Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 MUSORO WO KUJIJA WO 15

Tevejeranyi Jesu kuti Murambe Muno Runyararo

Tevejeranyi Jesu kuti Murambe Muno Runyararo

“Rugarisiko hwa Mwari hunopinda uzivi hwese hunozorinda mwoyo yenyu.”—VAFILIPI 4:7.

NDUMBO 113 Runyararo Hwedu

ZVATICAJIJA *

1-2. Ngenyi Jesu waithimwa-thimwa?

PA NJIKU yo kupejisira yo upenyu hwake pasi pano, Jesu wakathimwa-thimwa. Tevere, waizourawa mu njira inosuruvarisa ngo vandhu vacina mutemo. Asi, Jesu aacaithimwa-thimwa basi ngokuti waizofa. Iyena waida maningi Babake zve waida kuvadakajisa. Jesu waizviziva kuti kudari akaramba akagondeka pa zvineso zvaaizosongana nazvo, waizojivirira zina ra Jehovha. Jesu wainga no rudo no vandhu zve waizviziva kuti tive no soterero yo kupona kwenda no kwenda, iyena waidikana kuramba akagondeka kuna Jehovha mbhera kufa.

2 Kunyange Jesu wainga wakasuruvara maningi, iyena wakava no runyararo. Iyena wakabvunja vapostori vake kudari: “Ndinomupa runyararo hwangu.” (Johani 14:27) Iyena wainga no runyararo kana “Rugarisiko hwa Mwari,” unowanikaya no vaya vano ushamwari wo phedo na Jehovha. Runyararo uu, wakabesera Jesu kuti atame kuthimwa-thimwa.—VaFilipi 4:6, 7.

3. Zvicinyi zvatinozovona pa musoro uno?

3 Tese atizosongani no zvineso zvakasonganari na Jesu, asi vese vanotevera Jesu vanozosongana no zvineso. (Mateu 16:24, 25, Shanduro yeNyika Itsva; Johani 15:20) Inga ndi Jesu, nguva jimweni tinothya. Waro zvicinyi zvatinodikana kuita kuti titame kuthimwa-thimwa no kutama kuramba tino runyararo? Ngativone njira ndhatu jakaita Jesu pa mushando wake paainga pasi pano no kuvona kuti tingamutevejeresa kudini patinosongana no zvineso.

 JESU WAIKUMBIRA NGUVA JESE

Tingaramba tino runyararo ngo kuita mukumbiro (Vonanyi ndima 4-7)

4. Mecivona 1 VaTesalònika 5:17, ipanyi muezaniso jinokhombija kuti Jesu wakaita mukumbiro kakawanda pa njiku yo kupejisira yo upenyu hwake pasi pano?

4 Verenganyi 1 VaTesalònika 5:17. Jesu wakaita mukumbiro kakawanda pa njiku yo kupejisira yo upenyu hwake pasi pano. Paakakhombija vateveri vake manera o vaizoceukija kufa kwake, wakaita mukumbiro ngo pamusoro po pau no vhinyu. (1 VaKorinto 11:23-25) Vacito vabuda pa mbuto yo vakaitira Phasika, Jesu wakaita mukumbiro no vateveri vake. (Johani 17:1-26) Iyena no vateveri vake no vaguma pa Dundhu ro Maorivhe pa usiku hwiya, wakaita mukumbiro bvaza jakawanda. (Mateu 26:36-39, 42, 44) Magama okupejisira a Jesu acito afa wakamananga ngo kuita mukumbiro. (Luka 23:46) Jesu wakaita mukumbiro kuna Jehovha ngo pamusoro po zviro zvese zvakaitika pa njiku yake yo kupejisira pasi pano.

5. Ngenyi vapostori avazivi kuva no cicunge cakavanga?

5 Thangwe rimwe rakaitisa kuti Jesu acungirire zvineso zvake ngo rokuti iyena waikumbira besero kuna Jehovha. Ngo divi rimweni, vapostori avazivi kuramba veciita mukumbiro pa usiku hwiya. Inga muviyo, avazivi kuva no cicunge cakavanga povakasongana no zvineso. (Mateu 26:40, 41, 43, 45, 56) Patinosongana no zvineso, tinozoramba takagondeka basi kudari tikatevejera muezaniso wa Jesu wo kuita mukumbiro nguva jese. Waro tinozokumbira ngo pamusoro penyi?

