Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

Vangisananyi “Ngocenyu Njiku no Njiku”

Vangisananyi “Ngocenyu Njiku no Njiku”

“Kudari muno bziribzese bzo kubesa ndibzona vandhu, vereketanyi.”​—MAITIRO O VAPOSTORI 13:15.

NDUMBO: 121, 45

1, 2. Ngenyi zvinosisira manigi kuvangisa vamweni?

KRISTINA, ano 18 o makore o kubahwa, wakananga kudari: “Vabari vangu avazivi kumbondivangisavo, vanondondivereketera basi. Zvovanovereketa kazinji zvinondihwaja. Vanondibvunja kuti ndiciri mwana mudoko pa kurangarira, andizwi; ndaremba ngokubvunjwa kudaro. Ndinondogara ndecicema zve ndinovona kuti zviri nane kutama kubhuya navo. Ndinojivona ndicikasisiri.” [1] (Vonanyi masoko o kupejisira.) Upenyu hunganyangajisa maningi kudari tikatama kuvangiswavo ngo vamweni!

2 Ngo divi rimweni, rangariranyi ngo pamusoro po mabesere atingaita vamweni patinovavangisa. Rubén wakananga kudari: ‘Ko makore akawanda ndaijizwa inga mundhu acikafaneri. Asi njiku imweni, ndainga ndecicumaera no mukuru zve iyena wakavona kuti ndainga ndicizivi kudakara. Iyena wakapurutana ngo kunaka mwoyo kwese, pandainga ndecinanga zvandaizwa. Perepo, iyena wakandirangarija ngo pamusoro po basa rakanaka randainga ndeciita. Wondirangarijazve  ngo magama a Jesu, okuti tinosisira maningi kupinda shiri zinji. Kazinji ndinoceukija vhesi yondhoyo, zve iri kundoramba yecibaya mwoyo wangu. Magama o mukuru uwu akandibesera maningi.”​—Mateu 10:31.

3. (a) Mupostori Pauro wakanangenyi ngo pamusoro po kuvangisa vamweni? (b) Tinozojijenyi pa musoro uno?

3 Bhaibheri rinonanga kuti nguva jese tinodikana kuvangisana umwe kuno umweni. Mupostori Pauro wakatara kuno maKristu o ciHebheru, eciti: “Basopanyi, mucadova no mwoyo wakaxata no ucikatendi, unoreana na Mwari anopona. Pangirananyi [kana vangisananyi] ngocenyu njiku no njiku.” Pauro wakasanangura thangwe rakona, eciti: “Kuti acadovanga mwoyo ariwese ecicengejwa ngo uxaixi.” (Vaheberi 3:12, 13) Rangariranyi ngo pamusoro po mazwire akanaka amunova nao pamunovangiswa ngo ari wese. Waro, ngo api mathangwe atinawo kuti tivangise hama jedu? Tingajijenyi ngo njira yakashandisa Jehovha, Jesu na Pauro kuitira kuvangisa vamweni? Zve ngo japi njira jimweni jatingashandisa kuitira kuvangisana umwe no umweni? Ngatende tizwe mupinguro jo mubvunjo iji.

TESE TINODA KUVANGISWA

4. Ndiani anodikana kuvangiswa? Ngenyi vandhu vazinji nyamasi uno avavangisani umwe no umweni?

4 Tese tinoda kuvangiswa. Maningi-ningi vabari vanodikana kuvangisa vana vavo. Mujijisi umweni anozwi Timothy Evans, wakananga kuti vana ‘vanoda kuvangiswa mukufanana no zvokusimwa zvinoda kumwa.’ Iyena wakaengejera kudari: “Ngo kuvangiswa, mwana anozwa kuti anofanera zve anosisira.” Asi ngo ndava yo kuti tiri kurarama mu ‘njiku jo kupejisira,’ vandhu vazinji vano umbau zve avana “rudo no unyaxa” ku umwe no umweni. (2 Timoti 3:1-5) Vabari vamweni avavangisi vana vavo, ngokuti ivona avazivi kumbovangiswavo ngo vabari vavo. Vakuruwane vanodavo kuvangiswa, asi kazinji izvi azviitiki. Inga muezaniso, vazinji vanon’gun’nguta kuti avambosimbwivo ngo zvovanoita ku basa.

