Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

‘Cungai . . . kuti Uzviite’

‘Cungai . . . kuti Uzviite’

‘Cungai no kuvanga kuti uzviite. Ucadothya kana kutetemera, ngo kuti Jehovha . . . anewe.’—1 KRONIKE 28:20, Shanduro yeNyika Itsva.

NDUMBO: 38, 34

1, 2. (a) Soromona wakagajwa kuita basa renyi? (b) Ngenyi Dhavhidhi waikaya-kaya ngo pamusoro pa Soromona?

SOROMONA wakagajwa basa rinosisira. Jehovha wakamukheta kuti avonerere basa ro kuvakwa ko temberi mu Jerusarema zve basa iro rainga basa rinosisira maningi ricikazivi kuvonekazve. Temberi yaizova ‘inoshamaisa’ maningi, zve yaizova ino nduma ngo kuseja kwayo. Cinosisira maningi, ngo co kuti, iyona yaizova ‘nyumba ya Mwari’ wokadi-kadi, Jehovha.—1 Kronike 22:1, 5, 9-11.

2 Mambo Dhavhidhi waithemba kuti Mwari waizobesa Soromona. Asi Soromona wainga “mudoko” zve acina zivo yakawanda. Waizova no cicunge co kutendera basa raakagajwari ro kuvakisa temberi here? Kana kuti waizosiya kuti udoko no kutama kwake zivo yakawanda kumurambise kuita basa iri? Kuti abudirire, Soromona waidikana kucunga wotoita basa raakagajwa.

3. Soromona wakajijenyi ngo pamusoro po kucunga ka baba wake?

 3 Zvingaita kuti Soromona wakajija zvakawanda ngo pamusoro po kucunga ka babake, Dhavhidhi. Paainga aciri mujaha kamare, Dhavhidhi wakahwisana no zvinyama zvaida kuruma mabvuta a babake. (1 Samueli 17:34, 35) Iyena wakakhombija kucunga paakahwisana no musoca waishata mwoyo, waicunga zve wainga gakhanyara, waidanijwa Goriati. Hina, no besero ra Mwari, Dhavhidhi wakanyisa Goriati, ecishandisa cipuwe cakatisetete.—1 Samueli 17:45, 49, 50.

4. Ngenyi Soromona waidikana kuva wakacunga?

4 Tingazwisisa kuti ngenyi Dhavhidhi waifanera kuvangisa Soromona kuti ave no cicunge co kuvaka temberi. (Verenganyi 1 Kronike 28:20.) Kudari Soromona acizivi kuva wakacunga, waizothya wotama kuziva cokuita, kana kuti, waizokonehwa no kutanga basero. Zve kutama kuritanga kwaizova kwakashata maningi kupinda kuzokonehwa naaritanga kare.

Tinoda besero ra Jehovha kuti tive vakacunga kuti tiite basa ratakapuwa ndiyena

5. Ngenyi tinodikana kuva takacunga?

5 Inga ndi Soromona, tinoda besero ra Jehovha kuti tive vakacunga kuti tiite basa ratakapuwa ndiyena. Ngatijije ngo muezaniso, wo vamweni vakakhombija kucunga kareko. Perepo tozorangariravo macungire atingaita kuti tikwanise basa rotakapuwa.

VAKAVONESA KUCUNGA

6. Zvicinyi zvinomushamaisa ngo pamusoro po kucunga ka Jasefa?

6 Jasefa wakakhombija kucunga paakaejwa ngo mukaji wa Potifari kuti aite ruvatano ucikatendehwi. Iyena waiziva kuti upenyu hwake hwaizova pa ngozi kudari akaramba. Asi kusiyapo kujipekejera ku muejo uwo, iyena wakavonesa kucunga zve ciripo-ripoco wakaramba mukaji wa Potifari.—Genesi 39:10, 12.

7. Rahabhi wakakhombijisa kudini kuva wakacunga? (Vonanyi pikica yo kutanga.)

7 Umweni wakavonesa kucunga ndi Rahabhi. Vafei vo vaIziraeri pavakaguma pa muzi pake ku Jeriko, iyena waizothya woramba kuvabesera. Asi ngo kuti waithemba Jehovha, no kucunga kwese iyena wakaviga vanarume vaviri wovabesera kutiza. (Joxwa 2:4, 5, 9, 12-16) Rahabhi waithemba kuti Jehovha ndi Mwari wokadi-kadi, waigonda kuti ngo maitiro ari ese Iyena waizopa nyika vaIziraeri. Rahabhi aazivi kusiya kuti kuthya vamweni, kana kuthya mambo wo Jeriko no vanarume vake, kumutamise co kuita. Pa ndau pazvo, iyena wakakhombija kucunga zve wojiponesa iyena no mbhuri yake.—Joxwa 6:22, 23.

