Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

“Mutongi wo Nyika Yese” Anondoita Zvakarungama Basi

“Mutongi wo Nyika Yese” Anondoita Zvakarungama Basi

“Yena i Buwe, basa rake rakaperera ngokuti maitiro ake akarungama.”—DEUTERONÒMIO 32:4.

NDUMBO: 112, 89

1. Abhirahama wakakhombijisa kudini kuti waithemba Jehovha? (Vonanyi pikica yo kutanga.)

“MUTONGI wo nyika yese aazotongi ngo ururami kani?” (Genesi 18:25) Mugondeki Abhirahama aazivi kuita mubvunjo uwu ngo kuti waikana-kana. Kusiyapo izvo, mubvunjo uwu wakakhombija kuti iyena waithemba kuti Jehovha waizoparaja madhorobha o Sodhoma no Gomora ngo ndava yo urungami hwake hwakaperera. Iyena waithemba kamare kuti Jehovha ‘aacaizouraya mururami pamwepo no muxaixi.’ Kuna Abhirahama, iyena ‘aacaizoita ibzo.’ Pa kufamba ko nguva, Jehovha wakananga kudari ngo pamusoro pake kamare: “Yena i Buwe, basa rake rakaperera ngokuti maitiro ake akarungama. Yena ndi Mwari wokadi-kadi, acina bzicikazivi kururama, ndiyena Mururami no Murungami.”—Deuteronòmio 31:19; 32:4.

2. Ngenyi Jehovha aazoiti zvicizivi kurungama?

2 Ngenyi Abhirahama waithemba kuti Jehovha nguva jese anoita zvakarungama? Ngokuti Jehovha ndi muezaniso mukuru maningi wo ururami no wo urungami. Zvokadi, magama  o kuti ‘ururami’ no ‘urungami’ kazinji anoshandiswa ari pamwepo mu Matahwa o Cihebheru, ngo kuti ano revo imweyo. Zvecivoneka kuti ndhungamiriro ja Jehovha nguva jese jakarungama, iyena nguva jese anotonga shwiro ngo njira kwayo. Bhaibheri rinoti: “Iyena anoda kururama no bziro bzinodikana kuitwa.”—Nduyo 33:5.

3. Ipanyi muezaniso wo kutama kurungama kunoitwa mu nyika nyamasi uno.

3 Zvinotondhoja kuziva kuti Jehovha nguva jese anoita zvakarungama. Asi, nyika ino yakaza ngo kutama kurungama. Inga muezaniso, vandhu vanopumbhwa kuti vaphwanya mutemo voendeswa mu jere, kuveni avazivi. Asi pasure po citatijo cipsa cinokohwesa, vamweni ngo pavanovoneka kuti avana ndava, kuveni vanonga vapeja makore akawanda vakafungihwa. Kutama urungami kwakadaro, kunobara kunyangajwa no ushungu. Asi kuno mukhaindi umweni wo kutama kurungama unonesa kucungirira. Ngo wapi?

ZVICIZIVI KURUNGAMA ZVINOTWA MU UNGANO

4. Gonda ro muKristu ringava kudini pa muejo?

4 MaKristu aakahamari akaitihwa zvicikazivi kurungama kunja ko ungano yo ciKristu. Asi, gonda redu, rinodihwa pa muejo kudari tikavona kana kuitihwa ciro cinovoneka inga cicizivi kurungama mukati mo ungano. Waro zvikaitika, munozodini? Munokhugunyika ndizvona here?

5. Ngenyi atidikani kukahamara tikavona kana kuitihwa zvicizivi kurungama mu ungano?

5 Tese atizivi kukwana zve tinoposa, ngo kudaro zvingaita kuti vamweni vangatiitira zvicikazivi kurungama kana itusu kamare tingaitira vamweni zvicizivi kurungama mu ungano. (1 Johani 1:8) Pikija izvi azvinyanyi maningi kuitika, maKristu akagondeka aakahamari kana kukhugunyika akaitihwa zvicikazivi kurungama. Jehovha wakatipekeja mbhangiro inoshanda mu Bhaibheri ingatibesera kuramba takagoneka tikaitihwa zvicizivi kurungama ngo hama no hambzaji jedu.—Nduyo 55:12-14.

6, 7. Ngozvapi zvicikazivi kurungama zvakaitihwa hama imweni mu ungano, zve mugariro japi jakaibesera?

