Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

Temanyi Civaringo co kuti ‘Rudo Hwenyu inga Hama uenderere mberi’!

Temanyi Civaringo co kuti ‘Rudo Hwenyu inga Hama uenderere mberi’!

‘Rudo hwenyu inga hama ngauenderere mberi.’HEB. 13:1, Shanduro yeNyika Itsva.

NDUMBO: 72, 119

1, 2. Ngenyi mupostori Pauro wakavona pano dikano yo kutarira maKristu o ku ciHeberu mu zana ro kutanga ro makore?

RAINGA gore ro 61 N.V.Y. Ungano jo ciKristu mu Iziraeri jainga pa runyararo. Pikija hazvo mupostori Pauro wainga ari mujere ku Roma, iyena wainga no vetero yo kuti ngo kukasika waizobudiswa. Timoti, uwo wainga mudoni wake, wainga wabva kubviswa, zve vovaviri vainga vecironga kuti vabvakacire hama ku Judhea. (Heb. 13:23) Asi, inga zvakaphorofita Jesu, mukati mo makore mashanu, Jerusarema raizova ‘recitendenejwa ngo zvikwata zvo masoca.’ MaKristu mu Judhea, maningi-ningi ayani aigara mu Jerusarema, aizodikana kuita ciito ngo kukasika. Jesu wakavangwaja kuti vaizodikana kubvemo paya povaizovona zviitiko izvi zvecitanga.—Lc. 21:20-24.

2 Kubvira mu makore 28 Jesu naapera kunanga ciphorofita ici, maKristu akagondeka o ciJudha aigara mu Iziraeri, ainga atocungirira pa kusotana no kuzondhwa zve kuteverehwa kukuru. (Heb. 10:32-34) Asi Pauro waizviziva kuti ivona vainga vacada kuwanana no muejo jakakura jo rutendo hwavo. (Mt. 24:20, 21; Heb. 12:4) Iyena waida kuti vanasirire kuitira ciri cese caizovawira. Ivona  vaidikana kuva vecicungirira zve kuva no rutendo hwakakura—rutendo hwakavanga kamare kuitira kujivirira upenyu hwavo. (Verenganyi Vaheberi 10:36-39.) Ngo kudaro, Pauro wakakwevejehwa ngo mujimu wa Jehovha kuti atarire karata kuno hama no hambzaji iji jinodiwa, iyo yakanasirihwa kuitira kuwana zvinodiwa zvavo zvinosisira. Karata iyi, wari inozivikanwa inga bhuku ro vaHeberi.

3. Ngenyi tinodikana kubatikana ngo zvakatara Pauro ku maKristu o ciHebheru?

3 Tese nyamasi uno, tinodikana kubatikana ngo zvakatara Pauro ku maKristu aya o mu zana ro kutanga ro makore. Ngenyi? Ngo kuti tiri mu mugariro wakafanana. Pakati po “mukuvo wokunesa” uno, vandhu va Jehovha vari kusotana no mukhaindi wese wo kuzondhwa no kuteverehwa. (2 Tim. 3:1, 12) Pacina kukana-kana itusu tinokhombija kuti rudo no kujipira kwedu, zvakavanga. Asi vazinji vedu wari, tiri kurarama mu runyararo hwakatikuti, pacina kuteverehwa kunovoneka kamare. Asi, mukufanana no maKristu o mu njiku ja Pauro, apana na umwe wedu anodikana kuruza citatijo ici cinosisira co kuti—ngo kukasika tinozosotana no muejo jakakura jo rutendo hwedu!​—Verenganyi Luka 21:34-36.

4. Ngo wapi musoro wo gore wa 2016, zve ngenyi wakafanera?

4 Zvicinyi zvinozotibesera pakunasirira kuitira zviitiko izvi zvinoshamaisa zviriyari kumbeji kwedu kamare? Mu bhuku ro vaHeberi Pauro wakandandanisa zviro zvizinji zvinozotibesera kuti tivangise gonda redu. Ciro cimweni cinosisira ngo co kucindira vhesi yo kutanga yo cipauko cokupejisira co karata iyi. Vhesi iyi yakasanwa kuti ive musoro wo gore wa 2016. Inotingwaja kuti: “Disananyi . . . inga hama no hama.”—Heb. 13:1.

