Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 MUSORO WO KUJIJA WO 8

Ngenyi Tinodikana Kubongesera?

Ngenyi Tinodikana Kubongesera?

“Itanyi vandhu vanobonga.”—VaKolosi 3:15.

NDUMBO 46 Tobonga Jehovha

ZVATICAJIJA *

1. MuSamaria wakaraphwa ndi Jesu wakakhombijisa kudini kubongesera?

GUMI ro vanarume vainga pa mugariro unonesa. Ivona vainga no mapere zve avacaiimira kuti uhomi hwavo waizoita nane. Asi pa njiku imweni, ivona vakavona Jesu, Mujijisi Mukuru ari ngo ndhambo kamare. Ivona vakazwa kuti Jesu anorapa mushovo wese wo ndhenda zve vaikhohwa kuti iyena waizovarapavo. Ngo iyo ndava vakakhuwa ngo izwi guru vaciti: “Jesu, mujijisi, tiitirenyi unyaxa!” Gumi ro vanarume ava vakaraphwa vese. Atikanakani kuti vese vakabongesera ngo kunaka mwoyo kwa Jesu. Umwe wavo, wakaita zvizinji kusiyapo kuva no mazwiro o kubonga, iyena wakakhombija kubongesera * kwake kuna Jesu. Mwanarume uwu muSamaria, wakandundihwa kuti akuje Mwari ngo “izwi guru.”—Luka 17:12-19.

2-3. (a) Ngenyi nguva jimweni tinokanganwa kubongesera? (b) Tinozovonenyi pa musoro uno?

2 Inga muSamaria uwu, tinoda kukhombija kubongesera kwedu ku vese vanotikhombijira kunaka mwoyo. Asi, nguva jimweni zvingaitika kukanganwa kubongesera ngo magama kana ngo zviito.

3 Mu musoro uno, tinozovona kusisira ko kubongesera ngo zvatinonanga no zvatinoita. Tinozojija muezaniso munganani jo mu Bhaibheri jo vandhu vakakhombija kubongesera no vamweni vacikazivi. Perapo tinozovona njira jinoshanda kamare jatingakhombija kubongesera.

 NGENYI TINODIKANA KUKHOMBIJA KUBONGESERA?

4-5. Ngenyi tinodikana kukhombija kubongesera?

4 Jehovha wakatigajira muezaniso wakanaka wo kukhombija kubonga. Imwe njira yaakakhombija kuita zvondhozvo ngo yo kukomborera vaya vanomudakajisa. (2 Samueli 22:21; Nduyo 13:6; Mateu 10:40, 41) Bhaibheri rinotivangisa kuti tive “vaejaeji va Mwari, inga vana vanodikana.” (VaEfeso 5:1) Thangwe guru rinotiitisa kuti tive vandhu vanobongesera ngo ro kuti tinoda kutevejera muezaniso wa Jehovha.

5 Vonanyi thangwe rimweni rinotiitisa kuti tide kubongesera vamweni. Kubongesera, kwakadari inga zvokuha zvaushoni, zvinodakajisa kukovana no vamweni. Patinova no mazwiro o kuda kubongesera, tinozodakara. Patinokhombija kubongesera kwedu, tinoita kuti vamweni vadakare. Mundhu paanobongesehwa anoguma pa kuziva kuti zvese zvaaita kuti atipe ciri cese kana kutipa kwake ciro catinoda, kwatibeseradi kamare. Inga muviyo, kubatana kwedu inga shamwari kunovanga zve mundhu wondhowo anojizwa wakavanga.

