Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 MUSORO WO KUJIJA WO 6

Rambanyi Makagondeka!

Rambanyi Makagondeka!

‘Andizosii kugondeka kwangu mbhera kufa!’—JOBE 27:5, Shanduro yeNyika Itsva.

NDUMBO 34 Kufamba mu Kugondeka

ZVATICAJIJA *

1. Kuitisa kudini Zvapupu zva Jehovha zvitatu zvanangwaya mu ndima iyi, zvakaramba zvakagondeka kuna Jehovha?

RANGARIRANYI muezaniso mutatu iji, jecibatanija Zvapupu zva Jehovha. (1) Umwe musikane paaenga kucikora dhiya imweni, pirisori wakakumbira vajiji vese kuti vawanike pa kucerecejwa ko firiyadho. Musikane uu waizviziva kuti firiyadho yondhoyo aicaizodakajisa Mwari, ngo nderemejo yese wakaramba kuwanikepo. (2) Umwe mujaha anonyowa, ari kucumaira muzi ngo muzi. Waguma pa kuziva kuti umwe mudoni wo kucikora anogara pa nyumba inotevera, mudoni uu kare waishora maningi Zvapupu zva Jehovha. Asi mujaha uu anoenda pa nyumbepo woti sesa, acikathyi. (3) Umwe mwanarume anoshanda ngo simba kuti ape zvinodiwa mburi yake, dhiya imweni patarawe wake vakamukumbira kuti aite zviro zvakashata kana zvinophwanya mutemo. Kunyange waizoruza basa rake, wakasanangura kuti waidikana kuva wakagondeka no kuzwira mutemo, ngokuti ngo zvinoda Mwari ku vashandiri vake.—VaRoma 13:1-4; Vaheberi 13:18, Shanduro yeNyika Itsva.

2. Mubvunjo japi jaticazodavira zve ngenyi?

2 Mugariro wapi wamavona ku vandhu vatatu ava? Kangaije mavona mugariro muzinji, jakadari inga cicunge no kururama. Asi mugariro umwe unosisira maningi, kugondeka. Umwe nga umwe wavo wakakhombija kugondeka kuna Jehovha. Zve vese, vakaramba kuphwanya ndhungamiro ja Mwari. Kugondeka kwakavandundira kuti vaite zvovakaita. Jehovha waizodada ngo vese vanokhombija mugariro iwonawo. Isusuvo tinoda kuita kuti Baba wedu vo mugore vadade. Ngokudaro, ngatende tidavire mubvunjo iji: Icinyi kugondeka? Ngenyi tinodikana kuva takagondeka? Zve tingavangisa kudini civaringo cedu co kuramba takagondeka pa mugariro unonesa?

 ICINYI KUGONDEKA?

3. (a) Vashandiri va Mwari vanokhombijisa kudini kugondeka? (b) Ngowapi muezaniso ungatibesera kuzwisisa revo yo kugondeka?

3 Vashandiri va Mwari vanokhombijisa kudini kugondeka? Ngo kuda Jehovha ngo mwoyo wese, inga muviyo, nguva jese tinozoita zvinomudakajisa. Vonanyi amwe masoko anonangwa ngo pamusoro po gama ro kuti kugondeka. Revo imwe inozwisisika yo mu Bhaibheri kuitira gama ro kuti, ‘kugondeka’: Ndi kukwana kana kutama pakaposeka. Inga muezaniso, vaIziraeri vaipira zvinyama kuna Jehovha zve Mutemo wainanga kuti zvinyamezvo zvaidikana kuva zvicina no pakaposeka. * (VaLevi 22:21, 22) Vandhu va Mwari avacaitendehwa kuita mupiro no cinyama cina mureje umwe, njeve imwe kana jiso rimwe zve avacaitodikana kupira cinyama cino dhenda jakawanda. Zvaisisira maningi kuna Jehovha kuti cinyama cive cakakwana zve cicina pakaposeka. (Malakia 1:6-9) Tingatozwisisa kuti ngenyi Jehovha waineseka ngo pamusoro po kukwana kana ngo kutama pakaposeka. Inga muezaniso, patinotenga ciri cese, azvinenyi dangani ndi mucero, bhuku kana thurusi riri rese haro, atidi cakakura maningi kana divi raco. Tinoda ciro cakakwana zve cicina pakaposeka. Jehovha anozwavo kudaro ngo pamusoro po rudo hwedu naye no kugondeka kwedu. Kunodikana kuva kwakakwana zve kucina no pakaposeka.