Vhesi yedu yo gore ro 2016: “Disananyi . . . inga hama no hama.”​—Vaheberi 13:1

I CINYI KUVA NO RUDO INGA HAMA?

5. Rudo inga hama zvinobatanijenyi?

5 Zvinorevenyi kwatiri kukhombija rudo inga hama? Gama ro ciGiriki rakashandiswa ndi Pauro ro kuti phi·la·del·phiʹa, rinoda kureva “kuva no rudo ku hama.” Rudo inga hama i mukhaindi umweni wo rudo hwakavanga, rudo hwo ushamwari, rudo hwo kudisana, inga zvinoita vo pa mbhuri imweyo kana vano ushamwari wo phedo. (Jo. 11:36) Itusu atiiti inga tiri hama no hambzaji—itusu tiri hama no hambzaji. (Mt. 23:8) Mazwire edu o kuva no rudo umwe kuno umweni anogurisihwa ngo magama aya: “Disananyi ngo cenyu ngo rudo hwo ukama mecitungamirirana kudisana.” (Rom. 12:10) Mukuzwirana no rudo a·gaʹpe uwo wakacijikira mu zviambi, mukhaindi uwu wo rudo unoita kuti vandhu va Mwari vanase kubatana.

6. MaKristu anozwisisa kudini revo yo rudo inga hama?

6 Mukuzwirana no umweni mujiji,“‘Rudo inga hama,’ i gama rinonyanya kuwanika maningi mu mabhuku o ciKristu.” Ku vaJudha, revo yo gama ro kuti “hama” nguva jimweni raireva zvinopinda ukama wo kunyama, asi rainga ricandorevera vaya vainga mukati mo jinja ro ciJudha zve aricaibatanija vo Majinja. Asi, ciKristu cinobatanija vatendi vese, azvinenyi kuti ngo kwapi kwavanogara. (Rom. 10:12) Itusu takajijiswa ndi Jehovha kuti tive no rudo umwe kuno umweni inga hama. (1 Tes. 4:9) Asi ngenyi zvinosisira kuti rudo hwedu inga hama uenderere mberi?

NGENYI ZVINOSISIRA MANINGI KUENDERERA MBERI TECIKHOMBIJA RUDO INGA HAMA?

7. (a) Ngo rapi thangwe rokutanga rinotiitisa kuti tikhombijire rudo inga hama? (b) Ipanyi muezaniso umweni unovonesa kuti ngenyi zvinosisira kuvangisana rudo hwedu umwe kuno umweni.

7 Mupinguro wakareruka ngo wo kuti Jehovha anoda kuti tikhombijirane rudo inga hama. Atinganangi kuti tinoda Mwari kuveni atina rudo ho hama jedu. (1 Jo. 4:7, 20, 21) Mukuengejera, itusu tinoda kubeserana umwe kuno umweni. Izvi zvinonyanya maningi kudikana  mu nguva jo kunesa. Pauro waizviziva kuti maKristu amweni o ciHebheru aakatariraya karata, ngo kukasika aizodikana kusiya nyumba no upfumi hwao. Jesu wainga wakasanangura kuti nguva yondhoyo yaizova yakadini. (Mc. 13:14-18; Lc. 21:21-23) Ngo kudaro, nguva yondhoyo poyainga isati yaguma, maKristu ondhowo aidikana kuvangisana rudo hwavo umwe kuno umweni.—Rom. 12:9.