Simbanyi vamweni ngo zvakanaka zvavanoita

5. Tingavangisa kudini vamweni?

5 Tingavangisavo vamweni ngo kuvasimba pavanoita zvakanaka. Tingavangisazve vamweni ngo kuvabvunja kuti vano mugariro jakanaka zve ngokuvatondhoja pavanonga vakasuruvara. (1 VaTesalònika 5:14) Zvecivoneka kuti kazinji tino mukana jo kuva no hama no hambzaji jedu, tino mukana jakawanda jo kuvabvunja zvinovangisa. (Verenganyi Mucumaeri 4:9, 10.) Ngo kudaro, jibvunjisenyi kudari: “Ndinoita kuti vandhu vazive kuti ndinovada zve vanosisira maningi kwandiri here? Zve ndinovakhombija zvondhozvo pandinondowana mukana wo kuzviita here?” Rangariranyi ngo pamusoro po zvinonanga Bhaibheri: ‘Soko rinobhuiwa pa nguva kwayo, kunaka kwaro!’​—Mazwi Akangwara 15:23, Shanduro yeNyika Itsva.

6. Ngenyi Sathana anoda kurembesa vandhu va Mwari? Ipanyi muezaniso wo kuti wakambozviitisa kudini kareko.

6 Pana Mazwi Akangwara 24:10 panonanga kudari: “Ukarembesesa pa njiku yo khombo, simba rako i doko.” Sathana anoziva kuti kudari akakwanisa kutirembesa,  anozokwanisavo kurembesa ushamwari hwedu na Jehovha. Iyena wakaeja kurembesa Jobe ngo kumuviisira matambujiko akawanda. Zvaida Sathana azvizivi kubudirira. Jobe wakaramba wakagondeka kuna Jehovha. (Jobe 2:3; 22:3; 27:5) Itusuvo tingahwisana na Sathana no gwinyiso rokuti iyena aazobudiriri. Kudari tikaramba tecivangisa vo pambhuri yedu pomwe no hama no hambzaji jedu mu ungano, tingabeseravo vamweni kuti varambe vakadakara zve vari phedo na Jehovha.

MUEZANISO JATINGATEVEJERA

7, 8. (a) Jehovha wakavangisa kudini vadhu vake? (b) Vabari vangateveresa kudini muezaniso wa Jehovha? (Vonanyi pikica yo kutanga.)

7 Jehovha anovangisa vandhu. Mutari wo nduyo wakatara kudari: “[Jehovha] Mwari ari phedo no mwoyo yakakhuvazwa; anoponesa vese vakapera simba.” (Nduyo 34:19) Muporofita Jeremia paainga ecithya zve akarembejeka, Jehovha wakamugondisa kuti waizomubesera. (Jeremia 1:6-10) Jehovha wakatumira ngirozi kuna muphorofita wainga waamusharuka Dhanyeri. Ngirozi yondhoyo yakadanija Dhanyeri kuti “wokudikanwa.” (Danieli 10:8, 11, 18, 19) Mungavangisavo hama no hambzaji jenyu ngo maitiro akafanana here, kubatanija mapiyona pamwepo no vasharuka vacikakwanisizve kushanda inga zvavaiita kare?