4. (a) Ngenyi mundhu acikazivi kukwana angava akagondeka? (b) Mukuzwirana no Nduyo 103:12-14, Jehovha anoveterenyi kwatiri?

4 Izvi zvinoreva kuti tinodikana kuva takakwana kuti tive takagondeka here? Haiwa, nguva jimweni tinotojizwa kuti tinoshaisha zve atizivi kukwana. Vonanyi kuti ngenyi atidikani kuva takakwana kuti tive takagondeka. Cokutanga, Jehovha aasotesesi zvishaishi zvedu. Soko Rake rinotibvunja kudari: “Mukaverenga bzixaixi, Tenji Mwari, Tenji, ndiani angararama?” (Nduyo 130:3) Iyena anozviziva kuti atizivi kukwana, tinoshaisha zve no kukova kwese anotiregerera. (Nduyo 86:5) Cocipiri, Jehovha anoziva patinogumira zve aaimiri kuti tiite zviro zvoticikakwanisi kuita. (Verenganyi Nduyo 103:12-14.) Waro, tingaviisa kudini takakwana zve ticina pakaposeka pamberi pake?

5. Kuitisa kudini rudo i khiya ro kugondeka ku vashandiri va Jehovha?

5 Ku vashandiri va Jehovha, khiya yo kugondeka irudo. Rudo hwedu na Mwari, kujipira no kugondeka kuno Baba wedu vo mugore, kunodikana kuva kwakakwana zve kucina pakaposeka. Kudari rudo hwedu unoramba wakavanga patinosongana no muejo, tinova vandhu vakagondeka. (1 Kronike 28:9; Mateu 22:37) Vonanyizve muezaniso wo Zvapupu zvitatu zvanangwaya pa kutanga. Ngenyi izvona zvakaita kudaro? Kureva kuti musikane wiya waida kusekwa kucikora, mujaha wiya waida kunyowejeka paainga ecicumaera muzi ngo muzi, kana mwanarume waingaya no mbhuri waida kuruza basa here? Zvokadi kamare, haiwa. Kusiyapo izvo, izvona zvaiziva kuti ndhungamiro ja Jehovha jakarungama zve zvaida kuita zviya zvinodakajisa Baba wazvo vo mugore. Rudo hwazvo navo, wakazvindundira kuti zvidire pakutanga zviya zvinovadakajisa. Mu njira iyi, zvakakhombija kuti izvona zvakagondeka.

NGENYI TINODIKANA KUVA TAKAGONDEKA?

6. (a) Ngenyi tinodikana kuva takagondeka? (b) Adhamu na Evha vakaposesa kudini pa kukhombija kugondeka?

6 Zvicinyi zvinoita kuti kugondeka kuve kunodikana kwatiri? Munodikana kuva makagondeka ngo kuti Sathana ari kuphikiza Jehovha zve ari kutotiphikizavo. Ngirozi iyi yakapandukari yakajiita yoga Sathana kana Muphikizi.  Iyona yakashora zina rakanaka ra Jehovha ngo kunanga kuti Mwari wakashata, ano umbau zve i Mutongi acikagondeki. Zvinonyangaja ngo zvokuti, Adhamu na Evha vakabatana na Sathana, vopandukira Jehovha. (Genesi 3:1-6) Upenyu mu Munda wakavapa mukana jakawanda maningi jo kuvangisa rudo hwavo na Jehovha. Asi, pakupera kuphikiza ka Sathana, rudo hwavo aucainga hwakakwana zve wainga wakaposeka. Pakazomuka mubvunjo wo kuti: Vandhu vaizoramba vakagondeka kuna Jehovha Mwari vacina rudo naye here? Ngo magama amweni, vandhu vanokwanisa kukhombija kugondeka here? Mubvunjo uwu, wakamuswa pa shwiro ya Jobe.

7. Inga zvakatahwa pana Jobe 1:8-11, Jehovha waizwa kudini ngo pamusoro po kugondeka ka Jobe? zve Sathana waizwavo kudini?

