya vanoticamwira.’ (Verenganyi Isaia 41:11, 12, Shanduro yeNyika Itsva.) Vavengi vedu vangada kuita zvizinji kuti vatikhuvaze, asi mugumo wakona unondova wakafanana: Vavengi vese vo vashandiri va Mwari ‘vanozopejwa no kuurawa.’

TINGAENGEJERESA KUDINI KUTHEMBA KWEDU JEHOVHA?

Kuverenga Bhaibheri nguva jese kunotiita kuti tiengejere kuthemba kwedu Jehovha (Vonanyi ndima 17-18) *

17-18. (a) Kuitisa kudini kuverenga Bhaibheri kunoengejera kuthemba kwedu Mwari? Ipanyi muezaniso. (b) Kuitisa kudini kurangarijisisa vhesi yakasanwa kuitira 2019 kunotibesera?

17 Kudari tinoda kuengejera kuthemba kwedu Jehovha tinodikana kunasa kumuziva. Zve njira imwe ingatibesera kuti tinase kumuziva, ngo yo kuverenga Bhaibheri no kurangarijisisa zvotaverengaro. Bhaibheri rinonanga zvizinji ngo pamusoro po mangwaririre akaita Jehovha vandhu vake kareko. Zvondhozvo zvingatiita kuti tithembe kuti iyena anozotingwariravo wari uno.

18 Vonanyi masejere o muezaniso o magama akashandisa Isaya kuti aezanisire mangwaririre aanotiita Jehovha. Iyena wakanangira Jehovha inga muhavisi zve vashandiri va Mwari inga mabvuta. Isaya wakatara kudari ngo pamusoro pa Jehovha “ngo mukono wake anokwengweneja bzimabvuta, anobzidira pa mavero ake.” (Isaia 40:11) Patinozwa kuti takumbatihwa ngo nyara yakavanga ya Jehovha, tinojizwa takangwaririka zve takathiva. Kuitira kutibesera kuti tirambe takathiva pikija no zvineso zvatiri kusongana nazvo, muranda wakagondeka no wakangwara wakasana vhesi ya Isaia 41:10, Shanduro yeNyika Itsva, inga vhesi yo gore yo 2019, ‘Ucathimwa-Thimwa Ngokuti Ndiri Mwari Wako.’ Ivanyi munorangarijisisa ngo pamusoro po cigondiso ici. Icona cinozomuvangisa pamunozosongana no zvineso.

NDUMBO 38 Iyena Anozomuvangisa

^ ndim. 5 Vhesi yo gore yakasanwa kuitira 2019, inotipa mathangwe matatu kuti tirambe takathiva, pikija no zviro zvakashata zvinoitika mu nyika kana mu upenyu hwedu. Pa musoro uno, tinozopopora mathangwe ese aya zve no manera aanotibesera kuti titame kuthimwa-thimwa zve kuti tirambe tecithemba Jehovha. Rangarijisisanyi vhesi yo gore. Ejanyi kuidira mu musoro zvecikwanisika weya. Iyona inozomuvangisa kuitira kuhwisana no zvineso zvamunozosongana nazvo kumbejiyo.

^ ndim. 3 MAGAMA AMWENI AKASANANGUHWA: Cigondiso ndi cokwadi co kuti pacinonangwa cinondoitika basi. Zvigondiso zva Jehovha zvinotibesera kuti titame kuthya zvineso zvatinosongana nazvo mu upenyu hwedu.

^ ndim. 4 MASOKO O PASI: Gama ro kuti ‘ucathya’ rinonangwa katatu pana Isaya 41:10, 13, pomwe na 14, Shanduro yeNyika Itsva. Vhesi jondhojo jinoshandisazve gama ro kuti ‘inini’ (kuda kunangira Jehovha) pa bvaza jakawanda. Ngenyi Jehovha wakafemera Isaya kuti atare bvaza jakawanda gama ro kuti ‘inini’? Wakazviita ngokuti waida kujekesa fundo rinosisira maningi: Rokuti tingava vandhu vakathiva, basi tikathemba Jehovha.

^ ndim. 52 KUDURUJIHWA KO PIKICA: Zvihwa zvo mbhuri zviri kusongana no zvineso pa basa, mu uhomi hwavo, mu mushando no ku cikora.

^ ndim. 54 KUDURUJIHWA KO PIKICA: Maporisia ari kungwina pa nyumba yo hama, Zvapupu pazvinonga zveciita musongano, asi hama no hambzaji jakaramba jakathiva.

^ ndim. 56 KUDURUJIHWA KO PIKICA: Kuita Kunamata ko Mbhuri nguva jese kunotivangisa kuti ticungirire.