8. Kucunga ka Jesu kwakabesa kudini vapostori vake?

8 Vapostori vakagondeka va Jesu vakakhombija kucunga kwakavanga. Ivona kangaije vakavona kucunga ka Jesu, zve izvi zvakabesera kuti vamutevejere. (Mateu 8:28-32; Johani 2:13-17; 18:3-5) VaSadhuki pavakaeja kurambisa kucumaera ngo pamusoro pa Jesu, vapostori vakaramba.—Maitiro o Vapostori 5:17, 18, 27-29.

9. 2 Timoti 1:7 inotibesera kudini kuziva kwatinowanira cicunge?

9 Jasefa, Rahabhi, Jesu, no vapostori va  Jesu vainga vakasunga kuita zvakarungama. Vakakhombija kucunga, haiwa ngo kuti vaithemba simba ravo, asi ngo kuti vaithemba Jehovha. Pa nguva jatinodaya cicunge, tinodikana kuthemba Jehovha, haiwa kujithemba tega. (Verenganyi 2 Timoti 1:7.) Ngatimbovone ndau mbiri jatinodikana kukhombija kucunga mu upenyu hwedu: pa mbhuri no mu ungano.

MUGARIRO JINODA KUCUNGA

10. Ngenyi majaha no vasikane vo ciKristu vanodikana kucunga?

10 Kuno mugariro jakawanda jo kuti majaha no vasikane vo ciKristu vanodikana kukhombijira kucunga kuti vashandire Jehovha. Ivona vangajijira ngo muezaniso wa Soromona no kuutevejera, iyena wakakhombija kucunga paakatema zvivaringo zvo ungwaru kuti akwanise kupeja kuvaka temberi. Pikija hazvo majaha no vasikane vangadikana zve anodikana kupuwa ndhungamiriro ngo vabari vavo, kuno zvivaringo zvimweni zvinosisira zvavanodikana kutema vega. (Mazwi Akangwara 27:11) Majaha no vasikane vanodikana kucunga kuti vateme zvivaringo ngo pamusoro po kukheta shamwari, mabungaijo, zvavangaita kuti varambe vano mufambiro wakacena, zve ndirini o vanodikana kubhabhatijwa. Vanodikana kuva no cicunge ngo kuti vanonga vecihwisana na Sathana, anotukaya Mwari.

11, 12. (a) Mosi wakakhombijisa kudini kucunga? (b) Majaha no vasikane vangatevejeresa kudini muezaniso wa Mosi?

11 Civaringo cimweni cinosisira maningi cinodikana kutemwa ngo majaha no vasikane ngo co kugaja zvavanozoda kuita kumbejiyo. Mu nyika jimweni, majaha no vasikane vari kuvangirijwa kuti vapsake kuva no jijo yo pamusoro-soro no kupsaka mabasa anopoceresa mare yakawanda. Kuveni ku nyika jimweni, kuno urombo maningi, ngo kudaro majaha no vasikane vangavona kuti zviri nane kushanda kuti vabese ukama hwavo. Kudari uri pa mugariro umwe wa iji, rangarirai muezaniso wa Mosi. Iyena wakarehwa ngo mwana wokaji wa Faro, ngo ndava ya izvo, kangaije waizopsaka kuva mukhupuki kana anosisira maningi. Rangarirai kuti Mosi waivangirijwa zvakadini ngo ukama hwake hwo vaEjipita, vajijisi, no vapangiri! Asi Mosi wakava no cicunge co kusana kuva pamwepo no vandhu va Mwari. Naasiya nyika yo Ejipita no ukhupuki hwayo, wakathemba Jehovha kamare. (Vaheberi 11:24-26) Inga muviyo, Jehovha wakamukomborera maningi, zve acazomukomborerazve maningi kumbejiyo.

12 Majaha no vasikane, no kucunga kwese pavanotema civaringo co kushandira Jehovha no kudira pakutanga zvido zvo Umambo, iyena anozovakomborera. Anozovabesera kuti vakwanise kupa zvinodiwa ukama hwavo. Mu zana ro kutanga ro makore, mujaha Timoti wakasotesa upenyu hwake pa kushandira Mwari, imwimwi mungazviitavo. * (Vonanyi masoko o pasi.)—Verenganyi VaFilipi 2:19-22.

