Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

Kushanda Pamwepo Na Mwari​—Zvinoita kuti Tidakare

Kushanda Pamwepo Na Mwari​—Zvinoita kuti Tidakare

“Ngokuti tiri vabatiri va Mwari, tinomukonokeja kuti mucaaxira biresi unyaxa hwa Mwari.”2 KOR. 6:1.

NDUMBO: 75, 74

1. Pikija hazvo Jehovha ari Mukuru-kuru, anokoka vandhu kuti vaitenyi?

JEHOVHA Mukuru-kuru, Musiki wo zviro zvese, zve ano ungwaru no simba zvicikapimiki. Jobe wakaguma pa kuzviziva izvi. Jehovha paakapeja kubvunjisa Jobe ngo pamusoro po basa rake ro kusika, Jobe wakapingura kuti: ‘Ndinoziva kuti munokwanisa bzese, no kuti murangariro yenyu aidonyi [kana aikonereki].’ (Job. 42:2) Jehovha angakwanisa kuita ciri cese caangada kuti aite​—pacina anomubesera—​asi iyena anokhombija rudo ngo kukoka vamweni kuti vashande pamwepo naye kuitira kukwanirisa cidisiso cake.

2. I basa rapi rinosisira iro Jehovha raakakoka Jesu kuti aite?

2 Pakutanga Mwari wakasika Mwana wake, umwe ega wo kumujimu. Jehovha wakatendera Mwana wake kuti amubesere pa kusika zviro zvese. (Jo. 1:1-3, 18) Ngo pamusoro pa Jesu, mupostori Pauro wakatara kudari: “Ngo njio yake bziro bzese bzakaruhwa, mugore no mu nyika yo pasi, bzinovoneka no bzicikavoneki, bzinoti: Madendemaro, Masimba, Majimambo no Utongi: Bzese bzakaruhwa ndiyena, ngo njio yake. Yena anotungamirira bziro bzese; bzese bzinogwinyiswa ndiyena.” (Kol. 1:15-17) Ngo kudaro, Jehovha wakakuja  Mwana wake ngo kumubatanija mu basa ro kusika zve ngo kubvunja vamweni ngo pamusoro po basa rinosisira ro Mwana wake.

3. Jehovha wakakoka Adhamu kuti aitenyi, zve ngenyi?

3 Jehovha wakakokazve vandhu kuti vashande pamwepo naye. Inga muezaniso, iyena wakatendera kuti Adhamu adure mazina zvinyama. (Gn. 2:19, 20) Mudakaro wakadini wakava na Adhamu ngo kusotesesa zvisikwa izvi, ngo kujija mugariro wazvo, zve ngo kukheta zina ringafanera ku cinyama cimwe nga cimwe! Jehovha waizodura ega zvinyama​—ngo kuti ndiyena wakazvisika. Asi ngo rudo hwese, wakatendera kuti Adhamu adure mazina zvinyama izvi. Mwari wakapavo Adhamu mukana wokuita kuti nyika yese ive Paradhiso. (Gn. 1:27, 28) Zvinosuruvaja ngo zvo kuti, pakupejisira Adhamu wakaramba kushanda pamwepo na Mwari, zvoita kuti iyena atambujike no vana vake.​—Gn. 3:17-19, 23.

4. Vamweni vakashandisa kudini na Mwari kuitira kukwanirisa cidisiso cake?

4 Pakufamba ko nguva, Mwari wakakoka vandhu vamweni kuti vabatikane mu kuitwa ko cidisiso cake. Nowa wakavaka arka kuti apone no mbhuri yake pa ndambi yo nyika yese. Mosi wakaponesa jinja ro Iziraeri kubva ku Ejipita. Joshuwa wakatungamirira jinja ro Iziraeri kuti ringhwine mu nyika yakagondiswa. Soromona wakavaka temberi mu Jerusarema. Maria wakava mai wa Jesu. Vagondeki vese ava no vamweni vazinji vakashanda pamwepo na Jehovha kuitira kukwanirisa cidisiso cake.