6 Vonanyi zvakaitika kuna hama Willi Diehl. Pakutanga ko gore ro 1931, hama Diehl vaishanda vakagondeka pa Bheteri ro ku Bern, ku Suisa. Mu gore ro 1946, vakajija turma yo cisere yo Cikora co Giriadhi, ku Novha Yorki, Estadhos Unidhos. Novapeja cikora iya, vakagajwa inga muvonereri wo ndharaundha ku Suisa. Pa ndhorovondho yavo yo upenyu, vakananga kuti mu mweji wa Mauwe wo gore ro 1949, vakazivisa cine ro ku Suisa kuti vainga vecinasirira kuti vaite mucadho. Hama jaitungamirira jakavabvunja kuti vaizobvisihwa mutoro jese javainga najo mu sangano. Vaizotendehwa basi kusara vari piyona. Hama Diehl vakananga kuti: ‘Andicaitendehwa kuita hurukuro. Vazinji avacaitoticungamija, vecitotivona inga vandhu vakajingwa.’

7 Hama Diehl vakazodini? Ivona vakati: “Itusu taiziva kuti, kucadha asipi kuphwanya mupango wo Matahwa, ngo kudaro takatizira kuna Jehovha ngo mukumbiro zve tomuthemba.” Pikija hama jimweni ajicaizwisisa mavonero a Jehovha ngo pamusoro po mucadho, pa kufamba ko nguva ijona jakazobesehwa kuzwisisa, zve hama Diehl vakahwirijihwa mutoro javainga najo mu  sangano. Jehovha wakavapfupa ngo kugondeka kwavo. * (Vonanyi masoko o pasi.) Ngatijibvunjise kudari: ‘Kudari ndikaitihwa zvicizivi kurungama, ndaizova anosengerera zve ndovetera kuti Jehovha arungamise mugarirowo here? Kana ndaizojithemba perepo ndohwa kuti ndirungamise zviro?’—Mazwi Akangwara 11:2; verenganyi MIKEYA 7:7.

Zvinosisira kuceukija kuti ngo kutama kwedu kukwana, tingashaisha kuzwisisa zviro

8. Ngenyi tingatoshaisha kuzwisisa tovona inga kuti itusu kana vamweni vaitihwa zvicizivi kurungama?

8 Kudari mukava no mazwiro o kuti mu ungano maitwa zviro zvicizivi kurungama, mucakanganwa kuti nguva jimweni ndimwi muri kushaisha kuvona zviro. Ngenyi? Ngo kutama kwedu kukwana, tingashaisha kuzwisisa zviro. Zvingaitazve kuti atizivi zvese ngo pamusoro po zviri kuitikaro. Pikija zvatinongaro tecivona ndizvona kana kuti haiwa, tinodikana kuita mukumbiro kuna Jehovha ngo pamusoro pazvo, tomuthemba zve toramba takagondeka. Izvi zvinotibesera titame kuva “vanonyangajwa ndi Tenji Mwari.”—Verenganyi Mazwi Akangwara 19:3.

9. Muezaniso japi jatiri kuda kuvona pa musoro uno no unotevera?

9 Ngatijije ngo pamusoro po mushovo mutatu wo zvicizivi kurungama zvakasongana no vandhu va Jehovha mu nguva jo Bhaibheri. Pa musoro uno, tinozobhuya ngo zvakaitihwa Jasefa, muzukurukuruhwe wa Abhirahama, ngo hama jake. Pa musoro unotevera, tinozobhuya ngo manera akataja Jehovha mambo Akhabhi zve zvakasongana na Pedru ku Antiokia yo Siriya. Patinonga tecibhuya ngo muezaniso iji, psakanyi makwanja angamubesera kuramba makasota kuna Jehovha no kuramba muno ushamwari hwenyu naye, pamunova no gwinyiso ro kuti mwatajwa zvicizivi kurungama.

JASEFA WAKAITIHWA ZVICIVI KURUNGAMA

10, 11. (a) Ngozapi zvicizivi kurungama zvakaitihwa Jasefa? (b) Mukana wapi wakasongana na Jasefa paainga ari mu jere?

10 Jasefa wakava mushandiri wakagondeka wa Jehovha wakaitihwa zvicizivi kurungama ngo vo nyikanja. Asi zvakamuhwaja maningi ngo zvaakaitihwa ngo hama jake. Paainga no 17 o makore o kubahwa, hama jake jakamutora jomutengesa inga muranda. Kubva pondhopo, wakatohwa kwenda ku Ejipita. (Genesi 37:23-28; 42:21) Pa kufamba ko nguva, paainga ari nyikanja, wakapumbhwa kuti wakaeja kujipa mwanakaji, perepo wodihwa mujere pacina no ucapupu huri hwese. (Genesi 39:17-20) Kutambujika kwa Jasefa ku uranda zve mugunia kwakapeja 13 o makore. Zvicinyi zvatingajija ngo zvakaitika na Jasefa zvingatibesera kudari tikaitihwa zvicizivi kurungama ngo vamweni?

