Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

Mujimu Unoita Fakazi No Mujimu Wedu

Mujimu Unoita Fakazi No Mujimu Wedu

“Mujimu wambhwine unoita fakazi mu mujimu wedu.” ROM. 8:16.

NDUMBO: 109, 108

1-3. Zviitiko zvapi zvakaita kuti Pentekoste ya 33 N.V.Y. ive njiku inosisira, zve zviitiko zvondhozvo zvakakwanirisa kudini Matahwa ainga akanangwa? (Vonanyi pikica yo kutanga.)

MAINGA mu Dimingu co mangwanani mu Jerusarema. Dimingu iri rakava rinosisira kuna vaya vainga mu Jerusarema. Vandhu vaiita mabuso o Pentekosti, awo ainga mabuso akacena o kukotohwa ko tirigu. Pa mangwanani ondhowo, mupiri mukuru wakapira mupiro jaiizwa njiku jese mu temberi. Perapo, pa nguva jinokwana kuita pfumbamwe, mupiri mukuru wakapekeja pau mbiri jicina mbijo jakaizwa ngo tirigu yo kutanga, kana kuti mucero jo kutanga kukotohwa. Mupiri mukuru wakazunguzira pau iji kubva ku divi kuenda ku divi, kuitira kujipekeja kuna Jehovha. Izvi zvakaitika mu gore ro 33 N.V.Y. (nguva ya vese yaguma), zve yakava njiku yo Pentekosti.—Lv. 23:15-20.

2 Ko mazana o makore, gore ngo gore mupiri mukuru waiita cipo co kuzunguzira. Cipo ici cainga ceciimirira ciro cinosisira cakaitika mu Pentekosti yo gore ro 33 N.V.Y. Zve cakaitikira 120 ro vajiji  va Jesu, avo vaiita mukumbiro pamwepo mu nyumba yo nyezuru mu Jerusarema. (Mait. 1:13-15) Mazana masere o makore o kutanga, muphorofeti Joeri wakatara ngo pamusoro po ciitiko ici. (Joel 2:28-32; Mait. 2:16-21) Cicinyi cakaitika caisisira maningi?

3 Verenganyi Maitiro o Vapostori 2:2-4. Mu njikuyo, Mwari wakapekeja maKristu aya mujimu mucena, zve ivona vakazojwa. (Mait. 1:8) Perapo, mbungano yakatanga kuvaunganira, zve vajiji vakatanga kuvereketa ngo pamusoro po zviro zvinodakajisa zvovainga vavona no kuzwa. Mupostori Pedru wakasanangura kuti zvicinyi zvainga zvaitika zve ngenyi zvainga zvecisisira maningi. Iyena wakabvunja mbungano kuti: “Tenderukanyi; mubapatizwe ngo zina ra Kristu, kuti bzixaixi bzenyu bzikungurihwe, kusarepo munozoaxira Mujimu Mucena.” Njikuyo, vandhu vanokwana kuita 3.000 vakabhabhatijwa, zve ivona vakaashiravo mujimu mucena.​—Mait. 2:37, 38, 41, Baiberi Mazwi Akacena aMwari.

4. (a) Ngenyi tinodikana kudakarira zvakaitika pa Pentekosti ya 33 N.V.Y.? (b) Cicinyi cakaitikazve mu njiku yondhoyo mu makore mazinji o kutanga? (Vonanyi masoko o pasi.)

4 Ngenyi Pentekosti ya 33 N.V.Y. inosisira maningi kwatiri? Zvokadi kamare aisisiri kwatiri ngo ndava yo zvakaitika mu temberi mu Jerusarema. Asi, i ndava yo kuti Jesu Kristu, inga Mupiri mukuru-kuru, wakakwanirisa muezaniso uwu wo uphorofita. [1][7] Mupiri mukuru wakapira pau mbiri jo kuezanisira kuna Jehovha mu njiku yondhoyo. Pau jicina mbijo jakapihwa mu temberi, jinoimirira vajiji vokutanga vakazojwa, avo vakatohwa kubva ku majinja o vandhu ano cishaishi, kuti vave vana na Mwari vanoashihwa. Ngo kudaro, gwanja rakafunungukira vamweni vo ‘mucero jo kutanga’ vanobva ku majinja o vandhu, kuti vaende mugore zve kuti vabatanijwe mu Umambo unozoviisa makomborero acikaverengeki ku vandhu vanozwira. (Jak. 1:18; 1 Ped. 2:9) Ngo kudaro, azvinenyi kuti vetero yedu inozova yokuita muzi wedu mugore na Jesu kana kuti ngo yo kuzorarama nokucikaperi mu paradhiso pasi pano, upenyu hwedu unopsaswa ngo zviitiko zvo njiku yondhoyo.

