Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 MUSORO WO REVHISTA | NGENYI KUVA WAKAGONDEKA?

Kuva Wakagondeka kuno Muviyo Wenyi?

Kuva Wakagondeka kuno Muviyo Wenyi?

‘Tinothemba kuti tino hana yakagondeka, zvatinoda kuva vakagondeka pa zviro zvese.’—Vaheberi 13:18, Shanduro yeNyika Itsva.

Mu Bhaibheri, gama ro ciGiriki rinosandujwaya nguva jimweni ‘kugondeka’ rinoda kurevera ciro cakanaka cinosisira. Irona ringava no revo yo ciro cakanaka kuvona mu mufambiro.

MaKristu anobatisisa ngo mwoyo wese magama akafemehwa o mupostori Pauro okuti: ‘Zvatinoda kuva vakagondeka pa zviro zvese.’ Izvi zvinobatanijenyi?

HONDO YO MUKATI MEDU

Vandhu vazinji vanojisota pa supeya mangwanani ese vacito vabuda. Ngenyi? Ngo kuti ivona vanoda kuva no mavonekere akanaka. Asi kuno ciro cimweni cinosisira maningi kupinda kuva no magundihwe akaseja kana nguvo jiri kubuda wari. Zvokadi, undhu hwedu hwo mukati ungasejesa kana kushatisa mavonekere edu o kunja.

Soko ra Mwari rinonanga ricikapoti-poti kuti itusu takapeamira mu kuita zvakashata. Pana Genesi 8:21 panoti: “Murangariro yo mwoyo yo vandhu, yakaxata kubvira pa rucece hwavo.” Kunanga gwinyiso kamare, tinodikana kuhwisana no kupeamira ku cishaishi kotakabahwa nako. Mupostori Pauro wakanasa kusanangura ngo pamusoro po hondo yake no cishaishi, paakananga kuti: “Mbzakadi, kuti inini ndinodakara ngo Mupango wa Mwari, ndeciteveja undhu wo mu hana. Kaveta ndinozwa mu muviri wangu mupango umweni unorovana no mupango wo mwoyo wangu, wondiita muranda wo mupango wo uxaixi huri mu muviri wangu.”—VaRoma 7:22, 23.

Inga muezaniso, mwoyo wedu paunotindundira kuti tiite zvakashata kana patinonga tino cido cakavanga co kuda kutama kugondeka, atidikani kutendera kuva muranda wo zvinoda mwoyo wedu. Pondhopo tinonga ticiri no mukana wo kukheta. Patinokheta kuramba murangariro jakashata, tingaramba takagondeka pikija takatendenejwa ngo vacikazivi kugondeka.

KUWINA HONDO

Zvokadi kamare, itusu tinodikana kuva no ndhungamiro yo mufambiro yakavanga. Zvinosuruvarisa ngo zvo kuti, vazinji vanopeja nguva pakutema civaringo ngo pamusoro po mavonekero avo, kusiapo kupeja nguva vecirangarira ngo pamusoro po ndhungamiro yo mufambiro. Inga muviyo, ivona vanokwanisa kujiinikira pa zviito zvavo zvo kutama kugondeka zvinozwirana no mugariro wavo. Bhuku rino musoro unoti The (Honest) Truth About Dishonesty ([Kugondeka] Cokwadi ngo Pamusoro po Kutama Kugondeka) rakazvinanga kudari: “Tinocengejera, maningi-ningi mbhera pa mutengo unotitendera kuramba tecivoneka inga vandhu vakagondeka.” Asi, kureva kuti, kuno ndhungamiro ingatibesera kutema civaringo pacedu kuti ngo papi—kudari paripo—patinotendehwa kuita ciito co kutama kugondeka here? Zvinodakajisa kuziva kuti iriyo.

Zviuru zvo vandhu pasi pese zviri kufumbhura kuti Bhaibheri rinopa besero rakaperera. Bhaibheri rino ndhungamiro yo mufambiro icikaezanisihwi no iri yese hayo. (Nduyo 19:8) Irona rinotipa ndhungamiriro inothembeka mu shwiro jakadari inga jo upenyu, mbhuri, kuitira pa basa, jo mufambiro, zve jo kumujimu. Ndhungamiro jaro jinoshanda mbhera nyamasi. Mutemo pomwe no zviambi zvaro zvinoshanda kuno vandhu vo nyika jese, vo mushovo wese, majinja ese pomwe no vandhu vese. Ngo kusota zvinonanga Bhaibheri no kuzvirangarijisisa, tingajijisa mwoyo wedu kuti uve wakagondeka zve wakarungama.

