Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

Munoreremeja Kamare Bhuku ra Jehovha Here?

Munoreremeja Kamare Bhuku ra Jehovha Here?

“Ngokuti makaaxira Izwi [ra Mwari] . . . inga riri rona bzakadi: Izwi ra Mwari.”​1 VATESALÒNIKA 2:13.

NDUMBO: 9694

1-3. Ngozvapi kangaije zvakaitirana Evhodhia na Sintike? Mapope akadari tingamatizisa kudini? (Vonanyi pikica yo kutanga.)

TINOREREMEJA maningi Bhaibheri ngokuti tinoriziva kuti i Bhuku ra Mwari kamare. Bhaibheri rina mazano anotibesera kuti titame kuwanana no zvineso, zve rinokwanisa kutipangira potinoposa. Waro tinoavonesa kudini mazano aro? Rangariranyi ndi Evhodhia na Sintike, vaenga vanakaji vaviri vakazojwa vo muzana ro kutanga ro makore. Bhaibheri rinonanga kuti vakavereketesana, kaveta aritibvunji kuti vakavereketesana ngenyi. Ngatirangarire zvakavaitisa kuti vavereketesane.

2 Kangaije Evhodhia wakakoka hama no hambzaji jimweni kooha najo kumuzi kwake. Asi aazivi kukokavo Sintike. Tevere, Sintike paakazwa vamweni vacinanga mabusiro ovakaita kumuzi ka Evhodhia, iyena wakacamwa. Kangaije wakarangarira kudari: ‘Andingazvitendi! Evhodhia angatama ngenyi kundikokavo? Ndairangarira kuti tiri shamwari yo cika ndicikevo.’ Sintike wakarangarira kuti Evhodhia aacaimudakarira,  waimunyenya. Ngokudaro, Sintike wakakovavo vandhu vondhovo kamare kooha navo kumuzi kwake, wosiya Evhodhia! Kangaije mugariro uu wakacamwisavo vamweni mu ungano. Bhaibheri rinotatija kuti Pauro wakapangira hambzaji mbiri iji, wojivangisa kuti jiite runyararo. Ijona jakamupurukira, joramba jicishandira Jehovha no mudakaro.​—VaFilipi 4:2, 3.

3 Mu ungano jedu nyamasi uno, nguva jimweni tingava no mapope no hama kana hambzaji. Asi kudari tikatevera zano ro Bhaibheri, tinokwanisa kupeja mapope ondhowo. Zvokadi, tingatokwanisa kumatiza. Zve potinozwira zvinonanga Bhaibheri, tinotatija kuti tinoreremeja kamare Bhuku ra Jehovha.​—Nduyo 27:11.

BHAIBHERI RINOTIJIJISA KUNGWARIRA MAZWIRO EDU

4, 5. Soko ra Mwari rinotipa mbhangiro yapi ngo pamusoro po kungwarira mazwiro edu?

4 Kungwarira mazwiro edu akuzivi kureruka nguva jese. Kudari ariwese akatituka kana kushaisha kutitaja, kangaije ngo ndava yo magariro edu, mufumbo wo ganda redu kana ngo mavonekero edu, tingacamwa kana kutonyangajwa maningi. Zve zvingatihwaja maningi kudari mundhu watitukaro kana kushaisha kutitaja i hama kana hambzaji yedu. I zano rapi riri mu Soko ra Mwari ringatibesera?

5 Jehovha anozviziva zvinoitika kudari vandhu vakatama kungwarira mazwiro avo. Potinonga takakhugunyika kana takanyangajwa, tingavereketa kana kuita ciro catinozodemba kana kuzvivaza. Jehovha anotijijisa ngo Bhaibheri kuti tingwarire macamwiro edu zve anotibvunja kudari: “Ucakasika kunyangajwa.” Rangariranyi basi ngo ndhango zinji jatizonotiza ngo kuzwira mbhangiro iyo, yo kutama kukhugunyika ngo kukasika! (Verenganyi Mucumaeri 7:9; Mazwi Akangwara 16:32.) Bhaibheri rinotibvunjazve kuti tinodikana kuregerera vamweni. Zvokadi kamare, Jesu wakananga kuti tikatama kuregerera vamweni, Jehovha aazotiregererivo. (Mateu 6:​14, 15) Imwimwi munoda kuva anosengerera zve ano cido co kuregerera vamweni here?