ZVICINYI ZVINOITIKA PANOZOJWA MUNDHU?

5. Tingazvizivisa kudini kuti asipi vese vakazojwa vanoashira kuzojwa kwavo ngo njira imweyo kamare?

5 Vajiji vainga vari mu nyumba yo nyezuru avacaizokanganwa njiku yondhoyo. Umwe nga umwe wavo wainga ano ciro cakaita inga muriro pa musoro pake. Jehovha wakavaita kuti vakwanise kuvereketa ngo ndumi imweni. Avacaikana-kana kuti vainga vazojwa ngo mujimu mucena. (Mait. 2:6-12) Asi zviro izvi zvinoshamaisa azvizivi kuitika ku maKristu ese paainga ecizojwa. Inga muezaniso, Bhaibheri arinangi kuti vakazozoja pasure po njiku yondhoyo, pa musoro pavo pakavonekavo ciro cakaita inga muriro. Ivona vakazojwa povakazobhabhatijwa. (Mait. 2:38) Zve asipi maKristu ese anozojwa pa nguva yaanobhabhatijwaro. VaSamaria vakazozojwa papera nguva pasure po kubhabhatijwa kwavo. (Mait. 8:14-17) Ngo divi rimweni, Kornerio no vo pamuzi pake vakazojwa ngo mujimu mucena vacito vakabhabhatijwa zve azvizivi kumboitikazve.​—Mait. 10:44-48.

6. Vakazojwa vese vanoashirenyi, zve izvi zvinovapsasisa kudini?

6 Ngo kudaro, asipi vese vanozojwa ngo njira yakafanana kamare. Vamweni kangaije vakakasika kuzwisisa kuti Jehovha wainga akavazoja. Vamweni vakazozvizwisisa pa kufamba ko nguva. Asi mupostori Pauro wakasanangura zvainga zvaitika kuna umwe na umwe wavo. Iyena wakati: “Surevo ko kuritenda, makadihwa cidindo ngo Mujimu wakagondeswa: Mujimu Mucena, cibatiso co utaka hwedu.” (Ef. 1:13, 14) Ngo kudaro, Jehovha anoshandisa mujimu wake mucena kuti anase kujekesera maKristu aya kuti iyena wakavakheta kuti vaende  mugore. Ngo njira iyi, mujimu mucena i ‘cibatiso co utaka hwavo,’ kana kuti unovakhohwesa kuti kumbejiyo ivona vanozorarama mugore haiwa pasi pano.—Verenganyi 2 VaKorinto 1:21, 22; 5:5.

7. MaKristu akazojwa anodikana kuitenyi kuti aashire mupocero wao mugore?

7 MuKristu paanozojwa, zvinoreva kuti zvinonga zvatokwana kuti azoashira mupocero wake here? Haiwa. Iyena anonasa kugonda kuti wakadanijwa kuti aende mugore. Asi iyena anozoashira mupocero wake kudari basi akaramba akagondeka kuna Jehovha. Pedru wakazvisanangura ngo njira iyi: “Ngo ndava yabzo, hamadoni, vangiriranyi kuti muvangise kudanijwa no kusanwa kwenyu. Mukaita kudaro, amucazokhugunyibze; munozozaurihwa kamare misuvo yo Umambo hucikaperi hwa Tenji no Muponesi wedu Jesu Kristu.” (2 Ped. 1:10, 11) Ngo kudaro, umwe nga umwe wo maKristu akazojwa, aadikani kuita kuti ciri cese cimuregerese kushandira Jehovha. Pikija hazvo iyena akakokwa kana kudanijwa kuti aende mugore, kudari akatama kugondeka iyena aazowani mupocero wake.—Heb. 3:1; Ap. 2:10.

UMWENI MUNDHU ANGAZVIZIVISA KUDINI?

8, 9. (a) Ngenyi vandhu vazinji vecinesehwa ngo kuzwisisa zvinoitika panozojwa mundhu? (b) Mundhu angazvizivisa kudini kuti iyena wakadanijwa kuenda mugore?