11 Paainga ari mujere, muperekeri wo  doro wakanghwiniswavo mu jeremo. Pa usiku humweni, muperekeri wo doro wakarota, zve Jehovha wakabesera Jasefa kusanangura revo yo zvaakarotaro. Jasefa wakasanangura kuti muperekeri wo doro waizobudiswa mu jere wohwirira koshandira Faro. Perepo, Jasefa wakashandisa mukana uwo kuti asumurire muperekeri wiya zvaakasongana nazvo. Kuno zvatingajija pa muezaniso wa Jasefa, haiwa basi pa zvaakananga asi pa zvaacikazivi kunanga.—Genesi 40:5-13.

12, 13. (a) Tinozvizivisa kudini kuti Jasefa aazivi kundotendera hake kuitihwa zvicizivi kurungama? (b) Ngo zvapi zvicizivi kusumura Jasefa kuna muperekeri wo doro?

12 Verenganyi Genesi 40:14, 15. Vonanyi basi: Jasefa wakananga kuti ‘wakatohwa.’ Gama ro mu Bhaibheri rakashandiswa apa, ringarevavo “kubiwa.” Zviri pambhene kuti zvaakaitihwari zvainga zvicizivi kurungama. Jasefa wakajekesazve kuti aacaiiziva ndava yaainga ecipumbhwa. Ngo iyo ndava wakakumbira muperekeri wo doro kuti anangevo ngo zvake kuna Faro. No cinangwa cenyi? Jasefa wakati: ‘Kuti ndibudiswe mu jere rino.’

13 Kureva kuti Jasefa wakatendera hake kuitihwa zivicizivi kurungama acikaeji kuita ciri cese here? Haiwa! Jasefa waiziva kuti iyena waiitihwa zvizinji zvakashata. Ngo iyo ndava, wakasumurira mugariro wake kuno muperekeri wo doro, ecivetera  kuwana besero. Asi vonanyi kuti Matahwa aanangi kuti Jasefa wakambobvunja ari wese, nee Faro, kuti hama jake ndijona jainga jakamutengesa. Zvokadi, hama jake pajakakaviya ku Ejipita, joita runyararo naye, Faro wakajiashira ushoni wojikoka kuti jigare mu Ejipita no kubusa ‘bzauxoni’ zvo mondhomo.—Genesi 45:16-20.

Kundozvibhuira vamweni kunonyanyisa shwiro (Vonanyi ndima 14)

14. Icinyi cinozotibesera kuti titame kuvereketa zvinokhuvaza patinoitihwa zvicizivi kurungama mu ungano?

14 Tikavona kuti taitihwa zvicikazivi kurungama mu ungano, tinodikana kungwarira maningi kuti titame kundobhuira ari wese ngo pamusoro pazvo. I zvokadi kuti, tinodikana kukumbira besero kuno vakuru no kuvabvunja kudari kuno hama yaita cishaishi cikuru. (VaLevi 5:1) Asi, kazinji, paya pokuti apabataniji cishaishi cikuru, zvingakwanisika kuita runyararo no hama yatiitiraro zvicizivi kurungama, ticikabvunji ari wese, nee vakuru. (Verenganyi Mateu 5:23, 24; 18:15.) Ngative vakagondeka zve vanoshandisa zviambi zvo Bhaibheri pakabuda mugariro wakadaro. Nguva jimweni tingazotozwisisa kuti zvokadi atizivi kuitihwa zvicizivi kurungama, so ndisu takashaisha kuvona zviro. Waro zvinozotinakira maningi kudari ticizivi kunyanyisa zviro ngo kuvereketera hama yedu zvicikashandi! Ceujanyi kuti, tingava hedu no razawe kana kuti haiwa, kunanga ciro cinohwaja hama yedu azvizombopejizve ndava. Kugondeka kuna Jehovha no kuno hama jedu kunozotibesera kuti titame kuposa kudaro. Mutari wo nduyo wakananga kuti kuno “wiya anoteveja bzakarurama.” Mundhu wondhowo ‘[“aareveri zvakashata vamweni, ngo rurumi hwake,” Shanduro yeNyika Itsva]; aaitiri mudoni wake bzakaxata.’—Nduyo 15:2, 3; Jakobo 3:5.