6. Magama edu o kubongesera akaezana kudini no masau akaithwa ngo ndarama?

6 Kubongesera kwatinoita kunosisira maningi. Bhaibheri rinoti: “Izwi rakanangwa pa ngari yaro rakaita inga mucero wo ndarama no bzinemeso bzo siriva kuna wiya anorizwa.” (Mazwi Akangwara 25:11) Rangariranyi basi kuti masejero akadini anova no mucero wo masau unoithwa ngo ndarama zve wodihwa sirivha! Vonanyi kuti mutengo wakadini waizova nawo! Maizojizwa kudini kudari mukaashira cipo cakadaro? Hina, magama o kubongesera amunobvunja vamweni ano mutengo mukuru. Vonanyi cokwadi ici basi: Masau akaithwa ngo ndarama anogara kwenda no kwenda. Mu njira yakafanana, magama okubongesera ku mundhuwo angatoceukijwa kana kuvigwa mu upenyu hwake hwese.

 IVONA VAKAKHOMBIJA KUBONGESERA

7. Inga zvatinovona pana Nduyo 27:4, Dhavhidhi no vatari vamweni vo nduyo vakakhombijisa kudini kubongesera kwavo?

7 Vashandiri vazinji va Mwari vo mu nguva yo kare, vakakhombija kubongesera. Umwe wavo ndi Dhavhidhi. (Verenganyi Nduyo 27:4.) Iyena waireremeja maningi kunamata kwakacena zve wakakhombija kubongesera kwake mu njira inoshamaisa. Wakabesera kuvakwa ko temberi ngo zviro zvinosisira zvaainga nazvo. Mubarihwana wa Azafi wakakhombija kubongesera ngo kutara nduyo no ndumbo jo kubonga. Pa imwe nduyo, ivona vakabonga Mwari zve vakakhombija kuda kwavaiita ‘mabasa anoshamaisa’ a Jehovha. (Nduyo 75:1, Baiberi Mazwi Akacena aMwari) Zvakajeka kuti Dhavhidhi no mubarihwana wa Azafi vaida kukhombija Jehovha kubongesera kwavainga nako ngo makomborero ese avaiashira ecibva kwaari. Mungavonavo njira yo mungatevejera vatari vo nduyo ava here?

Karata ya Pauro ku vaRoma inotijijisenyi ngo pamusoro po kukhombija kubongesera (Vonanyi ndima 8-9) *

8-9. Mupostori Pauro wakakhombijisa kudini kubongesera ku hama no hambzaji jake zve ticina kukana-kana zvicinyi zvakaitika pakati pavo?

8 Mupostori Pauro wabongesera hama no hambzaji jake zve wakakhombija izvi mu njira yaaibhuya navo. Nguva jese waibonga Mwari pa mukumbiro jovaiita. Wakakhombijazve kubongesera kwake pa karata jaaivatarira. Pana VaRoma 16:15, Pauro wakananga mazina o maKristu doni vanokwana kuita 27. Pauro wakatonanga kuti Priska na Akira vakatodira pa ngozi upenyu hwavo ngo ndava yake zve wakananga kuti Febhi “wakabesa vazinji,” kubatanijavo Pauro. Iyena wakasimba hama no hambzaji jaishandari ngo simba.—VaRoma 16:1-15.

9 Pauro waiziviva kuti hama no hambzaji jake ajicaikwana, asi paakapejisa karata yake ku vaRoma, wakatara mugariro jakanaka javainga najo. Rangariranyi kuvangiswa kwakadini kwakava no hama no hambzaji pavakazwa mupinguro wa Pauro ngo izwi guru mu ungano! Inga muviyo, ushamwari hwavo na Pauro, pacina kukana-kana wakaguma pakuvanga. Kureva kuti munobongesera zviro zvakanaka zvinoithwa ngo hama jo mu ungano yenyu here?