6. Ngozvapi zvingaitika tikatama kungwarira mazwiro edu?

6 Kudari atingwariri mazwiro edu, tingagara takanyangajwa zve tingatotanga kunyenya ariwese. Tingatoitavo kuti vamweni mu ungano vavevo no mazwiro ondhoo. Pikija tikaeja kuviga kucamwa kana cizondo cedu, vamweni vanozozvivona. Hama no hambzaji jedu jingazotitizira ndhambo. (Mazwi Akangwara 26:24-26) Vakuru vanozoshandisa Bhaibheri kuti vaeje kutibesera kuti tisiye kunyangajwa, kuzonda zve kuti tiregerere vamweni. (VaLevi 19:17, 18; VaRoma 3:11-18) Povanotibesera, tinozoteveja ndhungamiriro yo Bhuku ra Jehovha here?

JEHOVHA ARI KUTITUNGAMIRIRA

7, 8. (a) Jehovha ari kutungamiririsa kudini vandhu vake? (b) Ngojapi ndhungamiriro jimweni jotinowana mu Bhaibheri, zve ngenyi tinodikana kujizwira?

7 Jehovha ari kutungamirira no kujijisa vari mu divi ro pasi ro sangano rake. Ari kuzviitisa kudini? Iyena wakagaja Kristu kuti ave ‘musoro wo ungano’ zve Kristu wakagajavo “muranda wakagondeka no wakangwara” kuti ajijise no kutungamirira vandhu va Mwari. (VaEfeso 5:23; Mateu 24:45-47) Kuezana no mukhumbi unotonga wo muzana  ro kutanga ro makore, muranda uu anoreremeja maningi Bhaibheri ngokuti irona i Soko ra Mwari. (Verenganyi 1 VaTesalònika 2:13.) Ngojapi ndhungamiriro jimweni jotinowana mu Bhaibheri?

8 Bhaibheri rinotibvunja kuti tinodikana kwenda ku musongano nguva jese. (Vaheberi 10:24, 25) Irona rinovangisa tese kuti titende jijiso jimwejo jinowanika mukati mwaro. (1 VaKorinto 1:10) Rinotibvunjazve kuti ‘tiambe kupsanga Umambo.’ (Mateu 6:33) Bhaibheri rinotijijisa kuti ticumaire nyumba ngo nyumba, mu ndau jakazara vandhu, no kuri kwese hako kunowanika vandhu. (Mateu 28:19, 20; Maitiro o Vapostori 5:42; 17:17; 20:20) Irona rinotungamirira vakuru vaite kuti ungano irambe yakacena. (1 VaKorinto 5:1-5, 13; 1 Timoti 5:19-21) Zve rinotibvunja kuti tirambe tina muviri yakacena no kujivirira murangariro no zviito zvinonyenywa ndi Jehovha.​—2 VaKorinto 7:1.

Ndinozova ndakagondeka kuna Jesu no kuteveja ndhungamiriro yo muranda wakagondeka here?

9. Jesu wakagaja aani kuti atibesere kuzwisisa Soko ra Mwari?

9 Kuno vanorangarira kuti avana dikano yo kubesehwa kuzwisisa zviri mu Bhaibheri. Asi, kubvira mu gore ro 1919, Jesu wakatanga kushandisa “muranda wakagondeka no wakangwara” kuti abesere vandhu va Mwari kuzwisisa zvinojijisa Bhaibheri no kuteveja zvorinonanga. Ngo kuzwira Bhaibheri, tinoita kuti ungano igare yakacena, ina runyararo zve yakabatana. Zvibvunjisenyi kudari: ‘Ndinozova ndakagondeka kuna Jesu no kuteveja ndhungamiriro yo muranda wakagondeka here?