Vabari, beseranyi vana venyu kucungirira muejo ku cikora

8 Pikija Jehovha na Jesu vakapeja makore akawandisisa no vari vese mugore, Jehovha wakavona dikano yo kuramba ecivangisa Mwana wake Jesu paakaviya pasi pano. Jesu wakazwa Baba wake vecivereketa kubva mugore paakatanga basa ro kucumaera, no pagore rake ro kupejisira pasi pano. Pa bvaza mbiri iji, Jehovha wakananga kudari: ‘Nga uu mwana wangu anodikana.’ (Mateu 3:17; 17:5) Zvokadi Jesu wakazwa kuvangiswa paakazwa Baba wake vecinanga kuti vaimuda maningi zve vaijikuja ndiyena. Tevere, pa usiku hwaakafa ndihwona, iyena wainga ecithimwa-thimwa maningi. Jehovha wakamuvangisa ngo kutumira ngirozi kuti imuvangise no kumutondhoja. (Luka 22:43) Vabari, mungatevejeravo muezaniso wa Jehovha ngo kuvangisa vana venyu nguva jese. Vasimbenyi pavanoita ciri cese cakanaka. Zve pavanosongana no zvineso ku cikora, itanyi zvese zvamunokwanisa kuti muvavangise no kuvabesera kucungirira.

9. Tingajijenyi ngo matajire aaita Jesu vajiji vake?

9 Jesu wakagajavo muezaniso wakanaka watingatevejera. Pa usiku hwaakafa ndihwona, Jesu wakasambija murenje jo vajiji vake wovabvunja kuti zvinosisira maningi kuva vanojidodokesa. Asi ivona vaijikuja zve vainesana ngo ndava yo kuda kuva wokutanga, zve Pedhru ngo maitiro okudada wakananga kuti aacaizosiya Jesu. (Luka 22:24, 33, 34) Asi, Jesu aazivi kuramba wakasotesesa pa kushaisha kwavo. Kusiyapo, iyena wakavasimba ngokuramba kwavo vakagondeka kwaari. Wakavagondisa kuti vaizokwanisa kuita zviro zvakakura kupinda zvaakaita, wovavangisazve ngo kuvabvunja kuti Jehovha anovada maningi. (Luka 22:28; Johani 14:12; 16:27) Jibvunjisenyi kudari: ‘Ndiri ­kutevejera muezaniso wa Jesu here no kusimba vamweni  ngo mugariro javo jakanaka kusiyapo kusotesesa pa zvavanoposa?’

10, 11. Pauro wakavangisa kudini hama jake, zve waijipira kuitenyi?

10 Mupostori Pauro kazinji waibhuya zvakakana ngo pamusoro po hama jake. Iyena wakapeja makore akawanda eciita hwendo no vamweni vavo zve wakanasa kuzivana navo, asi aazivi kumbotara ngo pamusoro po zvavaiposa. Kusiapo izvo, iyena waivasimba. Inga muezaniso, Pauro wakananga kuti Timoti wainga “mwana . . . wokudikana no wokugondeka mwa Tenji” zve wakananga kuti waithemba kuti Timoti waizokwanisa kukoronda zvinodiwa zvo vamweni. (1 VaKorinto 4:17; VaFilipi 2:19, 20) Pauro wakabvunja maKristu o ku Korinto kuti Tito wainga “mudoni wangu, wakamubatira basa na inini.” (2 VaKorinto 8:23) I zvokadi kuti Timoti na Tito vakavangiswa pavakazwa kuti Pauro wainga ecivarangariravo!

11 Pauro no mudoni wake Bharnabha vakadira upenyu hwavo pa ngozi ngo kuda kwenda kovangisa hama javo. Inga muezaniso, vaiziva kuti vandhu vazinji mu dhorobha ro Ristra vaida kuvauraya. Kunyange zvakadaro, vakahwirireyo kuitira kovangisa vajiji vapsa no koovabesera kuti varambe vakagondeka kuna Jehovha. (Maitiro o Vapostori 14:19-22) Pa kufamba ko nguva, ku Efeso, Pauro waiganwa ngo mbhungano yainga no ushungu, asi wakaramba ari kondhoyo no hama jake ko nguva yakati kuti kuitira kujivangisa. Maitiro o Vapostori 20:1, 2 inoti: “Bope norapera, Paulo wakaunganija vajiji, [“wovavangisa,” Shanduro yeNyika Itsva]; wakaenekana na ivona, woenda Masedonia. Wakafambira ndau jese jiya ecivangisa hama ngo mazwi mazinji, woguma Gresia.”