5. Tingabatikana mu basa rapi, zve Jehovha wainga ano dikano yo kutibatanijavo here? (Vonanyi pikica yo kutanga.)

5 Nyamasi uno, Jehovha anotikoka kuti tibesere zvakaperera Umambo hwo Umesia. Pano mukana jakawanda jingatiita kuti tishandire Mwari. Jimweni jakona, kangaije ajingawaniki hajo ngo maKristu ese, asi tese hedu tingabatikana mu basa ro kucumaira masoko akanaka o Umambo. Ngo zvokadi kuti, Jehovha waizokwanisa kuita ega basa iri. Iyena waizokheta kuvereketa no vandhu vo pasi pano ari mugore kamare. Jesu wakananga kuti Jehovha waizokwanisa pikija kuita kuti mapuwe abvunje vamweni ngo pamusoro po Umambo hwo Umesia. (Lc. 19:37-40) Asi, Jehovha wakatitendera kuti tive ‘vabeseri vake.’ (1 Kor. 3:9) Mupostori Pauro wakatara kudari: ‘Inga zvatinoshanda pamwepo naye, tinomudeketereranyi kuti muregere kuashira unyasha ucikafaneri wa Mwari mokonehwa kuzwisisa cinangwa cawo.’ (2 Kor. 6:1, Shanduro yeNyika Itsva) Kushanda pamwepo na Mwari, i rukujo rucikatifaneri rinotiita kuti tidakare. Ngativonenyi mathangwe amweni anokhombija zvondhozvo.

KUSHANDA NA MWARI ZVINOTIDAKAJISA

6. Mwana wo dangwe wa Mwari wakasanangurisa kudini mazwire ake ngo pamusoro po kushanda pa divi ra Baba vake?

6 Kubvira pa nguva jo kutanga, vashandiri va Jehovha vari kuwana mudakaro mu kushanda na Mwari. Mwana wo dangwe wa Mwari wo kumujimu, uwo anoimirira inga uzivi wo kuezanisira, wakati: ‘Jehovha wakandisika kuti ndiwanikepo inga kutanga ko njira yake . . . Ndaiva pa divi rake ndiri mujijisi wo mabasa, ndakava mundhu waaida kamare njiku ngo njiku, inini ndaidakara pamberi pake nguva jese.’ (Mazwi 8:22, 30, Shanduro yeNyika Isva) Jesu paaishanda na Baba vake, iyena waidakara ngo kuti waikwanirisa zviro zvizinji zve waiziva kuti Jehovha waimuda. Asi zvakadinivo kwatiri?

I basa rapi rinodakajisa romaizoita rinopinda ro kujijisa mundhu cokwadi? (Vonanyi ndima 7)

7. Ngenyi basa ro kuita vajiji rinotiviisira mudakaro?

7 Jesu wakananga kuti kuno mudakaro mu kupa no kuashira. (Mait. 20:35) Zvinotiviisira mudakaro kuashira cokwadi, zve zvinotiviisira mudakaro kukovana cokwadi no vamweni. Inga zvatinokovana cokwadi co Bhaibheri no vamweni, itusu tinovona vanonjara yo kumujimu vecidakara maningi paya pavanotanga  kuzwisisa no kudakarira Mwari wedu zve pavanodakarira cokwadi ciri mu Soko rake. Izvi zvinobaya mwoyo wedu patinovavona veciita cinjo mu kurangarira zve mu mararamire avo. Itusu tinozwisisa kuti basa ro kucumaira masoko akanaka rinosisira maningi. Izvi zvinofunungura gwanja ro upenyu ucikaperi kuna vaya vanojidira pasi pa Mwari. (2 Kor. 5:20) I basa rapi rakanaka zve rino mudakaro mukuru rataizoita, ringapinda ro kubesera vandhu kuti vave no jijiso icazovaita kuti vararame no kucikaperi?