7 Jobe wakapona mu njiku jo kuti vaIziraeri vainga ku Ejipita. Ndiyena ega basi wainga wakagondeka. Inga ndisu, wainga mundhu acikazivi kukwana. Iyena waiposa. Ngokudaro, Jehovha waida maningi Jobe ngo ndava yo kugondeka kwake. Zvinovoneka inga kuti Sathana waiseka Jehovha ngo pamusoro po kugondeka ko vandhu. Ngokudaro, Jehovha wakasanangurira Sathana mugariro jinoshamaisa ja Jobe. Maponero o mwanarume uwu, zvokadi kamare akakhombija kuti Sathana, munyepi! Sathana wakakumbira kueja kugondeka ka Jobe. Jehovha waithemba shamwari yake Jobe, ngo iyo ndava wakatendera kuti Sathana amueje.—Verenganyi Jobe 1:8-11.

8. Sathana wakahwisisa kudini Jobe?

8 Sathana mushati zve iyena muurai. Iyena wakaita kuti Jobe aruze zvese zvaainga nazvo kubatanijavo upfumi hwake, vashandiri vake zve wakazvipisa zina ra Jobe. Wakahwisa  mbhuri ya Jobe zve wakauraya gumi ro vana vake. Perapo wakahwisa Jobe ambhwine, wokhuvaza uhomi hwake woita kuti iyena ave no mapundu anohwaja kubvira mu musoro atee pa soka. Mukaji wa Jobe wakasuruvara zve waijipa ndava, wobvunja Jobe kuti asiye kugondeka kwake ngo kutuka Mwari kuti afe. Jobe pacake waida kufa, asi wakaramba akagondeka. Sathana wakapsaka manera amweni o kuhwisa Jobe. Iyena wakashandisa shamwari jake ndhatu. Ivona vakagara na Jobe dhiya nganani, asi avazivi kumuembejera. Kusiyapo izvo, ivona vakamukhuvaza no kumushora. Atee vakatonanga kuti Mwari ngaaitisaro zvineso zvake zve acaitovona kugondeka kwake. Ivona vakanangazve kuti Jobe wainga mundhu wakashata, waifanera kuashira zviro zvese zvakashata zvaingari zvecimuitikira!—Jobe 1:13-22; 2:7-11; 15:4, 5; 22:3-6; 25:4-6.

9. Pikija no zvineso zvake, Jobe wakaramba kuitenyi?

9 Jobe wakahwisana kudini no zvineso zvese izvi? Iyena aacaiengepi mundhu wakakwana. Wakapangira vaembezeri vake vacikabeseri zve pa kufamba ko nguva wakazonanga kuti wainga acizivi kunasa kurangarira. Wakatojivona inga kuti wakarurama kupinda Mwari. (Jobe 6:3; 13:4, 5; 32:2; 34:5) Asi, pikija pa mugariro uwu unonesa, Jobe wakaramba kumukira Jehovha Mwari. Iyena wakaramba kutenda manyepo o shamwari jake jiya. Iyena wakananga kudari: ‘Andimborangariri zvakadaro kuti ndimuite makarurama! Andizosii kugondeka kwangu mbhera kufa!’ (Jobe 27:5, Shanduro yeNyika Itsva) Magama aya, akakhombija kuti Jobe waida kuramba akagondeka kuna Jehovha, azvinenyi zvinoitika. Jobe aazivi kuremba; tinodikanavo kuita zvakafanana.

10. Mungabatanijwavo kudini pa shwiro yakamusari Sathana ngo pamusoro pa Jobe?

10 Mungabatanijwavo kudini pa shwiro yakamusari Sathana ngo pamusoro pa Jobe? Iyena wakananga kuti amuna rudo hwokadi na Jehovha Mwari, munozosiya kumushandira kuti mujiponese zve kugondeka kwese kwamunako ngo ko kunyepa! (Jobe 2:4, 5; Apokalipsi 12:10) Ngo api mazwiro enyu ngo kuzwa izvi? Zvinohwaja maningi, andizvopi? Asi, rangariranyi basi: Jehovha anomuthemba, ngo iyo ndava anomupa mukana unokahamarisa wo kuramba makagondeka. Iyena anotendera kuti Sathana aeje kugondeka kwenyu. Zve anothemba kuti mungakwanisa kuramba makagondeka zve anomubesera kukhombija kuti Sathana, munyepi. Jehovha anogondisa kumubesera. (Vaheberi 13:6) Cidakajiso cikuru maningi co kuthembhwa ngo Mukuru-kuru wo mudenga no pasi! Mavona kuti kuitisa kudini kugondeka kunosisira maningi? Ikona kunotiita kuti tirambe manyepo a Sathana, kujivirira zina ra Baba wedu no kubesera utongi hwavo. Tingaitisa kudini kuti tisakurire mugariro uwu unosisira?

