Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

Jakobe wakava umwe wo vacete va Mesia ngo kuti iyena wakatenga citendehwa ca Isau inga dangwe here?

Mubvunjo Jo Vaverengi

Mubvunjo Jo Vaverengi

Mu Iziraeri yo kare, mundhu waidikana kuva mwana wo dangwe kuti ave umwe wo vacete va Mesia here?

Kare tairangarira kuti izvi ndizvona ngo ndava yo zvakatahwa pa Vaheberi 12:16, Shanduro yeNyika Itsva. Iyona inonanga kuti Isau ‘aazivi kubonga ngo zviro zvakacena’ zve wakapa Jakobe ‘uthangwe hwake ngo ndava yo ndiro imwe yo bzokuha.’ Ngo kudaro, tairangarira kuti Jakobe paakaashira ‘uthangwe,’ izvi zvaibatanija cidakajiso co kuva umwe wo vacete va Mesia.—Mateu 1:2, 16; Luka 3:23, 34.

Asi, kunasa kujija ndhorovondho jimweni jo Bhaibheri jakavonesa kuti mundhu aacaidikana kuva mwana wo dangwe kuti ave umwe wo vacete va Mesia. Ngatende tivone muezaniso munganani.

Rubheni wainga mwana wo dangwe wa Jakobe na Reya. Jasefa wainga mwana wo dangwe wa Jakobe na Rakeri. Rubheni paakaita uhure, iyena wakaruza uthangwe hwake zve wakazopuwa Jasefa. (Genesi 29:31-35; 30:22-25; 35:22-26; 49:22-26; 1 Kronike 5:1, 2) Asi, Mesia aazivi kubva ka Rubheni kana ka Jasefa. Iyena wakabva ka Judha mwana wocirongomuna wa Jakobe na Reya.—Genesi 49:10.

Pana Luka 3:32 tinowana munda-nda-nda mushanu jo vacete va Mesia zve umwe na umwe wavo zvinovoneka inga kuti ndi dangwe. Inga muezaniso Boazi wainga baba wa Obhedhi zve Obhedhi wainga baba wa Jese.—Rute 4:17, 20-22; 1 Kronike 2:10-12.

Dhavhidhi mwana wa Jese aacaingepi dangwe. Kunasa kunanga, wainga mwana wo kupejisira. Mesia wakabva ka Dhavhidhi. (1 Samueli  16:10, 11; 17:12; Mateu 1:5, 6) Mukufanana, umwe wo vacete vocitandhatu wa Mesia wainga Soromona. Pikija iyena aacaengepi mwana wokutanga wa Dhavhidhi.—2 Samueli 3:2-5.

Izvi azvirevi kuti kuva mwana wodangwe akucaisisiraa. Iyena waiashira zvizinji zvokuti vana vamweni aavacaiashira. Kazinji, iyena waiguma pa kuva musoro wo mbhuri pasure pa baba zve ndhaka yake yaipethwa kaviri.—Genesi 43:33; Deuteronòmio 21:17; Joxwa 17:1.

Asi uthangwe waizokwanisa kucinjwa kubva ku mwana umwe kwenda ku umweni. Abhirahama paakapindisa Ismaeri, uthangwe hwake wakapuwa Izaki. (Genesi 21:14-21; 22:2) Inga zvotapera kunanga, uthangwe hwa Rubheni wakapuwa Jasefa.

Waro, Pauro waida kunangenyi pana Vaheberi 12:16, Shanduro yeNyika Itsva? Ipona panonanga kudari: ‘Kuti patame kuva no muiti wo uhure kana mundhu acikabongi ngo zviro zvakacena, inga ndi Isau, uwo wakatengesa uthangwe hwake ngo ndiro imwe yo zvokuha.’

Apa, Pauro acainangepi ngo vacete va Mesia. Mukusiana, iyena wainga ecipa ngwajo ku maKristu. Iyena wakavabvunja kudari: ‘Rambanyi mucinasiririra soka jenyu gwanja rakarungama’ ngokudaro ‘apana mundhu anozova acikafaneri kuashira unyasha wa Mwari.’ Zvinosuruvarisa ngo zvokuti, izvi zvinoitika pavanoita uhure. (Vaheberi 12:12-16, Shanduro yeNyika Itsva) Mu njira iyi, ivona vanova inga ndi Isau, uwo ‘aacikazivi kubonga ngo zviro zvakacena’ asi waida kugutisa zvido zvake.

Mukuzwirana no zvirovejeso zvo mu nguva iyi, Isau pa nguva jimweni wainga no cidakajiso co kupa mupiro kuna Jehovha. (Genesi 8:20, 21; 12:7, 8; Jobe 1:4, 5) Asi Isau wainga wakabatikana no zvido zvake basi, zvokuti wakapa uthangwe hwake ngo zvokuha. Isau waizokwanisa kutiza dambujiko iri rakanangari Jehovha, kuti raizosongana no mubarihwana wa Abhirahama. (Genesi 15:13) Wakatatijazve kuti aacaireremeja zviro zvakacena paakacadha no vanakaji vaviri vo majinja, zviro zvokuti zvakasuruvarisa maningi vabari vake. (Genesi 26:34, 35) Isau wainga wakasiyana maningi na Jakobe, uwo wakacadha no vanamati va Mwari vokadi-kadi!—Genesi 28:6, 7; 29:10-12, 18.

Ndhorovondho iyi ingatijijisenyi ngo pamusoro po vacete va Mesia? Vamweni vavo vainga vana vo dangwe zve vamweni avacainga. Izvi zvainga zviro zvokuti vaJudha vakazvizwisisa zve vakazvitenda. Tinozvizivisa kudini izvi? Ngokuti ivona vakatenda kuti Kristu waizova mubarihwana wa Dhavhidhi, mwana wokupejisira wa Jese.—Mateu 22:42.