10. Tingajijenyi ngo manera akaita Jesu pakukhombija kubongesera vateveri vake?

10 Pa masoko ake ku ungano yo ku Azia Menori, Jesu wakabongesera ngo basa rakaitwa ngo vateveri vake. Inga muezaniso, iyena wakatanga kunanga masoko ake ku ungano yo ku Tiatira, eciti: “Ndinoziva mabasa ako, rudo hwako, rutendo, kujipira no kuvangirira kwako. Bziito bzako bza wari, bzakawanda kupinda bzokutungamira.” (Apokalipsi 2:19) Jesu aazivi basi kunanga kuengejeka ko basa ravo, asi wakavasimba ngo ndava yo mugariro jaivaita kuti vave no mabasa aushoni. Pikija Jesu waida kupangira vamweni ku Tiatira, iyena wakatanga no kupejisa masoko ake ngo magama anovangisa. (Apokalipsi 2:25-28) Rangariranyi mutoro wainga na Jesu wo kuva musoro wo ungano jese. Iyena aatodikani kubongesera ngo basa ratinomuitira. Pikija zvakadaro, anoita zvaanokwanisa kuti akhombije kubongesera. Wakagaja muezaniso waushoni maningi ku vakuru!

IVONA AVAZIVI KUKHOMBIJA KUBONGESERA

11. Inga zvatinovona pana Vaheberi 12:16, mugariro wapi wakakhombija kuti Izau aacaireremeja zviro zvakacena?

11 Zvinosuruvarisa ngo zvokuti, vandhu vamweni vanonangwa mu Bhaibheri vakasiya kubongesera. Inga muezaniso, pikija Izau wakarehwa pa mbhuri yaida no kureremeja Jehovha, iyena wakasiya kubongesera zviro zvakacena. (Verenganyi Vaheberi 12:16.) Mugariro wo kutama kubongesera wa Izau wakavonekesa kudini? Iyena wakada kutengesa utangwe hwake ku munukuna wake, Jakobe, ngo ndava yo paratu yo zvokuha. (Genesi 25: 30-34) Pa kufamba ko nguva, Izau wakazosuruvara ngo civaringo caakatema. Asi wakakhombija kutama kubongesera ngo zvaakaita, ngo iyo ndava, aacaengepi no thangwe ro kung’u ng’uta ngo ndava yo kutama kuashira makomborero inga dangwe.

12-13. VaIziraeri vakakhombijisa kudini kutama kubongesera zve ngowapi wakava muviyo wakona?

12 VaIziraeri vainga no mathangwe mazinji o kuti vakhombije kubongesera. Ivona vainga vasujunuhwa ku uranda, Jehovha paakaviisa gumi ro matambujiko ku Ejipita. Perapo Mwari wakavaponesa paya paakauraya masoca ese o vaEjipita pa Jombe ro Kupsuka. VaIziraeri vakabongesera maningi, atee vakatoimba ndumbo yo unyisi kuti vakuje Jehovha. Asi, vakaramba vano mugariro uwo here?

13 VaIziraeri povakasongano no zvineso zvimweni, ngo kukasika vakakanganwa zviro zvese zvaushoni zvovakaitihwa ndi Jehovha. Vakava vandhu vacikabongeseri. (Nduyo 106:7) Kuitisa kudini? “Gungano rese ro vaIsraeli rakangunguntira Mosi na Aroni mu cipare,” zvokadi kamare, vaing’u ng’utira Jehovha. (Exodo 16:2, 8) Iyena wakasuruvara maningi, ngo mugariro wo kutama kubongesera wakakhombijwa ngo vandhu ava. Atee, wakazoguma pakunanga kuti mubarihwana wese wo vaIziraeri waizofira mu zvipare kusiyapo Joshuwa na Karebhi. (Bziverengo 14:22-24; 26:65) Ngatende tivone kuti tingaitenyi kuti titame kutevejera muezaniso iji jakashata zve totevejera muezaniso jaushoni.

KHOMBIJANYI KUBONGESERA WARI UNO

14-15. (a) Varovorani vangakhombijisa kuti vanobongesera zvinoita umweni? (b) Vabari vangajijisa kudini vana vavo kuti vakhombije kubongesera?

14 Pa mbhuri. Mbhuri inobesereka maningi vese povanova no cirovejeso co kubongesera. Mbhuri zinji jinokhombija kubongesera umwe kuno umweni, jinova shamwari jo phedo. Umweni akaposa azvivaneseri kuregererana. Mwamuna anobongesera mukaji wake, aavoni basi zviro zvaushoni zvaanonanga no kuita asi ‘anomuka kuti amureremeje.’ (Mazwi Akangwara 31:10, 28) Zve mwanakaji wakangwara anobongesera mwamuna wake ngo zviro zvaushoni zvovaita.