USHAMWARI HWENYU NA JEHOVHA NGAUNOSISIRA MANINGI

15. Jasefa wakamborehwa kudini ngo kuva no ushamwari na Jehovha?

15 Tinowanazve cijijo cimweni cinosisira maningi na Jasefa. Mukati mo 13 o makore eciitihwa zvicizivi kurungama, iyena wakakhombija kuti wainga no mavonero a Jehovha. (Genesi 45:5-8) Narini aazivi kumbopa ndava Jehovha ngo matambujiko ake. Zvokadi, Jasefa aazivi kukanganwa zviro zvicivi kurungama zvaaitihwa, asi aazvivi kuguma pa kunyangajisisa. Zvinosisira maningi ngo zvokuti iyena aazivi kutendera kuti kutama kukwana no zviito zvakashata zvo vamweni zvimuparajanise na Jehovha. Kugondeka ka Jasefa kwakamupa mukana wo kuvona Jehovha ecipeja mugariro ucizivi kurungama no kukomborera iyena no ukama hwake.

Jasefa aazivi kutendera kuti kutama kukwana no zviito zvakashata zvo vamweni zvimuparajanise na Jehovha

16. Ngenyi tinodikana kuengejera kukhwedera phedo na Jehovha patinoitihwa zvicivi kurungama mukati mo ungano?

16 Mukufananavo, itusu tinotaja no kungwarira ushamwari hwenyu na Jehovha.  Atizotenderi kuti kuposa ko hama jedu kutiparajanise na Mwari watinoda no kunamata. (VaRoma 8:38, 39) Kusiyapo izvo, kudari tikaitihwa zvicizivi kurungama mu ungano, ngatitevejere Jasefa, toengejera kukhwedera phedo na Jehovha. Ngatieje kuvona zviro inga mavonero aanozviita Iyena. Tikapeja kuita zvese zvatinokwanisa kuti titonge ndhangoyo mukuzwirana no zviambi zvo Bhaibheri, tinodikana kuisiya mu nyara ja Jehovha. Tingathemba kuti iyena anozoitonga pa nguva kwayo zve ngo njira kwayo.

THEMBANYI “MUTONGI WO NYIKA YESE”

17. Tingakhombijisa kudini kuti tinothemba “Mutongi wo nyika yese”?

17 Paticiri mu nyika ino yakashata, tingavetera kuitihwa zvicizivi kurungama. Pikija kuve kashoma hako, nguva jimweni imwimwi kana ari wese wamunoziva angavona zvinoita inga zvicizivi kurungama mu ungano. Zvikaitika, mucadokhungunyika. (Nduyo 119:165) Rambanyi makagondeka kuna Mwari, itanyi mukumbiro kwaari kuitira kubesehwa zve muthembenyi. Mucakanganwa kuti ngo ndava yo kutama kukwana, mungashaisha kuzwisisa zviro, amuzivi zvese zvakaitika. Tevejeranyi muezaniso wa Jasefa zve mucavereketa zvicikashandi motonyanyisa zviro. Pakugumisira, kusiyapo kujithemba, temanyi civaringo co kuramba makagondeka zve veteranyi Jehovha no kusengerera kwese, kuti aitonge ndiyena. Ngo kuita kudaro, munozodakajisa Jehovha mokomborehwa ndiyena, inga ndi Jasefa. Ivanyi no gwinyiso ro kuti Jehovha, “Mutongi wo nyika yese,” anondoita zvakarungama, “ngokuti maitiro ake akarungama.”—Genesi 18:25; Deuteronòmio 32:4.

18. Tinozojijenyi pa musoro unotevera?

18 Pa musoro unotevera, tinozovona muezaniso jimweni muviri jinobhuya ngo zvicizivi kurungama zvakaitika pakati po vandhu va Jehovha mu nguva jo Bhaibheri. Muezaniso jondhojo, jinozotibesera kuvona kuti kujidodokesa no kuregerera, kungatibesera kudini kuva no mavonero a Jehovha o zvakarungama.

^ ndim. 7 Vonanyi ndhorovondho yo upenyu ya Willi Diehl ino musoro unoti: “Jehovha ndiMwari Wangu Wandichavimba Naye,” mu Murindiri wo njiku 1 yo mweji wa Cikowe wo 1991, mu Cishona.