8. Ngo zvapi zvakananga vamweni ngo pamusoro po mudakaro wo kushanda na Jehovha?

8 Patinobesera vamweni kujija ngo pamusoro pa Mwari, tinoziva kuti tiri kudakajisa Jehovha zve tinoziva kuti iyena anodakarira kuvangisira kwatinoita pa kumushandira. (Verenganyi 1 VaKorinto 15:58.) Marko , anogara ku Itaria anoti: “Ndino mudakaro mukuru maningi ngo kuziva kuti ndiri kupekeja Jehovha zvandinokwanisa, haiwa mundhu, uwo waizokasika kukanganwa zvandinonga ndaita.” Mukufanana, Franko , uwo anoshandavo ku Itaria, anoti: “Ecishandisa soko rake no zvinodiwa zvo kumujimu, Jehovha anoticeukija njiku ngo njiku kuti anotida, zve zvese zvatinomuitira zvinosisira, pikija hazvo kuvangisira kwedu kangaije tingakuvona inga kucikashandi. Ngo iyo ndava, kushanda pamwepo na Mwari zvinondiviisira mudakaro zve upenyu uno cinangwa.”

KUSHANDA NA MWARI KUNOTIKHWEDEJA PHEDO NAYE ZVE NO VAMWENI

9. Ushamwari hwapi huna Jehovha na Jesu, zve ngenyi?

9 Patinoshanda pamwepo no vaya vatinoda, itusu tinokhwedera phedo navo, toguma pa kuziva undhu hwavo zve mugariro javo. Itusu tinojija zvidisiso zvavo zve tinojija kuti vanoitisa kudini kuti vazvikwanirise. Jesu wakashanda pamwepo na Jehovha, kangaije ko mabhiriyoni o makore, rudo hwavo umwe kuno umweni hwakava hwakavanga zvokuti apana caizoparajanisa ushamwari hwavo. Ecisanangura ngo pamusoro po ushamwari hwavo hwo phedo, Jesu wakati: “Inini na Baba wangu tiri umwe basi.” (Jo. 10:30) Ivona vano rubatano hunodakajisa, zve nguva jese vanoshanda pamwepo vakanasa kubatana.

10. Kucumaira kunotikhwedejesa kudini phedo na Mwari pomwe no vamweni?

10 Paaita mukumbiro, Jesu wakakumbira Jehovha kuti ajivirire vajiji vake. Ngenyi wakaita kudaro? Iyena wakakumbira kudari: ‘Kuti vave ciro cimwe inga ndisu.’ (Jo. 17:11) Patinorarama tecishandisa ndhungamiriro ja Mwari pomwe no kukovana mu basa ro kucumaira, itusu tinoguma pa kuzwisisa mugariro jake jinoshamaisa. Tinojija kuti ngenyi uri ungwaru kumugonda zve kutevejera ndhungamiriro jake. Inga zvatinokhwedera phedo na Mwari, iyena anokhwederavo phedo na itusu. (Verenganyi Jakobo 4:8.) Itusu tinokhwederavo phedo no hama no hambzaji jedu jo kumujimu ngo kuti tinosotana no zvineso zvakafanana, mudakaro wakafanana, zve ngo kuti tino zvidisiso zvimwezvo. Hina, itusu tinoshanda pamwepo, tinodakara pamwepo, zve tinocungirira  pamwepo. Octavia , anogara ku Briteni, anoti: “Kushanda pamwepo na Jehovha kunondikhwedeja phedo no vamweni, ngo kuti ushamwari pomwe no ukama hwangu, aucacijikiri pa kuzivana hako basi, asi wakacijikira pa cidisiso no cinangwa cimwe basi.” Imwimwi muri kuvavo no mazwire amwewo here? Imwimwi amukhwederi phedo no vamweni paya pamunovona kuvangisira kwavanoita kuti vadakajise Jehovha here?