NGORO YA JEHOVHA IRI KUFAMBA NGO KUKASIKA!

10. Bhuku ra Ezekieri rinosanangurisa kudini divi ro mugore ro sangano ra Jehovha?

10 Patinoverenga Bhaibheri, tinozwa kuti vashandiri va Jehovha vo mugore vakarongekavo. Inga muezaniso, pa cimwe civoniso, Ezekieri wakavona Jehovha wakapakira imwe ngoro yaifamba ngo kukasika kuenda kurikwese kwaaida. (Ezekieli 1:4-28) Ngoro iyi, inoimirira divi ro mugore ro sangano ra Mwari, iro rinokasikira kutevera ndhungamiriro jake. Zve irona rinokwevejera divi ro pasi ro sangano rake. Rangariranyi ngo cinjo zinji jakaithwa ngo sangano ra Mwari pa gumi ro makore aperari. Mucakanganwa kuti ndi Jehovha ari kutungamirira cinjo iji. Sasambi, Kristu no ngirozi vanozoparaja nyika ino yakashata. Akuzovizve no ariwese hake anozorerusa Jehovha no zina rake kana kushora matongero ake!

Kubonga kwakadini kotinako ku hama jo kuzvipira jinoshanda ngo simba pa basa ro kuvaka! (Vonanyi ndima 11)

11, 12. Sangano ra Jehovha riri kukwaniswa kuitenyi mu njiku jino jo kupejisira?

11 Vonanyi zviri kuitwa ngo sangano ra Jehovha mu njiku jino jo kupejisira. Kuvaka. Mazana o hama no hambzaji jiri kushanda ngo simba pa kuvaka cine ibza ro nyika yese ro Zvapupu zva Jehovha ku Woriwiki, Novha Yorki, E.U.A. Zviuru zvo hama no hambzaji jimweni jo kuzvipira jiri kuvaka Nyumba jo Umambo no mahofisi o macine mu nyika yese. Hama jo kuzvipira iji jinotungamirihwa ngo ­Departamento  Mundial de Projeto/Construção. Tinojibonga maningi kamare ngo kushanda kwajo ngo simba pa basa iri ro kuvaka! Zve vashandiri va Jehovha, vari kupa zvovanokwanisa kuitira kubesera kupagari kuvaka ndau iji, zvicinenyi kovanonga vari. Jehovha ari kukomborera vandhu vake ngo kugondeka no kuzvidodokesa kwavo.​—Luka 21:1-4.

12 Jijiso. Jehovha anoda kujijisa vandhu vake. (Isaia 2:2, 3) Rangariranyi ngo kusiana-siana ko zvikora zvotinazvo. Kuna Cikora co Basa ro Upiyona, Cikora co Vabvangeri vo Umambo, Cikora co Giriadhi, Cikora co Vari Kutanga Kugara pa Bheteri, Cikora co Vavonereri vo Ndharaunda no Vakaji Vavo, Cikora co Vakuru vo Ungano, Cikora co Mushando wo Umambo, no Cikora co vo Dare ro Cine no Vakaji Vavo. Zve mu websaite yedu, jw.org, tinowana Bhaibheri no mabhuku amweni mu mazana o ndumi. Mondhomo tinowanazve mativi anosisira maningi kuitira vana no mbhuri zve divi rina zviro zvipsa. Muri kushandisa jw.org mu basa ro kucumaira no pakunamata kwenyu ko mbhuri here?

