Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 MUSORO WO REVHISTA | PANOFA MUNDHU ANODIWA

Kuhwisana no Kusuruvara Kwenyu

Kuhwisana no Kusuruvara Kwenyu

Kuno ngwajo zinji maningi ngo pamusoro po masoko aya. Pikija zvakadaro, asipi jese jinobesera. Inga muezaniso, munozovona kuti masoko amweni ano mungwaja kuti mutame kucema kana kuvonesa mazwiro enyu mu njira iri yese. Ngwajo jimweni jingamundundira kuti muceme no kubudisa mazwiro enyu ese. Bhaibheri rinopa mavonero akaezanana, anobesehwa ngo kupsakisisa ko mazuva ano.

Mu maponero amweni zvinonangwa kuti mwanarume aabviri kucema. Asi, zvokadi kamare tinodikana kuva no mazwiro o kunyoejeka ngo pamusoro po kuririra, pikija tiri pakawanda vandhu here? Vajiji vo zvo uhomi wo mu musoro vanoziva kuti kurembejeka kunoita divi ro kusuruvara. Zve pakufamba ko nguva, kusuruvara ngo ndava yo kufihwa kungamubesera kwenderera mberi, pikija makaruza mundhu wamaida maningi. Asi, kuviga mazwiro okusuruvara, kazinji kungakhuvaza. Bhaibheri rinotitondhoja no kubesera pa hwiru hwakashata uu kana pa zviro zviciripi zvo cibharihwe kuti mucinje kumbhweja musoji uku pomwe no kusuruvara. Rangariranyi, muezaniso wa Jesu. Pikija Jesu wainga no simba ro kuhwirija Razaro ku upenyu, iyena wakarira pambhene kamare pa kufa ko shamwari yake inodiwa!—Johani 11:33-35.

 Kuva no ushungu kazinji kunotora rutivi wo kusuruvara ngo kufihwa, maningi-ningi kudari rufuhwo wakaitika ngo cibvumbu. Pano zvizinji zvokuti ngenyi mundhu wafihwa anganeseka, kudari inga kunanga magama acikashandi zve acina shwiro ngo pamusoro po mundhu. Mwanarume umweni waidanijwa Mike wo ku Afrika dhu Suri wakasanangura kudari: “Ndainga no 14 o makore basi apo baba wangu vakafa. Pa njaumba, mutungamiriri wo ciara Angrikana wakananga kuti Mwari anoda vandhu vakanaka zve anovatora sedo. * Izvi zvakandinyangaja maningi ngo kuti itusu taivada maningi baba wedu. Wari zvina makore 63 nozvaitika asi zviri kundihwaja.”

I cinyi mazwiro o kuzviha mwoyo? Maningi-ningi kufu kungaitika pamukuvo wo kuti akucaivetehwepi, kuhwajihwa ko mundhu uhu kangaije angakurangarira kakawanda, ‘azvicaibvira kuitika kudari basi inini ndaita izvi kana kuita izvo.’ Kana nguva jimweni pakupejisira kuwana pamwepo zvizinji ngo pamusoro pa nyakufa. Kangaije izvi zvingaengejera mazwiro o kuzviha mwoyo.

Kudari matanga kuneseka ngo mazwiro o kuzviha mwoyo akadari no o ushungu, zvinosisira maningi kutama kuzvifungira mu mazwiro awo. Zvokadi kamare, kubhuya no shamwari inomupurukira no kugonda kwese mucazvivona inga kuti ano mazwiro acikazivi kurangarihwa ushoni ngokuti zvinoitika no vazinji vanofihwa ngo ari wese. Bhaibheri rinoticeuja parinoti: “Xamwari inokuda mu mukuvo wese; yakabahwa kuti iite hama pa bonezi.”—Mazwi Akangwara 17:17.

Angakwanisa kuva shamwari yakapinda kunaka pa ciriro co mundhu ndi Musiki wedu, Jehovha Mwari. Munodikana kubvisa mazwiro enyu mu mwoyo ngo mukumbiro ngokuti “yena anozomukorondha.” (1 Pedru 5:7) Kunja kwa izvi, iyena ari kugondesa kuti vese vaya vanoita kudaro vanozova no murangariro no mazwiro akathiva ngo ndava yo “rugarisiko hwa Mwari hunopinda uzivi hwese.” (VaFilipi 4:6, 7) Ngo kudarovo, tenderanyi kuti Mwari abese kumurapa ngo kushandisa uembejeri unobva mu Soko rake, Bhaibheri. Vonanyi nda-nda-nda yo tsamba jinoembejera. (Vonanyi bhokiso.) Imwimwi kangaije mungakwanisa kuzvirangarira padoko. Kudari mawana murangariro kuti murangarijisise maningi-ningi zvingamubesera co usiku nguva yo kuti muri mwega zve muri kunesehwa kuwana hope.—Isaia 57:15.

Sambi sambi uno, umwe mwanarume waamukuru ana makore 40, iyena waidanijwa Jack wakaruza mukaji wake anodiwa ngo kuti wainga no kanceri. Jack wakananga kuti pa nguva jimweni ndinova no mazwiro o ushongwe hukuru kamare. Asi iyena anoita mukumbiro kuitira kujibesera. Iyena wakati: “Pandinokumbira Jehovha andijizwi ndega.” Kazinji ndinomuka pakati po usiku zve anditokwanise kuvata. Pakupera kuverenga no kurangarijisisa pa murangariro unoembezera kubva mu Matahwa perepo ndovonesa mazwiro ari mu mwoyo wangu ngo mukumbiro, ndinojizwa ndakapfava zve ndinova no runyararo kupinda wandainga nawo, ndodira mu murangariro wangu no mu mwoyo zve ndinokwanisa kuvata.

Umwe musikane waidanijwa Vhanessa wakaruza mai wake ngo kuhwaja. Iyena wakakwanisa kuvona simba ro mukumbiro. Iyena wakati: “Yakava nguva inonesa maningi kwandiri, yainga nguva yo kudanija zina ra Mwari basi no kupeja musoji jangu. Jehovha wakazwa mukumbiro wangu zve mazuva ese wakandipa simba randaida.”

Vapangiri vamweni vo zvo ciriro vanonanga kuti vaya vari kuhwisana no kusuruvara ngo kufihwa vangajipira mu mabasa amweni o kubesera vamweni mundharaundha. Kuita kudaro kungaviisa mudakaro no kurerukihwa ku mundhu wakasuruvaraya. (Maitiro o Vapostori 20:35) Uzinji hwo maKristu ari pa ciriro vanoshanda pa kubesera vamweni kuti vawane kuembejehwa kukuru.—2 VaKorinto 1:3, 4.

^ ndim. 5 Izvi andizvopi zvinojijiswa ngo Bhaibheri. Bhaibheri rinokhombija mathangwe matatu anoitisa kuti kuve no kufa.—Mucumaeri 9:11; Johani 8:44; VaRoma 5:12.