Makatema civaringo co kuva makacunga mu mativi ese o upenyu hwenyu here? (Vonanyi ndima 13-17)

13. Cicunge cakabesera kudini hambzaji imweni kuti ikwanirise zvayainga yakagaja kuita mu basa ro umwari?

13 Hambzaji imweni yo ku Arabhama, ku Estadhos Unidhus, yaida kugaja zvo kuita mu basa ra Mwari. Iyona yakatara kudari: “Pandainga ndiciri mudoko, ndainyararisa  maningi. Andicaitokwanisa kutanga mabhuyo no vamweni pa Nyumba yo Umambo, nee kutaka musuvo wo mundhu wandicikazivi.” No besero ro vabari vayo pomwe no vamweni mu ungano, hambzaji iyi payainga iri musikane yakakwanisa kuguma pa kuva piyona wo nguva jese. Iyona yakananga kudari: “Nyika ya Sathana inoti zviro zvakanaka kupsaka i jijo yo pamusoro-soro, nduma, mare no zviro zvo kunyama zvakawanda.” Asi hambzaji iyi yakafumbhura kuti vandhu vazinji vanopsaka izvi avazviwani, zvavanowana basi i kubararika hwiru no kuhwajihwa. Yakaengejerazve yeciti: “Asi, kushandira Jehovha, kuri kundiviisira mudakaro mukuru no mazwiro o kugajana.”

14. Mugariro japi jinoda kuti vabari vo ciKristu vave no cicunge?

14 Vabari vo ciKristu vanodikanavo kuva vakacunga. Inga muezaniso, vomunobatira vangamukumbira mukuvo wese kuti mushande kupindirija nguva mu njiku jomakakheta kuitira kunamata ko mbhuri, kocumaira no musongano jo ungano. Zvinoda kucunga kuti murambe kuita zvinonanga patarau wenyu no kugajira vana venyu muezaniso wakanaka. Kangaije vabari vamweni mu ungano vanotendera kuti vana vavo vaite zviro zvokuti imwimwi amudi kuti zviithwe ngo vana venyu. Vabari ava povanomubvunjisa thangwe rakona, munozova no cicunge zve movadurujira ngo njira yo kureremeja here?

15. Nduyo 37:25 no Vaheberi 13:5 jingabesera kudini vabari?

15 Zvinoda kucunga kuti mubesere vana venyu kugaja zvido mu kushandira Jehovha no kuzozvikwanirisa. Inga muezaniso, vabari vamweni vangathya kuvangisa vana kuti  vanghwine mu basa ro upiyona, koshandira kunodiwa maningi vashandi, ku Bheteri kana koobesera mu kuvaka Nyumba jo Umambo no jo Magungano. Kangaije vangathya kuti vanevo avazokwanisi kuvasapota povanoita vasharuka. Asi, vabari vakangwara vanokhombija kucunga no kugonda kuti Jehovha anozoita zvaakapikira. (Verenganyi Nduyo 37:25; Vaheberi 13:5.) Vabari vanokhombija kucunga kwakadari no kugonda Jehovha, vanobesera vana vavo kuti vazviite.—1 Samueli 1:27; 2 Timoti 3:14, 15.

16. Vabari vamweni vakabesera kudini vana vavo kuti vagaje zvido mu kushandira Mwari, zve vanevo vakazobesereka kudini?

16 Umwe mwanarume no mukaji wake vo ku Estadhos Unidhus, vakabesera vana vavo kuti vasotesese pa kushandira Jehovha. Mwanarumewo wakati: “Vana vedu vacito wakwanisa kuvereketa no kufamba, taivabvunja ngo mudakaro wo kuva mapiyona no wo kushandira ungano. Wari uno ngo zvovari kutoda kuita.” Wakaengejera kuti ngo ndava yokuti vana vavo vakagaja zvido zvakadari no kuzvikwanirisa, zviri kuvabesera kuti vahwisane no zviejo zvo nyika ya Sathana no kusotesesa pa kushandira Jehovha. Imwe hama ina vana vaviri yakatara kudari: “Vabari vazinji vanovangisira maningi no kumosha zvovanazvo vacibesera vana kuti vakakwanirise mu mativi akadari inga mu zvomutambo, mabungaijo no mu zvokujija. Zvinobesa maningi kuvangisira kudaro no kumosha zvotinazvo pa kubesera vana vedu kuti vakwanirise zvido, zvinozovabesera kuti varambe vano ukama waushoni na Jehovha. Zviri kutidakajisa maningi, kuciripi ngokuti tiri kuvona vana vedu vacikwanirisa zvido zvavo zvo kumujimu, asi ngokuti tiri kufamba navo.” Mungava no gwinyiso rokuti vabari vanobesera vana kuti vagaje zvido pa kushandira Mwari no kuzvikwanirisa vanotendehwa ndiena.