11. Ngenyi tingananga kuti tinozonasa kukhwedera phedo na Jehovha pomwe no hama jedu mu nyika imbza?

11 Rudo hwedu na Mwari pomwe no hama jedu hwakavanga wari uno, asi unozonasa kuvanga mu nyika imbza inozova no urungami. Amborangariranyi basi ngo pamusoro po basa riri kumbeji kwedu! Tinozoashira vaya vanozomuswa no kuvajijisa ngo pamusoro pa Jehovha. Tinozoita kuti nyika ive paradhiso. Aya asipi mabasa akareruka, asi tinozova no kudakara kukuru ngo kushanda pamwepo zve kuita kuti kutonga ko Umambo hwo Umesia kuve kwakakwana. Vandhu vese vanozonasa kukhwedererana phedo umwe kuno umweni zve vanozonasa kukhwedera phedo na Jehovha, uwo anozonasa kamare ‘kugutisa bzese bzinorarama.’​—Ndu. 145:16.

KUSHANDA NA MWARI KUNOJIVIRIRA

12. Basa ro kucumaira rinoshandisa kudini inga jiviriro?

12 Itusu tinoda kujivirira umujimu hwedu. Ngo kuti tiri kurarama mu nyika iri kutongwa ndi Sathana Dhiabhu zve ngo kuti itusu atizivi kukwana, zvakareruka kuvavo no murangariro pomwe no muitiro jakashata jinoitwa ngo nyika. Mujimu wo nyika ungafananijwa no kusambira mu murambo uno kumwa inotiendesa ku divi raticikadi kwenda. Kuti ticathwahwa, tinodikana kuvangisira kusambira tecienda ku divi rimweni. Mukufanana, tinodikana kuvangisira kuti ticathwahwa ngo mujimu wo nyika ya Sathana. Patinonga tecicumaira vamweni, tinosotesesa pa shwiro jo kumujimu jinosisira zve jinobesera, haiwa pa murangariro jinozorembesa kutenda kwedu. (Fil. 4:8) Kucumaira kunovangisa gonda redu, kunotirangarija zvigondiso zva Mwari zve ndhungamiriro jake jo rudo. Zve kunotibeserazve pa kuramba tino zvibvikiro zvedu zvo kumujimu.​—Verenganyi VaEfeso 6:14-17.

13. Cimwe capupu co ku Austraria cakava no mazwire api ngo pamusoro po kucumaira, zve imwimwi munodikana kuva no mazwire api ngo pamusoro pazvo?

13 Kudari tikaramba takabatikana mu basa ro kucumaira pomwe no mabasa amweni o kumujimu, itusu atiwani nguva yo kuneseka maningi ngo pamusoro po zvineso zvedu pacedu, zve izvi zvinobesera pa kutijivirira. Joel, anogara ku Autraria, anoti: “Basa ro kucumaira rinondibesera kuti ndicapauka mu cokwadi. Rinondirangarija zvineso zvinosotana no vandhu zve rinondirangarija besero randinowana ngo kushandisa zviambi zvo mu Bhaibheri mu upenyu hwangu. Basa ro kucumaira rinondibesera kuti ndieje kuramba ndecijidodokesa, izvi zvinondipa mukana wo kuthemba Jehovha zve kuthemba hama no hambzaji jangu.”

14. Ngenyi kucungirira kwedu mu kucumaira kunokhombija kuti mujimu wa Mwari una itusu?

14 Basa ro kucumaira rinotiitavo kuti tinase kuthemba kuti mujimu wa Mwari una itusu. Mukuezanisira: Ngatimboti makapuwa basa ro kupekeja vandhu vo mundharaundha menyu pau. Amupocehwi ngo basa iri, zve munozviita ngo mare yenyu kamare. Kusiapo izvi, ngo kukasika moziva kuti vandhu vazinji avaripi kudakarira pau jamunovapaya, zve vamweni vari kutomuzonda ngo kuvaviisira kwamunoita pau iji. Maizopeja nguva yakadini mecienderera mberi mukuita basa iri? Ngo kukasika kamare, imwimwi maizozwa mucina simba ro kuzviita, zve kangaije maizozviregera. Asi, vazinji  vedu tinoramba teciita basa ro kucumaira gore ngo gore, pikija hazvo basa iri recitipejera nguva no mare yedu zve pikija vandhu vecitirerusa kana kutinyangajisa. Izvi azvikhombiji kuti mujimu wa Mwari uri kushanda nesu here?