8. Icinyi catinodikana kuita wari dambujiko guru ricito ratanga?

8 Ngo kukasika, dutu ro matambujiko makuru o nguva jese rinozoregejehwa. (Mc. 13:19; Ap. 7:1-3) Perepo, zvingazova zvakanaka kuti tizwire mazano aya akafemehwa: ‘Vandhu vangu, viyanyi nghwinanyi mu nyumba jenyu jo mukati mukonye musuvo. Jifindarisenyi ko cimukuvo cidoko mbhera ushungu udarike.’ (Is. 26:20, Shanduro yeNyika Itsva) ‘Nyumba . . . jo mukati’ iji, kangaije jiri kurevera ungano jedu. Ndimona matinounganaya inga hama no hambzaji kuti tinamate Jehovha. Asi izvi azvikwani kwatiri kuungana nguva jese pamwepo. Pauro wakaceukija maKristu o ciHebheru kuti aidikana kushandisa mukana uwu kuti avangisane umwe kuno umweni ‘pa basa ro kudisana no kuita zviro zvakanaka.’ (Heb. 10:24, 25) Tinodikana kukhwijirija rudo hwedu inga hama wari, izvi zvinozotibesera kucungirira muejo uri wese watingazosotana nawo kumbejiyo.

9. (a) Mukana japi jatinajo jatingakhombija ndijona rudo hwedu inga hama? (b) Ipanyi muezaniso wo makhombijire anoita vandhu va Jehovha rudo inga hama, mungava mu mutundhu movanogara kana ku divi rimweni ro nyika.

9 Pikija wari matambujiko makuru acito atanga, itusu tino cido cakavanga co kukhombija rudo inga hama. Hama jedu zinji jiri kuwihwa ngo mudhuma ngo pasi, ndambi, madutu makuru, tsunami (vimbi guru rinobahwa ngo mudhuma ngo pasi unoitika mu jombe) kana ngozi jinoitika jega. Hama jimweni jiri kutambujika ngo ndava yo kuzondhwa no kuteverehwa. (Mt. 24:6-9) Mukuengejera zvese izvi, njiku ngo njiku tinohwisana no kutamika ko mare, uwo unova muviyo wo kurarama mu mugariro uno wo zviro uno uvori. (Ap. 6:5, 6) Ngo kudaro, zvineso izvi pazvinoramba zveciengejeka, mukana jedu jo kukhombijirana rudo umwe kuno umweni ngajivevo jecikura. Pikija hazvo ‘wecizopera rudo hwo [vandhu] vazinji,’ itusu tinodikana kukhombija kuti rudo hwedu inga hama huri kuenderera mberi.—Mt. 24:12. [1]

TINGAITISA KUDINI KUTI RUDO HWEDU INGA HAMA UENDERERE MBERI?

10. Zvicinyi zvaticapopora wari uno?

10 Pikija tecisotana no zvineso, ngo zvapi zvatingaita kuti tirambe tino gonda ro kuti tiri kuramba teciita kuti rudo hwedu inga hama uenderere mberi? Mu njira japi jatingatatija ndijona kuti tino mukhaindi uwu wo rudo kuno hama jedu? Pasure po kunanga kuti ‘rudo hwenyu inga hama ngauenderere mberi,’ mupostori Pauro wakandandanisa njira jakasiana-siana ijo maKristu jaangashandisa pa kuda kuzviita. Wari uno ngatipopore ndhandhatu jakona.

11, 12. Zvinorevenyi kuashira vafambi? (Vonanyi pikica yo kutanga.)

11 ‘Mucakanganwa kuashira vafambi.’ (Verenganyi Vaheberi 13:2.) Gama ro kutanga rakasandujwa kuti “kuashira vafambi,” rinoreva “kunaka mwoyo ku mundhu waucikazivi.” Gama iri rinoticeukija muezaniso wa Abhirahama na Roti. Vanarume vaviri ava vakakhombija kunaka mwoyo ku vabvakaci vovainga vacikazivi. (Gn. 18:2-5; 19:1-3) Pauro wakananga muezaniso iji kuti avangise maKristu o ciHebheru kuti akhombije rudo inga hama ngo kuva anoashira vafambi.