6. Kuitisa kudini rutendo unotibesera kuti tirambe tino runyararo?

6 Tingakumbira Jehovha kuti ‘aengejere kutenda kwedu.’ (Luka 17:5; Johani 14:1) Tinoda rutendo ngo kuti Sathana anozoeja vateveri vese va Jesu. (Luka 22:31) Kuitisa kudini rutendo unozotibesera kuti tirambe tino runyararo  kunyange patinosongana no zvineso zvakatevererana? Patinoita zvese zvatinokwanisa kuti tinyise zvineso, kuva no rutendo kuna Jehovha, kunozotibesera kuti titame kuthya ngokuti iyena anozokwanisa kutibesa ngo njira kwayo pa nguva kwayo. Zvecivoneka kuti iyena anozviziva zvokuita kupinda itusu, tinova no runyararo mu murangariro no mu mwoyo.—1 Pedru 5:6, 7.

7. Majijenyi ngo zvakananga hama Robert?

7 Mukumbiro unotibesera kuti tirambe tino runyararo wo mukati azvinenyi zvineso zvapi zvatinosongana nazvo. Vonanyi muezaniso wo hama Robert, vari mukuru wakagondeka vano 80 o makore. Ivona vakati: “Magama ari pana VaFilipi 4:6, 7 akandibesera pa kuhwisana no zvineso mu upenyu hwangu. Ndainga murombo. Zve ndakazoruza cidakajiso co kushanda inga mukuru.” Waro zvicinyi zvakabesera hama Robert kuti varambe vano runyararo wo mukati? Ivona vakati: “Ndaiita mukumbiro kuti nditame kuthimwa-thimwa. Ndaizviziva kuti kuita mukumbiro nguva jese zve ndicikarembi, ndaizoengejera runyararo hwangu.”

JESU WAIVANGISIRA PA KUCUMAERA

Tingaramba tino runyararo ngo kucumaera (Vonanyi ndima 8-10)

8. Inga zviri pana Johani 8:29, ngorapi thangwe rimweni rakaitisa kuti Jesu ave no runyararo wo mukati?

8 Verenganyi Johani 8:29. Kunyange waiteverehwa, Jesu Kristu wainga no runyararo wo mukati, ngokuti waiziva kuti waidakajisa Baba wake. Iyena waivazwira kunyange po zvainesa kuzviita. Iyena waida Babake zve kuita kuda ka Jehovha cainga ciro caisisira maningi mu upenyu hwake. Acito aviya pasi pano, waishanda inga “mujijisi wo mabasa.” (Mazwi Akangwara 8:30) Zve paainga pasi pano, iyena wakajijisa no kuvangisira kwese vamweni ngo  pamusoro pa baba wake. (Mateu 6:9; Johani 5:17) Basa iro rakamupa mudakaro wakakura maningi.—Johani 4:34-36.

9. Ngenyi tinova no runyararo wo mukati patinova takabatikana maningi mu basa ro kucumaera?

9 Tingatevejera Jesu ngo kuzwira Jehovha zve ‘nguva jese tova no zvizinji zvokuita mu basa ra Tenji.’ (1 VaKorinto 15:58, Shanduro yeNyika Itsva) Kudari ‘tikabatikana’ ngo basa ro kucumaera, tingava no mazwiro akanaka ngo pamusoro po zvineso zvedu. (Maitiro o Vapostori 18:5, Shanduro yeNyika Itsva) Inga muezaniso, vese vatinosongana navo mu basa ro kucumaera kazinji vanosotana no zvineso zvinonyisa zvedu. Hina, pavanojijira kuda Jehovha no kushandisa mazano ake, upenyu hwavo hunoita nane zve vanova vakadakara. Patinovona izvi zveciitika, tinothemba kamare kuti Jehovha anotitaja. Kuthemba kondhoko, kunotiita kuti tirambe tino runyararo wo mukati. Imwe hambzaji yakahwisana no mazwiro acikabesi no anosuruvarisa, yakavona kuti kubatikana mu basa ro kucumaera kunoviisa mudakaro mukuru. Iyona yakati: “Pandinobatikana ngo basa ro kucumaera, ndinova ndakadakara maningi. Ndinorangarira kudaro ngokuti pandinopinda kocumaera, ndinojizwa ndiri phedo na Jehovha.”