15 Vabari, mungajijisa kudini vana venyu kuti vakhombije kubongesera? Ceujanyi kuti vana venyu vanozotevejera zvamunonanga no kuita. Ngokudaro, gajanyi muezaniso ngo kukhombija kubongesera vana venyu pavanomuitira zviri zvese. Mukuengejera, jijisanyi vana venyu kuti vakhombijire kubongesera, vandhu pavanovaitira zviri zvese. Vabeserenyi kuti vazwisise  kuti kukhombija kubongesera kunodikana kubva pasi po mwoyo zve vangatoita zvizinji kusiyapo kunanga basi. Inga muezaniso, umwe musikane anodanwa Clary wakati: “Pavainga no 32 o makore o kubahwa, mai wangu vakadikana kurera vana vatatu voga. Pondakavavo no 32 o makore, ndakarangarira kuti manesere akadini avakava nawo. Ngo iyo ndava ndakavabongesera maningi ngo zvese zvovakandiitira pamwepo no hama jangu. Pa mukuvo waperari, ivona vakandibvunja kuti magama angu o kubongesera akavabaya maningi mwoyo, vanomarangarijisisa nguva jese zve anovaita kuti vadakare dhiya jese.”

Jijisanyi vana venyu kuti vakhombije kubongesera (Vonanyi ndima 15) *

16. Ipanyi muezaniso unokhombija kuti kubongesera kunovangisa vamweni.

16 Pa ungano. Patinokhombija kubongesera hama no hambzaji jedu, tinovavangisa. Inga muezaniso, Jorge imwe hama yakashanda inga mukuru pa 28 o makore, yakahwaja maningi. Aizivi kukwanisa kwenda ku musongano ku mweji munganani. Pikija poyakatanga kwenda ku musongano, iyona aicaikwanisa kuita mativi. Hama Jorge vakananga kudari: “Ndiri kujizwa ndicikasisiri ngo kuti andicakwanisi kuita zvizinji zve andicatokwanisi kuita basa riri rese pa ungano. Asi njiku imweni musongano no wapera, imwe hama yakavabvunja kudari: ‘Ndinoda kumubongesera ngo muezaniso waushoni wo makapa mbhuri yangu. Kangaije amutorangariri kuti besero rakadini rotaiwana ngo hurukuro jenyu makore aperari. Ijona jakatibesera kuti tive no rutendo hwakavanga.’ Zvakandibaya mwoyo zve majiso angu akazara ngo musoji. Magama iya ndiona ondaida kuzwa kamare.”

17. Inga zvinonangwa pana VaKolosi 3:15, tingakhombijisa kudini kubongesera ngo kukova ka Jehovha?

17 Ka Mwari wedu anokova. Jehovha ari kutipa zvokuha zvokumujimu zvakawanda maningi. Inga muezaniso, tinoashira ndhungamiro jinobesera pa musongano, mu marevhista edu pomwe no mu saiti. Zvakambomuitikira dhiya imweni mozwa hurukuro, moverenga musoro uri wese kana movona vhidhiyo jo broadcast morangarira kuti, ‘Izvi ndizvona zvondaida kamare’? Mungakhombijisa kudini kubongesera kwenyu Jehovha? (Verenganyi VaKolosi 3:15.) Imwe njira ngo yo kumubongesera patinoita mukumbiro dhiya jese ngo zvipo zvese izvi.—Jakobo 1:17.