12 Kureva kuti itusu tinoashira ushoni vamweni ngo kuvakoka kooha kana kubungaija no kuvangisana navo kumuzi kwedu here? Kuti tivoniwe inga vaashiri vakanaka, azvirevi kuti tinodikana kuita nasiriro inopeja mare  yakawanda; nee atizopsaki kukoka basi vaya vatinoziva kuti, ngo maitiro ari ese, vanozotiitiravo zvondhozvo. (Lc. 10:42; 14:12-14) Cidisiso cedu ngacive co kuvangisa haiwa co kuda kuvoniwa. Itusu tinonasa kukhombijira rudo muvonereri wedu wo ndharaundha no mukaji wake pikija hazvo ticikamuzivi ushoni here? (3 Jo. 5-8) Zvinopinda kusisira ngo zvo kuti atidikani ‘kukanganwa kuashira vafambi’ ngo ndava yokuti takabatikana maningi kana ngo ndava yo zvineso zvedu zvo njiku no njiku.

13, 14. Tingaitisa kudini kuti tirambe ‘tecirangarira vakasungwa’?

13 “Rangariranyi vakasungwa.” (Verenganyi Vaheberi 13:3.) Pauro aacainangira basi vaya vari mu jere kamare. Asi wainangira hama jiri mu jere ngo ndava yo rutendo hwajo. Pauro wakavavo mu jere ko makore anokhwedera kuita marongomuna pa nguva yaakatara magama aya ku maKristu o ciHebheru. (Fil. 1:12-14) Iyena wakavangisa hama kuti ‘jikovane matambujiko a vaya vaisungwa.’ (Heb. 10:34) Mukusiana na vaya vaibesera kamare Pauro paainga ari mu jere, maKristu o ciHebheru ainga akaparajana kamare na Pauro. Ngo kudaro, aizoitisa kudini kuti arambe ecimurangarira? Iwona aizoita kudaro ngo kuita mukumbiro jo mwoyo wese kuitira kumubesera.—Heb. 13:18, 19.

14 Nyamasi uno, tingavavo takaparajana kunyama no hama jedu jiri mu jere. Kangaije atingakwanisi kuvapa besero inoshanda inga mapire anoita Zvapupu zvinogara phedo no jerero. Asi tingakhombija kuzwira urombo no rudo hwedu ngo kuramba tecirangarira vakagondeka ava zve kuvananga patinoita mukumbiro jedu, tecikumbira Jehovha kuti avabesere. Inga muezaniso, tiri kuramba tecirangarira hama no hambzaji zinji, kangaije no vana vadoko vari mu jere ku Eritrea, kubatanija hama ndhatu—Paulos Eyassu , Isaac Mogos, na Negede Teklemariam —avo vaano makore anopindirija kuita 20 vavasungwa kondhoyo here?

15. Ngenyi tinodikana kuita kuti ‘mucadho ureremejwe ngo vandhu vese’?

15 “Mucado ngaureremejwe ngo vese.” (Verenganyi Vaheberi 13:4.) Tingakhombijazve rudo hwedu inga hama ngo kuramba takacena mu mufambiro. (1 Tim. 5:1, 2) Kudari ariwese ‘akakhuvaza opindirija zvinofanera’ zvo hama kana hambzaji, ngo kuita ruvatano ricizivi kucena nayo kana kuzviita no umwe wo pa mbhuri yake, izvi zvaizophwanya pakacijikira cokwadi co rudo hwedu inga hama. (1 Tes. 4:3-8 Shanduro yeNyika Itsva) Mukuengejera, amborangariranyi basi kuti mukaji waizozwa kudini kudari akazoziva kuti mwamuna wake waimucengeja ecivona zvo umitu-mitu. Mufambiro uwu waizokhombija rudo kuno mukaji no nderemejo ku mucadho wavo here?—Mt. 5:28.

16. Kukwana ngo zvatinazvo kungatibeseresa kudini kuti tikhombijire rudo inga hama?

16 ‘Dakaranyi ngo zvo munazvo.’ (Verenganyi Vaheberi 13:5.) Kudakara ngo zvatinazvo, kwakacijikira pa magondere atinoita Jehovha. Izvi zvinotiita kuti tive no mavonero akaezanana ngo pamusoro po zviro zvo kunyama. (1 Tim. 6:6-8) Izvi zvinotibesera kuziva kuti ushamwari wedu na Jehovha pomwe no hama jedu jo ciKristu, unosisira maningi kupinda ciri cese cingatengwa ngo mare. Mundhu anokwana ngo zvaanazvo, aan’gun’guti, aakhari, aapsaki zvakaposeka zve aanyiswi ngo mazwire o kuva no thima pomwe no umbau—mazwiro angaita kuti rudo hwedu inga hama ucabudirira. Kusiapo izvi, kukwana ngo zvaunazvo kunoviisa mujimu wo kukova.—1 Tim. 6:17-19.