TINGARAMBISA KUDINI TAKAGONDEKA PA NGUVA INO?

11. Tingajijenyi ngo muezaniso wa Jobe?

11 Sathana ari kuengejera kutihwisa mu ‘njiku jino jokupejisira.’ (2 Timoti 3:1) Mu nguva jino jo cidima, tingajivangisa kudini kuti tirambe takagondeka? Tingajijazve zvizinji kubvira pa muezaniso wa Jobe. Iyena wakatanga kare eciengejera kugondeka kwake kuna Jehovha. Vonanyi zvijijo zvitatu zvatingawana ngo pamusoro po kuvangisa kugondeka kwedu.

Mu njira japi jimweni jatingavangisa ndijona kugondeka kwedu? (Vonanyi ndima 12) *

12. (a) Inga zvakatahwa pana Jobe 26:7, 8, 14, Jobe wakakhwijirijisa kudini kukahamara no nderemejo? (b) Tingaitisavo kudini kuti tizaje mwoyo wedu ngo zviro zvinokahamarisa zva Mwari?

12 Jobe wakavangisa rudo hwake na Mwari ngo kukhwijirija kureremeja kwake Jehovha. Jobe wakapeja nguva kuti avone kushamaisa kunoita zvisikwa zva Jehovha. (Verenganyi Jobe 26:7, 8, 14.) Iyena wakakahamara maningi paakarangarira ngo  pamusoro po nyika, matenga, makore pomwe no mbheni, asi, wakazwisisa kuti aacaiziva zvizinji ngo pamusoro po zviro zvese zvakasikwa ndi Jehovha. Iyena waireremejazve masoko a Jehovha. Jobe wakatara kudari ngo pamusoro po soko ra Mwari: “Andizivi kufunduruka mu mupango yo muromo wake.” (Jobe 23:12) Kukahamara kwakava na Jobe pomwe no nderemejo yake zvakamubesera maningi. Iyena waida Baba wake zve waida kuvadakajisa. Inga muviyo iyena wakatema civaringo co kuramba wakagondeka. Tinodikanavo kuita inga zvakaita Jobe. Isusu tinoziva zvakawanda maningi ngo pamusoro po zvisikwa zvinoshamaisa kupinda vandhu vo mu nguva ja Jobe. Zve tino Bhaibheri rese iro rinotibesera kuti tizive Jehovha inga zvaari kamare. Zvese zvatinojija zvinotibesera kuti tizaje mwoyo wedu ngo kukahamara. Kukahamara kwatinoita no nderemejo yedu kuna Jehovha, zvinotibesera kuti tikhombije rudo hwedu, timuzwire zve zviengejere kugondeka kwedu.—Jobe 28:28.

Tingavangisa rutendo hwedu ngo kuramba takagondeka ngo kutama kuvona zvoumitu-mitu (Vonanyi ndima 13) *

13, 14. (a) Inga zvatinovona pana Jobe 31:1, Jobe wakakhombijisa kudini kuti waizwira? (b) Tingatevejeresa kudini muezaniso wake?

13 Jobe wakavangisa kugondeka kwake ngo kuita zviro zvinovonesa kuzwira. Jobe waizviziva kuti mundhu ave wakagondeka, waidikana kuzwira Jehovha. Zvokadi kamare, kuzwira kondhoko kunozoita kuti tirambe takagondeka. Jobe wakashanda ngo simba kuti azwire Mwari mu upenyu hwake. Inga muezaniso, iyena wainasa kungwarira mufambiro wake no vaya vano zvihwa zvakasiyana naye. (Verenganyi Jobe 31:1.) Inga mwanarume wakacadha, waiziviziva kuti kuva no mazwiro o rudo no mwanakaji umweni aciripi mukaji wake, zvainga zvakashata. Nyamasi uno, tiri kupona mu nyika yo kuti masoko mazinji anobhuiwa, ndi uhure. Inga ndi Jobe, tinozoramba mazwiro acikafaneri ku mundhu woticikazivi kucadha naye here? Tinozorambazve kuvona zvoumitu-mitu ngo njira iri yese here? (Mateu 5:28) Kudari tikajibata dhiya jese, tinozovangisa kuramba kwedu takagondeka.