Kubesera kucenesa Nyumba yo Umambo i njira yakanakisisa yo kubongesera (Vonanyi ndima 18)

18. Tingakhombijisa kudini kuti tinobongesera ngo Nyumba jedu jo Umambo?

18 Tinokhombijazve kubongesera Jehovha patinosiya ndau yedu yo kunamatira yakacena zve yakarongeka. Tinobatana pamwepo nguva  jese kuti ticenese no kunasirira Nyumba yedu yo Umambo zve vese vanongwarira zvimucini zvinoshandiswa ngo ungano vanodikana kunasa kuzviviga. Patinosiya Nyumba yedu yo Umambo yakarongeka, inozogara makore akawanda zve aizodikani kugara icindonasirihwa nguva jese. Mu njira yondhoyo, tinoita kuti kuve no mare yakawanda kuti kuvakwe zve kunajirihwe Nyumba jo Umambo jimweni kutenderera pasi pese.

19. Majijenyi kubvira ku zvakaitikari no muvonereri wo ndharaundha no mukaji wake?

19 Ka vese vanoshanda ngo simba kuitira itusu. Patinokhombija kubongesera, magama edu angakwanisa kucinja mazwiro o mundhu ngo pamusoro po zvineso zvaari kusongana nazvo. Vonanyi muezaniso wo umwe muvonereri wo ndharaundha no mukaji wake. Pasure po kucumaera dhiya yese mu ngari yo kutondhora, ivona vakahwirira kanyi no vakaremba. Kwainga kwecitondhora zvokuti mukaji wake wakaguma wotovata akafuka jeka. Comangwanani fumi, iyena wakabvunja mwamuna wake kuti aacaikwanisa kwenderera mbheri mu basa ro kufambira ungano. Pa mangwanani ondhoo, yakaguma karata icibva ku Bheteri, yainga yake kamare. Karata yaisimba hambzaji iyi ngo basa royaiita pa kucumaera no kuvangirira kwayo. Tinoziva kuti zvinonesa maningi, kucinja po kugara sumana jese. Mwamuna wayo vakati: “Kusimbwa kwaakaitwa kwakamuita kuti ajizwe ushoni, kubvira dhiya iya aazivi kumbonangazve kuti aacadi kuita basa ro kufambira ungano. Zvokadi kamare, nguva zinji iyena anondivangisa kuti tirambe teciita basa iri pikija pandinoda kurisiya.” Varovorani ava vakaenderera mbheri vacishanda inga vavonereri vo ndharaundha pa 40 o makore.

20. Tinodikana kueja kuitenyi dhiya jese zve ngenyi?

20 Ngatieje kuita zvese zvatinokwanisa kuti tikhombije kubongesera ngo zvatinonanga no zvatinoita. Magama edu anobva pasi po mwoyo kana zviito zvedu zvingatova zvinoda mundhu umweni kuitira kumubesera kuhwisana no zvineso zvo dhiya ngo dhiya. Kukhombija kwedu kubongesera kunozoita kuti ushamwari hwedu uve wo kwenda no kwenda. Cinosisira maningi, tinonga tecitevejera mukovi wedu zve Baba vanobongesera, Jehovha.

NDUMBO 20 Makapa Mwana Wenyu Anosisira

^ ndim. 5 Tinojijenyi ngo kutatija kubongesera kwa Jehovha na Jesu pomwe no Musamariya nyamapere? Pamusoro uno, tinozojija muezaniso jese iji no jimweni. Tinozovona kuti ngenyi zvinosisira kubongesera zve tinozovona njira jinoshanda kuti tizviite 

^ ndim. 1 MAGAMA AKASANANGUHWA: Kubongesera ari wese kana ciri cese kunoreva kuziva kureremeja mundhuwo kana ciroco. Gama iri ringatonangiravo mazwiro atinova nawo ngo mu mwoyo.

^ ndim. 55 KUDURUJIHWA KO PIKICA: Karata ya Pauro iri kuverengwa ku ungano yo Roma; Akira, priska, Febhi no vamweni vari kudakara ngo kuzwa kuti mazina avo ari kunangwa ndi Pauro.

^ ndim. 57 KUDURUJIHWA KO PIKICA: Hambzaji iri kubesera mwana wayo wokaji kuti akhombije kubongesera ngo muezaniso wakakhombijwa ngo imwe hambzaji yaamusharuka.