Kusiapo izvi, kuno zvizinji zvatingawina pa hondo yedu yo kuhwisana no kutama kogondeka kusiya basi kuwina kuwana zivo yo kadi yo Bhaibheri. Pa musoro pa zvese, tiri kurarama mu nyika ino mufambiro wakashatisisa inotivangirija kuti titendere ndhungamiro jayo jakavora. Ngo iyo ndava, tinodikana kuita mukumbiro kuna Mwari kuti atibesere. (VaFilipi 4:6, 7, 13) Ngo kuita kudaro, tinova no cicunge co kubatisisa zvakarungama zve tova takagondeka pa zviro zvese.

MUPOCERO NGO KUVA WAKAGONDEKA

Hitoshi wanangwaya pa musoro wo kutanga, wakava no muviyo wo kuva no zina rakanaka ngo ndava yo kuva akagondeka. Wari ari kushandira mundhu anomusimba ngo kuva kwake wakangondeka. Hitoshi wakananga kudari: “Ndinobonga maningi ngo kuti ndakakwanisa kuwana basa rinonditendera kuramba ndino hana yakacena.”

Vazinji vari kufumbhura kuti izvi ngo zvokadi. Ngativone muezaniso munganani jo vaya vakabesereka ngo kushandisa ciambi co mu Bhaibheri co “kuva vakagondeka pa zviro zvese.”

  • Hana Yakacena

    “Ndakaregera cikora pandainga no 13 o makore o kubahwa, ndoenda kooshanda no mambavha. Inga muviyo, mutengo unokwana 95 kubva mu zana wo mare yangu, ndaiiwana ngo maitiro acikazivi kugondeka. Pa kufamba ko nguva, ndakarovohwa, zve inini no mwamuna wangu takatanga kujija Bhabheri no Zvapupu zva Jehovha. Takajija kuti Jehovha * Mwari anonyenya zviito zvo kutama kugondeka, ngo kudaro takatema civaringo co kucinja mugariro wedu. (Mazwi Akangwara 6:16-19) Mu gore ro 1990 takapira upenyu hwedu kuna Jehovha tobhabhatijwa inga Zvapupu zva Jehovha.

    “Kareko, nyumba yangu yaizara ngo zviro zvokuba, asi wari uno ndakasujunuka ku zviro zvondhozvo; zve izvi zvinondisiya no hana yakacena. Ndikarangarira ngo makore andakapeja ndeciita zviito zvo kutama kugondeka, ndinobonga kuna Jehovha ngo unyasha hwake hukuru. Zvinodakajisa maningi kuvata njiku jese ndeciziva kuti Jehovha wari anodakajihwa ndini.”—Cheryl, Iriranda.

    “Patarawe wangu pavakavona kuti ndakaramba kudyekehwa kubva ku vatengi vakuru, iyena wakati kwandiri: ‘Mwari wako unokuita mundhu wakagondeka! Zvokadi kamare i makomborero kuva na iwewe pa empreza yedu.’ Kuva wakagondeka ku zviro zvese zvinondiita kuti ndive no hana yakacena kuna Jehovha Mwari. Izvi zvinonditendera kuti ndibesere mbhuri yangu zve no vamweni kuti vaite zvimwezvo.”—Sonny, Hongi Kongi.

  • Runyararo mu Murangariro

    “Ndinoshanda inga mubeseri wo mukuru wo rimwe bhanko ro nyika zinji. Pa basa iri, kugondeka nguva jese kunodihwa pa mutivi kuitira kuwana upfumi. Mavonero o vazinji ngo okuti: ‘Kutama kugondeka kwakashatira papi kudari kweciviisa upfumi no kubesera kuwana mare?’ Asi ngo kuva ndakagondeka, ndino runyararo wo mu murangariro. Ndakatema civaringo co kuramba ndakagondeka no kuhwisana no zvineso zvese zvinobudirira ngo kuva kwangu ndakadaro. Vandinoshandira vanozviziva kuti andizovanyeperi kana kuvanangira zviciripi izvona.”—Tom, Estadhos Unidhos.

  • Kujireremeja Pacedu

    “Muvonereri wangu kubasa wakandibvunja kuti ndinyepe ngo pamusoro po kungarangaka ko zviro pa basepo, asi ndakaramba. Mbavha jaiba zviro zviya pajakawanika, patarawe wangu vakandisimba ngo kuva ndakagondeka. Kugondeka mu nyika ino yakazara ngo kutama kugondeka zvinoda kucunga. Asi pakupejisira, tinova vandhu vanothembiwa no kureremejwa ngo vamweni.”—Kaori, Jhapau.

Kuva no hana yakacena, runyararo mu murangariro, kujireremeja pacedu—zvese izvi zvinokhombija kuti kuva takagondeka kuno mupocero. Amuzvitendivo here?

^ ndim. 18 Jehovha i zina ra Mwari inga zvinonangwa mu Bhaibheri.