Tingavangisa rutendo hwedu ngo kuva takaezanana pa mavonero atinoita zviro zvo kunyama (Vonanyi ndima 14) *

 14 Jobe waizwirazve Jehovha mu njira yaaivona zviro zvo kunyama. Iyena waizwisisa kuti kudari akadira pakutanga upfumi hwake, waizoita cishaishi cikuru co kuti waizofanera kupanicwa. (Jobe 31:24, 25, 28) Nyamasi uno, tiri kupona mu nyika inoda maningi zviro zvo kunyama. Kudari tikava no mavonero akaezanana pa manera atinovona mare no cigaro cedu, tinozovangisa kuramba kwedu takagondeka.—Mazwi Akangwara 30:8, 9; Mateu 6:19-21.

Tingavangisa rutendo hwedu ngo kuita kuti kuimira kwedu kuve kwakavanga (See paragraph 15) *

15. (a) Zvicinyi zvakabesera Jobe kuti arambe akagondeka? (b) Ngenyi zvingadikana kuti tirambe teciimira mupfupo hwatinozopuwa ndi Jehovha?

15 Jobe wakaramba akagondeka ngo kubatisisa zvaiimira, zvokuti Mwari waizomupfupa. Iyena waiziva kuti Mwari waitaja kugondeka kwake. (Jobe 31:6) Pikija no zvineso zvake, Jobe waithemba kamare kuti Jehovha pejisire waizomupfupa. Kuthemba kondhoko kwakamubesera kuti arambe akagondeka. Jehovha waidakara maningi ngo ndava yo kugondeka ka Jobe, zvomuita kuti iyena awane upfumi hwakawanda pikija paainga aciri mundhu acikazivi kukwana! (Jobe 42:12-17; Jakobo 5:11) Zve anozova no makomborero akawandisisa. Munoimira kuti Jehovha anozomupfupa ngo kugondeka kwenyu here? Mwari wedu aazivi kucinja. (Malakia 3:6) Kudari tikaziva kuti iyena anoreremeja kugondeka kwedu, tingaramba tecigarira kumbeji kwedu kunokahamaja.—1 VaTesalònika 5:8, 9.

16. Tinodikana kusunga kuitenyi?

16 Ngo kudaro, narini mucasiya kugondeka kwenyu! Nguva jimweni mungatojizwa inga kuti akuna mundhu umweni ari kuramba wakagondeka, asi amuzovi mega. Imwimwi muri pakati po mamirioni o vandhu vakagondeka kutenderera nyika yese. Munozova pa munda-nda-nda wo vanarume no vanakaji vakagondeka vo mu nguva yo kare, pikija povaithyisijihwa ngo rufu. (Vaheberi 11:36-38; 12:1) Tese tinodikana kuva no cido co kuda kupona mukuzwirana no magama a Jobe, okuti: ‘Andizosii kugondeka kwangu mbhera kufa!’ Zve kugondeka kwedu kunozokuja Jehovha mbhera narini!

NDUMBO 124 Nguva Jese Takagondeka

^ ndim. 5 Icinyi kugondeka? Ngenyi Jehovha anoreremeja mugariro uu ku vashandiri vake? Ngenyi kugondeka kunosisira ku umwe na umwe wedu? Musoro uu unozotibesera kuwana mupinguro wo mu Bhaibheri kuitira mubvunjo iji. Unozotibeserazve kunasa kuvona kuti tingajivangisa kudini kuti tirambe takagondeka dhiya ngo dhiya. Kuita kudaro, kunozotiviisira makomborero akawanda.

^ ndim. 3 Gama ro ciHebheru ro kuti ‘kukwana’ recida kunangira cinyama, rakaezana no gama ro kuti ‘kugondeka’ rinoshandiswa pa kunangira vandhu.

^ ndim. 50 KUDURUJIHWA KO PIKICA Pheji: Apa tiri kuvona Jobe ecijijisa vamwe vo vana vake ngo pamusoro po zvisikwa zvinoshamaisa zva Jehovha.

^ ndim. 52 KUDURUJIHWA KO PIKICA Pheji: Apa tiri kuvona hama iri kuramba kubatana no vadoni vo ku basa kuti ivone zvoumitu-mitu.

^ ndim. 54 KUDURUJIHWA KO PIKICA Pheji: Apa tiri kuvona hama iri kuhwisa muejo wo kuvangirijwa kutenga zikutirivhizori raaicikadi zve raaicikakwanisi kupagari.

^ ndim. 56 KUDURUJIHWA KO PIKICA Pheji: Apa tiri kuvona hama iri kuita mukumbiro kuti irangarijisise zvairi kuimira mu Paradhiso.