NGATIVANGISANE UMWE NO UMWENI

12. Ngenyi zvinosisira maningi kwenda ku musongano?

12 Jehovha anoda kugarika kwedu. Ngo iyo ndava anotibvunja kuti tisonganire nguva jese. Pa musongano, tinojijira ngo zva Jehovha zve tinovangisana umwe no umweni. (1 VaKorinto 14:31; verenganyi Vaheberi 10:24, 25.) Kristina, wanangwaya pa kutanga ko musoro uno, wakananga kudari: “Zvandinodakarira maningi pa musongano i rudo no vangiso yandinowanepo. Nguva jimweni ndinoguma pa nyumba yo Umambo ndakasuruvara. Asi hambzaji jinondikhwederera jondikumbatira, jonanga kuti ndakaseja maningi. Jinondibvunja kuti jinondida maningi zve jiri kudakajihwa ngo kuenderera kwangu mberi kumujimu. Kundivangisa kwajo kunondiita kuti ndijizwe ushoni!” Zvinosisira maningi kuti umwe nga umwe wedu avangise mudoni wake!​—VaRoma 1:11, 12.

13. Ngenyi kuti pikija vaya vanoshandira Jehovha ko nguva yakareba vanodavo kuvangiswa?

13 Pikija vayani vari kushandira Jehovha ko makore akawanda, vanoda kuvangiswa. Rangariranyi ngo pamusoro pa Joshuwa. VaIziraeri pavaida kunghwina mu Nyika yo Cipikihwa, Jehovha wakakheta Joshuwa kuti avatungamirire. Asi, Jehovha wakabvunja Mosi kuti amuvangise, pikija hazvo Joshuwa wainga ecishandira Jehovha ko makore akawanda. Jehovha wakananga kudari: “Ipai mutheto wako kuna Joxwa. Mucungisei no kumuvangisa, ngokuti ndiyena anozotungamirira kuambuka pamberi  po jinja iri, eciita kuti vatore nyika ii yo unoringisisaro!” (Deuteronòmio 3:27, 28) Zvokadi kamare Joshuwa waidikanadi kuvangiswa, ngo kuti pa kufamba ko nguva jinja ro Iziraeri raizohwisana pa hondo jakawanda maningi zve waizoruza pa imwe yo hondojo. (Joxwa 7:​1-9) Nyamasi uno, tingavangisavo vakuru no vavonereri vo ndharaundha, avo vanoshanda ngo simba pa kubesera vandhu va Mwari. (Verenganyi 1 VaTesalònika 5:12, 13.) Muvonereri umweni wo ndharaundha wakati: “Nguva jimweni hama jinotipa karata jo kubongesera jecinanga madakarire ojakaita kuvafambira kotakaita. Tinoviga karata iji zve patinojizwa takarembejeka tinojiverenga.”

Tinobesera vana vedu kukhwedera phedo na Jehovha patinovavangisa (Vonanyi ndima 14)

14. Muezaniso japi jinotatija kuti zvakanaka kubonga vamweni potinovapa mbhangiro?

14 Pa bvaza imweni, mupostori Pauro wakapa mbhangiro kuno vaKorinto. Pavakaishandisa, Pauro wakavasimba. (2 VaKorinto 7:8-11) Zvokadi, magama ake akavavangisa kuti vaenderere mberi veciita zvakarungama. Nyamasi uno, vakuru no vabari vangatevejera muezaniso wa Pauro. Andrea uwo ano vana vaviri wakati: “Kuvangisa kunobesera vana kuti vakure kumujimu no mu murangariro. Unokohomeja mbhangiro ngo kupa vangiso. Pikija vana vedu vanoziva zvakarungama, vanokwanisa kuzviita nguva jese kudari tikavavangisa.”

ZVICINYI ZVINGAMUBESERA KUVANGISA VAMWENI?