KUCUNGA MU UNGANO

17. Ipanyi muezaniso jo kucunga mu ungano yo ciKristu.

17 Tinodikanazve kukhombija kucunga mu ungano. Inga muezaniso, vakuru vo ungano vanodikana kucunga kuti vasazanure shwiro jo zvishaishi zvakakura kana povanobesera vaya vokuti upenyu hwavo huri pa ngozi ngo ndava yo zvourapi zvinodiwa ngo kukasika. Vakuru vamweni vanofambira majere kuitira kojija no vanodakarira kana koitisa musongano. Tingativo kudini ngo hambzaji jicizivi kucadha? Ijona jina mukana jakawanda jo kukhombija kucunga no kushandira Jehovha. Jingava mapiyona, kuenda kunodiwa maningi vashandi, kushanda pamwe no urongwa hwo Departamento Local de Projeto/Construção (bauhwa ro urongwa hwo kuvaka), no kuenda ku Cikora Co Vavhangeri vo Umambo. Vamweni vanotokokwa kuenda ku Cikora co Giriadhi.

18. Hambzaji jaamadhodha jingakhombijisa kudini kucunga?

18 Itusu tinoda maningi hambzaji jedu jaamadhodha, zve zvinodakajisa kuva najo mu ungano. Pikija kuti jimweni ajicakwanisi kushanda inga zvojaiita kare pa kushandira Mwari, jinokwanisa kukhombija kucunga no kuita basa. (Verenganyi Tito 2:3-5.) Inga muezaniso, hambzaji yaadhodha inodikana kukhombija kucunga kudari vakuru vo ungano vakaikumbira kuenda kobhuya no hambzaji iciri musikane ngo pamusoro po kunasa kusimira. Aidikani kovereketera hambzajiyo ngo masimirire ayo, asi inodikana  koibesera ngo njira yo kunaka mwoyo kuitira kuti irangarire kuti nguvo joinosimira jingapsasa kudini vamweni. (1 Timoti 2:9, 10) Hambzaji jaamadhodha jinovangisa ungano, pojinokhombija rudo ngo njira jakadari.

19. (a) Hama jakabhabhatijwa jingava kudini jakacunga? (b) VaFilipi 2:13 no 4:13 jinobesera kudini hama kuti jive jakacunga?

19 Hama jakabhabhatijwa jinodikanavo kuva jakacunga zve joita basa. Ungano inobesereka maningi hama iji pojinoda kushanda inga vabatiri vanoshandira no vakuru. (1 Timoti 3:1) Asi, hama jimweni jingatokana-kana kuti jizviite. Kangaije hama ina zvoyakaposa kare, wari iri kujizwa kuti aifaneri kuva mubatiri anoshandira kana mukuru. Hama imweni ingatojizwa kuti aina zvikwaniriso kuti ishandire kunodiwa vashandi. Kudari muri kujizwa kudaro, Jehovha anomubesanyi kuti muve makacunga. (Verenganyi VaFilipi 2:13; 4:13.) Ceujanyi muezaniso wa Mosi. Iyena waijizwavo kuti aacaikwanisa kuita zvaakabvunjwa ndi Jehovha. (Exodo 3:11) Asi Jehovha wakamubesera kuti ave wakacunga no kuita zvaidikana. Hama yakabhabhatijwa ingawanisa kudini kucunga kwakadari? Ingaita mukumbiro kuti Jehovha aibesere no kuverenga Bhaibheri njiku jese. Ingarangarijisisa ngo muezaniso jo vakacunga jinonangwa mu Bhaibheri. Ingakumbira vakuru ngo kujidodokesa kuti vairoveje zve yojipira kuti ibesere mu ungano ngo njira iriyese iri kudiwa. Tiri kukohomeja hama jese jakabhabhatijwa kuti jive jakacunga zve jishande ngo simba mu ungano.

‘JEHOVHA . . . ANEWE’

20, 21. (a) Dhavhidhi wakaceujenyi Soromona? (b) Tingava no gwinyiso renyi?

20 Mambo Dhavhdhi wakaceuja Soromona kuti Jehovha anozova nae mbhera pa kupera kuvakwa ko temberi. (1 Kronike 28:20) Zvokadi kamare, Soromona wairangarijisisa masoko aya zve aazivi kutendera kuti udoko hwake no kutama uzivi zvimuphinge kuita basa. Kusiyapo izvo, wakakhombija kucunga kwakakura zve, ngo besero ra Jehovha, wakapeja kuvakisa temberi mukati mo makore manomwe no meya.

21 Jehovha wakabesera Soromona, zve anokwanisa kutibesa kuti tive takacunga no kuita basa redu, mukati mo mbhuri yedu no mu ungano. (Isaia 41:10, 13) Kudari tikakhombija kucunga potinoshandira Jehovha, tinova no gwinyiso rokuti anozotikomborera wari uno no kumbejiyo. Ngokudaro, ngative ‘takacunga . . . kuti tizviite.’

^ ndim. 12 Munozowana amwe mazano okuti mungava kudini no zvido mu kushandira Mwari mu musoro unoti, “Shandisa Zvinangwa Zvokunamata Kukudza Musiki Wako,” wakabudiswa mu Murindiri wo 15 ya Khunguru wo 2004, mu Cishona.