10. Majijenyi ngo zvakananga hambzaji Brenda?

10 Vonanyi muezaniso wo hambzaji Brenda. Ivona no mwana wavo wokaji vano ndhenda inozwi esclerose múltipla. Hambzaji Brenda avakwanisi kufamba zve vanodikana kufamba ngo kadera yo marodha. Ivona nguva jimweni vanocumaera muzi ngo muzi, asi kazinji vanocumaera vecishandisa karata. Ivona vakati: “Kuziva kuti ndhenda yangu airapiki munyika ino yakashata, zvinondiita kuti ndibatikane maningi mu basa rangu ro kucumaera. Zvokadi kamare, kucumaera kunondiita kuti nditame kuthimwa-thimwa. Kusiyapo izvo, ndinobatikana maningi ngo kubesera vese vandinocumaera muzi ngo muzi no vese vandinocumaera ndecishandisa karata. Zve pandinocumaera, nguva jese ndinorangarira ngo pamusoro po soterero yandinayo yo kumbeji.”

JESU WAKAASHIRA BESERO RO SHAMWARI JAKE

Tingaramba tino runyararo ngo kuva no shamwari jaushoni (Vonanyi ndima 11-15)

11-13. (a) Kuitisa kudini zvakaita vapostori no vamweni zvinovonesa kuti vainga shamwari jokadi ja Jesu? (b) Shamwari ja Jesu jakamuita kuti ajizwe kudini?

11 Jesu paaicumaera nguva jese, vapostori vakagondeka vakava shamwari jake jokadi. Ivona vainga no ushamwari hwokadi unosananguhwa pana Mazwi Akangwara 18:24: ‘Shamwari jimweni jinodiwa kupinda hama.’ Shamwari jakadaro jaifanera maningi kuna Jesu. Pa mushando wake, apana umwe wo hama jake jakamutenda. (Johani 7:3-5) Ngo magama amweni, vo ukama hwake vaitorangarira kuti waipenga. (Marco 3:21) Ngo kusiyana, pa usiku acito afa, Jesu wakabvunja vapostori vake vakagondeka kuti: “Imwimwi makagara neni pa kuejwa kwangu.”—Luka 22:28.

12 Vapostori nguva jimweni vaicamwisa Jesu, asi iyena kusiyapo kusotesesa zvovaiposa, waisotesesa rutendo hwavo. (Mateu 26:40; Marco 10:13, 14; Johani 6:66-69) Pa usiku wo kupejisira acito auraiwa, Jesu wakabvunja vanarume avo vakagondeka kuti: “Ndamudana xamwari, ngokuti ndakamuvonesa bzese bzondakazwa ndi Baba wangu.” (Johani 15:15) Pacina kukana-kana, shamwari ja Jesu jakamuvangisa maningi. Manera o vakabesera Jesu mu basa ro kucumaera, zvakamuita kuti adakare maningi.—Luka 10:17, 21.

13 Kusiyapo kuva no vapostori basi, Jesu wakava no shamwari jimweni, vanarume no vanakaji, avo vakamubesera mu basa ro kucumaera no mu mativi amweni. Vamweni vakamukoka kuti aende koha kanyi kwavo. (Luka 10:38-42; Johani 12:1, 2) Vamweni vakabvakaca nae  zve vaitomubesera ngo upfumi hwavo. (Luka 8:3) Jesu wakava no shamwari jaushoni ngokuti iyena wainga shamwari yaushoni. Iyena wakavaitira zviro zvizinji zvaushoni zve aacaivakumbira kuti vaite zviro zvavacikakwanisi. Jesu wainga wakakwana, asi waibonga maningi ngo besero raiitwa ngo shamwari jake pikija jicikazivi kukwana. Tingava no cokwadi cokuti ivona vakamubesera kuti arambe ano runyararo wo mukati.

14-15. Tingaitisa kudini kuti tive no shamwari jakanaka zve ijona jingatibeseresa kudini?

14 Shamwari jaushoni jinotibesera kuti tirambe takagondeka kuna Jehovha. Kuti tiwane shamwari jaushoni tinodikana kuva shamwari yaushoni. (Mateu 7:12) Inga muezaniso, Bhaibheri rinotivangisa kuti tishandise nguva yedu no simba kuti tibesere vamweni, maningi-ningi vanoda besero kana kuti ‘vatami.’ (VaEfeso 4:28, Baiberi Mazwi Akacena aMwari) Mungakwanisa kurangarira ariwese ari mu ungano yenyu wamungabesera here? Mungakwanisa kobesera mundhu acikakwanisi kwenda kotenga ciricese ngo ndava yo usharuka kana ndhenda here? Mungakwanisa kubesera mbhuri iri kutamikihwa ngo zvokuhwa kana mare here? Kudari munokwanisa kushandisa saite jw.org® no apirikativho JW Library®, maizokwanisa kubesera vari mu ungano yenyu kuti vaishandisevo here? Kudari tikabatikana ngo kubesera vamweni tinozova vandhu vakadakara maningi.—Maitiro o Vapostori 20:35.