15. Ngo api maitiro amweni atingashandisa kuti tivangise vamweni?

15 Bvunjanyi hama no hambzaji kuti munoreremeja maningi kuvangisira kwajo pomwe no mugariro javo jakanaka. (2 Kronike 16:9; Jobe 1:8) Tikaita kudaro, tinotevejera Jehovha na Jesu. Ivona vanoreremeja zvese zvatinovaitira, pikija ticikakwanisi kuzviita ngo maitiro otaida. (Verenganyi Luka 21:1-4; 2 VaKorinto 8:12.) Inga muezaniso, tinoziva kuti hama no hambzaji jedu jakura jinovangisira maningi kuti jiviye ku musongano no kwenda mu basa ro mu munda nguva jese. Kureva kuti tinovavangisa no kuvasimba ngo zvese zvavanoita here?

16. Ndi rini patingavangisa vamweni?

16 Vangisanyi vamweni pazvinondokwanisikaya. Mundhu akandoita cakanaka, musimbenyi. Pauro na ­Bharnaba pavainga vari ku Antiokia ku Pisidhia, vatungamiriri vo mu sinagoga vakavabvunja kudari: “Hama: kudari muno  bziribzese bzo kubesa [kana kuvangisa] ndibzona vandhu, vereketanyi.” Pauro wakashandisa mukana wondhowo kuitira kuvangisa vandhu. (Maitiro o Vapostori 13:13-16, 42-44) Patinovangisa vamweni, tinozovangiswavo.​—Luka 6:38.

17. Ngo yapi njira yakanaka yo kusimba vamweni?

17 Jekesanyi. Jesu paakasimba maKristu o ku Tiatira, iyena wakajekesa zve wakasanangura kuti ngozvapi zvavaisimbaro ndizvona. (Verenganyi Apokalipsi 2:18, 19.) Tingamutevejeresa kudini? Tingasimba mai vacina mwamuna ngo marerero o vanoita vana vavo, pikija no zvineso zvovanazvo. Kudari muri mubari, mungasimba vana venyu ngo kuvangisira kwavo pa kushandira Jehovha. Vajekeserenyi kuti ngojapi mugariro jakanaka jomakavona kuti vanajo. Ngo kunasa kujekesa patinovangisa vamweni, vanozozviziva zvatiri kuda kunanga.

18, 19. Tingabeseresa kudini vamweni kuti varambe vari phedo na Jehovha?

18 Jehovha wakabvunja Mosi kuti avangise Joshuwa. I zvokadi kamare, Jehovha aazotibvunji nyamasi uno kuti tivangise mundhu ari wese. Asi izvi zvinomudakajisa patinovangisira kuti tivangise vamweni. (Mazwi Akangwara 19:17; Vaheberi 12:12) Inga muezaniso, hama painoita hurukuro ya vese mu ungano, tinodikana kuibvunja zvicinyi kamare zvatidakajisa pa hurukuro yavo. Kangaije zvayanangaro zvatibesera kuhwisana no cineso ciri cese kana kuzwisisa bvesi iri yese. Imwe hambzaji yakatarira hama yainga yakaita hurukuro yecinanga kudari: “Pikija takabhuya ko museswa munganani, mwakakwanisa kuvona kutambujika ko mwoyo wangu, monditondhoja no kundidakajisa. Ndaida kumubvunja kuti pamwavereketa ngo maitiro o kunaka mwoyo akadaro, pa tiribhuna zve na inini kamare, ndaijizwa kuti ndiri kuashira cipo cinobva kuna Jehovha.”

19 Tinozokwanisa kubeserana umwe no umweni kuti tirambe tiri phedo na Jehovha kudari tikatevejera mbhangiro yo mupostori Pauro yokuti: ‘Besananyi no kuvangisana, kudari ngo bzo munoita.’ (1 VaTesalònika 5:11) Kudari tikaramba tecivangisana ‘ngocedu njiku no njiku,’ tinozodakajisa maningi Jehovha!

^ [1] (ndima 1) Mazina amweni akacinjwa.