 GONDEKANYI KUNA JEHOVHA ZVE BESERANYI SANGANO RAKE

13. Zvicinyi zvinovetehwa kuno vandhu va Jehovha?

13 I rukujo hukuru maningi kuva mu divi ro sangano ra Jehovha no kuziva zvaanovetera kwatiri. Zvecivoneka kuti tinoziva zvinoda Mwari, zvinovetehwa kuti timuzwire no kuita zvakarungama. Pikija vandhu vazinji vanoda kuita zvakashata, itusu tinodikana ‘kunyenya zvakashata,’ inga zvaanoita Jehovha. (Nduyo 97:10, BMAA) Atidikani kuezana no vaya vanorangarira kuti “bzakaxata kuti bzakanaka no bzakanaka kuti bzakaxata.” (Isaia 5:20) Itusu tinoda kudakajisa Jehovha, ngo iyo ndava takasunga kuva takacena mu mativi ese. (1 VaKorinto 6:9-11) Zvaanotibvunja Jehovha mu Bhaibheri i kuitira kugara ushoni kwedu. Itusu tinomuda zve tinoda kuva takagondeka kwaari. Ngo kudaro, tinozwira ndhungamiriro yake pamuzi, mu ungano, kubasa kana kuri kwese kotiri. (Mazwi Akangwara 15:3) Rangariranyi ngo mativi amweni otinodikana kuva takagondeka kuna Mwari.

Baba na mai vanoda Jehovha, vanoda kuti vana vavo vave no ushamwari hwo phedo naye

14. Vabari vangava kudini vakagondeka kuna Jehovha?

14 Marovejere atinoita vana vedu. Mu Bhaibheri, Jehovha wakapa vabari ndhungamiriro yo marovejere avangaita vana vavo. MaKristu anodikana kungwarira kuti atame kukwevejehwa ngo murangariro wo munyika ino. (VaEfeso 2:2) Inga muezaniso, mu ndau jimweni baba vangarangarira kudari: ‘Mukaji ngaanojijisa vana.’ Asi ngo maitiro akajeka, Bhaibheri rinopangira majibaba kuti ajijise ndiona vana vao ngo pamusoro pa Jehovha. (VaEfeso 6:4) Baba na mai vano rudo na Jehovha, vanoda kuti vana vavo vave no ushamwari hwo phedo naye, inga zvakaita Samueri paaenga cimujaha.​—1 Samueli 3:19.

15. Tingava kudini takagondeka kuna Jehovha potinotema zvivaringo zvikuru?

15 Matemere atinoita zvivaringo zvedu. Ticito tatema zvivaringo zvikuru mu upenyu, tinoda kuziva kuti ngozvapi zvinorangarira Jehovha kuitira kuti tive vakagondeka kwaari. Bhaibheri no sangano rake zvingatibesera. Inga muezaniso, nyamasi uno, vabari vamweni vakasiya nyika yavo voenda ku nyika imweni, zve pavanobara mwana vanotema civaringo co kumutumira ku ukama hwavo ku nyika yovakabva. Vanozviita kuti vovari vakwanise kuenderera mberi vecibata basa veciwana mare. I zvokadi kuti ici i civaringo cavo, asi ivona vaidikana kuzvibvunjisa kudari: ‘Jehovha anozocivona kudini vivaringo catatemari?’ (Verenganyi VaRoma 14:12.) Zvaizova zvo ungwaru kutanga tarangarira kuti Bhaibheri rinonangenyi ngo pamusoro pazvo, ticito tatema zvivaringo zvinosisira ngo pamusoro po mbhuri yedu no basa redu. Tinoda besero ra Baba wedu, ngokuti atikwanisi kutungamirira madanyu edu.​—Jeremia 10:23.

16. Mai vamweni vakadikana kutema civaringo capi pasure po kubara mwana wavo? Zvicinyi zvakavabesera kuti vateme civaringo caushoni?