15 Shamwari jedu jinozotivangisa patinosongana no zvineso no kutibesera kuti tirambe tino runyararo wo mukati. Kudari inga ndi Erihu waipurutana Jobe paaibhuya ngo pamusoro  po zvineso zvake, shamwari jedu ngo kusengerera kwese jinotipurutana kuti jitibesere patinojibvunja mazwiro edu. (Jobe 32:4) Atiimiri kubvunjwa ngo shamwari jedu zvatinodikana kuita, asi tinova vakangwara kudari tikapurukira mbhangiro javo jakacijikira mu Bhaibheri. (Mazwi Akangwara 15:22) Zve inga ndi Mambo Dhavhidhi avo vakatendera besero raibva ku shamwari javo ngo kujidodokesa kwese, isusu tinodikana kuzvidodokesa kuti titendere mbhangiro jatinopuwa ngo shamwari jedu patinonga tecida besero. (2 Samueli 17:27-29) Shamwari jakanaka kudaro, cipo cinobva kuna Jehovha.—Jakobo 1:17.

MANERA ATINGAITA KUTI TIRAMBE TINO RUNYARARO

16. Mukuzwirana no VaFilipi 4:6, 7, ngo yapi njira imwe basi yatingawana ndiyona runyararo? Sananguranyi.

16 Verenganyi VaFilipi 4:6, 7Ngenyi tingathemba kuti Jehovha angatipa runyararo ngo ‘njiyo ya Jesu Kristu’? Ngokuti tingawana basi runyararo wo murangariro no mu mwoyo, kudari tikazwisisa no kuva no rutendo ku basa rinozokwaniriswa ndi Jesu. Inga muezaniso, ngo njiyo yo muripo wo kujipira wa Jesu zvishaishi zvedu zvese zvinoregerehwa. (1 Johani 2:12) Murangariro uwo unotiembezera maningi! Inga Mambo wo Umambo hwa Mwari, Jesu acazoparaja mabasa ese a Sathana no mugariro wakashata unotiita kuti titambujike. (Isaia 65:17; 1 Johani 3:8; Apokalipsi 21:3, 4) Izvi zvinotipa soterero inoshamaisa! Pikija Jesu akatipa basa rinonesa, iyena anozova na isusu pa kutibesera mu njiku jino jokupejisira. (Mateu 28:19, 20) Kuvangiswa kwakadini kwatinako! Embezero, soterero no cicunge zvinotibesera kuti tive no runyararo wo mukati.

17. (a) MuKristu angaitisa kudini kuti ave no runyararo wo mukati? (b) Inga zvakagondiswa pana Johani 16:33, zvicinyi zvatinozokwanisa kuita?

17 Mungarambisa kudini muno runyararo wo mukati pamunonga mucithimwa-thimwa ngo matambujiko akasiyana-siyana? Mungaita izvo ngo kutevejera zvakaita Jesu. Cokutanga, itanyi mukumbiro zve rambanyi meciuita mucikarembi. Cocipiri, zwiranyi Jehovha zve cumaeranyi no kuvangisira kwese, pikija zvecinesa kuzviita. Zve cocitatu, thembanyi besero ramunopuwa no shamwari jenyu pa zvineso zvamunosongana nazvo. Perapo, rugarisiko hwa Mwari hunozorinda mwoyo yenyu no murangariro yenyu. Zve inga ndi Jesu, imwimwi munozonyisa zvineso zviri zvese zvamunosongana nazvo.—Verenganyi Johani 16:33.

NDUMBO 41 Ndapota Izwanyi Mukumbiro Wangu

^ ndim. 5 Tese tino zvineso zvokuti zvingatibvisira runyararo. Pa musoro uno, ticavona zviro zvitatu zvakaitwa ndi Jesu, ticavonazve zvatingaita kuti tirambe tino runyararo kunyange patinonga tecihwisana no zvineso.