17. Kuva ‘vakacunga kamare’ kunotibeseresa kudini kuti tikhombijire rudo inga hama?

17 ‘Tive vakacunga kamare.’ (Verenganyi Vaheberi 13:6, Shanduro yeNyika Itsva.) Kugonda kwedu Jehovha kunotivangisa, azvinenyi kuti i cineso capi catingasotana naco. Kuvangiswa uku, kunotiita kuti tive no mugariro wakanaka. Rudo hwedu inga hama no mugariro wakanaka  wondhowo, zvicatibesera kuti tivake no kutondhoja vatendi doni vedu. (1 Tes. 5:14, 15) Pikija nyika yecivetera mugariro wo cidima pa nguva yo dambujiko guru, itusu tingakwanisa ‘kuvangirira tecimusa musoro [jedu]’ teciziva kuti ruponeso hwedu uri phedo.—Lc. 21:25-28.

Munodakarira basa ratinoitihwa ngo vakuru here? (Vonanyi ndima 18)

18. Tingavangisa kudini rudo hwedu inga hama kuna vaya vari “vatungamiriri.”

18 “Ceukijanyi vatungamiriri.” (Verenganyi Vaheberi 13:7, 17.) Patinorangarira basa guru ratinoitihwa ngo vakuru vedu—​zvese vecizviita vacikapoceri—​rudo hwedu inga hama pomwe no mazwire o kuda kuvabonga, zvinovangiswa. Narini atizodi kuti varuze mudakaro wavo kana kuti vapsinyike ngo ciri cese catinonga taita. Kusiapo izvi, ngo kuzwira kwedu no kujidira pasi, ‘ngativadisise, ngo ndava yo basa ravo.’—1 Tes. 5:13.

NGATIRAMBE TECIZVIITA MUKUNASA KUPERERA

19, 20. Mativi api atingaramba tecikhombija kuti ’rudo hwedu inga hama uenderere mberi’?

19 Ngo zvokadi kuti, vandhu va Jehovha vanonasa kuzivikanwa ngo kuva no rudo inga hama. Pauro waizviziva zvondhozvo mu njiku jake. Iyena wakaenderera mberi ecivangisa vese kuti ‘vaende mberi basi’ veciita zvondhozvo. (1 Tes. 4:9, 10) Nguva jese pano mukana wo kuitisa nane!

20 Ngo kudaro, inga zvatinosota pa vhesi yedu yo gore mukati mo gore rese, ngatirangarijisise mubvunjo iji: Ndingaengejera kuashira kwangu vafambi here? Ndingaitisa kudini kuti ndirangarire hama jedu jiri mujere? Kunanga kuti ndinoreremeja ngo maitiro anofanira nasiriro ya Mwari yo mucadho here? Zvicinyi zvingandibesera kuti ndikwane ngo zvandinazvo? Ndingaitisa kudini kuti ndijikise kugonda kwangu Jehovha? Ndingaitisa kudini kuti ndinase kubatana pamwepo no vaya vari kutungamirira? Kudari tikamashandisa kamare mativi matandhatu aya, vhesi yedu yo gore aizovi inga citatijo haco ciri pa biravira ro Nyumba yo Umambo. Asi, icazotirangarija kuti tipurukire ngwajo iyi yo kuti: ‘Rudo hwenyu inga hama ngauenderere mberi.’—Heb. 13:1, Shanduro yeNyika Itsva.

^ [1] (ndima 9) Kuitira kuwana muezaniso wo makhombijire anoita Zvapupu zva Jehovha rudo inga hama mu nguva jo ngozi, vonanyi Nharireyomurindi ya July 15, 2002, mapheji 8-9 zve bhuku rino musoro unoti, Zvapupu zvaJehovha—Vazivisi voUmambo hwaMwari cipauko 19.