8 Vazinji vo vashandiri va Mwari nyamasi uno vanovona zvecinesa kuzwisisa kuti zvicinyi zvinoitika ku ari wese paanozojwa ndi Mwari. Izvi ndizvona, ngo ndava yokuti ivona pacavo avazivi kumbozojwa. Mwari wakasika vandhu kuti vararame kwenda no kwenda pasi pano, kuciripi mugore. (Gn. 1:28; Ndu. 37:29) Asi Jehovha wakasana vamweni kuti vave majimambo zve vapiri mugore. Ngo kudaro, iyena paanovazoja, vetero yavo, murangariro javo zve mazwiro avo zvinocinja, zvoita kuti vasoterere upenyu wo mugore.​—Verenganyi VaEfeso 1:18.

9 Asi Mundhu angazvizivisa kudini kuti iyena wakadanijwa kuti aende mugore? Vonanyi zvakananga Pauro ku hama jakazojwa mu Roma, avo “vakadanijwa kuita vanasi.” Iyena wakavabvunja kudari: “Amuzivi kuaxira [“mujimu” Shanduro yeNyika Itsva] wo uranda, kuti muthyebze. Kaveta makaaxira [“mujimu” Shanduro yeNyika Itsva] wo urehwi, ngo wo tinomima ndiwona kuti: ‘Abba, Baba’. Mujimu wambhwine unoita fakazi mu mujimu wedu, kuti tiri vana va Mwari.” (Rom. 1:7; 8:15, 16) Ecishandisa mujimu wake mucena, Mwari wakajekesera ariwese wakadanijwa kuti atonge inga mambo mugore na Jesu.​—1 Tes. 2:12.

10. Pana 1 Johani 2:27 panoda kurevenyi ngo kunanga kuti muKristu wakazojwa aadi kuti ari wese aajijise?

10 Vaya vakaashira mukoka uwu avana dikano yo kubvunjwa ngo ari wese kuti ivona vazojwa. Jehovha anovaita kuti vakhohwe. Mupostori Johani vakabvunja maKristu o kuzojwa kuti: “Kaveta imwimwi makazojwa ndi Kristu ngo mujimu mucena, mucinako kuzojwa uku, amucabviri kujijiswa ngo vamweni. Ngo kuzoja kwake makajijiswa zviro zvese, mucikacengejwi. Ngo kudaro, garanyivo mwaari, kudari ngo bzo makajijiswa.” (1 Jo. 2:20, 27) MaKristu akazojwa anotodavo kujijiswa ndi Jehovha inga zvinoitwa vamweni. Asi ivona avadi ari wese kuti avatendere kuti ivona vakazojwa. Jehovha anoshandisa simba guru ro mujimu mucena kuti anase kuvajekesera kuti mbzakadi vakazojwa.

IVONA “VANOBAHWA NGA PAPSA”

11, 12. Zvicinyi zvingarangarira muKristu wakazojwa, asi zvicinyi zvaacikadikani kukana-kana ndizvona?

11 MaKristu paanozojwa ngo mujimu mucena, anocinja kamare zvokuti Jesu wakananga kuti ivona “vanobahwa nga papsa.” [2] (Jo. 3:3, 5) Perapo iyena wakasanangura kuti: “Ucakahamara ngo kubvunjwa ndini kuti unodikana kubahwa ngo papsa. Mbhepo inobvunguza ko  inoda. Unozwa caungu cayo, kaveta aubzizivi ko inobva no ko inoenda. Ndibzona bzondhobzo mundhu wese wakabahwa ngo Mujimu.” (Jo. 3:7, 8) Zvakajeka kuti, zvinonesa kusanangura zvinoreva kuzojwa ko mundhu kuno mundhu acizivi kuzojwa.

