Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 MUSORO WO REVHISTA | NGENYI KUVA WAKAGONDEKA?

Kutama Kugondeka Kunomupsasisa Kudini?

Kutama Kugondeka Kunomupsasisa Kudini?

“Nguva jese kuno mugariro jinonesa jinoda kuti titame kugondeka padoko.”—Samantha, Afrika dhu Suri.[1]

Munotenderanavo no masoko aya here? Mukufanana na Samantha, itusu tese nguva ngo nguva tinosongana no mugariro jinonesa. Zvatinoita patinonga tiri pamugariro jinotieja kuti titame kugondeka, zvinokhombija kuti i ndhungamiro japi jatinoreremeja. Inga muezaniso, kudari kuda kuvoniwa inga takanaka ndikona kuri pa kutanga kwatiri, tinozovonavo kuti kutama kugondeka kunozoshanda inga thurusi rimweni kuti tikwanise kuvoniwa inga takanaka. Cokwadi cikazozivika, kunova no muviyo jakashata. Ngativonenyi basi.

KUTAMA KUGONDEKA KUNOPARAJA KUTHEMBEKA

Ushamwari unovakihwa pa kuthembana. Kudari vandhu vaviri vecithembana. Asi kuthembeka akuwaniki nyamasi-nyamasi. Vandhu vanotanga kuthembana pavanopeja nguva vari vese, veciita mabhuyo o kadi kamare, vacikaiti ciri cese no umbau. Asi kuthembeka kungaparajwa ngo ciito cimwe basi co kutama kugondeka. Zve kuthembeka kukandopera, kunonesa maningi kuda kukuwanazve.

Makambocengejwa ngo ari wese womairangarira kuva shamwari yakanaka here? Kudari zvakamuitikira, mwakazwa kudini? I zvokadi kuti mwakahwajihwa, mwakatojizwazve kucengejehwa. Izvo zvinozwisisika. Atikani-kani maningi kuti kutama kugondeka kungaparaja fabirika yo ushamwari hunosisira.

KUTAMA KUGONDEKA KUNOBARA KUTAMA KUGONDEKA

Jijo yakaitwa ndi Robert Innes, mujijisi wo marongehwe o mare no empreza wo Univhersidhadhe yo California, yakafumbhura kuti “kutama kugondeka kungapairihwana.” Ngo kudaro, kutama kugondeka kungaezanisihwa no citongoni—patinonga tecishamwarijana no mundhu anocengeja, imwimwi munovavo pa ngozi yo kuva “anojipairira” ngo kutama kugondeka.

Mungatizisa kudini kuwira pa murau wo kuva acikazivi kugondeka? Bhaibheri ringamubesera. Tapota vonanyi zviambi zvinganani zvo Bhaibheri, zvinozonangwa pa musoro unotevera.