KUSHANDA NA MWARI KUNOVONESA RUDO HWEDU KWAARI ZVE KUNO VAMWENI

15. Kucumaira masoko akanaka kunozwirana kudini no cidisiso ca Mwari ku vandhu?

15 Amborangariranyi basi kuti kucumaira masoko akanaka kunozwirana kudini no cidisiso ca Jehovha co rudo ku mushovo wese wo vandhu. Iyena wainga ano cidisiso co kuti vandhu vararame pa nyika vacikafi, zve Jehovha aazivi kucinja murangariro wake ngo kushaisha kwakaita Adhamu. (Is. 55:11) Kusiapo izvi, iyena wakaita nasiriro yo kuti vandhu vaponeswe kubva mu mugariro wo cishaishi no rufu. Mukuzwirana no cidisiso ici, Jesu wakaviya pasi zve wakapira upenyu hwake kuitira vandhu vanozwira. Asi kuti vave vanozwira, vanodikana kuzwisisa kuti Mwari anodenyi kwavari. Ngo kudaro, Jesu wakajijisavo vandhu ngo pamusoro po zvinoda Mwari kwavari, zve wakapangira vajiji vake kuti vaitevo zvondhozvo. Patinobesera vamweni kuti vagume pa kuva shamwari ja Mwari, itusu tinonga tecibatikana kamare mu nasiriro yake yo rudo yo kuitira kuponesa vandhu ku cishaishi no rufu.

16. Basa redu ro kucumaira rinobatana kudini no mupango mukuru wa Mwari?

16 Kubesera vamweni kuti vawane gwanja ro upenyu ucikaperi, kunokhombija kuti tino rudo no vadoni vedu zve na Jehovha, uwo anoda kuti “vandhu vese vaponeswe, no kukwanisa kuziva bzokadi.” (1 Tim. 2:4) Vafarisi pavakamubvunjisa kuti ngo wapi wainga mupango mukuru pa mupango jese jakapuwa jinja ro Iziraeri, Jesu wakavapingura kudari: “‘Unozodisa [Jehovha] Mwari wako, ngo mwoyo wako wese, ngo mwiha wako wese, ngo hwiru hwako hwese.’ Uu ngo mupango mukuru no wokutungamira. Wocipiri wakatojana na uu: ‘Unozodisa mudoni wako no madisiro o unojiita iwewe.’” (Mt. 22:37-39) Ngo kukovana mu basa ro kucumaira, itusu tinonga tecikhombija kuti tiri kuzwira mupango iji.​—Verenganyi Maitiro o Vapostori 10:42.

17. Mazwiro api amunawo ngo pamusoro po rukujo wo kucumaira masoko akanaka?

17 Kukomborehwa kwakadini kwatinako! Jehovha wakatipa basa rinotiviisira mudakaro, rinotiita kuti tikhwedere phedo naye pomwe no vamweni, zve rinotijivirira kumujimu. Irona rinotipa mukana wo kukhombija rudo hwedu kuna Mwari zve ku vadoni vedu. Jehovha ano mamiriyoni o vashandiri mu nyika yese, zve vese vano mugariro jakasiyana. Asi azvinenyi kuti tingava wocidoko kana musharuka, kana kuti tingava wakapfuma kana murombo, kana kuti tingava wakavanga kana wakaremba, tese hedu tingakovana kutenda kwedu no vamweni. Kangaije imwimwi mungatenderana na Chantel, anogara ku Fransa. Iyena anoti: “Mundhu ano simba maningi kutenderera nyika yese, Musiki wo zviro zvese, Mwari anodakara, anoti kwandiri: ‘Endai! Vereketai! Vereketai pa ndau pangu, vereketai zvecibva pamwoyo. Ndinokupa simba rangu, Soko rangu Bhaibheri, besero yo mugore, vadoni vo pasi, jijiso inoenderera mberi, zve ndhungamiriro jo kadi pa nguva yakafanira.’ Cidakajiso cakakura zvakadini ici, co kuita zvatinokumbihwa ndi Jehovha zve kushanda pamwepo na naye!”