12 Kangaije mundhu wakazojwa angarangarira kudari: ‘Ngenyi ndakakhetwa? Ngenyi ndakakhetwa inini kuciripi umwenivo hake?’ Kangaije iyena angatorangarira kuti dangani wakanasa kuperera kuti awane cidakajiso ici. Asi iyena aakani-kani kuti Jehovha wakamukheta. Kusiapo izvi, iyena anozwa ano mudakaro mukuru zve ecibongesera ngo cipo ici. Vakazojwa vanova no mazwire amwewo no akava no mupostori Pedru paakati: “Ngaasimbhwe Mwari, Baba wa Tenji wedu Jesu Kristu, ngo unyasha hwake, ngo ndava yo kumuka ka Jesu Kristu mu kufa, wakatimusa ngo papsa, ku ruvetero hwo uhomi, ku utaka hucikaperi hwakacena no hucikavori, hwo munovigihwa mugore.” (1 Ped. 1:3, 4) Vakazojwa pavanoverenga masoko aya, mu kutama kukana-kana ivona vanoziva kuti Baba wavo vari kuvereketa navo pacavo.

13. Marangaririre anoita mundhu anocinjisa kudini paanozojwa ngo mujimu mucena, zve cinjo iyi inobarenyi?

13 Jehovha acito akoka maKristu aya kuti aende mugore, kangaije iwona ainga ano vetero yo kurarama no kucikaperi pasi pano. Ivona vaisoterera nguva iyo Jehovha yaanozoita kuti pasi pave paradhiso, zve kubvisa vese vakashata. Kangaije ivona vaijirangarija pacavo veciashira vo pa mbhuri kana shamwari jainga jakafa. Zve ivona vaisoterera kuzovaka nyumba zve kuraramemo, kana kuti kusima muti zve kuha mucero wao. (Is. 65:21-23) Ngenyi murangariro wavo wakacinja? Asipi kuti ivona avazivi kudakarira vetero yondhoyo. Ivona avazivi kucinja murangariro javo ngo ndava yo kuneseka. Ivona avazivi kusiya pasi pano ngo kuti vaizofindhwa ngo kuraramepo no kucikaperi, zve avazivi kusiya pasi pano ngo kuda kuvona mugariro wozvaizoita kurarama mu gore. Kusiapo izvi, Mwari ndiyena anosunga izvi kuti zviitike kovari. Paanovakoka, anoshandisa mujimu wake mucena kuti acinje marangaririre avanoita zve mupocero wavo uwo wovari kuvetera kumbeji.

14. Vakazojwa vanovonesa kudini upenyu hwavo pasi pano?

14 Ngo kudaro, izvi zvinoda kunanga kuti vayani vakazojwa vanodakarira kufa here? Pauro wakasanangura mazwiro o vakazojwa. Iyena anoezanisa muviri wo mundhu no ‘tende’ zve wakananga kuti: ‘Zvokadi, itusu tiri mu tende ino tinogomera, teciremehwa, ngo kuti atidi kuipfenyura, asi kusimira imweni yakona, kuti cinofa cimijwe ngo upenyu.’ (2 Kor. 5:4, Shanduro yeNyika Itsva) MaKristu aya aadi kufa. Ivona vanobusa upenyu zve vanoda kushandisa njiku imwe nga imwe kuitira kushandira Jehovha pamwepo no mbhuri zve shamwari javo. Asi azvinenyi kuti ngo zvapi zvovanoita, ivona vanoceukija zvavakagondeswa ndi Mwari kumbejiyo.​—1 Kor. 15:53; 2 Ped. 1:4; 1 Jo. 3:2, 3; Ap. 20:6.

MAKAKOKWA NDI JEHOVHA HERE?

15. Zvicinyi zvinovonesa kuti mundhu uwu aazivi kuzojwa ngo mujimu mucena kuti aashire mupocero wake wo mugore?

15 Kangaije imwimwi mungarangarira kuti kudari henyu maiyashiravo mukoka uwu unodakajisa. Kudari muno mazwiro ondhowo, rangariranyi ngo pamusoro po mubvunjo iji jinosisira: Munojivona mecivangisira mu kuita basa ro kucumaera here? Muri kunasa kujija kamare Bhaibheri pomwe no ‘zviro zvakajika zva Mwari’ here? (1 Kor. 2:10) Munojizwa mecipekejwa muviyo wakanaka ndi Jehovha mu basa ro kucumaera here? Munoda maningi kuita zvinoda Jehovha kupinda ciro ciri cese  here? Muno rudo wakakura ku vamweni zve munorivona riri basa guru kuvabesera kushandira Jehovha here? Muri kuvona zvitatijo zvinovonesa kuti Jehovha ari kumubesera mu njira jakawanda mu upenyu hwenyu here? Kudari mukadavira kuti hina pa mubvunjo jese iji, zvinonga zvecireva kuti makakokwa kuti muende mugore here? Haiwa, azvirevi kudaro. Ngenyi? Ngo kuti vashandiri va Mwari vese vangava no mazwiro akadaro, azvinenyi kuti vakazojwa here kana kuti haiwa. Zve ecishandisa mujimu wake mucena, Jehovha anopekeja simba rimwero kuno ari wese wo vashandiri vake, azvinenyi kuti mupocero wavo unozova kwapi. Zvokadi kamare, kudari mecikana-kana kuti dangani munozoenda mugore here kana kuti haiwa, zvinonga zvecireva kuti imwimwi amuzivi kukokwa. Vaya vakakokwa ndi Jehovha avarangariri ngo pamusoro pazvo. Ivona vanotozviziva!