16 Varovorani vamweni novathutha  kuenda kunyika imweni, vakabara mwana worume, zve vakaita zano rokuti vaizomutumira kuti aende koorarama no majicekuru ake. Asi pa kufamba ko nguva, mukaji wakona wakatanga kujija Bhaibheri no umwe wo Zvapupu zva Jehovha. Iyena wakajija kuti wainga no mutoro wake wo kujijisa mwana wake ngo pamusoro pa Jehovha. (Nduyo 127:3; Mazwi Akangwara 22:6) Mukuzwirana no zvatinobvunjwa ngo Bhaibheri, musikane uu wakaita mukumbiro ecideketerera Jehovha kuti amubesere kuita zvakarungama. (Nduyo 52:8, 9) Iyena wakasumiriravo zvineso zvake kuno hambzaji yaijija naye Bhaibheri, zve wakabhuya no vamweni mu ungano. Pikija ukama no shamwari jake, vaigara vacimubvunja kuti atumire mwana ku maji cekuru ake, wakasunga kutama kuzviita ngo kuti zvainga zvicizivi kurungama. Mwamunake wakavona kuti hama no hambzaji jaibesa maningi mukaji wake no mwana wavo. Zvakamushamaisa kuvona mwamuna wake acitanga kujija Bhaibheri no kuenda ku musongano no mbhuri yake. Rangariranyi mudakaro wakavana no musikane uwu Jehovha paakadavira mukumbiro wake!

17. I ndhungamiriro yapi yotinodikana kuteverera potinojija Bhaibheri no mundhu?

17 Kuzwira kwatinoita ndhungamiriro. Kudari takagondeka kuna Mwari, tinozoteverera ndhungamiriro jotinopuwa ngo sangano rake. Inga muezaniso, vonanyi zvotinodikana kuita tikandotanga kujija bhuku Bhaibheri Rinojijisenyi Kamare? no mundhu. Takabvunjwa kuti tinodikana kutora museswa munganani pa kupera ko jijo imwe na imwe kuitira kubesera mujiji kuti azive zvakawanda ngo pamusoro po sangano ra Jehovha. Tingashandisa vhidhio ina musoro vokuti Zvicinyi Zvinoitwa mu Nyumba yo Umambo? no bhurushura Ndiani Ari Kuita Zvinoda Jehovha Nyamasi Uno? Tikapeja kujija bhuku Bhaibheri Rinojijisenyi rese, tinodikana kubesera mujiji kuti ave wakanasa ‘kucijikira [mu] kutenda’ ngo kuenderera mberi tecijija naye tecishandisa bhuku Rambanyi Muri mu “Rudo hwa Mwari”, pikija waana nguva yakakura naapera kubhabhatijwa. (VaKolosi 2:7) Muri kutevera here ndhungamiriro iyi yo sangano ra Jehovha?

18, 19. Ngoapi mathangwe amweni anotiitisa kuti tibonge Jehovha?

18 Pana mathangwe akawanda maningi otinodikana kubonga ndiona Jehovha! Ciro cimwe ngo cokuti, ngo ndava yake “tinorarama, tinofamba, tino uhomi.” (Maitiro o Vapostori 17:27, 28) Iyena wakatipazve Bhuku rake, Bhaibheri. Inga maKristu o ku Tesaronika, tinoreremeja cipo ici ngokuti cino masoko anobva kwaari.​—1 VaTesalònika 2:13.

19 Bhaibheri rakatibesera kukhwedera phedo na Jehovha zve iyena wakakhwederavo phedo na itusu. (Jakobo 4:8) Tinovabonga maningi Baba wedu ngo kutikoka kovakaita kuti tive mu sangano ravo! Tinojizwa inga zvakatara mutari wo nduyo kuti: “[‘Bongai Jehovha,’ BMAA] ngokuti wakanaka, ngokuti rudo hwake ahuzoperi.” (Nduyo 136:1) Mutari wo nduyo wakaphinda magama okuti “rudo hwake ahuzoperi” pa vhesi jese jo nduyo iyo. Hina, kudari tikagondeka kuna Jehovha no kutevera ndhungamiriro jaanotipa acishandisa sangano, iyena anozotipa upenyu hucikaperi zve anozova wakagondeka kotiri mbhera narini!