16. Tingazvizivisa kudini kuti asipi vese vakaashira mujimu wa Mwari vakakokwa kuti vaende mugore?

16 Mu Bhaibheri, muno muezaniso muzinji jo vakagondeka avo vakaashira mujimu mucena wa Jehovha asi votama kuenda mugore. Umwe wo vandhu ava ndi Johani mubhabhatiji. Jesu wananga kuti akuna mwanarume mukuru kudarika Johani, asi perapo iyena wakananga kuti Johani aacaizotongepi inga mambo mu gore. (Mt. 11:10, 11) Dhavhidhi wakatungamirihwavo ngo mujimu mucena. (1 Sam. 16:13) Mujimu mucena wakamubesera kuti azwisise zviro zvakajika ngo pamusoro pa Jehovha zve wakamutungamirira kuti atare mativi o Bhaibheri. (Mc. 12:36) Pikija zvakadaro, mupostori Pedru wakananga kuti Dhavhidhi “aazivi kukhwira kuenda mugore.” (Mait. 2:34) Jehovha wakashandisa mujimu wake mucena kuti apekeje vandhu ava simba ro kuita zviro zvinokahamaja, asi aazivi kuushandisa pa kuvakoka kuti vararame mugore. Izvi azvirevi kuti ivona avazivi kugondeka kana kuti avakwanirisi. Izvi zvinoreva kuti Jehovha anozovavisa ku upenyu mu Paradhiso pasi pano.​—Jo. 5:28, 29; Mait. 24:15.

17, 18. (a) Mupocero wapi uri kusoterehwa ngo vashandiri vazinji va Mwari nyamasi uno? (b) Mubvunjo japi jaticazojija pa musoro unotevera?

17 Vashandiri vazinji va Mwari nyamasi uno avazoendi mugore. Ivona vano vetero imweyo no ina Dhavhidhi, Johani Mubhabhatiji pomwe no vanarume no vanakaji vamweni vakagondeka vo mu nguva yo kare. Inga Abhirahama, ivona vakasoterera kurarama inga vatongwi pasi po Umambo hwa Mwari. (Heb. 11:10) Pa mutengo wo vaya vakasanwa kuti vaende mugore, vashoma basi ndivona vasara pasi pano mu nguva ino yokupejisira. (Ap. 12:17) Izvi zvinoreva kuti pakati po vakakhethwa vanokwana kuita 144.000, vazinji vakona vakatofa kare vakagondeka.

18 Asi kudari ari wese akananga kuti wakazojwa, vaya vano vetero yo kurarama pasi pano vanova no mazwiro api? Kudari ari wese wo kuungano kwenyu akatanga kuha pau no kumwa vhinyu pa Cirangarijo, munodikana kumubatisa kudini? Zve zvakadini kudari mutengo wo vaya vanonanga kuti vakazojwa ukaramba uciengejeka, maizoneseka ndizvona here? Mubvunjo iji jinozodavihwa pa musoro unotevera.

^ [1] (ndima 4) Mabuso o Pentekosti anodinga akaitwa pa nguva imweyo no gore rakapekejwa Mutemo ndi Mosi pa Sinai. (Ex. 19:1) Ngo kudaro, kangaije Mosi wakanghwinisa jinja ro Iziraeri mu citenderano co Mutemo mu njiku imweyo no yakanghwinisa Jesu vakazojwa mu citenderano cipsa.[9]

^ [2] (ndima 11) Kuitira kusanangurihwa zvizinji ngo pamusoro po zvinoreva gama ro kubahwa ngo papsa, vonanyi Nharireyomurindi ya April 1, 2009, mapheji 3-11.